يَوْمِيَات وَلَد مَصْري
الجمعة، ديسمبر 26، 2008
مزيكاتي قديم – الجزء الرابع
وصلنا المرة اللي فاتت لما مطرب الغفلة .. أنهى على خير الحفلة .. والمعازيم انبسطت .. بعد ما هاصت ورقصت .. وسألوه على نمر التليفونات .. ووسائل الاتصالات .. علشان يكلموه .. وبسرعة يستدعوه .. في أي حفلة للشباب .. خطوبة كانت أو كتب كتاب .. وتوالت على الفرقة الأفراح .. وتعاقبت الليالي الملاح .. وبكده حصل المراد .. بعد ما انهمرت على الفرقة الأعياد ....
الفرح التاني اللي جه للفرقة كان للأسف الشديد أوطى من اللي قبله بمراحل، أولا لأنه كان في الشارع .. لأ وايه ومش في أي شارع، الفرح يا سادة كان في منطقة إسمها المنيب والمعازيم كانوا من تجار "الفاقهه" (الفاكهة باللغة المصرية) وتجار "الاصماق" (يعني الاسماك بس باللغة السواحيلي) وكل ده لحد دلوقتي مافيش منه مشكلة, لكن بصراحة اللي قطع في قلبي وخلاني أبكي على شبابي الضايع إن الليستيدج اللي الفرقة هتقف عليه كان عبارة عن عربيتين كارو لزقين في بعض وعليهم سجادة ميته لونها أحمر في اسود مهبب بهباب وطين اللي أول ما شفته خلاني انفجر في وش البهوات زمايلي في الكار الاسود بتاع المزيكا اللي كانوا واقفين بيندبوا حظهم الهباب:
- يا نهار مالوش ملامح ولا لون ولا طعم ولا ريحة، ايه يا هباب البرك انت وهوه الفرح اللي جايبينا فيه ده؟
- إثبت إنت وهوه .. محدش يقل عقله ويحاول يعمل أي حركة مريبة ليطخونا كلنا .. أنا بقولكم أهه
- إنتوا بتستهبلوا .. فرح في الشارع؟ وفين؟ في المنيب؟ والمسرح عربية كارو؟ يا نهار أزرق..دا ايه السفالة اللي احنا فيها دي ..
- يا جماعة وطوا صوتكم شوية لحد يسمع
- هوه احنا بنسرق ولا بنتبلى عليهم.. ما هيه دي الحقيقة
- المهم يا جماعة دلوقتي هنعمل ايه؟ الناس دول هينفع نلعب لهم الودنج مارش ونرقص العريس والعروسة على ضميني وانسي الدنيا برضه؟
- ودنج مارش ايه وإيمان البحر درويش إيه اللي عاوز تلعبهم .. دول بقى تجيب معاهم من الآخر وتدخل معاهم في الموضوع على طول .. إديني في الواطي وأنا أحبك يا فننس!!
المهم واحنا واقفين مسبهلين من هول المنظر لاقينا واحد داخل علينا لابس بدلة بتنجاني وقميص أصفر ولافف على رقبته حبل غسيل وعمله كرافته، شايل على كتفه صندوق بيرة استيلا وقال وهو فاشخ ضبه:
- المعلم فرج بيبعت أحلى تماسي على الفرقة وبيقولكم لو ليكم شوق في أي مصلحة تانية إحنا جاهزين!!
يا دي المصيبة – الظاهر إن الوالد كان عنده حق، العينه ظهرت والجواب بان من عنوانه!!
بعد شوية ظهر متعهد الفرح اللي كان متفق معانا بعتنا له واحد صاحبنا كنا مصدرينه علشان يتكلم ويتفق بإسم الفرقة.
رجع صاحبنا بعد شوية بمفاجئة تانية أنأح من اللي قبلها، لقيته بيقول إن المتعهد عاوزنا نشغل واحدة رقاصة درجة تالته، من نوعية الرقصات اللي بيكونوا أشبه ببرميل الطرشي المتحرك، لابسه بدلة رقص مقاس 70 ولسه قايمة حالا من على طشت الغسيل وجت جري علشان تهز أرداف على شكل رفارف عربية فولكس بيتلزوليها كرش كبير على شكل عوامة من بتوع كاوتشات العربيات النقل اللي بيبقى لونها اسود وقطرها لا يقل بحال من الأحوال عن 42 إنش بالمستريح.
