يَوْمِيَات وَلَد مَصْري
السبت، أكتوبر 11، 2008
إنت تفهم في البيجو؟
كان فيه نكته أيام زمان بتقول إن سواق بيجو في طريق مصر اسكندرية الزراعي كان ماشي على 120فالراكب اللي قاعد جنبه قال له: ما تهدي السرعة شوية يا اسطى!!
فرد عليه السواق: إنت تفهم في البيجو؟
رد الراكب: لأ
فقال له السواق: يبقى اقعد ساكت وماتتكلمش كتير
وبعد شوية السرعة زادت وبقت 140
فقال نفس الراكب: يا اسطى هدي السرعة شوية!!
فقال له السواق: انت تفهم في البيجو؟
رد الراكب: لأ
فقال له السواق: يبقى تحط لسانك جوه بقك وتخرس خالص
وبعدين السرعة بقت 160
عندها زعق الراكب اللي جنب السواق: حرام عليك يا اسطى انت كده هتموتنا
فرد السواق: إنت تفهم في البيجو؟
فرد راكب قاعد ورا: ايوة يا اسطى .. انا بفهم في البيجو
فقال له السواق: ابوس إيدك تيجي تفهمني المخروبة دي بتوقف إزاي!!
مش عارف ليه عندي إحساس إن هوه ده اللي بتعمله الحكومة مع الشعب .. يعني الحكومة تطلع قانون ما يعلم بيه إلا ربنا علشان تحسن أحوال البلد .. ولما حد من الشعب يسأل: هو القانون ده علشان إيه؟
فتقول له الحكومة: إنت تفهم في السياسة؟
يقول المواطن: لأ
ترد الحكومة: يبقى اقعد ساكت وماتتكلمش كتير
وبعدين تنزل قانون أنأح من اللي قبله
فيسأل مواطن: هوه القانون ده علشان إيه؟
فترد الحكومة: إنت تفهم في السياسة؟
فيرد المواطن: لأ
فتقول له الحكومة: يبقى تحط لسانك جوه بقك وتخرس خالص
وبعدين تنزل الحكومة قانون يولع الدنيا
فالمواطن يشتكي ويزعق ويقول: إنتوا بتعملوا فينا كده ليه؟
فترد الحكومة:إنت تفهم في السياسة؟
ومتهيألي لو فيه حد قال: أيوة أنا بفهم في السياسة
هيكون رد الحكومة: أبوس إيدك تيجي تفهمني المخروبة دي أمشيها إزاي!!
التسميات: وجهة نظر
33 Comments:
هيييييييييييييييييييه
اول تعليق
هقرا واجي
ههههههههههههههههههههههههههههه
وانا بقرا قارنت الموضوع علطول بسياسه الكومه وكان عندي يقين داخلي انك هتنهيها كده
وبالفعل قد كان
--------
هيكون رد الحكومة: أبوس إيدك تيجي تفهمني المخروبة دي أمشيها إزاي!!
--------
ياااااريت يقولوها
أبوس ايدك تيجي تفهمني المخروبة دي أمشيها إزاي؟
هو دا السيستم اللي مودينا في داهية، هما بس يصدروا في قوانين من غير ما يفكروا هتطبق ازاي، على اساس اننا احنا المصريين العباقرة بنقدر نعمل أي حاجة وبالتالي هنقدر نطبق اي قانون ههههههه
تحياتي
ههههههه
بص هما الظاهر القوانين علها اوكازيون بقالها فترة
تنزل قانون والقانون التانى مجانا ههههههه عشان كده فى قوانين كتيرة
بلد قوانين صحيح!
تحياتى يا boss
فين الجزرة؟:))))
ههههههههههههههههههههههههههههههههه
إنت بتحلم
عمرهم ما حيبوسوا إيدينا و ان شالله تخرب اكتر ما هي خربانة
دي حكومة مغرورة و نظيف باشا كان قال قبل كده إننا شعب غير ناضج سياسياً
يبقى عايزه يسألنا في السياسة
ده في المشمش
:)
بص هو الحاجة إلى مجننانى إننا عندنا عقليات فى السياسة والإقتصاد جامدة جدا بس مش عارف ليه بيخربوا فى إقتصاد البلد وبيحطوا قوانين تشل
أنا خايف ميكونوش مصريين!
