يَوْمِيَات وَلَد مَصْري
الخميس، فبراير 19، 2009
كلام واقف في سقف الحلق
**********************************
تحذير هام
هذا البوست يحتوي على ألفاظ ومشاهد ربما تكون غير مناسبة للأطفال أو المدونين المحافظين لذا يجب توخي الحرص عند القراءة وقد وجب التنويه لذلك...
ولغلق المدونة يمكنكم في أي وقت الضغط على زر إكس في أعلى الشاشة من جهة اليمين.
وربنا يستر علينا وعليكم.
**********************************
معلش يا جماعة فيه كلمتين فاقعني وواقفين في سقف حلقي ومأثرين بصورة مباشرة على الأجهزة العصبية والتناسلية عندي والحقيقة إني لما عرضت نفسي على أطباء أمراض الذكورة والعقم وبعد التحاليل والفحوصات والذي منه (محدش يسأل يطلع ايه الذي منه ده بلاش قلة حياء) كان رأيهم كلهم إني لازم أطرش الكلمتين اللي واقفين في زوري دول علشان أرتاح وبالمناسبة كلمة أطرش جاية من المصدر طَرَشَ أي استنطأ وهي تأتي أيضا بمعنى استفرغ أو تقيأ ومعناها اللفظي "جاب كل اللي في بطنه" بما فيها العصارة الصفرة ومعناها في قاموس اللغة الدارجة إن الموتور جاب زيت يعني محتاج يتفتح ويتعمله عمرة وتضبط التاكيهات بتاعته مع شد سلك الكلاتش وفنشرة البربأ وتسلمني نضيف أسلمك نضيف.
الحقيقة إن الكلمتين اللي حزقني دول (طبعا واحد رزل هيسأل هما مش كانوا في سقف الحلق دلوقتي طيب إيه اللي نزلهم تحت وهرد عليه بأغنية عدوية حبه فوق وحبة تحت) المهم إن الكلمتين بيندرجوا تحت بند الكلام في السياسة، ومع إني كنت حلفت ميت يمين قبل كده إني أبطل كلام عن السياسة وسنينها السوده وتبت إلى الله توبة نصوح ورجعت عما قلته أو كتبته وندمت عما فعلته في حق السياسة والساسة والسياسيين إلا إن للأسف الشديد نتيجة لنفسي الضعيفة والهوى والشيطان وقبلهم طبعا أفعال الحكومة اللي ما يعلم بيها إلا ربنا هضطر إني أرجع أتكلم تاني في السياسة وربنا يعوض عليا في العشرة مساكين اللي هضطر أطعمهم كفارة اليمين الغموس.
قبل ما أقول إيه هما الكلمتين اسمحوا لي يا جماعة أحكي لكم حكاية بطلها الزعيم جحا. الحكاية بتقول إن جحا كان عنده حمار وكان يا ولاد جحا بيحب الحمار بتاعه جدا جدا، وفي يوم من ذات الأيام ضاع الحمار، قعد جحا يدور على الحمار يدور على الحمار بدون أي فايدة فرجع البيت وهو حزين ومهموم ولما سألته مراته عن سبب حزنه فقالها إن الحمار ضاع. تاني يوم خرج جحا من البيت وقعد يلف في الشوارع ويدور على الحمار يدور على الحمار وبرضه بدون أي فايدة فرجع البيت وهو مهموم وحزين. تالت يوم خرج جحا من بيته وقعد يلف في الشوارع ويدور على الحمار يدور على الحمار وبعدين رجع بيتهم في اليوم ده سعيد ومبسوط وطاير من الفرح وقعد يقول الحمد لله .. الحمد لله .. ألف حمد وشكر ليك يا رب.
فسألته زوجته وهيه مستبشره: لقيت الحمار
فرد جحا وقالها: لأ مالقتهوش
فسألته مراته تاني: طيب ليه انت مبسوط وفرحان وعمال تحمد ربنا؟
قالها جحا: أنا بحمد ربنا إني ماكنتش راكب على ظهر الحمار لما ضاع .. لأني لو كنت راكب عليه كان زماني ضعت انا كمان!!
