يَوْمِيَات وَلَد مَصْري
الأحد، سبتمبر 21، 2008
المصريين في العمرة 2
نوادر المصريين في العمرة مابتنتهيش ومحتاجة كتاب كامل علشان يكفي الكلام عنها والحقيقة إن النوادر دي بتيجي بصورة عفوية يعني من غير ما يقصدوا لكنها بتحمل في طياتها من الكوارث ما لا عين رأت ولا أذن سمعت.
يعني مثلا في أحد مواسم الحج وفي اليوم الثاني من رمي الجمرات وبعد ما رميت الجمرة الوسطى، وقفت للدعاء، ولسه يا دوب بارفع إيدي وبتوجه بقلبي لله سبحانه وتعالى، لقيت واحد جاي يسألني ويقولي:
هو الشيطان التالت فين؟
سألته باستغراب شديد: الشيطان التالت؟ تقصد ايه؟
رد عليا باستغراب أكتر: هوه احنا مش رجمنا شيطانين لحد دلوقتي؟ فاضل شيطان .. أروح له إزاي (طبعا دي أول مرة أشوف واحد عاوز يروح للشيطان برجليه)
شاورت له على الشاهد بتاع العقبة الكبرى وقلت له:
شايف العمود اللي هناك ده .. هتلاقي الشيطان التالت واقف عنده!!
وقصة تانيه في أحد العمرات كان فيه راجل وزوجته بيطوفوا وطبعا كان الرجل هوه اللي بيقود المسيرة وماسك في إيده كتيبات وأوراق زي ما يكون هيحضر ماجستير في الطواف وطبعا كان عمال يقرأ من كتيب الأدعية والزوجة بتردد وراه:
الزوج: اللهم أوردنا حوض نبيك
الزوجة اللهم أوردنا حوض نبيك
الزوج: صلى الله عليه وسلم
الزوجة: صلى الله عليه وسلم
الزوج: وارزقنا من يده الشريفة
الزوجة: وارزقنا من يده الشريفه
الزوج: شوربه
الزوجة: شوربة؟ شوربة إيه يا راجل؟
الزوج: مكتوب كده يا وليه
الزوجه: خلاص شوربه شوبه!!
الزوج: شوربه لا نظمأ بعدها أبدا
الزوجة: شوربة لا نظمأ بعدها أبدا
المهم في الموضوع إن الزوجة خدت بالها إن الكلام مش راكب على بعضه، لكن الزوج أصر على صحة كلامه .. وفي النهاية .... كلام الزوج هوه اللي مشي.
بالهنا والشفا .. ربنا يتقبل .. ونتقابل في يوم جديد بإذن الله
التسميات: يوميات
32 Comments:
اول كومنت اهوه عشان متزعلش
يمكن الراجل اللى كان بيسأل مش فاهم شياطين غانها جمع و فاهمها على انه مثنى
و الراجل بتاع الشوربه
يمكن اصده شربه
يا ريت تكمل باقى نوادر الحج عشان جامده جدا
و متزعلش من تاخيرى فى الكومنت
و بعد متخلصها مع ان عندى اعتقاد انها مش حتخلص
متنساش تكمل حكايات الجيش
ولا ايه؟
و دمتـــــــــــــــــــــــــم
انت اكيد عاوزني اموت عاااااااااا
ماانا كده هموت بسكته قلبيه او ان هيجيلي فقدان للذاكره
يالهوي كل ده بيحصل في العمره
الا الزوجه وهي بتقوله شوربه ايه ياراجل لالالالالا وهو في التراوه خالص وبعدين مش مكتوبه شوربه جاب الواو منين
ياضغطي ياني
عاااااااااااااااااا
عاااااااااااااااا
بصراحه
فلللللللللللللللللل دماغ اشطه خالص
