يَوْمِيَات وَلَد مَصْري

الخميس، يوليو 24، 2008

أنا والعشق والهوا

يا سائلا عني الهوا جئت
ألبي داعي الهوا لما دعاني
فأنا لا أرفض للهوا سئلا
حتى إذا دعوت الهوا لباني
شربت كأس السهد مرارا وكلما
جئت الهوا ظمأنا سقاني
ظننت العشق والهوا كُلاً يذهبا
فأمسى العشق مجيبا وبات التضاني
قمت للعشق مرة أسائله
هلا دفعت عني الهوا ورحمت عناني
فنظر العشق مبتسما وأجابني
كيف السبيل وأنت والهوا نِعم الصديقان

التسميات:

posted by ولد مصري at 10:14 14 comments

السبت، يوليو 19، 2008

جاءنا البيان التالي

الحقيقة أنا ما صدقت عرفت أتلايم على إنترنت علشان أدخل أطمن عليكم وأشوف حجم الخسائر في المدونة نتيجة الإلقاء العشوائي للقلل (اللي بدباديب واللي بدون) من جانب النيران الصديقة والتي قامت بإحداث إصابات بالغة في المشاعر نتيجة الكلام الجميل اللي قرأته .. هذا وقد قررت ألتزم بسياسة ضبط النفس مع تجفيف منابع العبرات والصمود إلى حين تمكني من الرد ولاسيما إني قاعد ترانزيت مستني الفرج والذي يتمثل في الطائرة اللي هتنقلني بإذن الله إلى القاهرة لقضاء ثلاثة أسابيع أجازة ... "هي دي مصر يا عبلة"

التسميات:

posted by ولد مصري at 17:00 15 comments

الثلاثاء، يوليو 01، 2008

اللي عنده قلة يجهزها واللي معندهوش يشتري أو يأجر

طول عمر الشعب المصري شعب عاطفي، وعشان كده بياخد على دماغه من كل الخلق سواء كان حاكم أو حكومة وده بسبب واحد مافيش غيره إنه عاطفي ومابيحبش يزعل حد .. ومش بس كده لأ ده حتى في أحرج اللحظات أول ما حد بيجرجره في موضوع المشاعر ده تلاقيه اتدلق على طول ونسي كل اللي اتعمل فيه وعشان كده المشهد الآتي شفناه في يجي خمسميت فيلم عربي قبل كده من أول ما قالوا يا أبيض وأسود لحد الأفلام التكنو كولور:
تعود ليلي إلى المنزل في وسط النهار على غير العادة .. تفتح باب الشقة .. فتسمع صوت حركة مريبة في غرفة النوم
تذهب ليلى إلى غرفة النوم لتجد زوجها عادل في أحضان الخطيئة اللي هيه غالبا بتكون أعز صديقاتها
بعد ذهول وبكاء ونويح وعويل والذي منه تذهب ليلي إلى بيت والدها ويتبعها عادل ليقف أمامها مدلدل رقبته على صدره ويقول:
عادل: سامحيني يا ليلي .. أرجوكي تسامحيني
ليلي وهيه بتعيط: أنا مش قادرة أصدق اللي أنا شفته
عادل: أنا آسف .. أنا فعلا آسف
ليلي: طيب ليه .. ليه
عادل: لأني إنسان حقير خسيس حيوان
ليلي: إنت جرحتني يا عادل
عادل: مغفل حمار سافل
ليلي: أنا مش ممكن هقدر أسامحك
عادل: أرجوكي تسامحيني .. أحلفلك بأعز ما أملك وهو حبي ليكي (طبعا ده حلف بغير الله لا يجوز وبعدين كان فين الحب ده يا روح خالتك وانت بتخونها)
ليلي: صحيح يا عادل إنت ندمان (ليلي بتجيب مارشدير)
عادل: صدقيني يا ليلي (حسين رياض كان بيقولها صضئيني)
ليلي: احضني يا عادل .. ضمني ليك .. ضمني لصدرك .. ضمني قوي (ما خلاص يا أبلة ليلى إنتي ما صدقتي)
وبكده عادل يعود إلى ليلاه .. وطبعا نظرا لأن ديل الكلب عمره ما يتعدل فيقوم عادل بخيانة ليلى كمان مرة ويحصل نفس الحوار مع زيادة جملة "إنت قولتيلي إنك مش هتعمل كده المرة اللي فاتت" وعادل يزود جملة "طور جاموسة خنزير" وهو بيشتم نفسه .. ومع ذلك برضه بتسامحه وكل ده ليه؟ لأننا شعب عاطفي بنحب من قلبنا وبننسى كل اللي بيتعمل فينا.
المقدمة دي كلها علشان من الآخر أقولكم إني مسافر لمدة إسبوعين وعايزكم تسامحوني أنا كمان (إشمعنى عادل) وللأسف الشديد إني مش هقدر أفتح المدونة ولا أطمن عليكم خلال الفترة اللي جاية وعشان كده عايزكم تسامحوني كلكم عن أي طولة لسان أو دفاشة أو لجافة (محدش يحاول يفهم معنى الكلام ده ايه) قمت بيها بس أكيد إنتم فهمتوني وعرفتوا إنهالا يمكن تكون كانت مقصودة.
هتوحشوني كلكم
(إمسحي دموعك يا آمال)
ملحوظة لو فيه حد ناوي على حدف قلل يستنى بعد الساعة الثانية صباحا لأن ده موعد إقلاع الطائرة

التسميات:

posted by ولد مصري at 15:33 23 comments