يَوْمِيَات وَلَد مَصْري
الجمعة، يوليو 24، 2009
عودة للتدوين
بعد اهلا وسهلا وسلامات وطيبون والعواف ونهاركم سعيد وبون وي وبون جور وجودن مورجن وجودن ناخت .. ببعت أحلى سلام وأحلى تحية .. تحية كبيرة قوي وتحية عظيمة وتحية كاريوكا لكل نفر سأل علينا في غيبتنا وكل نفر ساب تعليق في مدونتنا وبنقول للجميع ألف ألف شكر وربنا يديم المعروف .. مع تحيات فراشة ولد مصري.
بادئ ذي بدء (الكلمتين دول دايما بيجوا في امتحان الإملاء للصف السادس الإبتدائي علشان فيهم همزات كتير والعيال الغلابة طبعا مابيعرفوش يكتبوهم وبيسقطوا .. وهي العيال دلوقتي فاضية للهمزة اللي على النبرة والهمزة اللي على السطر، دول يا دوب بيعرفوا يشتهجوا اسمهم بالعافية) .. المهم وأنا قاعد كده في قاعدة صفا (أو إنتباه مش فاكر بالظبط) قلت في عقل بالي (ايه عقل بالي دي .. مش مهم) انت يا واد يا مصري نقصك حاجة مهمة جدا .. حاسس كده ان فيه حاجة نقصاني .. قلت يمكن جعان .. فتحت التلاجة وتنحت قدامها يجي خمس دقايق وبعدين قلت "لع" ديه مش جوع يا واد يا مصري .. قلت يمكن "عشطان" ونفسي في "كان ببث" وبرضه قلت لأ مش هوه ده .. قلت جايز الشعور الغريب ده اللي أنا أول مرة أحس بيه سببه إن ربنا مد في عمري وعشت لما شفت الأهلي بقى يتغلب .. وبعدين قلت برضه لأ ... فيه حاجة تانية .. أيوة أيوة .. ابتديت أعرف انا عاوز ايه بالظبط .. انا عاوز الحاجة اللي قعدت سنه كاملة من حياتي بعملها وبعدين بطلتها في ظروف غامضه (غير اني كنت بلعب في مناخيري وأنا صغير) الحاجة دي هي التدوين .. حاسس إن نفسي غمه عليا وعاوز أطرش كلمتين أنزلهم في بوست جديد .. ياااااااااااه من زمان قوي ماكتبتش .. ده أنا حتى مش عارف هكتب أقول إيه .. ولا هبتدي إزاي .. بس مش مهم .. أنا عارف إن المدونين دول ناس طيبين وبيستحملوا أي حد وأي كلام بيتكتب لأنهم عارفين إن أي حد بيدون فهو بيدون لنفسه وبيفضفض معاهم والغريب كمان إنهم بيشجعوه إنه يكتب ويفضفض كمان وكمان.
دخلت على الورد (طبعا قصدي مايكرو سوفت وورد مش الورد اللي بنشمه .. بلاش نصاحة .. ايه فاكرني بكتب على ورق باردي) وابتديت أكتب .. كتبت كل اللي انا بعمله وكل اللي أنا حاسس بيه من غير رتوش أو أدوات تجميل .. محاولتش أحط النقط فوق الحروف .. محاولتش أزين الكلام .. كنت بكتب لنفسي .. زي ما كنت متعود قبل كده .. وفعلا حسيت بسعادة وحسيت براحة .. لأني رجعت تاني لبيتي القديم.
البوست ده ممكن تعتبروه بوست تسخين أو احماء وان شاء الله البقية تأتي بس قبل ما أنهي البوست الغريب ده .. وبمناسبة إنتهاء الدراسة ، افتكرت في أيام المدرسة وأنا في إعدادي كنت في مدرسة طبري روكسي وكان فيه شعار للمدرسة لازم كنا نقوله كل يوم الصبح في طابور الصباح ، الشعار ده كان بيقول ايه:
بم شيكا بم .. بم شيكا بم
هفسا هفسا هيه
ط ب ب ر ي – ط ب ب ر ي
احنا الطبري بمب حديد بمب حديد يا هيه
الحمد لله الذي عافانا مما ابتلى به كثيرا من الناس وفضلنا على كثيرا ممن خلق تفضيلا
أشوفكم في بوست جديد بإذن الله
29 Comments:
اخيراااااااااااااااااااا رجعت وظهرت
نورت التدوين وفضفض براحتيييييييك
بس حلو الشعار بتاع الطبري دا ميييييييييييين الفه نفسي اشوفه ههههههههه
:) منور
حمدلله على السلاااااااااااااااااااااااااااااااااااااااااااااااااااامة
كفارة ياراجل
مش عارفة ليه حاسه كده فى البوست ده بشماته واااضحة طبعا عارف انا اقصد ايه
شكلك اصلا راجع بسببها هه
جد بقى حمدلله على السلامة
وبلاش الغيبة دى تانى
^_^
يابنتي دول كانو بينامو يحلمو بيها وبيراحو لدجالين وبيرموا حاجات في الملعب يالهوووووووووووووووي والله صعبوا علياااا ههههههههههههههههههههههههههههه
كيارا
اخيراااااااااااااااااااا رجعت وظهرت
===================
الناس تقول حمدا لله على السلامة .. عودا حميدا .. كفارة .. مش ... أخيرا رجعت
إنتي ناقصة تقولي إنت ايه اللي جابك تاني :))))
تصدقي كده شكلي هندم إني رجعت للتدوين :))
طبعا بهزر
تحياتي
كيارا تاني
نورت التدوين وفضفض براحتيييييييك
=====================
أهو كده آدي الكلام ولا بلاش
بس حلو الشعار بتاع الطبري دا ميييييييييييين الفه نفسي اشوفه ههههههههه
===================
غالبا إسمه بم شيكا بم وده الإسم الثلاثي للمؤلف وقال فرصة أخلي الطلبه يهتفوا بإسمي
تحياتي
باشمهندس مصري
:) منور
================
ربنا يخليك يا باشمهندس ..