هو سوال فيه نوادر للعمره تاني عشان اعمل مناعه من الضغط زالبربري والسحال وكل الامراض اصل انا صغننه
عاااااااااااااااااا
ربنا يكون في عوووووووووونك
ههههههههههههههه
حلوة شوربة دية قوى
و الا الشيطان التالت اية الناس دية بجد مشكلة افرض انهم سالوا اى حد تانى ممكن يقولهم اى حاجة و يصدقوة
انتى يا بنى مالك حظك ديما بيوقع فى الناس الغلابة دية كدة لية
برضة هنقول لازم التوعية يا بشر قبل ما الناس تسافر و وجود مشرف معهم ليعرفهم اية المفروض يتعمل و اية الاى ما يتعملش
بص انا عندى صداع وجالى الضغط كمان بعد اللى قراته
شوربة يا لهوى (مش لاقية كلمة بالانجليزى مهذبة تساويها)شوربة ايه ماجى ولا من غير
والشيطان التالت :(( يارب ارحمنا
انا اتشليت ماشى يا مصرى
فاكر كانوا رسميين خط يحدد بداية الحجر الاسود علشان الناس تعرف بداية الطواف حتي من بعيد ده الغرض من رسم الخط لكن حبايبنا اعتبروه خط مقدس و كنت تلاقي الناس بتدور علي الخط و تزيح الناس لغاية لما يلاقوه يروحوا متمسمارين عليه و معطلين المليون اللي بيطوفوا و تقوللهم الحجر الاسعد هناك شوروله و هما مصممين يشاوروا للحط و في بعض الاحيان تلقاهم بيصلوا فوق الخط المهم بعد ما لغوا الخط مازالوا يبحثون عليه الي الان
طيب اضحك ولا اعيط
بص انا هاعمل الاتنين
ههههههههههههههههههههههههه
عااااااااااااااااااا
شيطان تالت و شوربه
ارحمنى يارب
هو انت منزل البوستات نوادر العمره ولا قصدك رفع ضغط المدونين )):
لا بجد ماشاء الله مرزق مرزق يعنى
ربنا يصبرك يابنى D:
و معلش بقى على الغاء دورة الصقر
مجبر اخاك لا بطل ):
عارفه طبعا انك بتقول فى سرك الحمد لله
بس على ميييييييييييين هافكرلك فى فكيره كدا برضه ادبسك بيها تاخد دورات لان من الواضح انك كسول شويتين تلاته اربعه خمسه
ال عايز اسنسير ال
لالالا مش ينفع كدا لازم يكون فى نشاط شويه
امال هاترفع ضغط المدونين ببلاش ولا ايه
P-:
تحياتى ام حنونه (الصقر D: )
(:
الشيطان الثالث راح فين راح فين يا ترى،ربنا يشفي انا قلت قبل كده دول من كوكب زحل دول حتى ما حصلوش زحل دول من مجرة تانية اما بقى الشوربة دي فحسبى الله ونعم الوكيل
تحياتي
ساموراي
اهو كده مبروك اول كومنت وان شاء الله دايما
بالنسبة للزبون بتاع الشيطان هوه كان عاوز يرجم العقبة الكبرى بس هوه فاهم إنه بيرجم الشيطان بجد وعشان كده بدل ما يسأل عن العقبة سأل على الشيطان
بالنسبة للدعاء فهو شربة بس الراجل قرأها شوربة جايز علشان كان صايم .. يمكن
بالنسبة لبقية نوادر الحج وحفاظا على صحة المدونين من ضغط الدم والكساح فبقول مافيش داعي وكفاية لحد كده انا مابصدق إن حد يجي عندي المدونة فمش طالبة إني أفقد أي حد فيهم
