يَوْمِيَات وَلَد مَصْري
الأربعاء، سبتمبر 17، 2008
المصريين في العمرة
في شهر رمضان ناس كتير بتحب تعمل عمرة, لانها زي ما الرسول صلى الله عليه وسلم أخبر إنها بتعادل حجة وعلشان كده بتلاقي المسلمين بيأتوا من كل فج عميق ويتطوفوا بالبيت العتيق.
طبعا من أكبر الأفواج اللي بتيجي أفواج جماعتنا المصريين اللي بيشرفونا في كل مكان، ولو إنت قاعد في الحرم اول ما فوج المصريين بيدخل على الكعبة, تلاقي السلطات السعودية رفعت درجة الاستعداد الي الدرجة القصوى وده لأن جماعتنا لما بيهجموا على الحرم بتحس إنهم ماشيين في مظاهرة أو داخلين يفتتحوا القدس وتلاقي دايما في واحد متزعم المظاهرة دي وعمال يهتف والكل بيهتف وراه :
الزعيم: ربنا
المظاهرة: ربنا
الزعيم: إغفر لنا
المظاهرة: إغفر لنا
الزعيم: إرحمنا
المظاهرة: إرحمنا
وهكذا لغاية السبع أشواط لما يخلصوا وبعدين يصلوا ركعتين عند مقام ابراهيم وطيران على الصفا والمروة علشان يكملوا المسيرة هناك.
وطبعا تبقى عمرتك مش فايته لو وقع حظك في فوج من أفواج المصريين دي وانت بتطوف ولا بتسعى لانك غصبا عنك هتلاقيك اتخدت في الرجلين ومش هتعرف تقول دعوتين على بعض وده طبعا غير كمان الكام بوكس على لكمية ويمكن شلوت اللي هيكونوا من نصيبك وانت بتطوف جنبهم.
اللي بيبقى صعبان عليا في الموضوع كله إخوانا بتوع ماليزيا واندونيسيا بيبقوا ياحرام ماشيين زي الملايكة ماتسمعلهمش حس خالص وطبعا مع هجوم التتار اقصد جماعتنا المصريين بتلاقيهم يضطروا ينزحوا من جنب الكعبة علشان يطوفوا من بره خالص منعا للسفلته اللي ممكن تحدث من القطار المجري اللي بيمثل مصر ولابس إحرام.
كل ده لحد دلوقتي مافيهوش مشلكة!!
المشكلة الكبيرة بتكون في الجهل اللي عند بعض الناس وده غصبا عنك بتسمعه وانت بتطوف او بتسعى، فدي مثلا أم وبنتها واقفين قدام الكعبة دار ما بينهم الحوار التالي:
الأم: يا سلام .. اللهم صلي على النبي .. ايه الجمال ده (لحد دلوقتي مافيش مشكلة)
البنت: اللهم صلي وسلم علي النبي
الأم: هوه ده يا بنتي قبر سيدنا النبي
أنا (في سري): ابتدينا نخطرف
البنت: لأ طبعا .. قبر النبي ايه يا ماما بس .. قبر النبي ده هناك في المدينة
أنا (في سري): الحمد لله .. ربنا يكملك بعقلك
الأم: أمال ده قبر مين؟
أنا (برضه في سري): يا مثبت العقل والدين يا رب
البنت: ده قبر ربنا
أنا (بصوت عالي): لا حول ولا قوة إلا بالله .. أستغفر الله العظيم .. أستغفر الله العظيم .. يا حاجة إنتي وهيه ربنا حي لا يموت .. ده مش قبر حد .. دي الكعبة يا حاجة الكعبة الشريفة
الأم والبنت يمصمصوا شفايفهم ويعوجوا بقهم عوجه مفادها ربنا يشفيك .. ويروحوا يطوفوا ..... عند القبر!!