الموضوع ده بيفكرني بحال الشعب المصري دايما بيبص على أي مصيبة تحصل معاه من الجانب المشرق ويحمد ربنا على المصيبة دي فمثلا لما جت شركة "طراشت" بتاعة بور سعيد ورفدت العمال بتوعها قلنا الحمد لله إن العمال بخير وصحتهم عال، ولما البوشي ضحك على الناس وخد فلوسهم قلنا الحمد لله إنه اتقبض عليه علشان ياخد جزاؤه ولما المعلم عز رفع أسعار الحديد قلنا الحمد لله إن ماعندناش أرض نبنيها، ولما تجار الأسمنت رفعوا سعر الأسمنت قلنا الحمد لله إن ماعندناش شقق بنشطبها، ولما سعر اللحمة زاد قلنا الحمد لله إننا نباتيين، ولما سعر الخضار زاد قلنا الحمد لله إن لسه فيه رز، ولما سعر الرز زاد قلنا الحمد لله عندنا العيش، ولما العيش بقى بالضرب وعليه طوابير قلنا الحمد لله إن الحكومة بتساعدنا علشان نعمل ريجيم.
السؤال دلوقتي اللي واقف في زوري يا ترى لو مصر ضاعت هل هينفع نعمل زي جحا ونحمد ربنا إننا ماضعناش معاها؟
التسميات: وجهة نظر
36 Comments:
الحمد لله انهم سرقوا الحمار
سموا الحمار
جابوا للحمار سرطان
سرقوا كلية الحمار
الحمد لله الحمار لسه عايش بعد كل ده
وأهم من كده أن البغل لسه معانا برضه
ورغم ان البغال لا تنجب بيقولوا جاب لينا بغل مناسب يكمل معانا المسيرة
وسمعني من فضلك اغنية بحبك ياحمار
بص انا معاك ان فى سلبية بس مش للدرجادى يعنى فى لسة ناس بتقف وتعمل اضراب وكدة ولو مش مصدقنى فى دلوقتى فى اسكندرية اضرلب داخل المينا وما فيهاش شغل من يومين يعنى لسة فى ناس ما وصلتش لمرحلة جحا
تحياتى
احمد الشاعر
أه المشكله مش فى مصر
المشكله فى الحمار إللى تاه فى ظروف غامضه
تفتكر راح فين ... ومين المسؤول عن غياب الحمار بالشكل المفاجئ ده
لازم نعقد لجنه علشان نعاقب المسؤول عن ضياع الحمار
أو تفتكر الحمار ضاح وفق خطه موضوعه وضمن منظومه متنظمه
اه هو ده اكيد كل شيئ مدروس ومحسوب
البلدى فيها حكومه .. أه حكومه كل شيئ بيضيع وفق خطه متنيله بنيله
وسمعنى أغنية 145 جنيه أعمل بيهم أيه ولا أيه
أزال المؤلف هذا التعليق.
