يَوْمِيَات وَلَد مَصْري
الأحد، نوفمبر 23، 2008
أحلام طائرة
أيام زمان وأنا صغير كان نفسي أركب "الطياية" قصدي الطيارة وكل ما أشوف طيارة في السما أقول إمتى بقى هيجي اليوم اللي أكبر فيه وأسافر بالطيارة وطبعا زي معظم الأولاد الصغيرين كان نفسي أبقى طيار والحقيقة إن الحلم ده فضل معايا لحد ما دخلت ثانوي وسألت إزاي أبقى طيار قالولي عليك وعلى معهد مصر للطيران لكن للأسف إن مصاريفه كانت غاليه وبالتالي بدل ما أحقق حلمي وأطير، طار الحلم الجميل بتاعي وده كان اول حلم يطيرمني وطبعا ماكنش الأخير..
قلت مابدهاش أدخل القوات الجوية وأهو نص العمى إني أسوق طيارة حتى وإن كانت طيارة حربية ومش بعيد العمى كله يتحقق وأبقى رئيس جمهورية أنا التاني .. ليه لأ ؟ لكن الحلم ده كمان طار لأني جبت في الثانوية العامة مجموع يدخلني هندسة عين شمس فطبعا من باب وجع البطن ولا كب الطبيخ دخلت هندسة وودعت حلم الطيران.
كمان كان فيه حلم تاني بيراودني في نفس الفترة دي – فترة ثانوي – إني أدخل معهد فنون مسرحية والحقيقة إني كنت بحب التمثيل جدا ومن وانا في إبتدائي كنت بمثل في مسرح المدرسة واشتركت وأنا في سنه رابعة (يعني جريد فور علشان الناس بتوع التعليم الأفرنجي) في مسرحية كوميدية كانت فكرتها عبارة عن ست أطفال ثلاث أولاد وثلاث بنات نفسهم يمثلوا، فراحوا لمخرج مسرحي وحاولوا يقنعوه إنه يشغلهم وكانت طريقة الإقناع إنهم يمثلوا قدامه ثلاث مقاطع من المسرحيات العالمية زي عطيل وروميو وجولييت وأنطونيو وكيلوباترا بس طبعا بشكل كوميدي والحقيقة إنهم إختاروني لدور "روميو" (إمنعوا الضحك) آه والله روميو وكانت جولييت بنت زميلة في نفس الفصل بتاعي ولاجل بختي الأغبر طلعت بنت المُدرسة بتاعتنا يعني الواحد ماعرفش ياخد راحته في تقمص الشخصية!! .. على العموم حضراتكم ممكن تتخيلوا العبد لله وهوه لابس شرط ورجليه مسلوعة زي عيدان الكبريت واقف على خشبة المرسح (الله يرحمك يا سي يوسف بيه يا وهبي) وعمال يتغزل في جوليت اللي هيه زميلته في الفصل وماتتخيرش عنه ويقولها شعر من الغزل الصريح وهيه طبعا مش معبراه .. المهم إن أولياء الأمور إنبسطوا واحنا كمان انبسطنا وناظرة المدرسة انبسطت وعم سعيد حارس المدرسة انبسط والدادا أم وداد كمان انبسطت وعلشان كده في في جريد فايف (يعني سنه خامسه علشان الناس بتوع التعليم البلدي) قرروا إننا نعمل أوبريت .. آه والله أوبريت (آدي المدارس ولا بلاش) وكان اسمه أوبريت السوق وكنت عامل فيه دور بياع القلل القناوي وطبعا لأني فنان شامل (تمثيل وغناء ورقص) فكنت بابيع القلل على أنغام الموسيقى وأنا عمال أرقص وأقول القلل القناوي .. القلل القناوي .. تعالى وإشتري القلل القناوي .. ولبسوني جلابية مقلمة وطاقية شبيكة وبولغة وكان التصفيق الحاد في النهاية سبب إني أفكر لما أكبر أحترف التمثيل لكن والدي بقى – الله يرحمه – بعد ما ظهرت نتيجة الثانوية العامة – الله يحرقها – نكش شعره وعمل فيها يوسف وهبي وقال لي لا أنت ابني ولا أعرفك لو دخلت معهد التمثيل .. هتكون ملعون بعدد القبور اللي اتفتحت من عهد آدم لحد دولقتي .. أخرج بره بيتي .. إمشي اطلع بره .. إمشي اطلع بره (عرفتوا ليه بقى كنت بحب التمثيل) .. فطبعا بعد الفيلم الهابط ده اضطريت إني أرضخ لرغبة والدي وأدخل كلية الهندسة وأنسى حلم التمثيل.
