يَوْمِيَات وَلَد مَصْري
الأحد، فبراير 15، 2009
يوميات مصري في أمريكا – كرباج ورا يا اسطى
في امريكا حطين نظام زي الفل بالنسبة للركوب والنزول من الأتوبيسات, فالسادة الركاب لما بيوصل الأتوبيس بيقفوا صف واحد وبيركبوا من الباب الأمامي للأتوبيس علشان يشتروا التذاكر من السواق اللى هوه في نفس الوقت بيلعب دور الكمسري لما الأتوبيس بيقف على المحطة طبعا لأنه مابيسوقش والأتوبيس واقف (غريبة مش كده) وكل الموجودين في الأتوبيس لما بيجوا ينزلوا بيروحوا للخلف علشان جميع عمليات الهبوط بتكون من ورا.
في اليوم ده كان الناس اللى واقفين على المحطة عددهم كبير وكنت واقف أنا كمان مستني الأتوبيس اللى هيوصلني الشغل وفعلا وصل الأتوبيس في ميعاده اللى مكتوب في جدول المواعيد كالعادة ووقف في مكانه المعتاد على المحطة جنب الرصيف (طبعا ده مش لت ولا عجن بس علشان نعرف الفرق ما بينا وبين غيرنا) وبدأت الناس تحازي وتقف صف واحد علشان تركب..ولما شاف السواق ان العدد كبير ونظرا لأن الأتوبيس مبيقدرش يقف في المحطة الا فترة محددة لقيت السواق فتح الباب الخلفي للأتوبيس علشان الناس تركب منه والغريب في الموضوع انه أخد القرار الجرئ ده من غير ما يطلب إذن من الهيئة أو يقدم طلب على عرضحال دمغة ويشهد معاه اتنين زمايله مايقلش مرتبهم عن أربعين دولار ان الدنيا كانت زحمة وانه كان لازم يعمل كده. المهم علشان ماطولش عليكم انا كنت من الناس اللى ركبوا من ورا ونتيجة للزحام الشديد فمأمكنش إني أروح للسواق وأدفع له تمن التذكرة إلا بعد فترة مش قصيرة لما الدنيا هديت والأتوبيس ابتدى يفضى .. رحت بكل شجاعة أدبية واشتريت التذكرة لأن أبويا كان معلمني أن ديه حقوق عباد ولازم هتندفع إذا ماكنش في الدنيا يبقى هيمسكوا في زمارة رقبتي في الآخرة وأنا بصراحة زمارتي مش ناقصة خانقة .. المهم إني بعد كده رجعت ووقفت تاني في مكاني.
في هذه الأثناء حسيت إحساس غريب (لأ ..غير اني عاوز أطرش يا ظريف) لاحظت أن فيه عين غريبة بتابعني ومش عايزة تنزل من عليا، بصيت من تحت لتحت وعينك يا محترم ما تشوف إلا النور, لقيت ملاك قاعد معانا في الأتوبيس شعرة أصفر لون سنابل القمح في عيد الحصاد (ده طبعا قبل ما يبطلوا زراعته ويحولوه لموالح) وعينه زرق لون السما الصافيه عمال بيبحلق في أخوكم ومش عايز يشيل عينه من عليه.
طبعا انا ريقي جري وقلت بس فردة الملاك دي وقعت في دباديب العبد لله والحب من أول نظرة اشتغل، وبيني وبينكم هيه برضه معذورة لأنها لما تلاقي قدامها شاب مصري حليوة شعرة أسود زي الليل وعينه متتخيرش عن الكلاماتا (ده نوع زيتون علشان اللى ميعرفش مايفتيش ويقول عدس) يبقى كان لازم تعمل أكتر من كده.
المهم بصيت لها بنظرات جريئة شبيهة بنظرات عمر الشريف .. لقيتها بتبتسم .. قلت بس حلاوتك يا معلم الصنارة غمزت والبنت أتكفت على قفاها وعايزة عشرة يشيلوها.
قمت انا كمان دايريكتيللي (يعني مباشرة) ماكدبتش خبر ورحت فاشخ ضبي بإبتسامة بدون عنوان ردا للتحية.
