يَوْمِيَات وَلَد مَصْري

الخميس، سبتمبر 25، 2008

كلام في السياسة

في فيلم سيدة القصر كان فيه مشهد ما بين فردوس محمد واستيفان روستي وقد قام الاخير بطلب يدها للرقص:

- تسمحي لي بالرقصة دي يا مدام
- ماترقص يا خويا هوه حد حايشك
- طب عن اذنك اروح اتحزم وآجي أرقص

مش عارف ليه المشهد ده فكرني باللي بتعمله الحكومة مع الشعب .. يعني تلقيهم يخترعوا قانون ما يعلم بيه الا ربنا ويحاولوا يقنعوا الشعب إن القانون ده في مصلحته ، وبعدين لما مايلقوش حد من الشعب اعترض يروحوا مصدقين نفسهم، ومش بس كده لأ وإيه ويعملوا عليه حملة إعلانات ، ولا بتاعة شركات الصابون والبيبسي.

ده تحديدا اللي حصل مع قانون الضرائب الجديد بتاع العقارات ومن قبله كان قانون الضرائب التجاري والله أعلم إيه اللي هيعملوه بعد كده .. المهم إنهم نجحوا (لأول مرة في حياتهم) إنهم يخلوا الواحد يكره يتفرج على الإعلانات مع إنها كانت الملاذ الوحيد للشعب من باب "اللي ما يشتري يتفرج" .

التسميات:

posted by ولد مصري at 15:50 64 comments

الأحد، سبتمبر 21، 2008

المصريين في العمرة 2

نوادر المصريين في العمرة مابتنتهيش ومحتاجة كتاب كامل علشان يكفي الكلام عنها والحقيقة إن النوادر دي بتيجي بصورة عفوية يعني من غير ما يقصدوا لكنها بتحمل في طياتها من الكوارث ما لا عين رأت ولا أذن سمعت.

يعني مثلا في أحد مواسم الحج وفي اليوم الثاني من رمي الجمرات وبعد ما رميت الجمرة الوسطى، وقفت للدعاء، ولسه يا دوب بارفع إيدي وبتوجه بقلبي لله سبحانه وتعالى، لقيت واحد جاي يسألني ويقولي:

هو الشيطان التالت فين؟

سألته باستغراب شديد: الشيطان التالت؟ تقصد ايه؟
رد عليا باستغراب أكتر: هوه احنا مش رجمنا شيطانين لحد دلوقتي؟ فاضل شيطان .. أروح له إزاي (طبعا دي أول مرة أشوف واحد عاوز يروح للشيطان برجليه)
شاورت له على الشاهد بتاع العقبة الكبرى وقلت له:

شايف العمود اللي هناك ده .. هتلاقي الشيطان التالت واقف عنده!!

وقصة تانيه في أحد العمرات كان فيه راجل وزوجته بيطوفوا وطبعا كان الرجل هوه اللي بيقود المسيرة وماسك في إيده كتيبات وأوراق زي ما يكون هيحضر ماجستير في الطواف وطبعا كان عمال يقرأ من كتيب الأدعية والزوجة بتردد وراه:

الزوج: اللهم أوردنا حوض نبيك
الزوجة اللهم أوردنا حوض نبيك
الزوج: صلى الله عليه وسلم
الزوجة: صلى الله عليه وسلم
الزوج: وارزقنا من يده الشريفة
الزوجة: وارزقنا من يده الشريفه
الزوج: شوربه
الزوجة: شوربة؟ شوربة إيه يا راجل؟
الزوج: مكتوب كده يا وليه
الزوجه: خلاص شوربه شوبه!!
الزوج: شوربه لا نظمأ بعدها أبدا
الزوجة: شوربة لا نظمأ بعدها أبدا

المهم في الموضوع إن الزوجة خدت بالها إن الكلام مش راكب على بعضه، لكن الزوج أصر على صحة كلامه .. وفي النهاية .... كلام الزوج هوه اللي مشي.