لو مصر ضاعت لا قدر الله
هنحمد ربنا إننا موجودين
لأننا إحنا اللي هنرجعها
وهنرجع كل الأرض
ده وعد ربنا
بس إمتى
فالله أعلى وأعلم
ياااااااااااااااااربى انت رجعت تانى للعادة المضرة دى
مافيش فايدة باين و لا ايه
ماعليكم .. ندخل فى الموضوع
مين قال ان الشعب سلبى هو بس صبور شوية يعنى بيحاول انه مايجبش اخره
بس لما الحكومة بتزودها بيجيب اخره و يظهر العين الحمرا اللى بردو مابتعملش حاجه غير بس تدخل بسيط .. بس اهو نص العمى ولا العمى كله
لسه موضوع جحا ماوصلش عندنا ... وربنا يستر بقى بعد البوست بتاعك ده هيحصل ايه
اهو انت كده فتحت عين الشعب على الموضوع و ممكن يعمل زيه و ذنبهم فى رقابتك بقى
و ساعتها انا هطلب بوقفك نهائى من بلوجر واحالة اورقك للمفتى
والله ما عارفه اقولك ايه؟
بس تفتكر دى حاجه كويسه ولا وحشه؟
اننا بنبص للجانب المشرق
ماهو احنا لو بصينا للناحيه التانيه
كان زمان الشعب كله مات من الحسره
اجمل مافى الشعب المصرى انه ابن نكته وبيضحك حتى على نفسه
وبيحاول يتكيف مع مشاكله
من اخر احنا شعب لقطه
اه والله شعب لقطه
وانا زى ايمان عايزه اسمع اغنية ال 145 ج اعمل بيهم ايه ولا ايه
على فكره الكمبيوتر اتقطعت عنه الكهربا وانا باكتب لك التعليق
هو العيب فين بالضبط
فى البوست ولا فى اللى كاتبه؟
لان اكيد مش فى انا ولا فى جهازى
(وش بيطلع لسانه)
ممممممممممممممممممممم
الموضوع خطير فعلا
الحالة دى يابنى عندك من امتى؟؟
متخفش الموضوع بقى فى ايدنا..وكلوا على الله ام هند بقى
***************
**عشان وقفنا وقفة رجاله وهنفضل طول عمرنا رجاله***
ماحنا لو كنا عملنا كدة كاااااااااان زمانه مسكنا العربجى الى ماسك الحنطور.....كنا وادينه اقرب مصحة نفسية او على الاقل نعمل معاة اقل واجب..
بس تقول اييييييييييييييييييييييية
***فى النهاية**
انصح بمشاهدة فيلم الارض كتيررررررررر
مع السلامو عليكوا
عوووووووووووو
المقدمة الأولي حسستني ان في قنبلة هتفجر في وشي وتعمل بووووم
نيجي للبوست
الموضوع فعلا خطير جدا والمشكلة ان ده اصبح الحال فعلا
مش عيب نحمد ربنا علي اي حال العيب اننا نحمد ربنا علي سلبيتنا
والمصيبة اننا عارفين اننا سلبيين وبرضه راضين وساكتين
الحمدلله
دكتورة ستيته
الحمد لله انهم سرقوا الحمار
سموا الحمار
جابوا للحمار سرطان
سرقوا كلية الحمار
*********************
يا ساتر يا رب كل ده حصل للحمار وهو مش واخد باله أما صحيح حمار فعلا
الحمد لله الحمار لسه عايش بعد كل ده
وأهم من كده أن البغل لسه معانا برضه
*********************
فكرتيني بنكته ان الريس راح يزور مزرعة أبقار وبعدين بيسألهم هي البقرة دي نوعها ايه فقالوله نيوزلندي وبعدبن راح لبقرة تانية وسأل نفس السؤال فقالوله دي استرالي يا فندم وبعدين وهو ماشي شاف ثور فبيسألهم والتور ده منين قالوله لأ يا فندم دي مرايا :))
تحياتي
السلام عليكم
حضرتك مغترب زيي انا بردو عايزة اروح مصر لاني بحبها مهما كانت
ربنا يوعدنا
.....