إنتي لسه عايزة حكايات جيش تاني بعد كل اللي حكيته
إمعي تكوني بتشاوري عقلك تطوعي فيه
تحياتي
كيارا
بس بس معلش حقك عليا انا خلاص اهو مشي .. مشي خلاص
سلامتك من امراض القلب والمخ والعظام والانف والأذن والحنجرة
ما أنا نوهت في بداية البوست إن الكلام اللي هكتبه ما لا عين رأت ولا أذن سمعت علشان أبرأ ذمتي
حضرتك موضوع الشوربة ده قطرة في بحر بالنسبة للكلام اللي الواحد بيسمعه ومش عارف ليه مصممين يقرؤا من الكتيبات ما كل واحد يدعي باللي في قلبه وخلاص لكن ازاي امال مين اللي هيشلنا
بالنسبة للنوادر فطبعا فيه كتير بس حفاظا على سلامة السادة المدونين اللي قلوا عقلهم وجم يزوروني وعاوز ربنا سبحانه وتعالى يمتعهم بالصحة والسلامة أطول فترة ممكنة فلنكتفي بهذا القدر من النوادر والحمد لله إنها عدت على خير
تحياتي
نونا
مش عارف موضوع الناس الطيبة دول اللي انا بتكعبل فيهم وانا ماشي تقريبا علشان نيتي اللي ما يعلم بيها الا ربنا
فعلا التوعية مهمة جدا لازم يا جماعة حد يفهم الناس دي الشياطين بيبقوا موجودين فين علشان يعرفوا يرجموهم كويس :<)
تحياتي
بجد زي ماقلت من مفترض يكون في مرشد لي ناس غالب دي بجد هم مش بيكون عارفين بس احنا حتي احد لومش عارف خاجه بسال اي احد من السودان اونزلين مع فندق حتي بنجاه الي عايزه بس لازم يجب ان يكون فيه مرشد مرشد بيخاذوا فلوس منها ينال ثوب من عندالله
برينسيس
سلامتك من الصداع والضغط
وبعدين كده برضه تتنزلي عن بريستيجك وترقعي بالصوت مش تمسكي نفسك كده
حضرتك فيه جرعة منشطة لشلل الأطفال متوفرة في الوحدة الطبية وحاجة بلاش كده يعني متقلقيش خالص
الف الف سلامة
دكتور أحوال الهوى
حضرتك الصلاة على الخط دي من مناسك العمرة وهيبقى عليهم دم لو ماصلوش عليه
وده اللي بيخليهم يدبحوا الناس التانية علشان يدوروا على الخط
تحياتي
شيماء
أولا إنتي ما بترديش ليه على التعليقات في المدونة بتاعتك؟
إعملي حسابك آخر بوست ده لازم تمسحيه بأستيكة (فيه أستيكة مخصوصة لمسح البوستات على فكرة وممكن أسلفهالك)
بالنسبة للدورة يعني أنا أروح أشتري "ترنك" جديد وكمان جزمة "كوشتي" برباط وبعدين تقوليلي أصلها إتلغت
لا ممكن أبدا
إعملي حسابك تدوين تكملي ودورة تنظمي وأسانسير تركبي
مع الاعتذار للريس أبو أحمد إننا بندي أوامر كده مش غير استئذان
تحياتي
بيربل ويفز
إنتي بتدوري على إيه عندك
طب شوفيه كده تحت السرير
فعلا الناس دي من مجره تانية وبيجوا يعملوا عمرة عندنا علشان يشلونا
تحياتي
عاشقة القمر
ماهي المصيبة إن غالبية الناس دي بتكون سأله ناس زيهم كده .. طراوة في الدين وبيجوا يعملوا اللي سمعوه