الموضوع تطور بسرعة البرق ولقيت الزبونة بتقولي بصوت ناعم رقيق "هآي" أنا سمعت الهآي ديه من هنا وقلبي لاقيته بقى عند صباع رجلي الصغير وقلت يبقى فعلا دي مش تهيآت ولا تخاريف البنت فعلا وقعت في دباديبي وبتجر معايا ناعم علشان عايزاني في مصلحة.
بعد ما استجمعت قوايا العقلية والجسدية رديت عليها وفشخة الضب لسه لازقة في سحنتي "هآي.. هاو آر يو" (يعني بلا قافية كيف حالك) قالت لي "كويسة شكرا" (لأ..طبعا بالإنجليشي) وبعد كده فتحت معاها الموضوع اللى دايما بيتفتح في المواقف اللى زي دية وهوه موضوع الويزر يعني الطقس (أي خدمة) وعملت نفسي إن أنا مش فارق معايا أي حاجة وإني بس بدردش مع أي بني آدم لحد ما تيجي محطتي .. اللى هيه أصلا فاتت ييجي من نص ساعة.
المهم لقيتها بتقولي "ممكن أقولك حاجة" .. هباه وسع يا جدع لعربية الإسعاف .. ألحقوني يا خلق .. طبعا ومن غير تفكير قلت خلاص البنت قررت تعترف وتقر بكل اللى هيه حسه بيه. قمت أنا بقى عملت فيها زكي رستم في فيلم سيدة القصر وقلتلها "إتفضلي يا هانم انا كلي آذان صاغية".
بصت في عيني ووجهها الأبيض يميل إلى الحمرة من آثار الخجل وقالت لي "أنا معجبة جدا" طن طن طن طآآآآآآآه .. "بالحركة اللى انت عملتها دلوقتي إنك دفعت تمن التذكرة مع إنك ركبت من ورا" وقعدت تديني محاضرات في الأخلاق والقيم اللى إختفوا اليومين دول وأنا مستني أنها تقول كلمة عن الحب والغرام إلا أبدا ولا حرف واحد وبعد شوية سكتت وقالت لي "لازم انزل دلوقتي محطتي جت" وسابتني كأني كيس يوستفندي مرمي على طرابيزة السفرة واتدألجت ورجعت للباب الخلفي للأتوبيس علشان تستعد للنزول, وأتاري الموضوع كله كان إعجاب بإني دفعت تمن التذكرة لما ركبت من ورا ولا كان فيه ريحة الغرام ولا يحزنون.
ياللا على العموم خيرها في غيرها ونكمل الحديث في يوم تاني.
التسميات: يوميات
38 Comments:
ههههههههههههههههههه ولله انت عسل يابني انا لما بكون مضايقه بفتح بلوجك اعد اضحك شوية هههههههههههههه
معلش يا عمنا تعيش وتاخد غيرها بس دور جوا بلدك احسن من بلاد برا ياخويا اهييي
ههههههههههههههه
اول تعليق اهو عشان متقلش اني عايزة ازعل وخلاص
اي خدمه ؟
يلا اعمل الخير وارميه في البحر
مش خساره فيك التعليق الاول
يلاااااااا ابسط يا عم
تحياتي
ههههههههههههههههههههههههه
فرحانه فيك فرحانه فيك فرحانه فيك نيهاهاهاهاهاهاهاها
ايوة كده هى دى الحاجات اللى لازم تنزل علشان الشماته على حق D:
بس على فكرة حبر الكيبورد رخص قوووووووى
بلاش بقى الخدمات اللى مفقودة فى المدونة دى
قولنا عايزين بوستين فى بوست
بس انت ماقولتش المرة الجايه هيبقى بردو تكمله لنفس البوست ولا هتروح مكان تانى
ماهو احنا لازم نقعد فى المكان قرن علشان ننقل لمكان تانى
موضوع يتبع ده ماينفعش على فكرة .. الضرايب خلاص نزلت و كل بوست صغيرهيدفع عليه ضرايب اكتر من البوست الكبير
و ادى قاعدة
تلاقي قدامها شاب مصري حليوة شعرة أسود زي الليل وعينه متتخيرش عن الكلاماتا (ده نوع زيتون علشان اللى ميعرفش مايفتيش ويقول عدس) يبقى كان لازم تعمل أكتر من كده.