وان شاء الله نتقابل في يوم جديد
طبعا من أكبر الأفواج اللي بتيجي أفواج جماعتنا المصريين اللي بيشرفونا في كل مكان، ولو إنت قاعد في الحرم اول ما فوج المصريين بيدخل على الكعبة, تلاقي السلطات السعودية رفعت درجة الاستعداد الي الدرجة القصوى وده لأن جماعتنا لما بيهجموا على الحرم بتحس إنهم ماشيين في مظاهرة أو داخلين يفتتحوا القدس وتلاقي دايما في واحد متزعم المظاهرة دي وعمال يهتف والكل بيهتف وراه :
الزعيم: ربنا
المظاهرة: ربنا
الزعيم: إغفر لنا
المظاهرة: إغفر لنا
الزعيم: إرحمنا
المظاهرة: إرحمنا
وهكذا لغاية السبع أشواط لما يخلصوا وبعدين يصلوا ركعتين عند مقام ابراهيم وطيران على الصفا والمروة علشان يكملوا المسيرة هناك.
وطبعا تبقى عمرتك مش فايته لو وقع حظك في فوج من أفواج المصريين دي وانت بتطوف ولا بتسعى لانك غصبا عنك هتلاقيك اتخدت في الرجلين ومش هتعرف تقول دعوتين على بعض وده طبعا غير كمان الكام بوكس على لكمية ويمكن شلوت اللي هيكونوا من نصيبك وانت بتطوف جنبهم.
اللي بيبقى صعبان عليا في الموضوع كله إخوانا بتوع ماليزيا واندونيسيا بيبقوا ياحرام ماشيين زي الملايكة ماتسمعلهمش حس خالص وطبعا مع هجوم التتار اقصد جماعتنا المصريين بتلاقيهم يضطروا ينزحوا من جنب الكعبة علشان يطوفوا من بره خالص منعا للسفلته اللي ممكن تحدث من القطار المجري اللي بيمثل مصر ولابس إحرام.
كل ده لحد دلوقتي مافيهوش مشلكة!!
المشكلة الكبيرة بتكون في الجهل اللي عند بعض الناس وده غصبا عنك بتسمعه وانت بتطوف او بتسعى، فدي مثلا أم وبنتها واقفين قدام الكعبة دار ما بينهم الحوار التالي:
الأم: يا سلام .. اللهم صلي على النبي .. ايه الجمال ده (لحد دلوقتي مافيش مشكلة)
البنت: اللهم صلي وسلم علي النبي
الأم: هوه ده يا بنتي قبر سيدنا النبي
أنا (في سري): ابتدينا نخطرف
البنت: لأ طبعا .. قبر النبي ايه يا ماما بس .. قبر النبي ده هناك في المدينة
أنا (في سري): الحمد لله .. ربنا يكملك بعقلك
الأم: أمال ده قبر مين؟
أنا (برضه في سري): يا مثبت العقل والدين يا رب
البنت: ده قبر ربنا
أنا (بصوت عالي): لا حول ولا قوة إلا بالله .. أستغفر الله العظيم .. أستغفر الله العظيم .. يا حاجة إنتي وهيه ربنا حي لا يموت .. ده مش قبر حد .. دي الكعبة يا حاجة الكعبة الشريفة
الأم والبنت يمصمصوا شفايفهم ويعوجوا بقهم عوجه مفادها ربنا يشفيك .. ويروحوا يطوفوا ..... عند القبر!!