وبعدين فكرة المرشد هايلة ويا ريت يعملوها بس المشكلة إن الشركات بتبقى عايزة توفر لان المرشد بيطلع على حساب الشركة مش عى حسابه
تحياتي
بس هو مقلناش اذا كانت شوربه زبادى والا شوربه عدس
عموما الناس بتبقى شخصيات بسيطه وربنا بيتقبل
وعلى فكرة انا مش بعلق عشان ترد الزيارة بتعليق دة مش اسلوبى
كمان لما بعلق عند حد بحب اشوف الرد ومناسب للتعليق والا لا لانى مش بدخل مجرد واجب لا فعلا بحب اعرف راى اللى بزورة ورده عليا وأذا كان الرد يسمح برد اخر او مناقشه ما
يعنى انت مش مجبر انك تعلق على شئ لا ترغبه لمجرد انى اجى يا حاج البيت
تحياتى ليك ولمغارماتك مع المصريين من حجاج بيت الله الحرام
ايه دا ايه دا ايه دا
مش تقول طيب كنت اجيب الدراع الواقى للصقر عشان مش تيجى طوبه فى دماغى كدا ):
عاااااااااااااااا
عااااااااااااااا
عااااااااااااااااا
كل دى حاجات هاعملها ...ايه الافترا بتاع البشر دا ...اذا كان انت مكسل تنزل للبوستات و هما كام واحد بس
عايزينى اعمل كوووووووووووووول دا ...دا ظلم
انى اعترض اعترض اعترض
انت فاكر ان مش فى منظمه حقوق انسان و حقوق المراْة و حقوق كل حاجه
هاقدم فيك شكوى وقتى بس هه
مش برد على التعليقات عشان اقدر اتابعكم فى الردود و اعرف اخباركم كمان ..لانى بجد يومى بقى مشحووووووووووووووووون ...بس انا برد عليكم فى مدوناتكم يعنى معكم مش تخاف الصقر عمره ماهينقطع عن الناس اللى بجد بيعزها (:
و مين عارف جايز تلاقينى بنيولوك .. بس بجد محتاجه ابعد عن المدونه
امممم انت جهزت نفسك للدورة دا ايه النشاط اللى نزل مره واحده دا O-:
طيب خلاص بعد العيد هابدأ الدورة بقى لانى مسافره مع بابا اول الاسبوع وهاجى بعد العيد
بس ياترى بقى لو عملت نيو لوك هاتعرفنى ؟؟؟
طبعا هاتقولى لأ عشان الدورة اتلغت ايوة ايوة عارفه انا ..لكن عذر غير مقبول
ابو احمد انت وهو بقى اتصرفه مع بعض
بيعه وقتى ..فاكر لما بعتنى فى الاول هه
داين تدان P-:
مش عارف موضوع الناس الطيبة دول اللي انا بتكعبل فيهم وانا ماشي تقريبا علشان نيتي اللي ما يعلم بيها الا ربنا
اديك اهوة اعترفت بلسانك هههههههههههه
دية باة مشكلة المصرين فى كل حتة تحس اكنهم جاين من كوكب تانى و المشكلة ان الكل بيبص لينا نظرة تضايق بس نقول الذنب ذنب شركات عايزة تلم فلوس و خلاص
السلام عليكم
ما شاء الله بوست رائع هو والسابق
لكن المشكلة في الجهل باحكام الحج والعمرة بسبب الاعلام والعلماء الذين يبدأون في شرح احكام الحج والعمرة بعد سفر الناس فيستمع لها من لا يحتاجها ..
بحمد الله اديت الحج العديد من المرات والعمرة مرات كثير وأسأل الله القبول
وكنت اتأفف وأتضايق كثيرا من سلوك الكثير من الناس ..
