يَوْمِيَات وَلَد مَصْري

الخميس، ديسمبر 18، 2008

مزيكاتي قديم – الفصل الثالث


كنا وقفنا المرة اللي فاتت لما صاحبنا الهمام .. بسرعة الحمام .. طار في سكوت .. إلى قهوة كتكوت .. وقابل مطرب الغفلة .. وكلمه عن الحفلة .. أقنعه إنه هيغني .. مع فرقة كبيرة ويبقى مغني .. وفعلا حصل المنشود .. ورجعوا للمكان المعهود .. اللي فيه الفرقة اجتمعت .. وللاقتراحات استمعت .. كل واحد بيقول رأيه ..بحياد مافيش زيه .. وبعد ما انتهت المداولة .. صدر الحكم بالمحاولة!!

بعد مقدمة ألف ليلية وليلة دي ندخل بقى في الموضوع ..

كانت الفرقة بتتكون من المطرب المغوار ومعاه كي بوردست وهو الشخص اللي بيلعب على آلة الأورج وواحد بيلعب على الليد جيتار (جيتار كلاسيك بس كهربائي وله ست أوتار) وواحد تاني ماسك البيز جيتار (والبيز جيتار بيكون بأربع أوتار وبيطلع صوت غليظ) وأخيرا العبد لله على الدرامز.

إتفقنا على الأغاني اللي هنلعبها وابتدينا نتدرب عليها والحقيقة إن المطرب فعلا كان صوته جميل وهيئته كمان محترمة .. واتدربنا من الساعة 12 الظهر لحد الساعة 6 مساءا وقررنا إننا نتقابل تاني في تمام الساعة السابعة والنصف علشان نطلع على الفرح اللي كان مكانه في نادي الغابة بمصر الجديدة.

روحت البيت وافتكرت حاجة مهمة جدا وهي إني لسه ماقولتش لحد من أهلي على موضوع الفرقة دي وحكاية نزول شغل المزيكا وطبعا علشان انا كنت عارف والدي كويس فكنت متأكد إنه هيبتدي الحوار بالرفض وفعلا حصل اللي كنت متوقعه.

أنا: بابا على فكرة انا عملت أنا واصحابي فرقة مزيكا وإن شاء الله هننزل شغل النهاردة
بابا: فرقة؟ فرقة إيه؟ واصحابك مين؟ وشغل فين؟
أنا (يا نهار ابيض .. كل دي أسئلة؟ .. دا انا عقبال ما أرد عليها يكون الفرح خلص)
أنا: حضرتك دي فرقة مزيكا وانا هلعب فيها درامز وأصحابي دول من الجيران وكنا مع بعض النهاردة وجالنا شغل في فرح في نادي الغابة
بابا: أيوة بس موضوع الموسيقى ده انا كنت حابب إنكم تتعلموه مش علشان تشتغلوا بيه لكن علشان تستمتعوا بالموهبة اللي عندكم وتنموها وبعدين بصراحة الوسط الفني ده وسط ما يعلم بيه إلا ربنا وممكن تتعرف فيه على ناس مختلفين عنك في الأخلاق والطباع
أنا: أولا الناس اللي معايا في الفرقة دول جيرانا ومتربيين مع بعض وكنا بنلعب مع بعض من واحنا صغيرين وأهاليهم كمان ناس محترمة يعني عارفين بعض كويس وبعدين المفروض إن حضرتك تكون واثق فيا أكتر من كده إنت علمتنا الصح والغلط والحلال والحرام يبقى المفروض إنك متخافش علينا بعد كده
بابا: طيب والدراسة؟
أنا: مالها
بابا:ممكن الشغل ده يعطلك عن الدراسة
أنا: مش حضرتك كنت بتقولنا بعد ثانوية عامة إبقوا إعملوا اللي انتوا عايزينه أهم حاجة تعدوا من عنق الزجاجة وأديني خلصت ثانوية وهدخل هندسة إن شاء الله يبقى فاضل ايه تاني
بابا: بكالوريوس الهندسة
أنا: طيب إحنا دلوقتي في الأجازة لما تيجي الدراسة يبقى يحلها ربنا
بابا: بس برضه أنا مش مستريح
أنا (والله ولا انا وخصوصا مع الفرقة العجيبة اللي نزلة شغل في اول يوم اجتمعوا فيه): يا بابا حضرتك طول عمرك بتبقى مش مستريح لأي حاجة جديدة وبعدين بعد كده بترتاح .. أرجوك خليني أجرب
بابا: مين قالك إني ببقى مرتاح بعد كده وبعدين إزاي عاوزني أخليك تجرب حاجة ممكن تضرك
أنا: حضرتك ماتقلقش خالص .. الموضوع مافهوش ضرر من أي نوع خليني أجرب ويمكن الموضوع مايعجبنيش أساسا (طبعا بعد ما نتحدف بالطوب) وانا اللي أقرر ما نزلش شغل تاني
بابا: يعني مافيش فايدة
أنا: مافيش فايدة في إيه بس
بابا: في موضوع شغل المزيكا ده
أنا: متقلقش وإن شاء الله كل حاجة هتبقى زي الفل