انا يمكن ماليش في السياسه أوي غير عن موضوع غزة بس اللي كان شاغلني لإني مبحبش الأخبار لغاية وقت كان قريب أصل ماما وبابا كانوا يجيبوا الأخبار وبكدا يضيع عليا الكارتون اللي انا متبعاه
ههههههههههههههه
عشان كدا ماليش فيها أوي أنا بدأت اهتم اهو يعني في تقدم
اي ده دا انا بحكيلك قصة حياتي
ررغايه بعيد عنك
المهم يعني
حلو طرحك للموضوع
موضوع يستاهل اننا نتكلم عنه
بس ياترى ايه الصح ما احنا نظرتنا تكون ايجابيه بس بردو لازم نتحرك
مش كدا ولا ايه
~~~~~~~
على العموم فرحت بوجودي هنا وان شاء الله مش المرة الأخيرة
بس صح هو ايه اللي خلى حضرتك تحلف انك متتكلمش في السياسه (تطفل بقى)
دمت بكل ود
تحيــــــاتي
الصبر مفتاح الفرج
وهي من موروثات شعبنا
و اصبر ع الجار السو يا يرحل يتجيله مصيبه تاخده
هذه احاديثنا السلبيه عن الصبر و لا توجد امثال عن الايجابيه
و حمار عمنا جحا دايما مغلبنا بحواديته
تحياتي
انت فين كل المده دى؟
ومش بترد على التعليقات ليه؟
انا كده بدأت اقلق عليك
اوعى تكون ربنا هداك وبطلت لماضه
اتأخرت علينا المرة دى اتمنى ان يكون خير
تحياتى
احمد الشاعر
علاء باشا
إزيك يا صديقي
معلش سامحني غيبت عن الناس كلها فترة طويلة
إيه يا عم كم الترجيع ده
ثم لما تعوز تطرش إبقى إنهدلي نطرش سوا المرة اللي جاية
;)
تحياتي يا باشا
ههههههههههههههههههههههه
انته عارف انا حالتي النفسية وحشه جدا والله بس بجد قريت البوست ده وضحكت من قلبي اصل هم يبكي وهم يضحك باين
بص هقول لك حاجة انا فعلا كنت زيك عمال بدور على حل بس لما تلاقي ان كتير من الشباب مبسوط ومعندش اي مشاكل وكل همه في الحياة انه يعاكس دي ويشرب السيجارة دي وانته عارف الباقي يبأه فعلا البلد دي الواحد ميستاهلش انه يفكر لها
اه عارف ان زي مافي الوحش في الكويس بس خلاص الواحد زهق وفعلا لو جت للواحد فرصه انه يهج من البلد دي هيكون
تحياتي
ايه ده ضحكتنا
بس مصر تضيع ازاي ما تخافش انا معلماها بعلامة مهمة جدا انا بس اللي عارفاها لو ضاعت قولي وانا اطلع ادور عليها وان شاء الله ترجع بس اهم حاجة تبقى انت مش فيها عشان تبقى تعرف تقولي
تفائلوا بصوا علىالنص المليان ايه التشاؤم ده الدنيا وردي مليتو البلد
شكرا ليك وصيتك المنديل
نداء الى ولد مصرى
الدواء فيه سم قاتل هههههههه
اين انت يا ابنى
لعل المانع خير:))
آسف جدا يا جماعة على التأخير في الرد وبإذن الله سوف تتوالى الردود تباعا (ايه الكلام المجعلص ده)
ما علينا
نبتدي وربنا يسهل
أحمد الشاعر
بص انا معاك ان فى سلبية بس مش للدرجادى يعنى فى لسة ناس بتقف وتعمل اضراب وكدة ولو مش مصدقنى فى دلوقتى فى اسكندرية اضرلب داخل المينا وما فيهاش شغل من يومين يعنى لسة فى ناس ما وصلتش لمرحلة جحا
*********************
مصدقك يا ريس
مش الاضراب ده اللي كان عمله فريد شوقي لما كان عاوز يعمل نآبة لعمال المينا ولا ده كان في السكة الحديد؟
منورني يا ريس وشكرا على سؤالك عليا
تحياتي
إيمان
المشكله مش فى مصر
المشكله فى الحمار
********************
تقصدي مين بالظبط إوعى يكون اللي بالي
تفتكر راح فين ... ومين المسؤول عن غياب الحمار بالشكل المفاجئ ده
********************
والله ما اعرف .. برئ يا بيه
لازم نعقد لجنه علشان نعاقب المسؤول عن ضياع الحمار
*******************
طيب ولو طلع المسئول عن ضياع الحمار هو رئيس اللجنة نعمل ايه؟
أو تفتكر الحمار ضاع وفق خطه موضوعه وضمن منظومه متنظمه
*******************
ده اللي هتقرره اللجنة الفرعية المنبثقة من اللجنة الرئيسية والتي تم تشكيلها بناءا على توصيات جمعية بهايم بلا حدود
اه هو ده اكيد كل شيئ مدروس ومحسوب
******************
دلوقتي هتطلع البنت الشغالة في البلكونة وتنفض السجادة وهي بتغني العتبة جزاز والسلم نايلو في نايلو
