يَوْمِيَات وَلَد مَصْري

السبت، نوفمبر 29، 2008

مزيكاتي قديم


طول عمري بحب المزيكا من وانا لسه عيل صغار ولو إني بطلت أسمع أو ألعب مزيكا من فترة مش قصيرة لكن ده مايمنعش إن عشقي ليها قديم جدا وتحديدا من بداياتي في مرحلة التعليم الإبتدائي وخصوصا إن المَدرسة اللي كنت مآنس فيها كانوا بيهتموا جدا بموضوع الأنشطة وخصوصا النشاط الموسيقي والرياضي.

الحقيقة يا سادة إني طلعت السلم الموسيقي من أوله .. لأ مش قصدي يعني من "الدو" أقصد ابتديت ألعب مزيكا من أول ما كنت بامسك الكاسكاليت والمُثلث والجلاجل!! واللي مش عارف يعني ايه كاسكاليت فدي آلة موسيقية تندرج تحت آلات البركشنز وبرضه للي مايعرفش يعني ايه بركشنز فدي الآلات المرتبطة بإصدار أصوات إيقاعية مساندة للدرامز أما بقى اللي ما يعرفش يعني ايه درامز (يعني طبلة بالعربي) فأنا بأنصحه نصيحة لله إنه يقف لحد هنا وما يكملش قراية الموضوع لأنه شكله كده هيخنقني وانا بصراحة مخنوق خلقه.

ما علينا .. بالنسبة للمثلث فدي آله حديدية على شكل مثلث ومعاها عصاية حديد لما بيخبطوا في بعض بيطلعوا صوت رنه .. وعلى فكرة دي أهم آلة في أي أوركسترا سيمفوني (نظرا لأني كنت بلعبها مش لأي سبب آخر) وأخيرا الجلاجل فدي طبعا الغالبية العظمى من حضراتكم يعرفوها كويس لاسيما إنها بتستخدم بكثرة مع أي فضيحة (فضيحة بجلاجل) وللي مايعرفش فدي آلة بتطلع صوت جلجلة يعني بتعمل كده: جلجلجلجلجلجلجلجل .. غريبة مش كده!!

نرجع بقى بالذاكرة لما كنت في التعليم الابتدائي (ساعات بيطلقوا عليه التعليم الإلزامي) وتحديدا وأنا في سنه تانية في حصة الموسيقى، قامت مس برلنتي واختارت كام واحد علشان يمسكوا الآلات سالفة الذكر وابتدت تعلمنا الآتي: طا فا تي في طا تي .. طا فا تي في طا وهاتك يا طلوع ونزول في أم السلم الموسيقى لما أتقطع نفسنا والغريب إن في اليوم ده إبتدى حبي لشغلانه المزيكا دي ولاسيما إن أخويا اللي أكبر مني بثلاث سنوات وكان في نفس المدرسة كان بيلعب كمنجه وطبعا كنت حابب أعمل زي ما بيعمل .. مش أخويا ولازم أقلده (طبعا موضوع التقليد ده كان بينرفز أخويا جدا وكانت نرفزته دي بتسعدني جدا تسألني ليه يا كابتن لطيف أقولك معرفش لكن غلاسة) المهم فضلنا على الحال اللي ما يعلم بيه إلا ربنا ده طول سنه تانية ولما طلعنا سنه ثالثة حصل تغيير جذري في حياتي الفنية لإنهم إختاروني علشان ألعب اكسليفون طبعا هلاقي واحد يسألني يطلع إيه الاكسيليفون ده وللي عاوز يسأل بس مكسوف أحب أوضح إن آلة الاكسيليفون دي عبارة عن صينية خشب كبيرة متمسمر فيها صوابع الومنيوم بمقاسات مختلفة ومعاها عصيتين خشب في نهاية كل عصاية منهم كورة فايدتها إننا ندق بيها على الصوابع الالومنيوم فتطلع صوت حاد جدا بيخرم ودن اللي بيعلب عليه .. المهم أنا طبعا رفضت رفض تام إن ألعب الآله الغبية دي وقلتلهم لأ .. أنا عاوز ألعب كمنجه زي أخويا عاااااااااااااا قالولي ماينفعش علشان إنت صغير وانا راسي وألف صرمة قديمة إني عاوز ألعب كمنجه زي أخويا عااااااااااااااا وروحت البيت وانا مفلوق من العياط .. طبعا والدتي لما شافتني إتخضت ولما عرفت اللي حصل قررت تروح المدرسة علشان تحاول تقنعهم (على فكرة دي من المرات القليلة اللي والدتي الله يرحمها راحت فيها المدرسة بتاعتي أنا وأخويا .. لأنها كانت بتشتغل ومش فاضية .. وطبعا ده اللي عقدني من موضوع عمل المرأة يا دكتور)