وفعلا لبست الملابس اللي اتفقنا عليها واجتمعت مع الشباب في المكان المتفق عليه وطيران على الفرح.

دخلنا الفرح وطلعنا على المسرح نجهز العدة اللي هنشتغل عليها ونجرب الصوت والميكروفونات زي ما كل الفرق بتعمل وبيقولوا كلام عجيب وهما بيجربوا الصوت:

هالو تست .. تست مايك هالو .. هسه .. هسه .. تست .. (مش عارف ايه هسه دي)

المهم شوية وسمعنا صوت الزفه جاية ومعاهم العروسة .. والحقيقة إن الفرح كان من البيئات الشعبية وده طبعا لحسن الحظ لأن معظم المعازيم كان كل همهم الرقص على أي دوشة حتى وإن كانت من عينة أنا بحبك يا حمار!!

يادي المصيبة دا الموضوع طلع بجد .. طبعا أنا إيدي ابتدت تترعش وماعرفتش أتلايم على أعصابي وابتديت أعرق مش عارف ليه.

ووقفنا على البست اللي هو يعني خشبة المرسح .. الله يرحمك يا يوسف بيه يا وهبي (يا عم هو ده وقته إنت في إيه ولا في إيه)

وابتدينا نلعب المزيكا الشهيرة اللي اسمها الويدنج مارش وطبعا الدرامز ماكنش ليه أي صوت خالص لأول مرة في تاريخ البشرية وكل الترقيع والخبط اللي كنت بأمارسه بمنتهى الجد والهمة طار في الهواء ومابقتش عارف أخبط خبطتين على بعض.

دخل المطرب ومسك المايك ومسى على المعازيم وابتدينا نلعب أحلى تخاريف سمعتها في حياتي والحمد لله إن ماكنش فيه أي حد من المعازيم بيفهم في طبيخ المزيكا والعجن والخبز اللي كنا بنعمله واللي كان لا يمت للمزيكا بأي صلة من قريب أو بعيد غيرشي بس إنه بيستخدم نفس الآلات اللي الجماعة المزيكاتيه بيستخدموها.

الجميل في الموضوع إني لقيت المطرب خد راحته على الآخر وزي ما يكون المعازيم دول من بقيت أهله وواضح جدا إن قهوة كتكوت الواطية كان ليها دور كبير في إعجاب السادة المعازيم بهذا المطرب الصاعد لسلم المجد وأكيد معاه الفرقة الماسية اللي احنا بنمثلها.

خلص الفرح وإنتهى معاه العجن وإجتمع بعض المعازيم حول المطرب علشان يسألوه عن نمر التليفونات وطريقة التواصل بالفرقة العظيمة بتاعتنا وطبعا ماكنش معانا أي بطاقات تعارف ولا يحزنون لكن على أي حال اهم حاجة إن الناس انبسطت واحنا كمان انبسطنا إننا نزلنا أول حفلة لينا في تاريخنا الفني.

طبعا الموضوع مانتهاش على كده لأن الحفلة دي كانت بداية المشوار إلى الفنادق الفايف ستارزلكن إن شاء الله المرة الجاية هنشوف إزاي الفرقة كملت مشوارها الفني ونوعية الأفراح الواطية اللي كانوا بيأنسوا فيها.