ربنا يهدى
تحياتى
هههههههههههههههههههههه
لالالا جامد التشبيه دا
(ومتهيألي لو فيه حد قال: أيوة أنا بفهم في السياسة هيكون رد الحكومة: أبوس إيدك تيجي تفهمني المخروبة دي أمشيها إزاي!!)
لا هى مش هاتقول ابوس ايدك تيجى تفهمنى
دى هطلعه مابيفهمش فى البطيخ حتى و بالمنطق برضه لانهم اكتر ناس بيحبه يتكلموا بالمنطق اللى مابيدخلش عقل عيل صغير
ربنا يهدهم قصدى يهديهم
ههههههههه
بس ولو
حكومتنا ضد النقد ضد الاصلاح ولا بيهمهم الكلام ده
ولا هما عارفين رايحين فين اساسا ولا بيعملوا ايه
احنا شعب عايش ببركة دعاء الناس الطيبة
ياريتهم يسألوا هى المخروبة دى توقف ازاى
ازاى التدهور الغير مسبوق ده يوقف
هما بيعتبروا نفسهم هما بس اللى فاهمين
هو ايه حكاية السياسة معاك؟؟؟؟
تحياتى
هههههههههههههههههههههههههههه
حتى لو حد قال انا بفهم فى المخروبة دية
هيقولوا حط لسانك فى بقك و اقعد ساكت
بس انت اية الحكاية ماشية معك تشبيهات فى السياسة قوى كدة لية
بس تشبية ممتاز(تصفيق حاد)
تصدق ان البلد فهلا بقت مخروبة
مش على طيرق اسكندرية بس
دا على جيمع الطرق
الله يحرق الحكومة
بس ما علينا
حلوه النكته اوى
ههههههههههههههههههههههههه
والله انا مش عارفه اقولك ايه
بجد انا لسه بأضحك ....
النكته حلوه قوى و جامده فى الحالتين
حاله سواق البيجو و حاله السواقين اللى سايقين بنا و مش عارفين رايحين على فين .. !!!
تقديرى و تحياتى
كيارا
شكرا على اول تعليق
مصممة إنك تحرجيني
يلا حصل خير
تحياتي
كيارا تاني
كل دي ضحكة
فعلا الموضوع واضح جدا وفيه تشابه غريب ما بين سواقة البيجو وسواقة البلد
بس الحقيقة بالنسبة لحكومتنا الرشيدة سواقة البلد أسهل من سواقة البيجو وعلشان كده عمرهم ما هيعترفوا بالفشل
تحياتي
بيربل
حضرتك هما بيديروا البلد بنظام تراي أند إرور وإذا كانت بتصيب معاهم في مرة فبتخيب في 99
أمال هيه بقت مخروبة من شوية
الله يسامحهم مابيعرفوش يسوقوا
تحياتي
برينسيس
كويس إن فيه حاحة في البلد أسعارها مخفضه حتى وإن كانت القوانين
على فكرة فيه قوانين هايلة لسه نازلة في وسط البلد إنزلي وإلحقيلك واحد لحسن دول بيتخطفوا
بالنسبة للجزرة فأنا عذرك وراكي كتل لحم جن عايزه تأكليهم
ربنا يعينك
تحياتي
برينسيس
كويس إن فيه حاحة في البلد أسعارها مخفضه حتى وإن كانت القوانين
على فكرة فيه قوانين هايلة لسه نازلة في وسط البلد إنزلي وإلحقيلك واحد لحسن دول بيتخطفوا
بالنسبة للجزرة فأنا عذرك وراكي كتل لحم جن عايزه تأكليهم
ربنا يعينك
تحياتي
ههههههههههههههههههههههههههه
ضحكوني النكتتين يا ريس
سواء الاولى او التانيه
بس سيبك انتا
اختم بالنسر ان محدش فاهم حاجه !
ياباشا إللى هيقول إنه بيفهم هيقطعوا رقبته على طول.