وشكرا على الزيارة
تحياتي
الف الحمد لله على السلامه تصدق انا بقالي زمن معلقتش عند أي حد بس قلت مش معقول ولد مصري يرجع بعد الغيبة ومنقولش حمدلله على السلامه
واعتقد ان مادام ربنا مد في عمرك وشفت الأهلي بيتغلب يبقى مش بعيد تشوف الزمالك بيتعادل قول يااااااااارب :))))
نورت التدوين من تاني وحلو موضوع شيكا بوم ده ممكن يبقى شعار المدونة في المرحلة القادمة :))
تحياتي
ولولولولوولللىىىىىىىىىىىىىىىىىى
لولوولاىىىىىىىىىىىىىىىىىىىىىىىىى
كل دة بتجيب كيس ملح ياجدع!!
ومن ساعتها ماشفتوش
حمد الله ع السلامه ايوة كدة ارجع وفضفض وقول اناشيد غريب
نورت مصر
سويت فايوليت
حمدلله على السلاااااااااااااااااااااااااااااااااااااااااااااااااااامة
========================
الله يسلللللللللللللللللللللللللللللللمك
كفارة ياراجل
===================
السجن للجدعان يا معلم
مش عارفة ليه حاسه كده فى البوست ده بشماته واااضحة ====================
أعوذ بالله هو أنا برضه وش ذلك
طبعا عارف انا اقصد ايه
====================
طبعا قصدك على موضوع هفسا هفسا هيه
شكلك اصلا راجع بسببها هه
======================
هي مين دي .. إنتي عاوزة توديني في داهية
جد بقى حمدلله على السلامة
وبلاش الغيبة دى تانى
=====================
الله يسلمك .. قولي يا رب
تحياتي
كيارا تالت مرة
يابنتي دول كانو بينامو يحلمو بيها وبيراحو لدجالين وبيرموا حاجات في الملعب
=====================
دجل ايه وشعوذه ايه اللي بتتكلمي عليهم دول .. الله يرحم العجل اللي الأهلي دبحه في 2003 والخمسة وخميسة اللي حطوها على العارضه .. هييييييييه أيام
يالهوووووووووووووووي والله صعبوا علياااا
=======================
ما يصعبش عليكي فريق يا هانم
ههههههههههههههههههههههههههههه
======================
اول مرة اشوف ضحكة راكنة صف تاني :))
تحياتي
بيربل ويفز
الف الحمد لله على السلامه تصدق انا بقالي زمن معلقتش عند أي حد بس قلت مش معقول ولد مصري يرجع بعد الغيبة ومنقولش حمدلله على السلامه
====================
الواحد مش عارف يودي جمايلكم دي فين
واعتقد ان مادام ربنا مد في عمرك وشفت الأهلي بيتغلب يبقى مش بعيد تشوف الزمالك بيتعادل قول يااااااااارب :))))
====================
يااااااااااارب مافيش حاجة بعيدة عن ربنا
نورت التدوين من تاني وحلو موضوع شيكا بوم ده ممكن يبقى شعار المدونة في المرحلة القادمة :))
====================
فعلا فكرة جيدة إني أضع الشيكا بوم كشعار جديد للمدونة بجانب الهفسا هيه والتي أثبتت فاعلية عميقة في صناعة البمب حديد ياهيه .. أشكرك ايتها الرفيقة بيربل على هذا الاقتراح البعبعبلي
تحياتي
كيكي عووووو
ولولولولوولللىىىىىىىىىىىىىىىىىى
لولوولاىىىىىىىىىىىىىىىىىىىىىىىىى
=======================
ده انا لو فرحي النهاردة ما كنتش سمعت الزغاريد دي كلها
كل دة بتجيب كيس ملح ياجدع!!
ومن ساعتها ماشفتوش
=====================
هو مين اللي ضحك عليكي وقالك اني رايح أجيب ملح
حمد الله ع السلامه
======================
الله يسلمك
ايوة كدة ارجع وفضفض وقول اناشيد غريبه
=====================
أفهم من كده إن كل اللي عجبك في كلامي الأناشيد الغريبة وبس .. هو انا اعتزلت التدوين من شوية
نورت مصر
===================
تصحيح بسيط مصر منورة بـــ....................