انت بقي بتوصف نفسك والا بتوصف حد قاعد جنبك
ال حليوة ال
وفي الأخر طلعت لا هي معجبة بالكلاماتا ولا الحليوة هههههه
لا بجد برافو عليك اخلاقك من دهب
هو ده مصري ولا بلاش
***********
بعيدا عن موضوع البوست في سؤال عاوزة اساله بس من غير رخامة
اتفقنا طبعا متفقين هبقي ابعتلك السؤال
ههههههههههههههههههههههههه
يعني طلع الموضوع "نو واي" يعني مفيش فايده وفووت المحطة ورجعت "اون فوت" يعني على رجلك ماشي وطبعا جالك "ديبرشن" يعني احباط فقررت تعمل "ريفنج" في بنات امريكا اييييييوة يعني تنتقم ... قمت متجوز مصرية وامرك لله "جود هالب يو" فعلا الله يكون في عونك
بوست تحفة تحفة تحفة وانت فعلا رائع والضوحك عندك للركب
تحياتي
انت لديك قدرات قصصيه ساخرة
خليتني اتجاوب معاك للاخر و الابدع ما بين الاقواس
يا حبيبي في الموقف ده انا اضيع ميت محطه و ادفع تمن تذكرتين لو الوصف ده عبر العبد لله و بص ناحيته
انت هتنهب
والله سكر و انت بالنيو لوك الرومانسي يا حنين
تحياتي
مرمر
ههههههههههههههههههه ولله انت عسل يابني انا لما بكون مضايقه بفتح بلوجك اعد اضحك شوية
********************
حيث كده بقى اعملي حسابك إن الدخول للبلوج بعد كده هيبقى بتذاكر واحتمال أشفره واخليه باشتراك :)
معلش يا عمنا تعيش وتاخد غيرها بس دور جوا بلدك احسن من بلاد برا ياخويا
**********************
حضرتك الشعر الأصفر والعنين الزرق دي مواصفات أوربي يعني ممنوع الموديل ده ينزل مصر ولو نزل هتلاقيه غالي قوي علشان الجمارك بتاعته
اول تعليق اهو عشان متقلش اني عايزة ازعل وخلاص
*********************
أهو ده الكلام ولا بلاش
اي خدمه
*********************
ايه؟ عايزة فلوس الشاي حلاوة أول تعليق ولا ايه؟
يلا اعمل الخير وارميه في البحر
********************
كل الذل بتاع اول تعليق اللي فوق ده وبتقولي انك رمتيه البحر أمال لو كنتي احتفظتي بالخير ده كنتي عملتي فيا ايه؟
مش خساره فيك التعليق الاول
يلاااااااا ابسط يا عم
*********************
لأ .. واضح فعلا إنك رمتيه البحر :)))
تحياتي
ضد التيار
فرحانه فيك فرحانه فيك فرحانه فيك نيهاهاهاهاهاهاهاها
**********************
يا ساتر .. ايه الغل اللي بقى عند الناس ده
ايوة كده هى دى الحاجات اللى لازم تنزل علشان الشماته على حق
*********************
طول عمرك أصيلة يا ضد
بلاش بقى الخدمات اللى مفقودة فى المدونة دى
قولنا عايزين بوستين فى بوست
*********************
معلش أصل البعيد غبي
بس انت ماقولتش المرة الجايه هيبقى بردو تكمله لنفس البوست ولا هتروح مكان تانى
********************
مين قال ان هيبقى فيه بوست تاني .. هو اللي يقرأ تعليقاتكم دي يقدر ينسحب من لسانه ويفضفض معاكم مرة تانية
ماهو احنا لازم نقعد فى المكان قرن علشان ننقل لمكان تانى
********************
قرن .. ايه قرن دي؟ قصدك قرن فلفل :))
موضوع يتبع ده ماينفعش على فكرة .. الضرايب خلاص نزلت و كل بوست صغيرهيدفع عليه ضرايب اكتر من البوست الكبير
*********************
الضرايب مصلحتك أولا
و ادى قاعدة
*********************
انتي بتقولي قاعدة .. اقبضوا عليها .. عايزينك تلحقي لك يومين في جوانتنامو قبل ما يقفلوه:)))
تحياتي
زهرة الجنة
تلاقي قدامها شاب مصري حليوة شعرة أسود زي الليل وعينه متتخيرش عن الكلاماتا (ده نوع زيتون علشان اللى ميعرفش مايفتيش ويقول عدس) يبقى كان لازم تعمل أكتر من كده.