و على رأى الحجاج بن يوسف الثقفى:
أرى رؤوسا قد أينعت و حان قطافها
فاهم... و لا أقولها بالشقلوب
ههههههه
النكتة حلوة اوى جامد
عموما اعتقد ان لو حد بيفهم فى السياسة الحكومة مش هتسيبوا يحاول يفكر اصلا يمشيها ازاى
السلام عليكم ورحمة الله
بيتهيأ لي انهم ممكن يعملوا العكس يعني يدوروا على اللي يقدر يخربها ويبوسوا ايديه عشان يساعدهم حقيقي بحس انهم بيكرهوا الشعب قوي ربنا يتوب علينا ويتولانا برحمته ان مع العسر يسرا
فى امانه عندى ياعمونا تعالى خدها
بجد البوست جامد جامد جامد وفكرته جديدة
صحيح
انت بتفهم فى التيوتا
احمد الشاعر
انت اية يا ابنى مالك بتختفى كدة لية بتقلقنا عليك
و الا عايز تعرفنا انك راجل مهم ماشى يا عم المهم
عمرهم ما حيبوسوا ايدينا يا عم عشان نعملهم حاجه
دة اذا اتكلموا اساسا
دول فالحين بس يجيبلونا احباط
و يفجعونا بقرارتهم الغريبه اللى ملهاش اى لازمه
و دمتـــــــــــــــــــــم
كوارث باشا
أهلا بيك
هو ختم النسر لسه ماتلغاش انا سمعت إنهم هيرجعوا الصقر
المهم انا ممكن أبصم بالعشرة إن محدش فاهم حاجة برضه
نورتني بالزيارة واتمنى دوام التواصل
تحياتي
بوبوس
يا ساتر يا رب
هما بيقطعوا رقبة اللي بيفهم دلوقتي
طب الحمد لله إني من نوعية "مافهماش حاجة"
ربنا يديمها علينا نعمة هيه والرقبة
طبعا مش فاهم لهو انت عايزني اقولك فاهم علشان رقبتي تطير
ياخي نه
تحياتي
نيرة ومنه
مش عارف مين فيكم اللي كتب التعليق لكن على أي حال أهلا بيكم إنتم الاتنين
كويس خالص مالص إن النكتة عجبتك اوي جامد
والله كلامك معقول إن الحكومة مش ممكن تسيب حد بيفهم في السياسة يعمل أي حاجة أمال هما بيقبضوا على الاخوان المسلمين ليه
على العموم اشكرك على الزيارة والتعليق واتمنى دوام التواصل
في انتظار الافتتاح الرسمي لمدونتكم وأدينا صابرين أهه لما نشوف أخرتها
تحياتي
أمل
وعليكم السلام ورحمة الله وبركاته
تصدقي مافكرتش في الموضوع ده
إنهم أكيد بيدوروا على اللي ممكن يخربها بس هما مابيضيعوش وقت ويبوسوا إيده لانهم بيعينوه رئيس جمهورية على طول
وهما على فكرة مابيكرهوش الشعب ولا حاجة أمال مين اللي هيشغلوه بالسخرة في الأبعدية
تحياتي
ضد التيار
كان قلبي حاسس إن الأمانة دي مش ممكن تكون خير أبدا
تاج
حاضن حاضن
الأمر لله
شكرا ويدوم العز
تحياتي
شاعرنا احمد الشاعر
ربنا يخليك يا ريس على كلامك
حضرتك انا تيوتاوي قديم أينعم دلوقتي غيرت عشان صحتي جابت ورا وبقيت هونداوي بس سعادتك تأمرني ممكن أحل البربأ وافنشر الكوريك واهوي لقم الفرامل
تحت امرك يا جميل
تحياتي
نونا
يا نهارك اسود ومنيل يا شحاته
لهو إنتي ماكنتيش تعرفي إني راجل مهم
على العموم حصل خير
أديكي عرفتي أهه
ساموراي
يا ستي مش عاوزنهم يبوسوا ايدينا
المهم بس يرحمونا من قوانينهم العجيبة اللي بيناموا يحلموا بيها وبعدين يصحوا يجربوها فينا
تحياتي
المشكلة الحكومة لن تقولهاابدا
لانها لاتعرف انها لاتعرف
تحياتي
إرسال تعليق
<< Home