ما علينا .. راحت والدتي المدرسة وقعدت مع مسيو أستيك (لأ ده مش اسم آلة موسيقية ده المايسترو اللي كان مسئول إنه يعلم الأولاد على الآلات الوترية زي الكمنجة والتشيلو والمندولين) وعلى فكرة هو كان مايسترو بجد كان راجل من أرمانيا شعره مرجعه لورا وعامله أجلاسيه لميع وكان بيقود أوركسترا المدرسة في كل الحفلات .. المهم إني قعدت قدامه وخلاني أمسك الكمنجه وطلب مني ألعب عليها .. طبعا أنا ما صدقت وقعدت أحاول أطلّع منها أي صوت لكن للأسف الصوت الوحيد اللي طلع منها كان أشبه بنهيق الحمير .. قالي عارف ليه مافيش أي صوت طالع، لأن صوابعك صغيرة مش بتقدر تدوس كويس على الأوتار علشان تطلع موسيقى .. الحقيقة إن دي كانت وجهة نظر مقبولة جدا واضطريت في النهاية إني أرضخ لمصيري المؤلم وأتعلم الاكسيليفون.

استمر الوضع على ما هو عليه لمدة سنتين بالتمام والكمال وانا مصيري مربوط بصينية خشب وصوت مسلسع غالبا أثر على حاسة السمع عندي لحد النهاردة .. لكن بعد كده وتحديدا في سنه خامسه قرر مسيو أستيك إنه يستعين بخبراتي الموسيقية وإني أحمل لواء الكمنجه .. وفعلا اتعلمت الآلة الجميلة اللي اسمها كمنجة وكنت سعيد جدا ولو إن فرحتي ماكتملتش نظرا لأن أخويا كان إتخرج من المدرسة وبالتالي ما أسعدنيش الحظ إني أقعد على قلبه .. أقصد أقعد جنبه وأعزف معاه روائع الموسيقى العالمية.

إن شاء الله نتقابل في يوم جديد، نكمل فيه حكاية الموسيقى في حياة المصري ..

التسميات:

posted by ولد مصري at 11:39

8 Comments:

ههههههههه
انا كنت مش هكمل الموضوع عشان مخنقش
وبعدين قلت ده عز الطلب ههههه(اكيد بهرج)
ايه تاريخك الموسيقى الحافل ده وايه الالات الجميلة دى اساميها صعبة جدا:)
عموما مستنين باقى قصة الكفاح الموسيقية مع السلم:)
تحياتى:)

السبت, نوفمبر 29, 2008 12:19:00 م  

برينسيس

طبعا فرصه وجت لحد عندك :)

على العموم أنا سعيد إنك كملتي قراية للآخر ربنا يسترك دنيا وآخره

إن شاء الله هكمل باقي القصة علشان تعرفوا انا قد ايه تعبت وكافحت لحد ما وصلت لقمة المجد (أي كلام فارغ)

تحياتي

السبت, نوفمبر 29, 2008 1:05:00 م  

الموسيقار الكبير و الكمنجاتي القدير
شكرا لدرس الموسيقي الحلمنتشى رجعتنا للعصور الوسطي لان كل الالات سالفة الذكر اندثرت حتي من كتب التاريخ
تحياتي

السبت, نوفمبر 29, 2008 1:39:00 م  

هههههههههه
بجد شكرا جزيلا على درس الآلات الموسيقيه...
بس الحمدلله أنا بعرف المثلث (وبعزف)خذ بالك(بعزف)عليه ..
يا سلام أيام..
......

