يَوْمِيَات وَلَد مَصْري

الجمعة، أغسطس 14، 2009

حكاية ماما سوسن والراجل العجوز

كان ياما كان .. في هذا العصر اللي احنا عايشينه وفي نفس المكان .. قرية جميلة اتبنت من زمان .. اسمها القرية المحروسة.

القرية دي يا ولاد كان بيحكمها راجل كبيرعجوز .. مناخيره قد الكوز .. وعايش معاه في نفس القصر مراته اللي اسمها ماما سوسن وابنه اللي اسمه جميل جمال اللي مالوش مثال لا في الحقيقة ولا في الخيال.

في كل يوم الصبح كان يقوم الراجل العجوز من النوم وقبل ما يطش وشه بشوية ميّه ، يقوم يصَّحي مراته ماما سوسن وابنه جميل جمال ويقعد يحكي لهم على اللي شافه في منامه. وكانت ماما سوسن يا أولاد بتسمع حكايات جوزها الراجل العجوز وهي مبسوطة مبسوطة مبسوطة .. لأنها كانت جزمة .. أقصد جازمة إن جوزها الراجل العجوز عمره ما يحلم حلم إلا ولازم ينفذه .. وبيضطرعلشان ينفذ أحلامه انه ياخد قرارات صرمة قديمة .. أقصد صارمة عظيمة بتخلي أهل القرية يزعلوا من الراجل العجوز .. وده طبعا لأن ذكاء أهل القرية يا أولاد كان محدود للغاية ويمكن كمان يكونوا أغبية وبالتالي كان لا يمكن يقدروا يفهموا الراجل العجوز بياخد القرارات دي ليه.
في يوم من الأيام صحي صاحبنا الراجل العجوز من النوم وكان سعيد وفرحان وطاير من السعادة .. ماما سوسن استغربت .. وسألته عن السبب .. قعد الراجل العجوز قدامها .. وبدأ يحكي لها .. عن اللي شافه في منامه .....
بدء الراجل العجوز في رواية الحلم العجيب الغريب لماما سوسن .. قال لها إنه اللهم اجعله خير شاف في المنام .. إنه كان لابس فانلة لونها احمر وشورط لونه ابيض وشراب اسود وكان بيعلب ماتش كوره مع فريقه اللي بيتكون من السادة الوزراء اللي بيحكموا معاه القرية المحروسة وطبعا كان هو كابتن الفريق اللي بيحط خطط اللعب والمناورة .. أما الفريق اللي بيلعب قصاده فكان بيتكون من ناس من سكان القرية المحروسة اللي هو بيحكمها ..
مع بداية الماتش حاول فريق سكان القرية المحروسة في إحراز هدف مبكر في فريق "حَكـَوِّمُه" أقصد الحكومه واللي كان بيلعب معاه الراجل العجوز لكن نظرا لأن فريقه كان بيستخدم اسلوب الرفس والنطح في اللعب فمعرفش فريق سكان القرية في إحراز أي أهداف في الشوط الأول.

وفي الاستراحة اللي ما بين الشوطين قرر فريق الراجل العجوز إن أسلوب الرفس والنطح مش كفاية وانهم لازم يستخدموا العنف والشده مع سكان القرية علشان يمنعهوهم من تسجيل أي هدف من أهدافهم في مرمى فريق الراجل العجوز.
وفعلا بدأ الشوط التاني وبدأ معاه تنفيذ خطة الراجل العجوز في فرض سيطرته على مجريات المباراة وحاول ياعيني سكان القرية في تسجيل ولو هدف واحد لكن لقوا إن فريق الراجل العجوز واقف لهم بالمرصاد ومش بس كده .. لأ ده كمان فريق الراجل العجوز بدأ في تسجيل أهدافه في سكان القرية اللي كانوا للأسف مستسلمين تماما.
وانتهت المباراة بفوز كبير لفريق الراجل العجوز وصحي الراجل العجوز من النوم وهو بيغني أغنية "والله وعملوها الرجالة ورفعوا راس ماما سوسن"

وعاش الراجل العجوز مع ماما سوسن في تبات ونبات وخلفوا ... أقصد .. وماعرفوش يخلفوا صبيان ولا بنات ..
وفضلت المحروسة محروسة بالراجل العجوز ومعاه .. ماما سوسن.

التسميات:

posted by ولد مصري at 11:24

6 Comments:

ههههههههههههه..تعرف ليه فريق المحروسة خسر؟
عشان أسلوب اللعب في مصر بيعتمد علي خط ظهر جامد ولو مفيش خط ظهر ليك..شيل أجوان لحد ما تقول يا بس..حتي لو فكرت تعمل هجمة مرتدة برضه حتتخبط أجوان
هما للأسف متحكمين في خط الوسط اللي بيشكل منطقة المناورات..لو احنا قدرنا نكثف وجودنا في منطقة الوسط نكسب الماتش ونلحق بفريق هذا العجوز هزيمة منكرة
تحياتي

الجمعة, أغسطس 14, 2009 9:26:00 م  

لا اله الا الله
ولا حول و لاقوة الا بالله
على الصبح كده
لكن الحكاية على فكرة فى جزء ناقص فيها
تفتكر اى جزء ؟؟؟
فكر و لو عرفت الحل
قوله فى التعليقات
علشان نرجع تانى نقفل المدونة دى زى زماااااااااااااااااااااان
^_^

* صحيح شوفت الحوار اللى كان اونلاين مع جمال ؟؟؟

السبت, أغسطس 15, 2009 6:00:00 ص  

يا صباح الفل

الحكايه ناقصها نص نعل قصدي نص فعل

و فريق ح كومه مش ممكن يتغلب لانه فايز باحتمالات 99.9 %

و اضح جدا انك مدمن كورة قدم لان كل اسقاطاتك بتكون في ملعب الكورة

تسمح تقابلنب الساعة عشرة يوم ما نوصل كاس العالم

تحياتي

السبت, أغسطس 15, 2009 10:57:00 ص  

مش هتدوم له كتير
مسيره يبطل يحلم
لو دامت له كانت دامت لغيره
عندنا امل فى ربنا
وزى مادمر شارون قادر يدمره
يبقى لاحى ولا ميت
يقف فى الاوفسيت كده

السبت, أغسطس 15, 2009 3:00:00 م  

ازيك يا ولد يامصري فينك
كل سنة وانت طيب
وبطل بقى بوستات الهرطقة دي علشان تفضل طيب ونحبك ولا عايز تتشال من وسطينا هااااا

الا صحيح يعني ايه هرطقة دي
تحياتي

الجمعة, أغسطس 21, 2009 9:32:00 ص  

كل سنة وأنت طيب
"عاوزين بوست جديد
:)

الأحد, أغسطس 30, 2009 6:07:00 م  

إرسال تعليق

<< Home