ومرت الأيام ونجحت في إعدادي هندسة (بعد الكلاكيت لتاني مرة) وأنا في سنه أولى قسم كهرباء كنت في يوم معدي من جنب الكافتيريا لقيتهم معلقين إعلان عن بدء التسجيل في فرقة التمثيل بالكلية والحقيقة وبدون تردد رحت سجلت إسمي وحددوا ميعاد علشان الإختبار وجابوا مخرج مسرحي علشان يقوم بالاختباروالإختيار وفعلا تم اختيار العبد لله من ضمن الفرقة اللي تم اختيار عناصرها ببراعة من المخرج وبدأنا فعلا في التدريبات على مسرحية اختارها المخرج اسمها "كلام فارغ" وكنت المفروض هعمل فيها دور فلاح بيداهن العمدة وشيخ الغفر علشان يوصل لمراده .. لكن للأسف الشديد وقع خلاف مادي ما بين مجلس الكلية والمخرج فأعتذر عن المسرحية وتوقف النشاط المسرحي في الكلية .. ودي كانت نهاية فرقة التمثيل في كلية الهندسة وطيران حلم ولد مصري الفني للأبد.
نعم هي أحلام ربما كانت ولكنها ستظل معنا .. تداعبنا ونداعبها .. حينا بعد حين بعد حين، علنا نلتقي بها في زمن آخر وفي غير المكان!!
التسميات: يوميات
27 Comments:
اوووووووووووول تعليق
كلاكيت تاني مرة ههههههههههههه
حلو اوي موضوع الأحلام الطائرة دي، قلتلي بقى كنت بتقوم بدور روميو يعيني عليك يا شكسبير وعلى اللي حصل لأبطالك لو كان يعرف ان اللي بيكتبه كان هيوصل لكده كان بطل كتابة واشتغل طيار هههههههههههههه وكان يوسف وهبي نكش شعره ووقف في وسط المسرح وقال ياللهووووووووووول
حلو اننا يبقى لينا احلام ونسعى وراها لكن الأحلى اننا لو موصلناش لحلم نحلم غيره :)
بيربل ويفز
الحقيقة إنك بتحرجيني (بالكبريت) هخخخخخ
لأ صحيح موضوع أول تعليق ده مرتين ورا بعض أنا باشكرك عليه
بقى صعبان عليكي الريس شكس "شكسبير يعني" مش يحمد ربنا إن فيه عيل عبره ومثله روايه لأ وإيه في مدرسة ابتدائي طب ده لازم ينبسط ويفرح إن رواياته بقت على كل لسان
على العموم التجربة في حد ذاتها كانت لذيذة وفعلا مهم جدا إن دايما يكون فيه حلم بنجري وراه وحتى لو ماحصلنهوش نجري ورا غيره
تحياتي
و عسى ان تحبوا شيئاً و هو شرٌ لكم و عسى ان تكرهوا شيئاً و يجعل الله فيه خيراً كثيراً
ههههههههههههههههههههههههههههههه
يالهوي فيش فايده فيش فايده
طول مااحناا عايشين هنحلم
بس بجد اسلوبك دايما لذيذ موت
بس ليه الغيااااب الكتير ده
ولد ولد مصرى:)
اولا مرسى على جريد فايف وفور ههههههه
وبعدين روميو!!!!!!1 شكسبير زمانه فى قبره بيكلم نفسه من المفاجاة:)
بس هقولك على حاجة كلها كانت احلام حلوة اوى ونصيحة لو فى طريقك ظهر ليك طريق تحقق بيه حلم منهم مترددش
ولو لا احلم تانى وتالت هيا الاحلام بفلوس:)
تحياتى
السلام عليكم...