الله يرحم والدتك ..
......
دمت بخير و
في إنتظار الجديد..

الأحد, نوفمبر 30, 2008 12:22:00 ص  

بالنسبة للمثلث فدي آله حديدية

وعلى فكرة دي أهم آلة في أي أوركسترا سيمفوني (نظرا لأني كنت بلعبها مش لأي سبب آخر

--------

هههههههههههههههههههههههههههههههههههههه


لا بجد هي اكيد مهمه تبعا هههههههههههههههههه

--------

إن أخويا اللي أكبر مني بثلاث سنوات وكان في نفس المدرسة كان بيلعب كمنجه وطبعا كنت حابب أعمل زي ما بيعمل .. مش أخويا ولازم أقلده (طبعا موضوع التقليد ده كان بينرفز أخويا جدا وكانت نرفزته دي بتسعدني جدا تسألني ليه يا كابتن لطيف أقولك معرفش لكن غلاسة

ههههههههههههههههههههههههههههههههه حسه اني شايفه محمد اخويا الاصغر مني بيقلد برده وانا اتعصب وهو يضحك ههههههههههههههههههه

-------------

بارة عن صينية خشب كبيرة متمسمر فيها صوابع الومنيوم بمقاسات مختلفة ومعاها عصيتين خشب في نهاية كل عصاية

هههههههههههههههههههههههههههههههه احلي وصف بجد عليك وصف وتشبيه يموت من الضحك

-----------------

(على فكرة دي من المرات القليلة اللي والدتي الله يرحمها راحت فيها المدرسة بتاعتي أنا وأخويا .. لأنها كانت بتشتغل ومش فاضية .. وطبعا ده اللي عقدني من موضوع عمل المرأة يا دكتور)

عشااااااااااان كداا بس لازم تقدر انها كانت بتشتغل يعني

----------

اله الكمنجه

الله بجد اله بحبها مووووووووووت واتغامها بجد تسحر بس برده كنت عاوز تقعد جنب اخوك يالهوي

الله يكون في عونه

-----------

بجد من غير اي كلام اي بوست ليك بجد بستمتع جدا وانا بقراه واي كومنت كمان


كل سنه وانت طيب واعذرني علي التاخير
تحياتي

الثلاثاء, ديسمبر 02, 2008 5:23:00 م  

الريس الكبير دكتور أحوال

بقى الآلات دي اندثرت خلاص

لا حول ولا قوة إلا بالله

والكلام ده حصل إمتى

على العموم أنا قلت ابتدي معاكم من الأول خالص علشان تعرفوا الأساس وبعد كده هنبتدي ندخل في آلات أصعب شوية

علشان ماتقولوش إني حارمكم من حاجة

وهو كله علشان خاطر مصر

تحياتي

الثلاثاء, ديسمبر 02, 2008 7:23:00 م  

M.K

بقى حضرتك بتلعبي مزيكا وكمان بتعزفي على المثلث

يعني طلعنا زمايل آلة واحدة

أشكرك على الدعاء للوالدة

وشكرا على الزيارة والتعليق

تحياتي

الثلاثاء, ديسمبر 02, 2008 7:26:00 م  

مولان

أيوة طبعا آلة المثلث دي مهمة جدا وغالبا هي السبب إني دخلت كلية الهندسة :))


مش عارف ليه انا حبيت محمد أخوكي كده لله في لله شكله كده بيعمل اللي كنت بعمله بالظبط

برافو يا محمد إستمر

فعلا الكمنجة من الآلات الجميلة وبعدين بتشتغل بيتلعب عليها مزيكا شرقى وغربي يعني بتاعة كله

كلامك كله ذوق ذوق ذوق ربنا يخليكي دايما بترفعي معنوياتي

أنا عارف إن التأخير غصب عنك المهم أخبار البياض إيه وكمان حمدا لله على السلامة

خالص تحياتي

الثلاثاء, ديسمبر 02, 2008 7:32:00 م  

إرسال تعليق

<< Home