بالهنا والشفا .. ربنا يتقبل .. ونتقابل في يوم جديد بإذن الله

التسميات:

posted by ولد مصري at 15:35 32 comments

الأربعاء، سبتمبر 17، 2008

المصريين في العمرة

في شهر رمضان ناس كتير بتحب تعمل عمرة, لانها زي ما الرسول صلى الله عليه وسلم أخبر إنها بتعادل حجة وعلشان كده بتلاقي المسلمين بيأتوا من كل فج عميق ويتطوفوا بالبيت العتيق.

طبعا من أكبر الأفواج اللي بتيجي أفواج جماعتنا المصريين اللي بيشرفونا في كل مكان، ولو إنت قاعد في الحرم اول ما فوج المصريين بيدخل على الكعبة, تلاقي السلطات السعودية رفعت درجة الاستعداد الي الدرجة القصوى وده لأن جماعتنا لما بيهجموا على الحرم بتحس إنهم ماشيين في مظاهرة أو داخلين يفتتحوا القدس وتلاقي دايما في واحد متزعم المظاهرة دي وعمال يهتف والكل بيهتف وراه :

الزعيم: ربنا
المظاهرة: ربنا
الزعيم: إغفر لنا
المظاهرة: إغفر لنا
الزعيم: إرحمنا
المظاهرة: إرحمنا

وهكذا لغاية السبع أشواط لما يخلصوا وبعدين يصلوا ركعتين عند مقام ابراهيم وطيران على الصفا والمروة علشان يكملوا المسيرة هناك.

وطبعا تبقى عمرتك مش فايته لو وقع حظك في فوج من أفواج المصريين دي وانت بتطوف ولا بتسعى لانك غصبا عنك هتلاقيك اتخدت في الرجلين ومش هتعرف تقول دعوتين على بعض وده طبعا غير كمان الكام بوكس على لكمية ويمكن شلوت اللي هيكونوا من نصيبك وانت بتطوف جنبهم.

اللي بيبقى صعبان عليا في الموضوع كله إخوانا بتوع ماليزيا واندونيسيا بيبقوا ياحرام ماشيين زي الملايكة ماتسمعلهمش حس خالص وطبعا مع هجوم التتار اقصد جماعتنا المصريين بتلاقيهم يضطروا ينزحوا من جنب الكعبة علشان يطوفوا من بره خالص منعا للسفلته اللي ممكن تحدث من القطار المجري اللي بيمثل مصر ولابس إحرام.

كل ده لحد دلوقتي مافيهوش مشلكة!!

المشكلة الكبيرة بتكون في الجهل اللي عند بعض الناس وده غصبا عنك بتسمعه وانت بتطوف او بتسعى، فدي مثلا أم وبنتها واقفين قدام الكعبة دار ما بينهم الحوار التالي:

الأم: يا سلام .. اللهم صلي على النبي .. ايه الجمال ده (لحد دلوقتي مافيش مشكلة)
البنت: اللهم صلي وسلم علي النبي
الأم: هوه ده يا بنتي قبر سيدنا النبي
أنا (في سري): ابتدينا نخطرف
البنت: لأ طبعا .. قبر النبي ايه يا ماما بس .. قبر النبي ده هناك في المدينة
أنا (في سري): الحمد لله .. ربنا يكملك بعقلك
الأم: أمال ده قبر مين؟
أنا (برضه في سري): يا مثبت العقل والدين يا رب
البنت: ده قبر ربنا
أنا (بصوت عالي): لا حول ولا قوة إلا بالله .. أستغفر الله العظيم .. أستغفر الله العظيم .. يا حاجة إنتي وهيه ربنا حي لا يموت .. ده مش قبر حد .. دي الكعبة يا حاجة الكعبة الشريفة

الأم والبنت يمصمصوا شفايفهم ويعوجوا بقهم عوجه مفادها ربنا يشفيك .. ويروحوا يطوفوا ..... عند القبر!!

