يَوْمِيَات وَلَد مَصْري
الاثنين، أكتوبر 27، 2008
للبيت رب يحميه .. ولكن
كنت أتجول في بعض مدونات الجيران ورأيت أن جل المدونين الآن يتكلم عن الحرية سواء كانت في الفكر أو التعبير أو حتى في المعتقد وكيف أن البعض قد استغل تلك الكلمات الرنانة من أمثال الديمقراطية والتنوير والحداثة لسب الآخر أو لعرض أفكار أقل ما يقال عنها أنها تدنس أخلاقا شرقية قد أفنى الآباء والأمهات حياتهم في منطقتنا الأوسطية لترسيخها عند أبناء يتعرضون في كل لحظة من عمرهم لشتى أنواع الفتن خلال انسياقهم وراء عولمة مجهولة الهوية بحثا عن سعادة مفقودة.
إنني هنا يا سادة لن أتعرض لتلكم الفئة التي تناضل من أجل هدم قيم المجتمع والفتك بثوابته فأنا أؤمن أن الباطل ما كان إلا لكون الحق ساكن، وهؤلاء ما اسطاعوا رفع شعارات الإلحاد والسفور إلا عندما أغمدت رايات العقيدة والفضيلة.
نحن المذنبون .. فلولا انشغالنا لهثا وراء المادة لتحقيق أحلامنا المشروعة ما ظهر هؤلاء من بيننا، لقد تركنا ما أمرنا الله تعالى به من أمر بمعروف ونهي عن منكر ودعوة لإيمان وشغلنا بأرزاق قد كتبها الله لنا، وعندئذ كانت النتيجة عادلة، فعندما ننسى أسباب الخلق لابد أن يتوه منا الطريق.
نعم للبيت رب يحميه .. ونعم الله قادر أن يغير ما بنا حتى وإن لم نغير ما بأنفسنا، ولكن ما هكذا قال الله تعالى وما هكذا فعل نبيه صلى الله عليه وسلم، وصدق الله تعالى إذ يقول " وَإذَا أَرَدْنَا أَن نُهْلِكَ قَرْيَةً أَمَرْنَا مُتْرَفِيهَا فَفَسَقُوا فِيهَا فَحَقَ عَلَيْهَا القَوْلَُ فَدَمَرْنَاهَا تَدْمِيرَاً " ويقول " وَمَا كَانَ رَبُكَ لِيُهْلِكَ القُرَىَ بِظُلْمٍ وَأَهْلُهَا مُصْلِحُون " وقد ربط هنا الله النجاة بالإصلاح وليس بالصلاح وشتان بين اللفظين، فلأن تكون صالحا فهذا جيد بل ومطلوب، ولكن العبرة والنجاة بأن تكون مصلحا لمن حولك وأن تبذل ما استطعت لتغير أحوالهم من سئ إلى حسن ومن حسن إلى أحسن.
فلنعود جميعا إلى جامعة محمد صلى الله عليه وسلم حيث القانون الذي لا يتبدل ولا يتغير وهو كتاب الله وسنة نبيه صلى الله عليه وسلم، دعونا نستمسك بالعروة الوثقى التي أمرنا الله بها، فإن في الاستمساك بها النجاة وفي الحيد عنها الهلاك.
وأخيرا فأنا أتوجه بهذا الكلام لشخصي المتواضع قبل أن يكون لأي ممن يقرأه فأنا والله أحق به منكم وأتمنى ألا أكون ممن قال الله فيهم " أَتَأْمُرُونَ النَّاسَ بِالبِِرِ وَتَنْسَوْنَ أَنفُسَكُم ".
التسميات: وجهة نظر
28 Comments:
كل كلمه كتبتها بجد معك حق فيها
و يارب فعلا كل واحد يبدأ بنفسه و يكون ايجابى و يحاول فى الاصلاح
-----
و لان الموضوع بتاعك فعلا عجبنى مووووت و متافقه معك فيه
فقد اصدرت قرار بالعفو عنك من المستحقات اللى عليك
ابسط بقى D:
أزال المؤلف هذا التعليق.