التسميات:

posted by ولد مصري at 13:03

18 Comments:

ههههههههههه
ايه كماية الشتايم اللى على الفرقة دى؟:)
وبعدين سلم المجد بيبدا بخطوة(وش بيطلع لسانه)
لا بجد بقى عارف احنا نستاها اى حاجة تجرالنا عارف ليه؟
عشان كلام باباك هيطلع صح بس كعادتنا دماغنا بتقفل خالص وبنبقى شايفين نفسنا صح
بس انى واى لو مكنتش جربت كنت هتفضل تسال نفسك لو كنت عملت كذا كان ايه اللى هيحصل:)
انا كنت متخيلة هتخدوا علقة
جت سليمة
مستنية الباقى:)
تحياتى

الخميس, ديسمبر 18, 2008 5:30:00 م  

ياخساره هو ماحصلش ضرب )):

لالالالالا ...انت كدا ضحكت علينا بقى فى البوست اللى فات

انا كت متوقعه ضرب للركب ..ياخساره )):

وكمان العزف كان اى كلام و السلام

بعت القضية يا عبد المولى و عملت زى الكل

لا
لا
لا
لااااااااااااااااااااااااااااااااااااااا

ماكنش انعذر و لا لبس نضاره

بس بس انا اتصدمت من العزف

عاااااااااااااااااااااااااااااااااااااااااااااااااااا

على فكره انا بجد بجد متغاظه ان مافيش ضرب بقى هه

---------
نتكلم جد بقى

حلوة الذكريات عجبنى جدا الحوار بينك و بين والدك

بتعرف تقنع انت كويس على فكره

لدرجه ان انا اقتنعت برضه تخيل D:

بس برضه انا متغاظه مووووووووووووووت عشان مافيش ضرب

مش عشان افرح فى الفرقه ولا حاجه

لالالالالالالالا ماتفهمنيش صح خاااااااااااااااااااالص

هو بس عشان الاكشن تحس ان فى كفاح و نضال و احمد فى الموضوع كدا

عموما منتظرة الباقى بس يكون بالضرب لو سمحت (:

الخميس, ديسمبر 18, 2008 8:32:00 م  

أبلة برينسيس

بداية حضرتك ناوية تفتحي العضوية عندك في المدونة امتى انتي مسمعتيش عن حملة ماما سوزان القراءة للجميع وحضرتك كده بتعارضي القرار ده وممكن تعرضي نفسك للمساءلة

حضرتك دي مش شتيمة انا مسكت نفسي بالعافية علشان كنت عامل حسابي ان فيه ناس محترمة هتدخل وتقرأ البوست :)

فعلا سلم المجد بيبدأ بخطوة بس معانا احنا كان مشوار صقع وفي الشمس كمان

بالنسبة لكلام الوالد فهو طلع صح في جزئية واحدة بس ان الوسط ما يعلم بيه الا ربنا وطبعا موضوع التعليم لان فعلا موضوع شغل المزيكا ده كان بياخد جزء كبير من الوقت وبالتالي التركيز في الكلية كان بيبقى صعب وخصوصا لما تكون كلية عملية

بالنسبة للعلقة متستعجليش على رزقك الجيات أكتر وان شاء الله هبقى أحكيلكم على كل حاجة في الأجزاء اللي جاية

أخيرا اعملي حسابك يا برينسيس إذا ما كنتيش هتفتحي المدونة وترجعي زي الأول هضطر أشتري سيخ حديد محمي من عند عز وبعدين انتي عارفة هعمل بيه ايه بعد كده (لأ طبعا مش هحطه في صرصور ودنك مش للدرجة دي انا هعمله طفاشة وافتح بيه قفل المدونة هخخخخخخخ)

تحياتي يا مزمازيل برينسيس :))

الخميس, ديسمبر 18, 2008 10:21:00 م  

ضد التيار

لأ ماحصلش ضرب النمرة غلط متهيألي المدونة اللي جنبنا بتعرض بوستات أكشن وكلها ضرب وعربيات بتتقلب تحبي أحجزلك كرسي لوج