وان شاء الله نتقابل في يوم جديد

التسميات:

posted by ولد مصري at 11:29 34 comments

الأحد، سبتمبر 14، 2008

التاج صابني ورب العرش نجاني

أعلن مصدر غير مسئول بوزارة الداخلية عن قيام إثنان من تنظيم الكعكة بإلقاء طلقات آثمة على المدعو ولد مصري وذلك إثر مروره على مدونة برينسيس غروب الشمس ومدونة بيربل ويفز وقد أدى إطلاق الرصاص إلى إصابة المجني عليه بتاج في الرأس مع إحتمال لفقده أعز ما يملك وهو ...... أعصابه !!
................................................................
1- بدأت تدون إمتى ودخلت عالم التدوين إزاي؟؟
بدأت التدوين من ست شهور يعني في مصطلح الأطفال لسه بحبي وممكن آكل رز وبطاطس مسلوقة.

أما بقى بدأت إزاي فده موضوع طويل .. شوف يا سيدي
بقى أنا كنت راجل شريف آكل يوم وأجوع يوم واللقمة أكلها من عرق جبيني وبعدين في يوم من الأيام اتكعبلت كده في مدونة العزيزة دكتورة جنة واللي كان إسمها همسات مصرية قبل ما تخصخصها وتسميها لولاكي يا جارتي وقوم هيه (دكتورة جنة يعني مش المدونة) كانت منزلة بوست جامد عن الزوجة التانية اللي بالمناسبة أعادت إنتاجه وتوزيعه في مدونتها الجديدة والحقيقة انا علقت عندها تعليق طويل حبتين وتوفوجؤت إنها منزلاه عندها في بوست جديد وقالت إن ده كان تعليق من شخص ما .. كنت ساعتها مسمي نفسي الحاج متولي (حد عنده مانع) وبعدين قوم جنة قالتلي إيه رأيك إنك تدون .. دي حاجة ظريفة خالص .. قلت أجرب وماله .. عنها وراحت معرفاني عندها في همسات مصرية .. ومن يومها دخلت الكار ده ومن ساعتها وانا مش قادر اتوب .. الله يسامحها بقى.

2- إيه كان إنطباعك في البداية ؟
حسيت بشكة دبوس .. إيه الأسئلة الغريبة دي .. على أي حال كان عندي شعور أكتر من رائع إني أكتب وكلامي فيه ناس بتقرأه وطبعا كالعاده في الأول ماكنش فيه غيري أنا والدكتورة جنه هيه تنزل بوست أنا اعلق عليه ولما أنا أنزل بوست هيه تعلق عليه .. حاجة كده زي البنج بونج (نعم يا سيدي إنت وهيه على الأقل كان فيه حد بيعبرني مش أحسن من إن مافيش ولا نملة تعلق ولا الدنيا تندع بشر زي ما أفراد العصابة قالوا)

3- مين أكتر حد بتحب تعليقه على بوستك الجديد؟
إنت يا سيدي .. إرتحت .. يا باي .. أسئلة عجيبة .. يعني عايز ايه بالظبط .. عاوزني أقول فلان الفلاني علشان الباقيين يزعلوا ويقولوا اشمعنى .. لأ يا سيدي مش قايل .. هه .. وطبعا هعمل زي ما كل الناس بيعملوا وهخليني جانتييه ودبلوماسي وكلك ذوق يا مضروب وهقول " أنا أهم حاجه عندي حب الناس ليا مش مهم رأي النقاد مش مهم رأي الجمهور مش مهم رأي أي حد أهم حاجة حب الناس والحمد لله الحمد لله إن ربنا وفقني واداني الحب الكبير ده اللي بيخليني أجتهد في كل أعمالي وأبقى فرجه لكل الناس"


4- إيه أهم حاجه إتعلمتها من التدوين؟
فك الخط .. انا ما بهزرش .. فيه بعض البوستات بتبقى محتاجة رموز حجر رشيد علشان تفهمها وبعد ما تقرأ البوست مرتين تلاته ربنا يكرمك وتفهم الكاتب قصده إيه وعلى فكره انا واحد من الكتاب دول.