ضد التيار
أشكرك على كلامك
فعلا مهم قوي إننا نبدأ بأنفسنا ونحاول نصلحها وكمان نحاول نصلح في المكان اللي احنا عايشين فيه ونصلح من غيرنا
بالنسبة للفرمان الملكي اللي أصدره البلاط (او الباركيه على حسب الأرضية اللي عندكم في البيت) واللي بيخص العفو عن المستحقات المالية الخاصة بالعبد لله فأنا بعتبر ده أول طريق الإصلاح :)
تحياتي
نونا
التعليق ده مش محسوب
"أصلك قلت كل حاجة ومش لاقيه حاجة أقولها ونشوفكم على خير ووالله ما انتو قايمين سلامو عليكم"
نظام القلب ده مش معايا أنا لا مؤاخذه
هنتظر تعليق بجد لما تكوني فاضية كده وموراكيش لا غسيل ولا مسح مش كلمتين وإقلب واهو محدش واخد باله
وعلى العموم جزانا الله وإياكي
بس برضه ليا عندك تعليق تاني
تحياتي
ياريت كلنا نعمل كده وكمان نربى اولادنا على كده ساعتها هيبقى فى امل
وانا بنضم لضد التيار
مش هخد اللى عليك يعنى كل الجزر اللى المفروض تجيبه خلاص نبدا صفحة جديدة ههههههههه
تحياتى
معاك حق
بس مين بيعمل بيه فعلاً
برينسيس
التربية دي هيه الأساس اللي بيتبني عليه المجتمع لأن الأولاد لو متربوش كويس هيكونوا سبب في فساد المجتمع بدل ما يكونوا سبب في إصلاحه
بالنسبة للجزر والصفحة الجديدة الحقيقة انا عيني دمعت لما قرأت كلامك ده
فعلا مصر بتتقدم بينا
تحياتي
باشمهندس مصري
اللي بيعملوا بيه كتير ولو قعدت تحسب هتلاقي فيه ناس كتير كويسه بس المشكلة إن الكويس مابيحبش يعمل مشاكل ولا يزعق وبيبقى هادي فالناس مابتحسش بيه أما بقى الوحش فتلاقيه دايما بيزعق وبيعلي صوته لانه عارف إن الحق مش معاه وده بيلقت إنتباه الناس بس في النهاية دايما بينقلب السحر على الساحر والحقيقة بتبقى واضحة وضح الشمس
منور يا ريس
تحياتي
انا جييييييييييييييييييت
بعد حرب خضتها بشرف مع الجهاز اللي اسمه كمبيوتر
عاااااااااااااااااااااا
بس فزت وانتصرت
------
تيجي للبوست
عارف ان كلامك فعلا يدخل الدماغ بدون استئذان مش عيب كده
مش لازم يخبط
فين البروتوكول والبرستيج والحاجات الكبيره دي
---------
جد بقي
بجد ياريت كلنا نركز علي الاصلاح هتتغير حاجات كتير بجدد
تحياتي
كيارا
فعلا معاك حق
واؤيد كلامك بشكل كبير
تقبل مروري من هنا
السلام عليكم ورحمة الله
القضية ان الاسلام بدأ غريبا وسيعود كما بدأ غريبا فتجد أكثر دعاة الحرية أو التحرر لا يتجرأون الا على الدين الاسلامي ومعتقدات كثيرين من أهله فالمرأة مثلا اذا نسيت أن ترتدي شيئا وهي خارجة فلا مشكلة في ذلك لأنها تملك حرية فعل ما تريد أما اذا قررت أن ترتدي الحجاب أو النقاب فهي ليست حرة لأنها تؤذي الرجال الذين لا يستطيعون التمتع بالنظر اليها ولكني أؤمن حقا بحديث رسول الله يأتي على أمتي زمان القابض فيه على دينه كالقابض على جمر من نار مش عارفه أنا تفرعت عن الموضوع الأصلي والا ايه بس طبعا أنا معاك في كل كلامك
السلام عليكم...
صدقت أخي في كل ما قلته..
يستغرب البعض عندما يرى
بعض البلاد الغير مسلمه في حالة رخاء وأمن...
ولا يجد ذلك في بلاد المسلمين..
.........
السبب كما قلت الإصلاح وليس الصلاح...
هم عدلوا ووفوا الناس حقهم...
ونحن ظلمنا البعض بقصد أو غير قد..
(بالطبع أقصد مترفي البلد)بالخصوص..
ومن بيدهم الحل والربط..
...........
وبالطبع لا أحل نفسي ...
وأقل كما قلت..
وأتمنى ألا أكون ممن قال الله فيهم " أَتَأْمُرُونَ النَّاسَ بِالبِِرِ وَتَنْسَوْنَ أَنفُسَكُم ".