*********************
مش بقولكم متواضع من يومي
انت بقي بتوصف نفسك والا بتوصف حد قاعد جنبك
********************
لأ .. بوصف القمر ساعدتك (انا مش عارف انا طايق نفسي ازاي)
وفي الأخر طلعت لا هي معجبة بالكلاماتا ولا الحليوة هههههه
********************
طلع مالهاش في شغل البقالة
لا بجد برافو عليك اخلاقك من دهب
هو ده مصري ولا بلاش
********************
حضرتك ده كان أيام الجاهلية والحمد لله الذي عافانا
بعيدا عن موضوع البوست في سؤال عاوزة اساله بس من غير رخامة
*********************
عادي ماهي دي مش أول مرة .. أما نشوف أخرتها على الله ما يبقاش الموضوع مرتبط بحرف ال A
اتفقنا طبعا متفقين هبقي ابعتلك السؤال
*********************
أيوة بس ...
لكن ماهو...
أصل يعني....
لعلمك بقى انا كان ممكن ماوفقش انك تبعتيلي السؤال لكن موافق بمزاجي :))
حاكم انا محبش إن واحدة تمشي كلامها عليا أبدا
تحياتي
مسز ستيتا هسب الله الهمش (اسمك بالانجليشي)
يعني طلع الموضوع "نو واي" يعني مفيش فايده
********************
لا وانتش صادقة ده طلع "أوت" يعني بره
وفووت المحطة ورجعت "اون فوت" يعني على رجلك ماشي
***********************
يس .. والشوز كان تايد (يعني ضيق) وهارم ماي لجز (عورني في رجلي)
وطبعا جالك "ديبرشن" يعني احباط
**********************
أوف كورس فيري فيري ماتش
فقررت تعمل "ريفنج" في بنات امريكا اييييييوة يعني تنتقم
*********************
أون مي أند أون ماي إنامي (يعني عليا وعلى أعدائي)
بوست تحفة تحفة تحفة وانت فعلا رائع والضوحك عندك للركب
*********************
ربنا يخليكي يا دكتورة ده بس من ذوقك
تحياتي
أحوال الهوى
انت لديك قدرات قصصيه ساخرة خليتني اتجاوب معاك للاخر و الابدع ما بين الاقواس
**********************
ربنا يخليك يا دكتور يا رافع معنوياتي وكايد الأعادي
يا حبيبي في الموقف ده انا اضيع ميت محطه و ادفع تمن تذكرتين لو الوصف ده عبر العبد لله و بص ناحيته
*********************
إتقل يا دكتور .. ليقوله علينا ما بنشجعش المنتج المحلي ويتهمونا بإننا السبب في الكساد
والله سكر و انت بالنيو لوك الرومانسي يا حنين
********************
إختشي يا دكتور مش قدام الأولاد :)))))
تحياتي
هو ده الإيجيبشن مان ( رجل مصري يعني :)
دا أنا ضحكت ضوحك :))
بس حلوة الأخلاق النابعه من الإنسان نفسه
حتى لو لم يوجد رقيب
فالإنسان رقيب نفسه
ههههههههههههه
اهئ اهئ اهئ
دانا قلت هنعيش قصه لف بمناسبة الفلانتين
مش عارف كنت تكمل شجاعة وجرائه تنزل وراها
ولا تقلها رقم لفلفون
حرااااااااااااااااام
الفرص دى بتبقى رومانسيه اوى
وتبقى عايزة حركة جدعنه هههههههههههه
معلشى يلا ايام وراحت
تعيش وتفتكر
دونياااااااااااااااا
والله كنت حاسه من الاول انها هتعمل كده
انت بقى ماشى تحب على روحك
فوق يابابا هو انت فى مصر؟
انا على فكره مش بحب اى لغه غير العربى
صلى ع النبى ياعم
معاك ربع جنيه سلف؟
حضرتك ده كان أيام الجاهلية والحمد لله الذي عافانا
********
يعني سيادتك بتزوغ دلوقتي من المواصلات مش بتدفع والا انا فهمت غلط؟؟
عادي ماهي دي مش أول مرة .. أما نشوف أخرتها على الله ما يبقاش الموضوع مرتبط بحرف ال A
***********
ماشي الله يسامحك مش هرد عليك انت برضه في مقام ابني
السؤال مش في الحرف A لا ده سؤال بجد مجرد كنت عاوزة اعرف لماذا؟
هبقي ابعت السؤال
هههههههههه طب كويس انها مش قلتلك انا معجبة بالفراعنة وكده
عاجبنى وصفك اوى لنفسك منتهى التواضع:))