وان شاء الله نتقابل في يوم جديد
التسميات: يوميات
34 Comments:
تعقيبا علي موضوع العمرة ا خونا المصريين المبدعين دايما فاكر كان فيه خط يدل علي الوصول للحجر الاسود كان اخوانا الحلوين يسيبوا كل شئ ويبصوا علي الارض بيدوروا علي الخط يعطلوا السير لمل يقفوا فوق الخط و لا يتحركوا و طبعا الناس تبتدي تتدافع و هما متمسمارين فوق الخط المقدس و بعضهم بتعمد يصلي فوق الخط و لما تقول لهم بتبصوا علي الحط ليه الكعبة و الحجر الاسود قدامكم يكون عندهم نفس النظرة و معناها اللي انت و صفتها و بناءا علية تم الغاء الخط من الحرم
و بالنسبة للادعية ازيدك ان قائد جموع الهتيفة دايما محو امية ينطق الدعاء خطأ و الناس وراه
لكنهم في النهاية ناس طيبين
شفتهم في رمضان لو حد غلط و بيقدم اي عصاير او اكياس طعام الخ و تصادف مرور احدي فلايق المحاربين المصريين بالطبع هيفرموا ابوه لكنهم في النهاية ناس طيبين
و لو كنت في سكن مع ناس منهم بيعين اللي وراهم وقدمهم علشان العمرة تلاقي الحريم من الصبح في رمضان مشغولين بالطبيخ تنزل لصلاة الضهر برضك طبيخ العصر كذلك يعني مقضينها طبيخ لكنهم في النهاية ناس طيبين
كل سنة وانت طيب
السلام عليكم
هيا حكاية البنت وامها دى بجد اصل دى تبقى بيج مصيبة لو الحوار ده صحيح
اما بالنسبة للافواج المصرية فياريت يبقى فى توعية للناس اللى رايحة تعمل حج او عمرة اكتر من كده
تحياتى
انا اعرف ان المفروض الناس وهى رايحه العمره بيبقى فى حد معها للتوعيه عشان مش يحصل اللى انت بتقول عليه دا والله اعلم...
اما بقى حكايه البنت والام بجد لو حقيقه يبقى خلاص نقول على الدنيا السلام دى فعلا تبقى مصيبه زى مابرنسيس قالت
تحياتى
(:
المفروض ان الافواج بتطلع لاما تبع جمعية اهالية او تبع شركة لية باة ما يبقاش فية مرشد زاى مرشد السياحى بس دة يبقا مرشد دينى يبدا يفهم الناس اية الاى تعملة و ازاى هتبقا العمرة و ينظم الناس قبل ما تبدا و ماحدش يقولى دول بيوزعوا كتب على الناس قبل ما يسافروا
يا جماعة و يا بشر معظم الناس الكبار الطيبين جدا ما يعرفوش يقراو الكتب الاى انتوا بتوزعوها
و على فكرة مش كل الناس بتقضيها فى العمرة بتطبخ هما قلة منهم
اما باة على الحاجة و بنتهم دول مصيبة انا لو منك كنت لازم اوقفهم و افهم الانسة بنت المدارس و الا كمان الجهل باة فى التعليم و الدين
و حسبى الله و نعم الوكيل لو دة فعلا حال شباب و بنات المسلمين
يالهوووووووووووووووووووووي انا مت من الضحك وانا بقرا البوست
لحد اما وصللللللللللللت
للبنت ومامتها
وجالي حاله من الازهلال والتتنيح ووش مش فاهم بيحصل ايه
هما لو فلللللللللله خالص في الدين
مش يقولوا حاجه زي كدا
لالالالالالالالالالالالالالالالا حراااااااااام عليك تفقع مرارتي وتجبلي البربري والكساح وكل الامراض
مش ممكن بجد الحوار ده
لا حول ولا قوة الا بالله
مش عارفه اقول ايه
هههههه حرام والله الام وبنتها... مش فاهمين حاجه... هو فيه جهل... وجهل جبري مش بأرادتهم... بس هم بسفرتهم ده تلاقيهم اتعلموا...
بس بجد لازم المتوجه للعمره يكون ضمن حمله... ويكون فيه مسئول يوجه الناس... ويعلمهم ...