البلددى فيها حكومه .. أه حكومه كل شيئ بيضيع وفق خطه متنيله بنيله
********************
إنتي اللي بتقولي .. بس طيبين والله
وسمعنى أغنية 145 جنيه أعمل بيهم أيه ولا أيه
********************
انا رأيي تتصدقي بيهم اهم برضه ينفعوكي في الآخرة
هو يعني يبقى لا دنيا ولا آخره
شكرا على الزيارة واعتذر عن التأخير واتمنى دوام التواصل (3 في 1)
تحياتي
سلوى
لو مصر ضاعت لا قدر الله
هنحمد ربنا إننا موجودين
لأننا إحنا اللي هنرجعها
********************
المصريين أهمه
حيوية وعزم وهمة
وهنرجع كل الأرض
********************
علشان كنا رجالة ووقفنا وقفة رجالة
ده وعد ربنا
بس إمتى
فالله أعلى وأعلم
*********************
ونعم بالله
اعتذر عن التأخير على الرد وشكرا للزيارة
تحياتي
سويت فايوليت (ما كانت ضد التيار بالعربي وكانت أسهل في الكتابة)
ياااااااااااااااااربى انت رجعت تانى للعادة المضرة دى
********************
تقصدي أنهي واحدة بالظبط
مافيش فايدة باين و لا ايه
*********************
باين ولا ايه
مين قال ان الشعب سلبى هو بس صبور شوية يعنى بيحاول انه مايجبش اخره
*********************
آخره ده يطلع فين بالظبط؟ وبعدين هو عنده ايه يخاف عليه يعني فرضا ماصبرش ايه اللي هيحصل فيه اكتر من كده
بس لما الحكومة بتزودها بيجيب اخره و يظهر العين الحمرا اللى بردو مابتعملش حاجه غير بس تدخل بسيط .. بس اهو نص العمى ولا العمى كله
********************
والله انا شايف العمى كله هيكون أرحم
لسه موضوع جحا ماوصلش عندنا ...
*******************
معلش الغايب حجتع معاه
وربنا يستر بقى بعد البوست بتاعك ده هيحصل ايه
********************
شاكلك كده عارفه حاجة ومخبية عليا
اهو انت كده فتحت عين الشعب على الموضوع و ممكن يعمل زيه و ذنبهم فى رقابتك بقى
*******************
ما أنا كتبت تنويه في أول البوست إن المفروض محدش يدخل يقرأ غير المدونين الغير محافظين على حياتهم طيب اعمل ايه تاني
و ساعتها انا هطلب بوقفك نهائى من بلوجر واحالة اورقك للمفتى
********************
اعتبر ده وعد
تحياتي
عاشقة الرومانسية
والله ما عارفه اقولك ايه؟
بس تفتكر دى حاجه كويسه ولا وحشه؟
*******************
وحشة طبعا إوعي تجربيها
اننا بنبص للجانب المشرق
ماهو احنا لو بصينا للناحيه التانيه
********************
هو احنا هنعدي الشارع ولا ايه .. ماترسيلك على ناحية انا دماغي لفت
اجمل مافى الشعب المصرى انه ابن نكته
**********************
تقصدي انه ابن غير شرعي؟
وبيحاول يتكيف مع مشاكله
*********************
هو فعلا أحسن شعب بيتكيف
من الاخر احنا شعب لقطه
اه والله شعب لقطه
*********************
خلاص هشتري بس انتي برضه تراعينا في السعر
وانا زى ايمان عايزه اسمع اغنية ال 145 ج اعمل بيهم ايه ولا ايه
***********************
هاتوا كمان 23 واحد ويبقى من حقكم تعملوا حزب
وممكن تسموه حزب العمل ب145 جنيه الديمقراطي الشعبي الاشتراكي الوحدوي التقدمي
تحياتي
عاشقة الرومانسية تاني
على فكره الكمبيوتر اتقطعت عنه الكهربا وانا باكتب لك التعليق
هو العيب فين بالضبط
فى البوست ولا فى اللى كاتبه؟
*********************
في الشخص اللي كان المفروض يدفع فاتورة الكهربا ومادفعهاش :)))
معلش هو ده نظام شركة الكهربا اللي مابيدفعش الفاتورة لمدة 3 شهور متواصلة بيقطعوا عنه الكهربا
عالم ظالمة بقى هتعملي ايه
(مافيناش من زعل)
تحياتي
كيكي
ممممممممممممممممممممم
الموضوع خطير فعلا
الحالة دى يابنى عندك من امتى؟؟
*******************
من ساعة ما ابتديت تدوين يا دكتور
ماحنا لو كنا عملنا كدة كاااااااااان زمانه مسكنا العربجى الى ماسك الحنطور.....كنا وادينه اقرب مصحة نفسية او على الاقل نعمل معاة اقل واجب..