ههههه
ما شاء الله عليك ...
شارح لناس البلدي والإفرنجي...
........
باين عليك بتحب يوسف بيك وهبي ...
ومتأثر بيه جدا...
بركاتك يا باشمهندس ..قفلوا فريق التمثيل في الكليه...
.........
أحييك على هذه الجمله..
نعم هي أحلام ربما كانت ولكنها ستظل معنا .. تداعبنا ونداعبها .. حينا بعد حين بعد حين، علنا نلتقي بها في زمن آخر وفي غير المكان..
..........
شكرا لإشراكنا بذكرياتك الجميله
......
دمت بخير ...
حلوه حكايه فنان شامل... ههههههه
ربنا يعوضك عن الاحلام اللي ماتتحققتش بحقيقه حلوه محققه... ان شاء الله...
مهندس باشا مصري
ربنا يكرمك ويجازيك كل خير على التذكير بالآية الجميلة دي
فعلا دلوقتي أنا بقول الحمد لله إني ماتهورتش وعملت اللي في دماغي ودخلت معهد التمثيل كان زمان الواحد مشرف في مهرجان القاهرة السينمائي في وسط ما يعلم بيه الا ربنا
الله يرحمك يابا كان عندك حق في كل كلمة قلتها
تحياتي
مولان
ما شاء الله كل دي ضحكة
على العموم اكيد لازم نحلم بس المهم إنها تبقى أحلام مشروعة مش متهورة
وكمان يبقى شئ جميل وهايل إن أحلامنا دي تساعدنا في تحقيق أملنا الكبير وهو إننا ندخل الجنة
وربنا يخليكي على كلامك الجميل عن اسلوبي ولو إنه مش للدرجة دي
موضوع الغياب بيبقى غصب عني لما بيكون فيه زحمة شغل
شكرا على سؤالك
تحياتي
برينسيس
ايه حكاية ولد ولد مصري دي؟ ممكن شرح مع إعطاء أمثلة إن أمكن علشان أفهم :)
بالنسبة لجريد فايف وفور .. علشان خاطرك بس إحنا بنحب نريح الزباين بتوعنا
أيوة كنت عامل سي"روميون" عندك مانع وإن كان على شكس ماتقلقيش عليه ماهو ده نتاج زمن العولمة في غياب المضمون اللي احنا عايشيين فيه
فعلا كانت أحلام لذيذة بس متهيألي هيكون صعب إني أحققها دلوقتي مش لأنها مش ممكن تتحقق بس لأني مش عاوز
سبحان الله هيه كده الدنيا لما تبقى قادر تحلم بتبقى مش قادر تحقق اللي بتحلمه ولما يجي وقت تقدر فيه تحقق أحلامك بتبقى مش عاوز تحققها
حد فاهم حاجة
خالص تحياتي
M.K
عليكم السلام ورحمة الله وبركاته
انا قلت أشرح علشان محدش يقول مش فاهم :))
بالنسبة للمعلم يوسف بيك وهبي فالحقيقة أنا مش متأثر بيه ولا حاجة بس هوه كانت له شخصية مختلفة زي معظم الممثلين بتوع أيام زمان وبصراحة كنت بحب أتفرج عليه وبالذات في أفلامه الكوميدية زي فيلم إشاعة حب كان رهيب فيه