بس أنت إزاي قدرت تتمالك ضحكتك وقتها... ههههههههههههههههه يمكن من الصدمه...؟
انت بتكلم جد ؟؟؟
معلشى هو سؤال رخم
ومش قصدى منه انك مش صادق
بس بجد انا فى زهول
فى ناس لسه مخها متخلف كدا
طب يمكن مهمش مسلمين اصلا
وجين جولا سياحيه ولا تايهين
طب ممكن اقترح حاجه
ايه رايك بعد كدا يعملو اختبار لكل واحد معتمر ولا جى للحج
اهو يشوفوه عارف ربنا فين ولا لاء
استغفر الله العظيم
بس قلى هنا انت ازاى تروح عمره
ومتقليش
ولا هتبخل علينا بالدعوات
الله يسامحك
تحياتى
أحوال الهوى
كلامك مضبوط يا دكتور موضوع الخط بتاع الحجر الاسود ده بيدل قد ايه المصريين عندهم قدرة على تغيير مجرى التاريخ وكمان دليل على حرص المصريين على آداء المناسك زي ما الكتاب بيقول حتى لو كان على حساب بقية الخلق وان شاء الله البوست اللي جاي هعمله برضه عن نفس الموضوع علشان اللي ما يشتري يتفرج على نوادرنا في العمرة
اما بخصوص توزيع الارباح أقصد توزيع العصاير والاكل فطبعا احنا بنكون سباقين .. طبعا مش في التوزيع لكن .. في اللم
وبالنسبة للطبيخ بصراحة معاهم حق يعني الناس صايمة بلاش ياكلوا وبعدين ده يدل على تضحية المرأة المصرية في خدمة الرجل ثم ايه يعني إنهم يطبخوا في مكة ولا في المدينة .. انا متهيألي انهم لما يدخلوا الجنة ان شاء الله هتلاقيهم برضه واقفين في المطبخ بتاع القصر بيطبخوا حلل محشي وقرنبيط باللحمة المفرومة
ربنا يعين سكان الجنة اللي هيكون عندهم جار مصري
شكرا على مرورك واتمنى دوام التواصل
تحياتي
برينسيس
عليكم السلام ورحمة الله وبركاته
خير اللهم اجعله خير التعليق بتاعك "فورمال" المرة دي ربنا يستر
اللي بيحصل في العمرات والحج فوق ما يمكن تصوره وان شاء الله هكتب البوست اللي جاي عن نفس الموضوع علشان تشوفي إنها مش بيج مصيبة وبس دي مصيبة هايبر
والحقيقة إن موضوع التوعيات ده شركات السياحة بتبقى عايزة تحقق اكبر ربح وبالتالي بيوفروا تمن تذكرة المرشد الديني
ربنا يتقبل
تحياتي
شيماء
كلامك مظبوط بس ده بيبقى في الشركات الكبيرة ودي بتبقى غاليه على معظم الناس اللي بيطلعوا عمرة وبتلقيهم بيطلعوا مع جمعيات أهلية بسيطة وغالبا دول ما بيقدروش يطلعوا مرشد ديني
وبعدين المشكلة مش في البنت وامها موضوع القبور ده للاسف في مصر شئ عادي والحكومة سامحة بيه وعارفه ان فيه ناس كتير عندهم الطواف حولين القبر ده عقيده ووسيلة للتقرب الى الله وسايبنهم على الجهل اللي هما فيه ولا حول ولا قوة الا بالله
تحياتي
البنت وامها دول جايين من كوكب زحل مش من مصر، بجد لازم يكون في توعية اكتر من كده للناس اللي بتطلع الحج والعمرة عشان الكلام الفارغ اللي بيحصل ده
تحياتي
نونا
كلامك مضبوط كلمة المفروض دي كلمة كبيرة قوي
بس طبعا زي ما قلت قبل كده انهم بيبقوا عاوزين يحققوا اكبر ربح وبالتالي بيتغاضوا عن الموضوع ده
وطبعا موضوع الكتيبات العجيبة اللي مليانه ادعية دي قصتها قصة وان شاء الله هتكلم عنها البوست اللي جاي
بالنسبة للطبخ المشكلة إن القلة دي بتأثر على البقية لأن ريحة الطبخ بتبقى جامدة جدا
بلاش نجيب سيرة الدين في المدارس لان ده كارثة تانية او على رأي برينسيس بيج مصيبة
الموضوع ده هيحتاجلة مدونة كاملة للكلام عن التعليم في مصر وخصوصا التربية الدينية
تحياتي
احنا هنا عدنا لازم يكون موجد مشرف او مرشد يكون معاهم علي طول يقول لهم قبل الخروج عملوا ايه بيكون معاهم علي طول
لازم لان في ناس كثيرين مش بعرفو برضو بوزع لهم كتب
عارف احنا برضو عدنا مرشد بعملو له دورات تدريب قبل السفر
السلام عليكم ...