سبب الكهربا اللي جاية من السد العالي :))))
تحياتي
حمد الله
اخيرا رجعت وبرضو ناسي المنديل
مش معقول كده هافضل افكرك لحد امتى ياولد يامصري
هههههههههه
بتلعب في مناخيرك ما انا قلت الصورة دي اكيد صورتك ايام شبابك
خلاص المنديل عليا المرة دي طالما اعترفت الاعترافات الموزهلة دي
تحياتي وماتغيبش تاني
أزال المؤلف هذا التعليق.
اوعى تقول كده ياولد
ولازم تستمر وتكمل معانا لان غيابك بيترك فراغ في العالم الافتراضي
التدوين عالمم زي الفسيفساء
لازم التجانس والاختلاف
شعر وقصةكوميديا اخبار خواطر كلناا بنكمل بعض
اشكرك وتحياتي
حمد الله على سلامتك
وحشتنا جداااااااااا
وحشتنى بوستاتك وتعليقاتك وردودك اللى بتخلينى اقيم فى مدونتك ومش بابقى عايزه امشى منها
(:
يااااااااارب مش تغيب تانى
تعرف ان الريدر عندى طار وانا باغير قالب المدونه؟
ودوخت عليك علشان الاقى مدونتك عند حد؟؟؟؟؟؟؟ ابداااااااا
ولقيتها عند فكره من الزمن ده صدفه
ورب صدفه خير ان شاء الله
حمد الله
اخيرا رجعت وبرضو ناسي المنديل
===================
هو أنا مخي دفتر
مش معقول كده هافضل افكرك لحد امتى ياولد يامصري
هههههههههه
=====================
لحد لما نشوف عيلة بتحكم المحروسة غير عيلة مبارك
بتلعب في مناخيرك ما انا قلت الصورة دي اكيد صورتك ايام شبابك
=====================
كويسة :))
خلاص المنديل عليا المرة دي طالما اعترفت الاعترافات الموزهلة دي
====================
فعلا هي اعترافات موز....هلة :)))
تحياتي وماتغيبش تاني
====================
قولي يا رب
خالص تحياتي
فكرة من الزمن ده (التعليق التاني)
...
اوعى تقول كده ياولد
======================
حا ضر حاضر مش هعمل كده تاني
ولازم تستمر وتكمل معانا
=======================
بس أنا ليا شروط عاوز عربية وموبايل
لان غيابك بيترك فراغ في العالم الافتراضي
التدوين عالمم زي الفسيفساء
لازم التجانس والاختلاف
شعر وقصةكوميديا اخبار خواطر كلناا بنكمل بعض
======================
في الواقع ده بيعتمد على زاوية الرؤية للبحث المطروح للنقاش فلو كانت دائرة إهتمام الأنا تعي الآخر وتضعة في بؤرته الطبيعية في هذا العالم الإفتراضي لكان من الممكن للفراغ المذكور أن يمتلئ بآخر من نفس الفصيل
ولكن هيهات
الخلاصة انا بشكرك جدا على كلماتك الرقيقة وبتفق معاكي في كلامك عن التدوين
اشكرك وتحياتي
=====================
ده انا اللي متشكر جدا
خالص تحياتي
عاشقه الرومانسيه
حمد الله على سلامتك
======================
الله يسلمك
وحشتنا جداااااااااا
وحشتنى بوستاتك وتعليقاتك وردودك اللى بتخلينى اقيم فى مدونتك ومش بابقى عايزه امشى منها(:
=====================
مش للدرجة دي يعني
أنا كده هصدق
يااااااااارب مش تغيب تانى
===================
ربنا يخليكي وان شاء الله تكون نهاية فترات الغياب
خالص تحياتي
عاشقة الرومانسية 2
تعرف ان الريدر عندى طار وانا باغير قالب المدونه؟
======================
تصدقي ما كنتش أعرف إن الريدر بيعرف يطير أنا كنت فاكره من فصيلة الزواحف :))
ودوخت عليك علشان الاقى مدونتك عند حد؟؟؟؟؟؟؟ ابداااااااا
======================
معلش ليا رب اسمه الكريم
ولقيتها عند فكره من الزمن ده صدفه
=====================
طول عمري اقول عليها انها بنت حلال مصفيه
ورب صدفه خير ان شاء الله
=====================
ايه المثل العجيب ده :)))
تحياتي ليكي ولفكرة
مرحب مرحب يا مطول الغيبة
عودة حميدة
و دمتم
حمدلله علي سلامتك حضرتك
welcome back ya man
:D
ساموراي
مرحب مرحب يا مطول الغيبة
عودة حميدة
======================
اللي يسمع كده يقول كل يوم بتنزل بوست جديد :))
إلا بالمناسبة مين حميدة دي
منورة
تحياتي
زهرة
حمدلله علي سلامة حضرتك
======================
كويسة حضرتك دي
الله يسلمك
تحياتي
برينسيس
welcome back ya man
:D
======================
سانك يوووه
يعني انتي غرقتي :))
تحياتي
إرسال تعليق
<< Home