أخيرا أنا اللي المفروض أشكر حضرتك وأشكر كل واحد دخل عندي وإداني بعض الدقائق الغالية من وقته اللي فيها قرأ البوست وساب تعليق والحقيقة ده اللي بيشجعنا إننا نطلع كل اللي جوانا ونفتح قلوبنا لناس ربما ماشفنهمش لكن بنحس إنهم قريبين مننا
شكرا ليكي
تحياتي
أكون أو لا أكون
أشكرك على دعوتك الجميلة
فعلا ربنا سبحانه وتعالى دايما بيقدر اللي فيه الخير للبني آدم المشكلة إن الانسان دايما بيستعجل على رزقه
أشكرك على مرورك والتعليق
تحياتي
السلام عليكم
انا جيييييييييت ليه الغيبة بقي؟؟
احلامك حلوة قوي وفكرتني باحلامي اللي طارت برضه
لكن وعسي ان تكرهوا شيئا ويجعل الله فيه خيرا كثيرا
الحمدلله علي كل حال
لكن بجد من طيار لفنان لشكسبير كمان بجد تولفة احلام هايلة
ربنا يحقق لك كل احلامك واولادك باذن الله يحققوا اللي انتي مش قدرت تحققه
شكرا علي انك اشركتنا في حلمك
وخلتنا نفكتر احلام نسيناها من زمااان
اتمني لك احلام واقعية وليست طائرة
زهرة الجنة
وعليكم السلام ورحمة الله وبركاته
أهلا وسهلا يادي النور
كويس إنك علقتي المرة دي من غير النور ما يقطع أو حرارة التليفون تتفصل أو ماسورة المجاري تضرب ربنا ستر :))
ماتزعليش على أي حلم طار لأنه لو كان خير كنتي لاقيتيه مرابط جنبك وبعديم محدش بياخد غير اللي ربنا كتبهوله فأكيد ده الخير زي ما قلتي
تصدقي إني مافكرتش قبل كده في حكاية من طيار لفنان دي بس ملاحظة قوية خليني أفكر فيها شوية يمكن أوصل لحاجة!!
شكرا على دعائك الجميل وأدعو لكي بالمثل
بالنسبة لمشاركتكم في أحلامي زي ما قلت في تعليق سابق أنا اللي المفروض أشكركم لأنكم نورتوني بزيارتكم وشرفتوني بالتعليقات الجميلة
كلمة أخيرة أجمل حاجة في الحلم إنه يفضل زي ما هوه حلم علشان نفضل نفكر فيه ونحاول نحققه لأن للأسف لما بيتحول لواقع بننسى إنه كان حلمنا وإننا بذلنا مجهود كبير علشان نحققه لكن بعد ما حققناه نسيناه وحلمنا بغيره..
سيبك إنتي بلا وجع راس
منورة
تحياتي
بالضبط انت كده فهمتني
المهرجان و الوسط كله مليان ناس لابسة ملط
و بيمثلوا ادوار في السينما قليلة الادب - الادوار مش السينما - و تحس إن الوسط كله فاسد و منحل أخلاقياً
فالحمد لله اللي نجاك منه
:)
بص بقى
اولا انا اللى زعلاااااااااااااااااااانه جدا
ثانيا بقى مين اللى ليه الحق انه ياخد على خاطره هه ؟؟!!!!