5- حاسس إن التدوين ليه تأثير؟
أنا شايف إن ممكن يكون له تأثير أكثر بكثير من الحالي وخصوصا لو المدونين إجتمعوا على فكرة واحدة وتناولوها بأكثر من زاوية أكيد ده هيكون تأثيره أقوى وأوضح.

6- أذكر 5 أحلام على الأقل تخص ماضيك وتحلم فيها بتغيير أشياء ماذا ستعدل وماذا ستترك؟
أهو ده سؤال صعب .. الحقيقة معتقدش إني ندمان على حاجة أكتر من الوقت اللي بيضيع قدامي من غير ما أستفيد منه في طاعة ربنا .. كمان كان نفسي أستفيد من وجود والدي رحمه الله أكتر لأن بعد وفاته حسيت إني محتاج أستشيره في حاجات كتيرة قوي ومحتاج رأيه في قرارات لازم أخدها.. وطبعا الوقت اللي قضيته في الغربه بعيد عن والدتي الله يرحمها لأن بعد وفاتها حسيت إن فيه حنفية دعاء اتقفلت وللأسف مش هتتفتح تاني .. وأخيرا كان نفسي أبقى أهلاوي علشان أوفر حرقة الدم بتاعة كل ماتش للزمالك.

7- أذكر 5 أحلام على الأقل تخص مستقبلك؟
إني أدخل الجنة واكون برفقة النبي صلى الله عليه وسلم ولو إني ما بعملش حاجة تستاهل الكلام ده لكن كلامه صلى الله عليه وسلم "المرء مع من أحب" بيديني أمل.
وكمان نفسي أسعد زوجتي وأربي بناتي تربية حسنة وأعينهم على دخول الجنة.
نفسي ابطل "دفاشة ولجافة" (مش عارف معناهم) بس عاوز اقول مابقاش مدب علشان محدش يزعل مني.


8- أذكر شخصين على الأقل متواجدين في حياتك حاليا كنت تود وجودهم قبل الآن بزمن؟
الشخص الأول هو كل إنسان بيقرأ الكلام المكتوب دلوقتي
الشخص التاني مش هقدر أقول على إسمه ..

9- أذكر شخصين على الأقل غير متواجدين في حياتك حاليا كنت تود وجودهم الآن أو في حياة أولادك مستقبلا؟
عابد وداود .. فارسان لنصرة الإسلام

10- على من تطلق الرصاص؟
الواحد محتاج مدفع رشاش:
دكتورة جنة
العزيزة روفي
باشمهندسة أمل
إلى الأبد ساموراي
المتغاظة همس
أم أحمد وحنين شيماء
المغتربة أكون او لا أكون
الصديقة الجديدة نونا
الصديقة الجديدة كناري
المفروسة زهرة
الباشا علاء عواد
دكتور بوبوس الأصيل

يا رب ما اكون نسيت حد

التسميات:

posted by ولد مصري at 15:19 36 comments

الثلاثاء، سبتمبر 09، 2008

أهالي الدويقة .. آسف أنا قتلتكم

نعم أنا قتلتكم
بسكين الفقر طعنتكم
قتلتكم
بصخور دكت دنياكم
تحت الانقاض
كانت النهاية
بكيتكم
بدموع التماسيح
وتركتكم
تحت التراب
فلتحولوا اوراقي للمفتي
نعم أنا مذنب
أو ليس الاعتراف
سيد الأدلة
فها هي ذي
إعترافاتي
أدونها لكم
ولتحاكموني
أنا المصري

التسميات:

posted by ولد مصري at 14:58 29 comments