ولكن هؤلاء العوام يأتون من بلاد مختلفة وثقافات مختلفة وأخلاق مختلفة ولن يكون الجميع على ما تهوى .. وذا نصحت دخلت في دائرة الجدال وهو من الأمور المنهي عنها في الحج والعمرة ( {الْحَجُّ أَشْهُرٌ مَّعْلُومَاتٌ فَمَن فَرَضَ فِيهِنَّ الْحَجَّ فَلاَ رَفَثَ وَلاَ فُسُوقَ وَلاَ جِدَالَ فِي الْحَجِّ وَمَا تَفْعَلُواْ مِنْ خَيْرٍ يَعْلَمْهُ اللّهُ وَتَزَوَّدُواْ فَإِنَّ خَيْرَ الزَّادِ التَّقْوَى وَاتَّقُونِ يَا أُوْلِي الأَلْبَابِ }البقرة197 ) لذا ففي كثير من المواقف ابتسم وأصبحت اتقبل هذا السلوك بشئ من الأريحية
العزيزة كناري
الحقيقة مش عارف نوع الشؤبة ايه بالظبط بس شكله كده كان بيقرأ الأدعية من كتاب أبلة نظيرة
بخصوص التعليقات واضح إني اتفهمت غلط (وده عادي على فكرة ودايما بيحصل معايا خصوصا إننا بنستخدم طريقة الحمام الزاجل في إرسال التعليقات) انا كان قصدي أعتذر إني اتأخرت في التعليق لأن الموضوع بتاعك فعلا هايل ولما دخلت أعلق قرأت تعليق عندك على نفس الموضوع كان ليا عليه بعض الملاحظات وحسيت إني لازم أعلق على التعليق نفسه والموضوع كان هياخد مني وقت فعلشان كده قلت لك إني عارف إنك نزلتي بوست جديد وإني عاوز اعلق عليه
اتمنى اكون وضحت وجهة نظري واشكرك على التوضيح والزيارة والتعليق :)
تحياتي
شيماء
أيوة طبعا تعملي كل الحاجات دي مش انتي اللي عاوزة تبطلي تدوين وتقعدي في البيت
وبعدين إعتراض ايه إنتي فاكرة نفسك قاعدة في مجلس الشعب
إعترضي براحتك خاااالص وبعد ما تخلصي اعتراض تعملي التلت اشتغالات اللي انطلبوا منك
وابقي سلميلي على الأمم المتحدة وابلة كونداليزا رايس وخلي منظمات الإغاثة اللي قلتي عليها تنفعك ..
هي دي مصر يا عبلة
تصدقي بعد كل كلامك اللي قلتيه انا مفهمتش برضه انتي ليه مابترديش على التعليقات
قعدتي تقولي كلام كده مش مفهوم من عينة اصلي براقبكم من ورا الشباك .. يومي مشحون (بأمارة حرف الواو لما علق منك) .. واصلي بعزكم قوي .. وهاجي اوزركم وادحرج تعليق واخلع .. واصلي مسافرة مع الحاج كام يوم(إوعى يعملوا فيكي زي ما عملوا في هنادي)
ايه الكلام ده
اديني سبب واضح اقدر افهمه
انتي مابترديش ليه على التعليقات؟
يا ساتر الواحد جاله صداع
نونا
يعني الواحد مايعرفش يفضفض معاكم بكلمتين شوية
تمسكوا عليه الكلمة
دا ايه ده
حضرتك المصريين بتلقيهم دايما منورين في كل مكان وبتعرفيهم من غير حتى ما يفتحوا بقهم
تحياتي
جني
هوه ايه اللي البوست رائع هوه واللي قابله .. ايه نظام القلب ده
ينفع كده يا ريس
ماشي نعديها المرة دي
بس بصراحة كلامك كله مظبوط فعلا في التلفزيون بيشرحوا احكام الحج والناس بتبقى واقفه على عرفات لأ وإيه واللي ينرفز أكتر كل يوم من أيام الحج تلقيهم في التلفزيون بيشرحوا المناسك اللي الناس بتعملها دلوقتي
حاجة تجنن
تحياتي
ههههههههههههههههههههههههههههه
فرحانه انا من الصداع اشمعنا انت تجيبلنا الضغط
(وش بيطلع لسانه وفرحان قوووووى)
هو قالها و مات على فكره مش فى فايده
مين قال انى هادحرج تعليق و افلسع بس