........
في أمان الله..
اتفق معاك في كل حرف انت قلته، ولازم كل واحد فينا يبدأ بنفسه ثم بمن حوله، والأهم من اننا نبدأ اننا نستمر عشان في اوقات كتير بتاخدنا الحماسة وبعد كده كل حاجة بترجع زي الأول
وياريت كلنا منبقاش ممن قال الله فيهم "" أَتَأْمُرُونَ النَّاسَ بِالبِِرِ وَتَنْسَوْنَ أَنفُسَكُم "
كيارا
حرب مع جهاز الكمبيوتر؟
يا ساتر يا رب
هو مافيش فايدة في الجهاز ده هوه مابيحرمش
كل مرة تاكليه علقة وبرضه مافيش فايدة
بالنسبة لكلامي اللي دخل بدون اسئذان أصله يا فندم لقى العقل مفتوح فدخل من غير ما يستأذن بس معلش مالوش حق برضه .. حاكم هوه طول عمره كده دفش زي صاحبه
أتمنى فعلا إن كل واحد فينا يبدأ بنفسه وبعدين اللي حوليه أكيد في النهاية المجتمع كله هيكون حاجة تانيه وينفع إنه يتعاش فيه
شكرا على الزيارة والتعليق خصوصا في الشات بوكس
تحياتي
أقصوصة
أهلا بيكي
سعدت بمرورك بس إعملي حسابك المرة الجاية التعليق ماينفعش على الواقف كده لازم تقعدي تشربي حاجة :)
تحياتي
أمل
وعليكم السلام ورحمة الله وبركاته
طبعا ما تفرعتيش لأن كلامك ده هو أصل المشكلة
إننا بننساق وراء تيار الباطل والناس اللي اتكلمتي عليهم دول لو لقوا اللي يقف قصاد كلامهم الفارغ عن التحرر والتعدي على الحجاب والنقاب ماكنوش تجرؤا على الدين لكن للأسف إن كل واحد فينا إعتمد على أن للبيت رب يحميه ووقف يتفرج ومحاولش يقاوم
شكرا على الزيارة
تحياتي
M.K
وعليكم السلام ورحمة الله وبركاته
كلامك كله مظبوط
للأسف أن الغرب طبق الدين بدون الإعتقاد فيه وعندنا الإعتقاد في الدين بدون التطبيق
معادلة صعبة تحتاج منا إلى وقفة
وأعتقد أن الظلم ليس فقط من مترفي البلد ومن بيدهم الحل والربط بل الظلم وقع من العوام لبعضهم وهذا أدى إلى إنتشار الفساد
وصدق الله العظيم "ظَهَرَ الفَسَادُ في البَرِ وَالبَحْرِ بمَا كَسَبَتْ أَيْدِي النَّاس"
أشكرك على مرورك وأتمنى دوام التواصل
تحياتي
السلام عليكم.. متفقة مع حضرتك تماما فى كلامك
...................
اتمنى ان ربنا ميكونش مسلط علينا أنفسنا حتى نهلك أنفسنا بأنفسنا.. لأن كلنا ملاحظين أن ازاى بقت أخلاقياتنا فى الشارع وفى تعاملاتنا مع بعض..
هذا لينك مدونتى الجديدة للتصدى للتحرش الجنسى بمصر أرجو الزيارة
ان أمكن والمشاركة الفعلية
http://againstsexualharrassment.blogspot.com/
السلام عليكم
صدقت فى كل ما كتبت .. اخى الفاضل
ادعوا الله معك ان نبدأ بأنفسنا و ان لا نكون ممن يأمرون الناس بالبر وينسون انفسهم ..
ادعوه ان يهدينا جميعا للحق و لما يحب و يرضى ..