ثالثا بقى ليا عوده للرد على البوست لانى لسه ماقرتهوش
انا بس لقيت حضرتك معلق عندى قولت كفااااااااااااارة ياريس
و قولت اجى اقولك ماينفعش خدوهم بالصوت لانى بجد انا اللى زعلانه
ماتنزلش بوستات الا ماجى اشوف الجديد
انا بقول اهو
يااما الصقر هايشتغل (وش بيحذر)
اه انا فاهمة:)
وبعدين لما كلمة تكرر يبقى للتاكيد:)
العزيز المهندس المصري
واضح إنك من المتابعين الجيدين للمهرجان مادام بتقول ناس لابسه ملط :)))
كلامك الجميل اللي قلته ده أنا سمعته في الفترة اللي كنت بافكر فيها أدخل معهد الفنون المسرحية سمعت نفس الكلام من صديق عزيز للوالد رحمة الله على الجميع لأنه كان بيمثل في فترة شبابه واشترك في مسرحيات كتيرة أيام الزمن الجميل أيام الأبيض والأسود وهو بنفسه اللي قالي الكلام ده .. تخيل كان بيقول الكلام ده وماكنش شاف الزمن الأغبر اللي احنا عايشينه دلوقتي
فعلا أنا بحمد ربنا إني عملت بنصيحة الوالد ونصيحة صديق الوالد وماعملتش اللي في دماغي
ربنا يكرمك على كلامك ويجعله في ميزان حسناتك
خالص تحياتي
ضد التيار
بالنسبة لأولا أعتذر عن التأخير لأني مادخلتش على النت بقالي كتير
بالنسبة لثانيا اللي تشوفيه حضرتك
أما بالنسبة لثالثا فننتظر ردكم على البوست
بالنسبة للكفارة لما حضرتك عارفة إني كنت غايب يبقى ايه لازمة أولا وثانيا دول
وبعدين حكاية خدوهم بالصوت ماهي نفعة أهه والدليل أولا وثانيا بتوع حضرتك يعني انتي داخلة مشمرة وضربتي الباب برجلك وتقولي زعلانة إني مابعلقش عندك مع إنك متأكدة إني كنت غير متواجد على الساحة التدوينية في الآونة الأخيرة (ايه رأيك في الكلام الكبير ده) ومع ذلك أنا اللي بعتذر وبعد ده كله تقولي ماينفعش موضوع خدوهم بالصوت .. أنا شايف إنه نفع وجاب نتيجة كويسة بس للأسف معايا أنا مش معاكي إنتي
على العموم يا ريت حضرتك تعلقي بسرعة لحسن فيه ست سبع تمن بوستات جديدة عاوز أنزلهم
وبعدين الوش اللي بيحذر ده يطلع شكله عامل ازاي لحسن دورت كتير عليه ومالقتوش :))
علشان بس أعرف أخاف كويس
تحياتي
الأميرة غروب الشمس (إسمك بيفكريني بالهنود الحمر) :))
والله كويس إني بكتب حاجة تتفهم والغريب إني ساعات بحس إني مش فاهم اللي بكتبه
خير إن شاء الله
لكن إيه البلاغة دي كلها بقى التكرار للتأكيد
يا سلام العلم نور يا ولاد
تصدقي فكرتيني بدروس البلاغة بتاعة ثانوي وبعدين علشان اللغة تبقى مظبوطة اسمه توكيد مش "تأكيد" ومتسألنيش ايه الفرق وازيدك من الشعر بيت اسمه توكيد لفظي وده غير التوكيد المعنوي اللي بيكون في بطن الشاعر
ولد ولد مصري
أدي البلاغة ولا بلاش
الله يرحمك يا رفاعة يا طهطاوي لو كنت تعرف ان ده هيحصل ماكنتش فكرت تفتح مدرسة الألسن اللي بتخرج ناس بليغة بالشكل ده
هخخخخخخخخخخخخخخخخ
تحياتي
ابداً يا راجل حتلبسني تهمة
:)
انا كنت عند واحد زميلي و كان بيقلب في قنوات الدش فلطش في قناة كايرو سينما اللي كانت بتنقل وقائع حفل الإفتتاح و ربع ساعة من الحفل كانت كافية جداً لإتأكد من انه لا يوجد اي محترمين بهذا المهرجان على الإطلاق
المايك فين
المايك فييييييييييييين
المايك معكى يااستاذه
طيب
احم احم احم
واحد اتنين تلاته هل تسمعنى ..حوووووووووول
مع انى صوتى وجعنى بس يلا ماهو برضه ولد مصرى
و امرنا لله
بس الاول ...الطيايه دى كانت و انت صغير بس و لا لحد دلوقتى ؟؟؟
اصلها تفرق الصراحه الواحد لازم يشوف عشان يراعى الحروف فى التعليقات ((:
نتكلم جد بقى مش كله هزار هزار كدا
مش معامله دى
لا بجد احلامك حلوة مع ان من الواضح انك مووووووووووووورزق
و الحمدلله مافيش ولا حلم اتحقق
ياخساره كان نفسى اشوفلك حلم اتحقق قبل مااموت ):
يلا مش مشكله المهم انك بقيت مهندس اد الدنيا
حكم ان المهندسين دول روحى روحى روحى (زى محمد هنيدى كدا)
بس تعالى هنا
---------------
ولاجل بختي الأغبر طلعت بنت المُدرسة بتاعتنا يعني الواحد ماعرفش ياخد راحته في تقمص الشخصية!