بدأ الفرح وطبعا الأمر ماسلمش من النقطة (مش قصدي النقطة اللي جاتلنا من الوطي اللي احنا قاعدين وسطيه) لكن النقطة بتاعة الأفراح الشعبي اللي بتكون على النحو التالي:
العريس – ريس .. ريس ريس ريس (صدى صوت)
العروسة – روسة .. روسه روسه روسه (صدى زفت)
الفرح – أرح .. أرح أرح أرح (ينعن ....)
المعازيم – زيم .. زيم زيم زيم (يا عالم حد يرحمنا من أم الإكو ده)
كمان مرة المعازيم زيم .. زيم زيم زيم (لا دي حاجة مايتسكتش عليها ابدا)
تجار الأسماك – ماك .. آك آك آك
كمان مرة تجار الأسماك – ماك .. آك آك آك
يعني سمك القرش – قرش .. أش أش أش
اللي واكل كل الأسواق – واء .. واء واء واء
يعني الحيتان الكبيرة – بيرة.. بيرة بيرة بيرة
ورقصني يا جدع
وهاتك يا رقص على أي كلام فارغ وأي مزيكا فارغة وأي حزن مالوش لازمة، أهم حاجة في الموضوع إن الإكو (اللي هوه صدى الصوت .. توت توت توت) يكون على أخره والصوت كمان يكون على أعلى درجة.
إنتهى الفرح ده كمان على خير وعدنا إلى قواعدنا سالمين بعد التجربة اللي ما يعلم بيها إلا ربنا ويمكن تكون دي أسفل تجربة مرت علينا في تاريخنا الفني كله.
عدت الأيام وجالنا فرح تاني في نادي كهرباء شبرا اللي للاسف الشديد اتحول بقدرة قادر إلى أحد أفلام الأكشن بتاعة فريد شوقي ومحمود المليجي وده بقى اللي هنشوفه مع بعض إن شاء الله المرة اللي جاية في ..... رصيف نمرة خمسة ..... أقصد في الجزء رقم خمسة !!
التسميات: يوميات
17 Comments:
ياه دا انت مريت بمواقف سوداء
و بتكلمني على مهرجان السينما
دا انت شفته لايف
و شفت افلام حية و كنت جزء منها كمان
:))
:((((
معلش بجد اضايقت اصلى حسيت باحسساسكم والصدمة اللى كنتم فيها
اوحش حاجة لما تكون بتحلم تعمل حاجة وتتحول الحاجة دى لحاجة مشوهة كده
نهرج بقى شوية
حلو فيلم فريد شوقى ده هههههههههه
بس متنساش فريد كان بيضرب لوحده وانتم عزوة
نويتنج ونشوف
الجزء اللى جاى:)
مبروك على الزمالك
هههههههههههههههههههههههههههههههههههههههههههههههههههههههههههههههههه
عجبتنى اوى حته فننس دى
يا عينى عليك يا عينى عليك
يا بنى فننس هو اللى ماشى دلوقتى
الناس عايزة تهيص على اى حاجه
مش فارقه ايه هى
محدش بيفهم خلاص
كله بقى فى الواطى
زى اونكل فننس
هههههههههههههههههههههههههههه
و عقبال ما يجى الجزء الخامس سليم
بس البشاير بتقول لا
و دمتــــــــــــــــــــــم
ياحبيبي
و الله تجربة زي العسل هي زفرة صحيح لكن الحلو فاكهه
و عجبتني بدلة حامل البيرة المحترم
عرفت من بوبوس انك في الرياض مش قادر.. نفسي اسمع منك باقي الفصول لانك بصراحة بتتاخر و بتوحشني
النقطة دي من ..... و روحني يا جدع
تحياتي
ههههههههههههههههههههههههههههههههههههههههههههههههههههههههههههههههههههههههههههههههههههه
موتني من الضحك
وحسيت بصدي الصووووت
ياحيني لا الله يكون في عووووووووووونك
بس ايه حكايه الاكشنات اللي جايه
هستناهاااااااااااااا
عاااااااااااااااااااااااااااااااااااا
ده إستنهاض بقى
عاااااااااااااااااااااااااااااااااااااااااااااااااااااا