***********************
طيب وسباطة الموز ممكن تاخد برضه دور البطولة في فيلم الجبنة والبطيخ
بس تقول ايييييييييييييييية
***فى النهاية**
انصح بمشاهدة فيلم الارض كتيررررررررر
***********************
ويا ترى الكلام ده قبل الأكل ولا بعده
مع السلامو عليكوا
*******************
وعليكم السلام ورحمة الله وبركاته .. اتفضل
مع تحياتي
زهرة الجنة
المقدمة الأولي حسستني ان في قنبلة هتفجر في وشي وتعمل بووووم
**********************
ايه ده؟ هي مانفجرتش
آدي آخرة التعامل في البوستات الفاسدة
الموضوع فعلا خطير جدا
**********************
استر يا رب
مش عيب نحمد ربنا علي اي حال العيب اننا نحمد ربنا علي سلبيتنا
*********************
أنا رأيي نحمد ربنا حتى على السلبية لأننا لو استنينا حاجة ايجابية نحمد ربنا عليها يبقى كده هنكفر
والمصيبة اننا عارفين اننا سلبيين وبرضه راضين وساكتين
الحمدلله
**********************
شفتي إزاي بقى أهو ده قصدي
تحياتي
بسمة صلاح
السلام عليكم
*********************
وعليكم السلام ورحمة الله وبركاته
حضرتك مغترب زيي انا بردو عايزة اروح مصر لاني بحبها مهما كانت
ربنا يوعدنا
*********************
تقولش هتطلع تحج :)
يا ستي ربنا يوعدك بزيارتها وتصلي ركعتين في الهرم أو في الحرم الجامعي :))))
انا يمكن ماليش في السياسه أوي غير عن موضوع غزة بس اللي كان شاغلني لإني مبحبش الأخبار لغاية وقت كان قريب أصل ماما وبابا كانوا يجيبوا الأخبار وبكدا يضيع عليا الكارتون اللي انا متبعاه
*********************
بالعكس السياسة هتلاقيها بتضحك أكتر من الكرتون جربي كده ومش هتندمي
عشان كدا ماليش فيها أوي أنا بدأت اهتم اهو يعني في تقدم
***********************
اكيد استمري على الفرجة على نشرات الأخبار مرتين في اليوم وانتي هتبقى زي الفل
اي ده دا انا بحكيلك قصة حياتي ررغايه بعيد عنك
*******************
الكل هنا بيدخل يفضفض ماتقلقيش
حلو طرحك للموضوع
موضوع يستاهل اننا نتكلم عنه
بس ياترى ايه الصح ما احنا نظرتنا تكون ايجابيه بس بردو لازم نتحرك
مش كدا ولا ايه
**********************
انا شايف انك ترجعي تتفرجي على أفلام الكرتون تاني :))))))))))))
على العموم فرحت بوجودي هنا وان شاء الله مش المرة الأخيرة
*********************
اعتبر ده وعد
بس صح هو ايه اللي خلى حضرتك تحلف انك متتكلمش في السياسه (تطفل بقى)
********************
الدكاترة مانعوني اني اتكلم في السياسة من ساعة اللومباجو ما نأح عليا
هنتظر زيارتك التانية
تحياتي
دكتور أحوال
الصبر مفتاح الفرج
وهي من موروثات شعبنا
و اصبر ع الجار السو يا يرحل يتجيله مصيبه تاخده
***********************
ايوة طبعا احنا شعب صبور بطبعنا مش صبرنا على فرعون القديم يحكمنا 70 سنه خلاص نستحمل بقى الأربعين سنه اللي فاضلة