ليه بس العنف ده كله ما الطيب أحسن

وبعدين بالنسبة للعزف ده طبيعي جدا ان اول حفلة تبقى كده لان بيبقى ليها رهبة لكن بعد كده بيبتدي الابداع

انتي نسيتي اللي حصل لعبد الحليم ولا ايه مع الفارق طبعا

بالنسبة للحوار اللي كان مع الوالد اهم حاجة في اي حوار إن الواحد يبقى مستعد كويس بالإجابات المنطقية السريعة لأن دي بتساعد على إقناع اللي قدامك لأن الواحد لو خد وقت في التفكير هيدي فرصه للي قدامه انه يجمع تفكيره ويسأله أسئلة أنأح من اللي قبلها (أي خدمة)

بالنسبة للضرب أوعدك إنك هتنبسطي أوي من الأجزاء اللي جاية لأن الأفراح اللي بعد كده كانت في مناطق شعبية وحصل فيها ضرب للركب ورقصني يا جدع مش بقول لك انت هتنبسط معانا قوي يا شحاته افندي

وعندك اتنين بوست أكشن بالضرب وصلحه أيوة جااااااااي

(تقولش فاكراني فريد شوقي)

عجايب

تحياتي

الخميس, ديسمبر 18, 2008 10:34:00 م  

ولد مصرى اللى شكله مشارك فى حديد عز ههههههه
المدونة مقفولة مفيش غيرى بيخشها ولا الباركنج الخاص هههههه
لا والله بعد اذن حضرتك شوية كده وان شاء الله هفتحها:))

الخميس, ديسمبر 18, 2008 10:34:00 م  

أبلة برينسيس

حضرتك البلد كلها مشاركة في حديد عز زلا انتي ماعندكيش خبر :)

ماهو حضرتك لو كل واحد قل عقله وخلا المدونة قطاع خاص هو بس اللي يدخلها مش هتبقى عيشة وممكن نستخدم مايكرو سوفت وورد ونحتفظ بأوراقنا الخاصه في الأدراج ونفضها سيرة

التدوين معمول علشان المشاركة

بقولك إفتحي يا برينسيس انا ابتديت اتنرفز وممكن أتهور وأدش باب المدونة واللي يحصل يحصل

وبعدين يا ستي افتحيها وماتكتبيش اهو أقل حاجة نسيب لك كلمتين يندي لهم الجبين ونخلي الدمعة تفر من عينك لما تقرئيهم علشان نحسسك بتعذيب الضمير

اي خدمة

الخميس, ديسمبر 18, 2008 10:43:00 م  

لالالالالالالالالالالا لاممكن ابدا

امال وصفك للفرقه بيقول اننا هنلاقي درر

يعني مش في حاجه اتحدفت

انا احتج

اكيد في بس انت مخبي هههههههههههه

عامه منتظره الاجزاء الجايه عشان اعرف ازاي وصلت للمجد

الجمعة, ديسمبر 19, 2008 3:33:00 ص  

مولان

الدرر اللي بتتحدف جايه في السكة متستعجليش على رزقك

خليكي انتي بس متبعانا وهتلاقي كل خير

مش عارف ليه الناس كلها نفسها تتفرج عليا وانا بنضرب

حاجة غريبة

برضه الواحد بيعرف معزته عند الناس

تحياتي

الاثنين, ديسمبر 22, 2008 10:49:00 م  

السلام عليكم
حج ودعاء مقبول ان شاء الله
بوست الحج رائع
تحياتى

الاثنين, ديسمبر 22, 2008 11:38:00 م  

السلام عليكم...
فعلا ترفعوا الراس ويتشد فيكم الظهر يا فرقه تووووووووت..
ههههههه مش بحب أقول الكلمه إلي أتحفتنا بها..
.........
أجمل حاجه إنك عمال بتشرح في الجيتارات والآلات ...
بس أنا ناصحه عارفه الدرامز..
من غير ماتشرح...
ههههه
.......
دمت بخير