------------
و هو ايه المشكله هه
قول قول ليه بختك هنا اغبر (مع توضيح معنى اغبر بالتفصيل الممل)
لالالالالالالالالالالالالالالالالالالا
لالالالالالالالالالالالالالالالالالالالالا
لالالالالالالالالالالالالالالالالالالالالالالالالالالا
شكلها كانت فعلا جولييت فى الحقيقه اعترف
شكلك من الاطفال اللى كانت روميو فعلا من و هى فى حضانه ((:
-----------
سؤال اخير و برئ جدا جدا جدا جدا جدا
مش شايف ان كل احلامك فى الاخر لازم يحصل حاجه
دا حتى الجامعه اتقلبت خناقه و ماكملتش
تفتكر لييييييييييييييييييه هه ليييييييييييييه
ماتفهمنيش صح انا بقول اهو
-----------------------------------
ربنا يحققلك احلامك الجايه ياسيدى
استنى انا لسه مش هامشى دلوقتى
هارد على تعليقك اللى فوق دا
دا انت شكلك كدا ناوى تجيب ضرف المدونه بدرى بدرى
اوباااااااااااااااا شفت كنت هانسى
" عهد آدم لحد دولقتي"
احم احم ترجم بقى P-:
يااااااااااااااااه صحيح الدنيا دى صغيره زى خرم الابره
و اخد بالك انت فاكر لما علقت على الكلمه بتاعتى هه فاكر
طبعا هايجى الزهيمر دلوقتى و تقول لا ...حكم انا عارفك
يابنى قولتلك الدورس عند الصقر لازم تبدأ
بالنسبة لاولا تقبلته
بالنسبة لثانيا طبعا انا
بالنسبة لثالثا ما انا علقت ولا انت ايه؟ البس النضارة
بالنسبة بقى لاعتراضك على كفارة
اولا وثانيا مش علشان كفارة
اولا وثانيا علشان انت جيت قلت خدوهم بالصوت عندى
انا قلت انى زعلانة علشان مش بتعلق ولا قلت انى زعلانة علشان مش بتسال؟
وكمان ايه الكلام الكبير ده؟ على فكرة ده غلط على صحتك انت بقالك فترة فعلا بتقول كلام كبير وماينفعش
كده هيجيلك تضخم فى صوابعينك وانشقاق فى الكيبورد وصدمة فى الشاشة والله يرحم البروسيسور ساعتها
طبعا طبعا خدوهم بالصوت ده مبدئى انا لذلك لازم ينفع مع اللى قدامى وماينفعش معايا
وتعالى هنا تعالى هنا انا بقول تعالى هنا
ايه ماسورة البوستات اللى فتحتها دى؟
ده انا عندى ييجى 48 بوست عند المدونين ولسه مارديتش على التعليقات عندى
مش بقولك ناوى تجيب درفها بدرى بدرى
تعالى بقى اقولك الوش اللى بيحذر ده شكله عامل ازاى
بص يا ولد انت لما ترفع صباعك اللى هو السبابة ده
وتحطه قدام وشك يعنى جمب عينيك على طول
وتروح متكلم زى ما انا كده اتكلمت بس ابقى زعق شوية
ساعتها انت هتعرف كويس هتخاف ازاى وساعتها طبعا انت مش هتخاف من الصوت
لااااااااااااااااا انت هتخاف لعينك تتخرق
وخاف على عينك وكفاية بقى هه
وكفاية بقى علشان ايدى وجعتنى وحبر الكيبورد خلص
مش لازم كل ماترجع كده تعملى قلبان فى النت
يلا بقى سى يو سووووووووون
مهندس مصري
بقى أنا اللي هلبسك تهمة برضه
يعني قاعد مع واحد صاحبك عمالين تقلبوا في الدش .. دي متعتبرش تهمة