ماانا متابعه اهو الردود ياساتر على افترا البشر
الا صحيح هما عملوا ايه فى هنادى
مش تقول كلها الوبا لالالالالا مش تخوفنى اروح اقوله مش هاسافر
و اقول انت اللى وسوست ليا هه يبقى ابو احمد و ابو شيماء عليك
تخيل يبقى مصلحه و انت بقى فى النص هيييييييييييه
دا انا هافرح فيك فرح ...شريرة انا نياهاهاهاهاهاها
و كمان مين قال انى مش برد ماانا برد عليكووووووووووووووا فى المدونه
دا ايه دا هو الواحد لازم يتعصب يعنى
طبعا هاتقول بدخل مش بلاقى رد منك صح ؟؟
كان عندى امل ان ظنى يطلع صح لكن من الواضح انك انت اللى هاتطلع صح
لكن انا وراك لحد مااثبت انى انا الصح
انى مش عدووووووووووووووووووووووووووو
داناقص اقولك انا اهو انا اهو
ياساتر خليتنى اشد فى شعرى
اجما هنا مش شركات ناس ماشيه بطريقه رسميه بطريقه دواله بيكون مع مرشد علي حساب دوله برضو شركات عندها علي حسابهم
دايما دمك خفيف اكيد انت بتهزر معقول لسة فى ناس بالعقلية دى لاحول ولا قوة الا بالله
احمد الشاعر
شيماء
لعلمك بقى انا الصداع اللي عندي عبارة عن صداع موز مش صداع راس ولا صداع روج (أنا اطشليط يا ليلي)
بالنسبة لهنادي يا اماي لما راحت عند اللمهندس وحصل اللي حصل سافرت برضه مع خالها كام يوم وبعدين ماظهرتش تاني في الفيلم فأنا بحاول أربط الأحداث باللي بيحصل معاكي وحكاية انك تقولي إنك هتبطلي تدوين وهتسافري مع الوالد كام يوم
وبعدين...
يا ويلي من اللي راح ويا خوفي من اللي جاي على رأي الست فاتن
بالنسبة لأبو احمد ده راجل زمالكاوي وفاهم لا ينكن يعمل حاجة في زملكاوي زيه .. هيسيبه للزمالك هوه اللي هيربيه
وبعدين خلاص يا ستي ماتزقيش فهمت فهمت إنتي ايه فاكراني غبي خلاص عين عب عال يبقى انتي عاحمد دي حاجة سهلة خالص
تحياتي ليكي ونصيحة على الواقف .. خليكي مع التيار احسن لحسن الموج يبقى عالي عليكي او على الاقل خالص البسي عوامه
تحياتي
عاشقة القمر
الحقيقة إحنا الدولة عندنا بتسفر على حسابها السادة الوزراء والفنانين اللي يعني ايه مش عارفين يطلعوا مع القرعة ((بضم القاف مش فتحها متواديناش في داهية) فطبعا مابتقدرش تطلع المرشدين الدينيين لان مالهمش مكان
هي الدولة هتعمل ايه ولا ايه
تحياتي
أحمد الشاعر
ربنا يخليك على ذوقك وكلامك الجميل دايما رافع معنوياتي
الناس دول يا ريس موجودين وهيفضلوا ليوم القيامة علشان بس نبقى فاهمين إننا في الآخر هندخل الجنة برحمة ربنا مش بأعمالنا
تحياتي
الف شكر على كل الضحك اللى بجد خلتنى اضحكه
بجد الناس دى بتهزر ولا بتتكلم جد
كل ده فى الحج
امال لو فى الملاهى حيبقى الموضوع عامل ازاى ربنا معاك يارب
تحياتى
إنجي
لا شكر على واجب
كويس إن اول زيارة ليكي تبقى مع نوادر المصريين
والحقيقة بالنسبة للمصريين مابيحسوش إن فيه فرق كبير ما بين الحج والملاهي لأن الاتنين بعد ما بتخلصيهم بتحسي إنك دايخة وعايزة ترجعي من القرف اللي بتشوفيه
ولا حول ولا قوة الا بالله
نورتيني بالزيارة واتمنى ماتكنش الأخيرة
تحياتي
إرسال تعليق
<< Home