سلمت يداك ودمت بكل خير
تقديرى و تحياتى
بيربل ويفز
فعلا أكبر عيب فينا إننا بنبتدي بحماس شديد وبعدين بنريح بعد كده وعلشان كده لازم كل شوية نفكر بعض ونتناصح لله وفي الله
تحياتي
باربي
وعليكم السلام ورحمة الله وبركاته
أهلا بيكي
ربنا سبحانه وتعالى عادل "وَمَا كَانَ رَبُكَ بِظّلاَمٍ لَلَعَبِيد" " وَمَا ظَلَمْنَاهُم وَلَكِن كَانُوا أَنفُسَهُم يَظْلِمُون"
يعني لو ربنا سبحانه وتعالى سلط علينا أنفسنا نبقى احنا اللي عملنا كده في نفسنا وفعلا ده واضح جدا في أخلاقيات الناس دلوقتي
المدونة فكرتها فعلا جميلة والحقيقة أنا شاركت بتعليق وان شاء الله أشارك ببوست لان الموضوع خطير
تحياتي
روفي
وعليكم السلام ورحمة الله وبركاته
اللهم آميين
فعلا محتاجين ندعي ربنا إنه يساعدنا علشان نغير نفسنا لأننا مستحيل هنقدر نعمل ده من غير مشيئته سبحانه وتعالى
خالص تحياتي
لا فض فوك يا ولد...يا مصرى
فى اعتقادى التقليد هو نكبتنا
وده اللى قال عنه النبى صلى الله عليه وسلم"لتتبعن سنن من كان قبلكم..حتى وان دخلوا جحر ضب لدخلتموه"اليهود والنصارى يعنى
اكلنا وشربنا وصحونا ونومنا ولعبنا وحتى البتاع اللى بنكتب عليه دلوقتى بتاعهم...مابقاش عندنا تقاليد ننقلها لولادنا..انا على ثقةانهم حييجى عليهم يوم يسالونا..طيب انتو كنتو شكلكم ايه وعاملين ازاى قبل ما تتمسخوا كده؟؟
حاجة تحسر بجد
مع انى اللى يعرفنى يقول عليا جاية من زمن الحرملك والله بس حاثبت لامتى فى وسط الخيبة القومية والشعبية اللى احنا فيها دى
:)
ازيك مصري
اولا شكرا لسؤالك الدائم واعتذر عن تقصيري الدائم
بس انت عارف بقي النت وسنينه
اما عن البوست
فصدقت في كل كلمة خطتها يدك
فلا يغير الله ما بقوم حتي يغيروا ما بأنفسهم
فقبل ان نري عيوب الأخرين لابد من ان نري عيوب أنفسنا
وان نكون أيجابين ونري حقيقتنا بأنفسنا
فلا يعقل ان اكون مقصرة ونفسي مليئة بالعيوب أنصح غيري بالأصلاح
فنسأل الله الصلاح والأصلاح لنا جميعا
جزيت خيرا علي هذا البوست
والله ليك حق
وياريتو على الكلام دا
دا انا اتكعبلت فى مدونة بيئه اوى
وللاسف لقيت واحد ضايفها عندو وكانه فخر وعلم وكلام عظيم
فحسبى الله ونعم الوكيل فيهم
أمولة
كله كوم و"البتاع ده" كوم تاني
برضه فكره علشان مانبقاش بنقلدهم بدل ما نسميه بلوج نسميه بتاع
بس بصراحة كلامك مظبوط
فعلا التقليد بقى مشكلتنا.. حياتنا كلها بقت زي حياتهم والمشكلة إننا مابنقلدهمش إلا في الخيابة وبس
يعني هما بيحترموا المرور ومنظمين .. منعرفش بقى نقلدهم في دي كمان أبدا
بالنسبة لولادنا ربنا يرحمهم بس لازم نربيهم على تعاليم دينا لان دي الحاجة الوحيدة اللي ممكن تحميهم وغير كده هيضيعوا
بالنسبة للحرملك دايما إفتكري قول الرسول صلى الله عليه وسلم أنه سيأتي على أمتى زمن القابض فيه على دينه كالقابض على الجمر
إذا كانت سكة الحرملك هتكون نهايتها الجنة فيا أهلا وسهلا وميت مرحب
خالص تحياتي
زهرة الجنة
يا فندم ده واجب علينا ولا شكر على واجب
فعلا لازم كل واحد فينا يبتدي بنفسه ويحاول يصلحها وكمان يصلح اللي حوليه بالكلمة والمعاملات الطيبة
جزانا الله وإياكي مع تمنياتي لكي وللنت بالصحة والسلامة :)
تحياتي
همس
طبيعي جدا إننا نتكعبل كل يوم في مدونات وأشخاص من النوعية اللي حضرتك قلتي عليها دي عارفة ليه .. لأن هي دي الحياة هتفضل مليانه بكل الأشكال والأنواع والمهم إننا نعرف نختار ما بينهم اللي يناسبنا ويناسب أوامر دينا وعادتنا وتقالدنا الجميلة
شكرا على زيارتك
تحياتي
إرسال تعليق
<< Home