وبعدين شفت هما عمليين ازاى اهى اول ما جت محطتها راحت نازلة وانت فوت محطتك من قرون ههههههههه
يالا مش مهم:))
تحياتى
انا قريت التدوينة دي قبل كدا عندك انت نزلتها تاني صح
احترف هاااا
تعرف انا مبسوطة بيك اوى
ايوة كده رفعت راسنا قدام الاجانب
عشان يعرفوا بس ان العرب المسلمين لا هما حرامية ولا همج
انا بقى ماش فتش التدوينة دي قبل كده زي كيارا
بس ابشرك ما تخافش الاعجاب بالمواقف بيبقى المرحلة الاولى
بس انت كل يوم روح نفس المحطة وخليك واقف اوعى تتحرك هتلاقيها ان عاجلا او اجلا جايالك تعترف بكل حاجة بس ابقى ادعيلي
هي اكيد قالت لنفسها احنا بنشتري رجالة بالانجليشي طبعا
بس انت برضة ما شفتش منديل للولة الغلبان مستني ايه لما الدبان يتلم؟
يلا علي رأيك خيرها ف عيرها صح
بس موقف طريف
وبارع في استخدام الاسلوب الساخر
تحياتي
السلام عليكم...
يا سلام على الإنجليشي ...
جميل خالص ..
هما فعلا شعب مايصدق يشوف موقف حسن يصدر من جينتلمان أو جنتلومانياه..
عشان يستشعرو إن الدنيا بخير ..
بيفتقدو الحاجات دي جدا..
ونعم الأب والدك...
ونعم التربيه إلي هم يفتقدوها..
...
دمت بخير
يالعبه ياعم الله يسهلك
وقدرت يا قاسى تسيبها تنزل كدة من غير ما تجرى وراها والله حرام عليكى
يالا يارب يرزقك بقمر تانى يا محظوظ
على فكرة انا مش بنؤ انا بحسد بس
تحياتى
احمد الشاعر
سيبك من امريكا بليز "يعني الاهي يكرمك" وخليك في بورسعيد اللي على ايدك الشمال وانت داخل من غزة
على اللينك ده راجل طالب منك المساعدة والمساندة .. مش انت مصري .. ادخل وطوف وشوف .. ولو في ايدك حاجة متقصرش
http://elhakika.blogspot.com
لا لتراست بورسعيد .. لا لتلوث البيئة .. لا لعمالة هندية على أرض مصر
اشترك معانا ولو ببوست .. تعاطفك لوحده مووووووووووووو كفاية
وبعدين بطريقتك التحفة ها تطلع بوست لوحده ملوش علاقة بكلام الفسخونيا بتاع ستيتة هسب الله الهمش
سلوى
هو ده الإيجيبشن مان ( رجل مصري يعني :)
******************
أيوة المصريين أهمة حيوية وعزم وهمة
بس حلوة الأخلاق النابعه من الإنسان نفسه حتى لو لم يوجد رقيب فالإنسان رقيب نفسه
*********************
بس المهم إن الأخلاق دي تبقى موجوده لما نحتاجها لأن المشكلة دلوقتي إن معظم الناس بقت بتسيب أخلاقها في البيت وهما نازلين الصبح :)
تحياتي
مهندس مصري
ههههههههههههه
********************
يا أبو ضحكة جنان
تحياتي
همس
اهئ اهئ اهئ
******************
خير ايه اللي حصل تاني
دانا قلت هنعيش قصه فل بمناسبة الفلانتين
*******************
معلش طلعت أوت المرة دي
مش عارف كنت تكمل شجاعة وجرائه تنزل وراها
ولا تقلها رقم لفلفون
********************
فكرك كده .. طيب وبعدين أقولها ايه إن بالصدفة دي طلعت محطتي أنا كمان .. وبعدين أنا قلت لازم أتقل على الرز لحد ما يفلفل :))
حرااااااااااااااااام
الفرص دى بتبقى رومانسيه اوى
وتبقى عايزة حركة جدعنه هههههههههههه
*********************
لا متلقيش لا ده ولا ده (يعني لا رومانسية ولا جدعنه)
تعيش وتفتكر
دونياااااااااااااااا
********************
شدي حيلك .. كلنا لها:))
تحياتي
عاشقة الرومانسية
والله كنت حاسه من الاول انها هتعمل كده
**********************
يا سلام .. شوف ازاي .. طيب مادام حضرتك بتعرفي الطالع كده ماتشوفيلي اذا كان قدامي سكة سفر ويبقى لك الحلاوة:)
انت بقى ماشى تحب على روحك
*********************
مش أحسن ما اعمل حاجة تانية على روحي وانا كبير كده
فوق يابابا هو انت فى مصر؟