طبعا السعى والطواف دول من أركان العمرة وربنا فرضهم علينا
أما المشكلة فى سلوكيات الناس اللى ابتدعوها
وده ناتج من التخلف الثقافى .
تحياتى ...
عمار صبرى .
لو حبيت تعمل عمرة او تحج بكرامتك واحترامك أتنكر . ألبس هندى والا ايرانى والا حتى جزر القمر
المصرى بقى معرّة فى كل مكان ومكروة دة طبعا غير الغوغائيه و الهمجيه والجهل المطبق وسمعه المصريين اللى سبقاهم فى كل موسم حج او عمرة بانهم بيروحو أما ينشلو او يشحتو
اية يا عم دة الحمد لله اننا مصرين عشان لو غير كدة كنا زمنا اسفلتنا على رأيك بس بالنسبة للبنت وامها انا من رأيى بعد اللى قالوا دة كنت اتلتهم
احمد الشاعر
كيارا
هم يبكي وهم يضحك
انا كمان مابقتش عارف اقول ايه على الكلام اللي مايعلم بيه الا ربنا ده
سلامتك من كل اللي قلتيه من اول الازبهلال نهاية بفقع المرارة والكساح
متعمليش في نفسك كده مصر محتجالك يا كيارا
تحياتي
اكون او لا اكون
هما فعلا مش فاهمين حاجة
المشكلة إننا بنيجي عند الدين ونقول ربنا غفور رحيم وربنا كريم وكله يمشي
لكن بقى في الدنيا قبل ما نعمل اي حاجة حتى وان كانت هايفة بنقعد نسأل طوب الارض وندور ونبحث ونشوف احسن حاجة علشان نعملها
أعتقد إن الجهل بإرادتنا إحنا ولو فعلا بنحرص على آخرتنا كنا بذلنا مجهود علشان نتعلمها زي ما بنبذل مجهود علشان نتعلم دنيانا
المشكلة فينا إحنا
وبعدين اغلب المصريين اللي بيطلعوا عمرات بيجوا مع حملات لكن المشكلة إنهم بيدوهم كتيبات ويسبوهم مع نفسهم وربنا يوفق الجميع
على العموم ربنا يفهمنا جميعا ويعلمنا ما ينفعنا
شكرا على مرورك والتعليق
تحياتي
همس
لا سؤال رخم ولا حاجة إنتي تأمري
فيه ناس ابسط مما تتخيلي
وتلقيهم بيعملوا حاجات تشيب
وان شاء الله البوست اللي جاي هعرض عينات منهم علشان تعرفي بس إن الموضوع مش بسيط وان الناس بيعملوا اعمال الدين بإتكالية غريبة إن ربنا كريم وبيتقبل اي حاجة ولا حول ولا قوة الا بالله
موضوع الاختبار ده لو عملوه مش هتلاقي ولا واحد بيعمل عمرة ولا حج من جمهورية مصر العربية وهتلاقي السبب "لم ينجح أحد"
ربنا يرحمنا جميعا
بمناسبة العمرة والله جت على غفلة جالي شغل في جدة لمدة يومين فطبعا العبد لله إنتهز الفرصه وطيران على مكة على العموم متقلقيش انا دعيت لكل المسلمين اللي إنتي طبعا واحد منهم وان شاء الله هحاول اعمل عمرة آخر رمضان يا رب ربنا يسهل فلو فيه دعوة معينه عايزاها غير (إنك تبطلي فرسة) قوليلي عليها وان شاء الله ربنا يذكرني بيها
تحياتي
عاشقة القمر
والله كلامك جميل
وياريت يبقى فيه إلتزام عندنا إحنا كمان إن شركات السياحة والجمعيات قبل ما تطلع الحملة يكون فيه دورات وخصوصا في العقيدة والمناسك لكل مشترك في الحملة
علشان الناس يبطلوا التخاريف اللي بيعملوها
شكرا على مرورك
تحياتي
عمار باشا صبري