لسه الجزء الخامس عشان اشوف الضرب
عاااااااااااااااااااااااااااااااااااااا
خلاص خلاص كفايه عياط
اساسا اساسا اللى انتوا كنتم فيه دا اكتر من الضرب و الاكشن
(وش فرحان جدااا)
منتظرة بقى الاكشن عشان افرح اكتر ((:
باشمهندس مصري
مكنتش أعرف إنك قلبك إسود كده .. لسه فاكر كلامي عن موضوع مهرجان السينما :))
وبعدين يا ريس كفاية تبكيت فيا أنا خلاص تبت توبة نصوح وسيبت موضوع المزيكا ده خالص
أنا بس بحكي الكلام ده للاعتبار وللعظة إن الواحد المفروض أولا يسمع كلام الوالدين وبعدين أهم حاجة إنه يفهم مادام مشي في سكة ما يعلم بيها إلا ربنا يبقى فيه إحتمال إنه يسقط في القاع والذنوب هتلاقيها جابت بعضها بس الحمد لله إن ربنا حفظ الواحد خلال الفترة اللي ما يعلم بيها إلا ربنا دي من بلاوي كتير كان ممكن تجيبه الأرض
وعلى فكرة وشك مش غريب عليا محتاج أعرف عنك شوية تفاصيل جايز نطلع قرايب :)
خلاص ماتزعلش أقصد زمايل :)
دايما منورني يا ريس
برينسيس
إنتي قلبتي الموضوع غم ليه ماهو كان ماشي كوميدي
أولا انا مش قصدي إني أضايق أي حد بالعكس المفروض إن الكلام اللي باكتبه يكون خفيف على أي حد يقرأه لكن طبعا كلامك مظبوط جدا إن الواحد لما بيبقى بيحلم بحاجة وتطلع مشوهه أكيد لازم يتصدم علشان يحرم يحلم بعد كده :)))
ندخل في برجراف التهريج:
فيلم فريد شوقي هتشوفيه المرة الجاية ان شاء الله ولو عايزاه لايف كمان معنديش مانع إنتي تؤمري :-))
بالنسبة لموضوع الزمالك إحب أقولك إني عرفت نتيجة مباراته مع بني عبيد منك وطبعا مصدقتش وقعدت أقلب في القنوات زي المجنون علشان قلت أكيد بتهرجي لكن للاسف طلع كل كلمة قلتيها مظبوطة .. روحي يا شيخة الله يسامحك قولي آمين
خالص تحياتي
ساموراي
واضح إن فننس ده سوقه ماشي زي الفل
وبعدين فعلا ما هي الناس اللي عايزة تسمع الكلام الفارغ وبتنبسط بيه يبقى خلاص يستاهلوا كل اللي يجرالهم
الجزء الخامس في المونتاج أول ما يخلص هعرضه إن شاء الله بس الجماعة الكومبارس تعبوا من كتر الضرب وحلفين ما يكملوا معايا :)
تحياتي
دكتور أحوال
من ناحية الزفارة فمقلكش سواء في الشكل أو المضمون لكن الحمد لله على كل حال
بالنسبة لموضوع الرياض وايه لزمة التسييح ده يا دكتور بس إن شاء الله يكون فيه بينا لقاء عاجل وأحكيلك على اللي جرالي
أخبار الأنيمل ميتنج إيه سبع ولا زي بوبوس
والله إنت كمان بتوحشني وفعلا نفسي نتقابل
معرفة خير إن شاء الله
تحياتي
كيارا
متفكرنيش بصدى الصوت ده لانه مأثر على وداني لحد دلوقتي :))
أكيد فيه أكشن أمال إيه زورونا تجدوا ما يسركم
تحياتي
ضد التيار
إنتي جايه هنا علشان تعيطي
أمال إنتوا فاتحين المدونات بتاعتكم ليه
إبقى لو سمحتي عيطي في مدونتك وتعالي اضحكي هنا .. أنا مابحبش الغم
طيب ايه لازمة السعادة والوش الفرحان ده .. هو انا يا بنتي يهودي ليه بس المعاملة دي
على العموم أنا متأكد إن البوست اللي جاي هيفرحك أكتر مادام حضرتك بتعزي الأكشن والتلطيش
خليكي إنتي بس متابعة وإنتي هتنبسطي معانا
تحياتي
السلام عليكم...