*********************
في ايه يا كباتن .. إنتوا كلكوا عليا ولا إيه
انا على فكره مش بحب اى لغه غير العربى
**********************
ماهو كل خريجي محو الأمية بيقولوا كده برضه
(إوعي تزعلي أنا بهزر)
صلى ع النبى ياعم
*********************
عليه أفضل الصلاة والسلام
معاك ربع جنيه سلف؟
*********************
ياااااااه الكلمة دي ماسمعتهاش من ايام ما كنت في ابتدائي ..
إنتي باين عليكي من زمان قوي ..الكلمة دي خلاص بطلت .. دلوقتي حضرتك بقت اسمها معاك ربع مليون سلف؟
(الزعل مرفوض)
تحياتي
زهرة الجنة
حضرتك ده كان أيام الجاهلية والحمد لله الذي عافانا
يعني سيادتك بتزوغ دلوقتي من المواصلات مش بتدفع والا انا فهمت غلط؟؟
********************
لا وإنتي صادقة انا أقصد بأيام الجاهلية أيام لما كنت بركب اتوبيسات علشان دلوقتي اشتريت عربية ... وكبيرة كمان
ماشي الله يسامحك مش هرد عليك انت برضه في مقام ابني
********************
ليه هو حضرتك عندك كام سنه أكيد عديتي الخمسين مرتاح
تحياتي
برينسيس
أولا حمدا لله على السلامة وكويس إنك طمنتينا عليكي
هههههههههه طب كويس انها مش قلتلك انا معجبة بالفراعنة وكده
*********************
ليه يا بنتي كانت شايفة قدامها أبو الهول ما أنا بني آدم زيي زيها وكنت لابس قميص وبنطلون "زنز"
عاجبنى وصفك اوى لنفسك منتهى التواضع:))
********************
أحسن صفة فيا :))
وبعدين شفت هما عمليين ازاى اهى اول ما جت محطتها راحت نازلة وانت فوت محطتك من قرون ههههههههه
********************
ماهما متقدمين عننا في كل حاجة حتى في النزول من المحطات :)))
خالص حياتي
كيارا
انا قريت التدوينة دي قبل كدا عندك انت نزلتها تاني صح
**********************
واضح يا كيارا إنك تعرفي أكتر من اللازم وده مش في صلحك
إبقي خلي بالك وانتي بتعدي الشارع النهاردة إحتمال تيجي عربية سوده مسرعة وتخبطك
احترف هاااا
*******************
موش أني .. موش أني
تحياتي
موناليزا
تعرف انا مبسوطة بيك اوى
ايوة كده رفعت راسنا قدام الاجانب
عشان يعرفوا بس ان العرب المسلمين لا هما حرامية ولا همج
**********************
لا ما هو احنا مش فالحين غير في الأخلاق وبس :))))
والحمد لله إن الموضوع ماتطورش عن كده لحسن كان ممكن راسكم دلوقتي تبقى في التراب :)))))
تحياتي
فكرة من الزمن ده
انا بقى ماش فتش التدوينة دي قبل كده زي كيارا
*********************
طيب الحمد لله إن ده يعتبر العرض الأول بالنسبة ليكي
بس ابشرك ما تخافش الاعجاب بالمواقف بيبقى المرحلة الاولى
**********************
طمنتيني لحسن كنت قلقان جدا
بس انت كل يوم روح نفس المحطة وخليك واقف اوعى تتحرك هتلاقيها ان عاجلا او اجلا جايالك تعترف بكل حاجة بس ابقى ادعيلي
**********************
تفتكري لو رحت دلوقتي بعد حوالي عشرين سنة من الواقعة تفتكري خطتك ممكن تجيب نتيجة :)
هي اكيد قالت لنفسها احنا بنشتري رجالة بالانجليشي طبعا
**********************
معتقدش عندهم نظام شرا الرجالة ده .. النظام ده في مصر بس .. واكيد لو عندهم هيكونوا بيشتروهم بالتقسيط على 20 سنة ولو الست مادفعتش البنك هيحجز على الراجل ويصادره :)
بس انت برضة ما شفتش منديل للولة الغلبان مستني ايه لما الدبان يتلم؟
*********************
مخبيش عليكي اصلي قرفان منه وبعدين قلت اسيبه يمكن ينشف لواحده
تحياتي
ازيك يا باشمهندس
البوست اللذيذ ده انا فاكراه و فاكره كمان انى فضلت اضحك كل ما افتكره لدرجة خوفت البنات يفتكرونى اتجننت ..)