الثلاثاء, ديسمبر 23, 2008 2:28:00 ص  

تسلم ... الشجاعة و الشجعان
هو ده الاقدام و مواجهة العالم في سبيل الفن الراقي علي مسرح الهرج و المرج بقيادة عازف الدرمز الاول و المطرب الحنجوري
و زغروته ياللي ما نتيش دريانا

تحياتي

الثلاثاء, ديسمبر 23, 2008 5:22:00 م  

جميل
الإعتراف بالحق فضيلة
بس بردوه
محدش من أول يوم بيشتغل مدير
و لاايه

بس بجد
انا بكره حياه الفن و الكلام اللى كدة يعنى
بدون إهانة

فى ناس فعلا فى المجال دة تختلف عن الغالبيه العظمى
بس بيختفوا وسط الزحمة

و دمتـــــــــــــــــــــــــــم

الأربعاء, ديسمبر 24, 2008 11:51:00 م  

الله عليك وكمان طلعت فنان و موسيقى و درامز ..

بس ما لقتوش غير الافراح اللى قلت عليها كل الشتايم دى ..

على كل حال متابعه الحكايه لما اشوف المره الجايه حتمزك فين ..

دمت بخير

تحياتى

الخميس, ديسمبر 25, 2008 5:35:00 ص  

جنة

وعليكم السلام ورحمة الله وبركاته

جزاكي الله خيرا على الدعاء وتقبل الله منا جميعا صالح الأعمال ورزقنا القبول آمين

بالنسبة لبوست الحج فأكيد لا يقارن بكلماتك الرائعة

تحياتي

الجمعة, ديسمبر 26, 2008 7:14:00 م  

نهار

وعليكم السلام ورحمة الله وبركاته

شامم ريحة مش عجباني في كلامك

بس كويس إنك حزفتي الكلام الخارج

بالنسبة للدرامز والله كويس إنك عارفاه لأني الحقيقة معرفوش أصلي حافظ مش فاهم :)

أشكرك على زيارتك الأولى وأتمنى دوام التواصل

تقبلي تحياتي

الجمعة, ديسمبر 26, 2008 7:16:00 م  

دكتورنا أحوال الهوى

كل ده من فرح واحد أمال لو شفت اللي جاي هتقول ايه

بس معلش الصبر طيب والعبرة بالنهاية وإحنا نهايتنا كانت فل خليك متابع معانا علشان تعرف بس ان مش أي أي ولا زي زي ولا كل كل

منور يا دكتور

تحياتي

الجمعة, ديسمبر 26, 2008 7:19:00 م  

ساموراي

يا سلام على كلامك الجميل

فعلا محدش من أول ولا تاني ولا رابع ولا عاشر يوم بيبقى مدير الموضوع محتاج صبر وده اللي احنا عملناه

بالنسبة لحياة الفن فانتي بتكرهيها وانتي بره امال لو عيشتي فيها هتعملي ايه دي حياة ما يعلم بيها الا ربنا وكلمة زبالة تعتبر كلمة راقية بالنسبة لوصفها

أكيد فيه أقليه محترمة بس للاسف غالبا بتلقيهم قاعدين في بيوتهم

المهم حمدا لله على السلامة ومتتأخريش علينا تاني

تحياتي

الجمعة, ديسمبر 26, 2008 7:23:00 م  

روفي

تقولي ايه بقى سبع صنايع

بالنسبة للافراح في الأول بيبقى صعب ان الواحد ينقي لان الفرقة بتبقى مش معروفة وبنبقى بنتنشق على اي فرح بس بعد كده بنبتدي نفلتر الافراح وطبعا مابننزلش الا الافراح المحترمة وساعات بننزل افراح مش محترمة بس بيكون المبلغ المدفوع صعب ان حد يقاومه (بجد الواحد مش عارف كان طايق نفسه ازاي) بس الحمد لله الذي عافانا وتاب علينا من الشغلانه اللي ما يعلم بيها الا ربنا دي وإذا كان الواحد بيتذكرها فأنا بحكيها علشان الناس تعتبر وتعرف إن المظاهر غالبا بتكون بتخدع ومش دايما بتكون جميلة زي ما الظاهر بتاعها بيقول

خالص تحياتي

الجمعة, ديسمبر 26, 2008 7:30:00 م  

إرسال تعليق

<< Home