لا دنتا مزيكاتي مزيكاتي ...
سؤال يطرح نفسه مين فننس ده؟؟؟
كلو كوم والرقاصه إلي زي البرميل كوم..
....
في إنتظار الجزء الخامس ..
.....
دمت بخير..
السلام عليكم
صعب قوى الفرح ده يا باشمهندس
كان كفايه علشان يقضى على مواهبكم و احلامكم .. لكن واضح ان كان عندكم امل قوى و اصرار و تحدى من اللى بقوا غالين قوى اليومين دول ..
يا ترى ايه حكايه الفرح الاكشن بتاع فريد شوقى رحمه الله .. !!!
ربنا يستر .. متابعة ان شاء الله
تحياتى
نهار
وعليكم السلام ورحمة الله وبركاته
انتي لسه شوفتي حاجة بكره تشوفي المزيكا على اصولها
حضرتك فننس ده غالبا ملحن مغمور واكيد هيفضل مغمور علشان اسمه اللي ما يعلم بيه الا ربنا ده
بالنسبة للرقاصة دي نقطة من غيث والمصيبة إنهم مش حاسين بنفسهم
منورة
تحياتي
روفي
وعليكم السلام ورحمة الله وبركاته
هو مين اللي يقضي على مواهبنا وأحلامنا ولا عشرين فرح زي ده يأثروا فينا وهو احنا لو كنا بنحس على دمنا أساسا كنا وافقنا نروحه
الحقيقة انا قضيت في الكار اللي ما يعلم بيه الا ربنا ده حوالي عشر سنين من ضمنهم سنتين ملطشة و3 في فنادق فايف ستارز وخمسه في دار الهيئة الهندسية
وفي النهاية كان فيه ماتش اعتزال
بالنسبة للفرح الأكشن ان شاء الله هينزل في الاسواق قريب بس بعد موضوع غزة ده ما يعدي على خير بإذن الله
قطيعة محدش بياكلها بالساهل
تحياتي
p6K聊天室,080中部人聊天室,聊天室交友,成人聊天室,中部人聊天室,情色聊天室,AV女優,AV,A片,情人薇珍妮,愛情公寓,情色,情色貼圖,情色文學,色情小說,色情,寄情築園小遊戲,AIO交友愛情館,情色電影,一葉情貼圖片區,色情遊戲
言情小說,情色論壇,色情網站,微風成人,成人電影,嘟嘟成人網,成人,成人貼圖,成人交友,成人圖片,18成人,成人小說,成人圖片區,微風成人區,成人網站,免費影片,色情影片,自拍,hilive,做愛,微風成人,微風論壇,AIO
情趣用品,情色,成人,A片,自拍
情趣用品,色情,成人影片,色情影片,免費A片
情趣用品,成人網站,A片下載,日本AV,做愛
情趣用品,美女交友,A片,辣妹視訊,情色視訊
情趣用品,色情聊天室,聊天室,AV,成人電影
A片,aio,av女優,av,av片,aio交友愛情館,ut聊天室,聊天室,豆豆聊天室,色情聊天室,尋夢園聊天室,080聊天室,視訊聊天室,080苗栗人聊天室,上班族聊天室,成人聊天室,中部人聊天室,一夜情聊天室,情色聊天室,情色視訊,美女視訊,辣妹視訊,視訊交友網,免費視訊聊天,視訊,免費視訊,美女交友,成人交友,聊天室交友,微風論壇,微風成人,sex,成人,情色,情色貼圖,色情,微風,聊天室尋夢園,交友,視訊交友,視訊聊天,視訊辣妹,一夜情
إرسال تعليق
<< Home