بجد كان واحشنى اسلوبك الساخر الجميل ده ..
تحياتى
القلم السكندري
يلا علي رأيك خيرها ف عيرها صح
بس موقف طريف
*********************
فعلا بقى ظريف دلوقتي بس ساعتها كان موقف ما يعلم بيه الا ربنا
وبارع في استخدام الاسلوب الساخر
********************
ربنا يخليك يا باشمهندس
إن شاء الله الزيارة ماتكونش الأخيرة واتمنى دوام التواصل
تحياتي
نهار
وعليكم السلام ورحمة الله وبركاته
يا سلام على الإنجليشي ...
جميل خالص ..
*******************
سانك يو ماهو ده العشم برضه
هما فعلا شعب مايصدق يشوف موقف حسن يصدر من جينتلمان أو جنتلومانياه..
عشان يستشعرو إن الدنيا بخير ..
بيفتقدو الحاجات دي جدا..
*********************
فعلا هما لولا النظام اللي ماسكهم كانوا بقوا همج
ونعم الأب والدك...
*******************
جزاكي الله كل خير وربنا يرحمه ويرحم اموات المسلمين
شكرا على الزيارة
تحياتي
الشاعر
يالعبه ياعم الله يسهلك
*********************
انت داخل تنؤ من أولها
وقدرت يا قاسى تسيبها تنزل كدة من غير ما تجرى وراها والله حرام عليكى
*********************
حرمت عليها عيشيتها هو أنا فاضيلها؟
هي بس لو كانت "شاورمتلي" بأي حاجة كنت نزلت معاها وامري لله
يالا يارب يرزقك بقمر تانى يا محظوظ
********************
آه فعلا هو نق :))
على فكرة انا مش بنؤ انا بحسد بس
*******************
لا ماهو باين
نورتني يا أبو حميد وياريت متتأخرش علينا تاني
تحياتي
دكتورة ستيته الحمش
رحت شفت المدونة وبصراحة كده الموضوع زاد عن حده قوي
ايه القرف اللي بيحصل ده وازاي الحكومة مابتخدش اي موقف
عايزين يضيعوا البلد
على العموم البوست الجديد بإذن الله هتكلم عن اللي الحكومة بتعمله فينا
وعلى فكره انا بطلت اكتب في السياسة من فتره لاني حسيت اني بانفخ في إربه مش مقطوعة دي منتهية خالص
ربنا يكرمك ويجازيكي كل خير
تحياتي
العزيزة روفي
ازيك يا باشمهندس
*****************
الحمد لله حضرتك اللي مختفيه خالص
البوست اللذيذ ده انا فاكراه و فاكره كمان انى فضلت اضحك كل ما افتكره لدرجة خوفت البنات يفتكرونى اتجننت ..)
*********************
حضرتك موضوع الجنون مالوش علاقة بالبوست متهيألي العرايس هما السبب :))))
ربنا يعينك عليهم وعلى البوستات بتاعتي :))
بجد كان واحشنى اسلوبك الساخر الجميل ده ..
*********************
ربنا يديم المعروف وشكرا على كلامك الجميل
تحياتي
إرسال تعليق
<< Home