تحياتي
عاشقة الرومانسية
انت فين كل المده دى؟
ومش بترد على التعليقات ليه؟
انا كده بدأت اقلق عليك
اوعى تكون ربنا هداك وبطلت لماضه
********************
ألف شكر على سؤالك وبعتذر عن التأخير وبالنسبة للماضة إدعي انتي بس بذمة ان ربنا يهديني وماتقلقيش
تحياتي
الشاعر
ربنا يكرمك يا أبو حميد على سؤالك ده العشم برضه
تحياتي
علاء عواد
علاء باشا
إزيك يا صديقي
معلش سامحني غيبت عن الناس كلها فترة طويلة
**********************
ايه يا عم الكلام اللي يوجع القلب ده المهم اننا نطمن على بعض
إيه يا عم كم الترجيع ده
ثم لما تعوز تطرش إبقى إنهدلي نطرش سوا المرة اللي جاية
**********************
طيب ما نعمل الحفلة دي عندك في المدونة؟
على العموم منورني بدون طرش يا ريس
تحياتي
وايت هارت
انته عارف انا حالتي النفسية وحشه جدا والله بس بجد قريت البوست ده وضحكت من قلبي اصل هم يبكي وهم يضحك باين
********************
الحمد لله ان الموضوع خرجك من اللي كنت فيه ولو ان مافيش حاجة تستاهل الهم ده كله
بص هقول لك حاجة انا فعلا كنت زيك عمال بدور على حل بس لما تلاقي ان كتير من الشباب مبسوط ومعندش اي مشاكل وكل همه في الحياة انه يعاكس دي ويشرب السيجارة دي وانته عارف الباقي يبأه فعلا البلد دي الواحد ميستاهلش انه يفكر لها
**********************
طيب ما احنا لو مافكرناش للبلد دي امال هنفكر لانهي بلد؟ للصومال مثلا :))
أهي البلد دي أحسن من غيرها
عارف ان زي مافي الوحش في الكويس بس خلاص الواحد زهق وفعلا لو جت للواحد فرصه انه يهج من البلد دي هيكون
***********************
عين العقل يا ريس وسيبهالهم مخضرة
تحياتي
فكرة من الزمن ده
بس مصر تضيع ازاي ما تخافش انا معلماها بعلامة مهمة جدا انا بس اللي عارفاها لو ضاعت قولي وانا اطلع ادور عليها وان شاء الله ترجع
***********************
هي العلامة فين؟
الا انتي مش واخده بالك ان مصر تاهت وبيدوروا عليها
طب يلا شدي حيلك كده
بس اهم حاجة تبقى انت مش فيها عشان تبقى تعرف تقولي
**********************
أمنيتك تحققت أهه أنا مش فيها بلاش حجج فارغة بقى وورينا شاطرتك
تفائلوا بصوا علىالنص المليان ايه التشاؤم ده الدنيا وردي مليتو البلد
***********************
تقصدي بالنص المليان النص اللي ساكنه 40 مليون تحت خط الفقر حاضر هنبص عليه علشان أم التفاؤل اللي انتي عايشة فيه :)))
صحيح ملينة البلد مش 80 مليون متشاءم
شكرا ليك وصيتك المنديل
*********************
دستة بحالها ولا يهمك
تحياتي
برينسيس
نداء الى ولد مصرى
الدواء فيه سم قاتل
*******************
يا ترى مين اللي حطلي السم ده ما انا عارف اللي بيعزوني كتير
اين انت يا ابنى
لعل المانع خير:))
********************
شكرا على سؤالك - المانع خير الحمد لله
تحياتي
إرسال تعليق
<< Home