وعليكم السلام ورحمة الله وبركاته
فعلا التخلف موجود وخصوصا في أمور الدين وللاسف إننا بنسيب نفسنا للتخلف ده ومابنحولش إننا نغيره
شكرا على مرورك وان شاء هردلك الزيارة
تحياتي
كناري
هخخخخخخ
فكرة جميلة قوي إني اتنكر دي بس فيه مشكلة إن كل المسلمين من كل الجنسيات بيلبسوا نفس اللبس وهو الاحرام .. يمكن مع النساء بيبان الفرق لكن مع الخناشير اللي زي حالتنا مافيش غير حل واحد إني ألغمط وشي بورنيش إسود واعمل إني من جنوب إفريقيا :=)))
بس على فكرة انا بختلف معاكي إننا مكروهين انا شايف إن بالعكس تماما "ابسلوتلي" المصريين لما بيجوا العمرات أهل مكة بيستنوا وصولهم بفارغ الصبر عارفة ليه لان المصريين احسن جنسية بتشتري هدايا وبيشتروا أي حاجة لانهم لازم يرجعوا مبضعين ومحملين بالهدايا للي يعرفوه وللي مايعرفهوش
اما بخصوص النشل فكلامك مظبوط ولو إن الموضوع اختلف مؤخرا ومابقناش بنسمع عن إنهم قبضوا على مصريين في قضايا شحاته أو نشل لكن المشكلة الاكبر كانت بتكون إنهم بيهربوا من الحملات علشان يقعدوا يدوروا على شغل ودي كانت المشكلة الكبيرة
شكرا للتعليق وتقبلي خالص تحياتي
ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف المسار
لا وعلى ايه بلاها ورنيش
خليك مصرى مصرى هما يعنى هيضربونا بالنار؟
طبعا ممكن تكون مشاكل النشل والشحاته قلت شويه بس برضه لسه فيه مشاكل التهريب . زى ما تكون مصر خليت من الموبايلات والكاميرات الديجتل
واهى كلها فضايح والسلام
وأكيد المصرى يعز الشرا والهدايا برضه زى عنيه وكأن كمان مصر خلصت فيها الهدوم والعبايات والايشاربات
ما علينا
أمى كانت فى عمرة ودخلت محل تشترى حاجات صاحب المحل لما عرف انها مصريه قالها ابوس ايدك مش هبيع . ليه يا عم
قالها انتو المصريين مقرفين فى شراكم وفصالكم وانا كرهت هالشغله بسببكم
مع ان الوليه والله غلبانه وملهاش فى كدة ألا انها اتكسف جدا وشعرت بأحراج ملوش حل
أحمد باشا الشاعر
فعلا الحمد لله إننا مصريين حاكم إحنا بنتلطش على طول ومش طالبه إننا كمان نتلطش في العمرة
بالنسبة لموضوع القتل ده يا ريس حرام عليك مش للدرجة دي إنت عاوز توديني في داهية ولا ايه بقى يا راجل عاوزين أقتل وفي الحرم كمان
على العموم نورتني بزيارتك
تحياتي
الريس بيرم المصري
كلامك جميل
إن شاء الله هزورك وهعلق
بس الحقيقة انا مابقتش أغضب لما المسار بينحرف لانه بقى على طول منحرف وانا صعب يفضل دمي محروق على طول
تحياتي
كناري كلاكيت تاني مرة
بالنسبة لقصة والدتك انا رأيي إنها كانت سمعت الزبون اللي مش عايز يبيع للمصريين ده من المنأي خيار (ده مصطلح بيطلق على الألفاظ السوقية) لأنه الحقيقة إنه بيستعبط وعايز أقولك إن جه وقت أيام ما كان عمرو موسى وزير الخارجية وقف العمرات لأن كان فيه مشكلة حصلت إن السلطات السعودية عملت كام حركة كده مش ولابد فلما عمرات المصريين وقفت كانوا التجار في مكة بيعيطوا لأن أحسن جنسية بتشتري هما المصريين ومعظم شغلهم بيبقى على المصريين وفعلا احنا بنفاصل بس لأنهم هما كمان بيرفعوا السعار جدا