وبعدين لطشتوا في قناة كايرو سينما وهيه بتنقل وقائع حفل افتتاح مهرجان القاهرة السينمائي .. طيب ماقلبتوش ليه هه؟
واستنيتوا ربع ساعة بحالها عمالين تتفرجوا على الممثلات اللي طبعا كلهم عندهم "سعة صدر" علشان تحسوا إن كده غلط
وبعد كل الاعترافات اللي ما يعلم بيها الا ربنا دي بتقولي إن انا اللي هجبلك تهمة؟
جايز برضه :))))
تحياتي يا عم المظلوم :)
ضد التيار
ايه النظام ده مايك وسماعات "واستريون" كل ده علشان ايه؟ ماكنش تعليق وجاي متأخر كمان :)
بالنسبة للطياية كانت وانا صغير دلوقتي بقى اسمها "طياغة" والعيب ده في "الكيبوغد" لان "الحوغوف" فيها مشكلة
فعلا خلينا نتكلم جد مش كله هزاغ هزاغ
بالنسبة للأحلام اللي مابتتحققش المشكلة مش في الحلم نفسه المشكلة فين النفس اللي تحقق الاحلام دي (أي كلام علشان الغلوشة)
وعلى فكرة بقى الكدب خيبة موضوع الهندسة ده عمره ماكان حلم بالنسبة لي وعلشان كده غالبا اتحقق :)
بالنسبة لموضوع جولييت انتي مخك راح لبعيد قوي(على الله يعرف يرجع تاني ومايتهش) الموضوع تمثيل مش أكتر .. بقى روميو يبقى عيل بشورط وجولييت لابسه مريلة وعملة ضفرتين يبقى متوقعة ايه؟
هو أينعم انا "تفوجؤت" إنها كانت معايا في نفس الكلية بس هيه بقى ربنا وفقها ودخلت قسم عمارة والعبد لله بقى بليه في قسم كهربا لكن ده مايمنعش إننا كنا زمايل فقط
بالنسبة بقى للأحلام اللي مابتتحققش يمكن ده أجمل حاجة فيها إنها زي ما هيه أحلام وبس وبعدين انا متأكد إن ربنا دايما بيقدر اللي فيه خير للشخص وبيسبب الأسباب سواء بقى كانت خناقه أو غيره
مش فاهم حكاية الترجمة دي ايه المطلوب بالظبط؟
وبصراحة انا مش فاكر تعليق ايه وكلمة مين اللي بتقولي إن الدنيا صغيرة زي خرم الإبره بسببهم ممكن شرح؟
وإذا كان على الزهايمر أحب أبشرك إنه مش من دلوقتي بس يعني مافيش مشكلة
وبخصوص الدروس ما أنا قولتلك أنا اشتريت "كِيرنْك" من التوحيد والنور وجاهز للتدريب :)))
تحياتي
ضد التيار برضه
بالنسبة لأولا فده العشم برضه
بالنسبة لثانيا اتفقنا
بالنسبة لثالثا لابس النضارة وبرضه مافيش فايدة
وجهة نظرك وصلت بالسلامة وكلامك مظبوط
أما بخصوص كلامي الكبير فطول عمري ولا مؤاخذه كلامي كبير بس انتي اللي واقفة بعيد علشان كده شايفاه صغير (أي خدمة .. كان ممكن أقول إنك محتاجة نضارة قراءة بس أنا جانتيه ومش هقول)
أشكرك على شرح الوش اللي بيحذر وأهو برضه مايضرش إن الواحد يبقى عارف شكله بس فيه مشكلة صغيرة قاااااااااااااد كدهوه
إني مابتهددش ولا مؤاخذه يعني فعلا يا خسارة حبر الكيبورد اللي طار في الشرح على العموم خيرها في غيرها
بس برضه ده ما يمنعش إنك منورة
تحياتي
الاوضة مش اوضتي و التلفزيون مش بتاعي و مليش إني اغير في القنوات
:)
إرسال تعليق
<< Home