على العموم انا سعيد بمرورك وانا عارف انك نزلتي بوست جديد وقرأته اكتر من مرة مع التعليقات بس الموضوع محتاج تعليق مش عادي
ان شاء الله هزورك حالا
تحياتي
الكومنت جه متأخر شويه
بس فى النهايه جه
بجد انا اول مرة اعرف المعلومات دى
و ان المصريين فى العمرة بيبقوا مميزين اوى
تقريبا عشان الطريقه الهمجيه الشلوطيه
التى يتبعها المصريين فى حياتهم اليوميه
فعادى انها تميزهم فى اى مكان
ههههههههههههههههههههههه
و دمتــــــــــــــــــــــــم
ساموراي
لا متأخر ولا حاجة
المهم اننا نطمن عليكي
المصريين دايما مميزين في اي مكان وفي اي زمان انا متهيألي ان شاء الله لما يدخلوا الجنة برضه الناس هتعرفهم
ربنا يستر علينا
تحياتي
انا كل المظاهرات اللي شفتها في العمرة و كانت بتردد ذكر جماعي أثناء الطواف كانت من غير العرب
إيرانيين و باكستانيين و أتراك
لكن مشفتش مصريين بيهتفوا ورا حد في الطواف
اما اللم بتاع الأكل فده كان فضيحة
كإنه شعب جعان
المهندس المصري
أولا ربنا يتقبل العمرة
ثانيا اكيد دول كانوا مصريين بس متخفيين في صورة أتراك وهنود (بتحصل يا خواجة)
ممكن يكون طبعا فيه جنسيات تانيه بيعملوا كده بس المصريين هما الأصل
وبعدين الحمدلله إنك ماقبلتشهمش علشان تعرف تعمل العمرة
ربنا يتقبل
تحياتي وكل سنه وانت طيب
السلام عليكم...
اسمحلي أحييك على اسلوبك المميز في الكتابه...
وأقولك أنه خالي تماما من الدفاشه ...
..........
فكرتني بالعمره....
وايامها الجميله...
هي العمره تحلى الا بالمصريين..
مواقفهم وقفشاتهم....
بجد بحب اتعامل معاهم ...
بيعطوا للمكان طعم آخر...
......
وكرماء جدا ..
عزموني على السحور بساحة الحرم المكي
وكان السحور عباره عن سردين وجرير وبصل....طبعا انا مكلتش بس
والله اتبسط....
غير الحجه الي حكتلي قصة حياتها وحكايات عن جوزها الي عمره ما أقصر معاها....
بس بجد العمره ماتحلى الا وياهم...
.......
شعب يدخل القلب...
..........
تقبل مروري
دمت بخير
M.K
وعليكم السلام ورحمة الله وبركاته
أشكرك على كلماتك الجميلة ولو إني لحد دلوقتي مش عارف يعني ايه "دفاشة"
فعلا المصريين دول زي التوابل في الأكل بس نصيحة ماتكتريش منهم لأنهم بيزودوا الضغط
بتقولي عزموكي على السحور وكان سردين وبصل؟ لأ وفين؟ في ساحة الحرم .. يا نهار أزرق
بس إزاي جماعتنا قدروا يهربوا الممنوعات دي ويدخلوها الحرم ..
يلا الحمد لله إن السلطات السعودية مقبضتش عليكم بتهمة إزدراء الدين الإسلامي
شكرا على زيارتك الأولى وأتمنى دوام التواصل
تحياتي
هههههههه المصريين احلى ناس
إرسال تعليق
<< Home