يَوْمِيَات وَلَد مَصْري
الثلاثاء، ديسمبر 02، 2008
مزيكاتي قديم – الفصل الثاني
كنا وقفنا المرة اللي فاتت لما عم جاديليو أقصد مسيو أستيك قال لي أنت اللي هتغني في الحفلة يا منعم واختارني في فريق الموسيقى كعازف كمان (عازف كمان هنا مش بمعنى عازف تاني لكن معناها عازف كمنجه بس إسم "الكمان" ده اسم الدلع الشيك بتاع آلة الكمنجة) .. وفعلا أتعلمت الكمنجة واشتركنا في حفلات المدرسة وحفلات تانية على مستوى إدارة مصر الجديدة التعليمية والكلام ده كان خلال السنة الخامسة والسادسة ابتدائي.
تدور الأيام وتعدي وأدخل إعدادي وللأسف بيتوقف نشاط الموسيقى نهائي خلال الثلاث سنوات العجاف بتوع إعدادي وأتحول بقدرة قادر إلى النشاط الرياضي وخصوصا كرة اليد ومعاها كرة القدم وكنت بلعب كحارس مرمى في الحالتين.
مرة تانية تجري الأيام وأدخل ثانوي ودي بقى كانت فترة التحول التام في حياتي كلها سواء على مستوى الشخصية أو على المستوى الفني .. فعلى مستوى الشخصية تحولت من شخصية خجولة جدا (لسه آثارها موجودة لحد دلوقتي) إلى شخصية مشاغبة وخصوصا في سنة تانية ثانوي .. أما على المستوى الفني فكان عندنا مُدرسة موسيقى رائعة كانت بتعتبر كل أعضاء فريق الموسيقى زي ولادها وكانت بتخدمهم بعنيها وانا أتذكر إن كان واحد زميل لينا في فريق الموسيقى كان عاوز يشتري جيتار كهربائي علشان هيكّون فرقة مع أصحابه وممعهوش تمن الجيتارفقامت مسلفاه كامل المبلغ علشان يشتري الآلة اللي بيحبها وعلى فكرة من ضمن الناس اللي كانوا معانا في فريق الموسيقى في المدرسة واحد إسمه طارق مدكور واللي منكم ما يعرفش طارق مدكور فده ملحن وموزع معروف في الوسط الفني جدا واسمه بلاقيه ملطوخ على معظم الشرايط الجديدة .. المهم إن طارق مدكور واحنا في ثانوية عامة سألته مرة بتاخد دروس في إيه فقال لي في الفرنساوي .. قلت له بس .. قال لي لأ وفي البيانو كمان!! وطبعا واضح جدا إن دروس البيانو هي اللي حوأت فيه وجابت معاه نتيجة كويسة.
المهم إن وأنا في ثانوي جنب لعب الكمان كنت بحب أقعد على الدرامز وأقعد أخبط عليه وأدوش كل اللي حواليا، لدرجة إن مس الموسيقى طلبت من واحد زميل لنا كان درامر شاطر إنه يعلمني لعب الدرامز وده غالبا علشان تتخلص من الصداع اللي أنا كنت بسببه .. وفعلا ابتديت أتعلم لعب الدرامز وأنهيت ثانوية عامة بمستوى يؤهلني إني ألعب مع أي فرقة موسيقية وده اللي شجعني مع جيران ليا في نفس المنطقة إننا نعمل فرقة .. وفعلا قعدنا مع بعض علشان نتفق هنعمل ايه وهنتمرن فين وكان نقصنا مطرب مش عارفين نجيبه منين .. المهم وإحنا قاعدين لا بينا ولا علينا حصلت حاجة غريبة جدا ألا وهي إن شخص اتصل بتليفون زميلنا اللي كنا مجتمعين عنده وقال له إن فيه فرح ومحتاجين فرقة ضروري جدا .. إمتى بقى الفرح والكلام الجميل ده؟ ............ الليلة يا عمدة!!
- يا نهار أبيض طب وبعدين يا جماعة
- ايه رأيكم يا رجالة نتوكل على الله
- يا بني ازاي بس؟ ده احنا لسه ماعملناش أي بروفات .. وعمرنا ما نزلنا أي حفلات .. ومحدش شافنا في أي مناسبات .. يبقى هيهات هيهات (طبعا حكاية هيهات دي من عندي كتبتها دلوقتي ومكنتش في الحوار بس حسيت إن الجلالة خدتني حبتين) وبعدين إنتوا ناسيين حاجة صغيرة قوي .. هنلاقي فين "مِنعم" دلوقتي اللي هيغني معانا في الحفلة؟ ولا حضراتكم ناويين تطربوا المعازيم بمزيكا بس وبلاهة غُنا؟ ولا جايز بقى ناويين تلفوا في الشوارع وتقولوا محدش شاف مطرب يا ولاد الحلال!!
- الشارع؟ والله فكرة
- إنت بتستعبط ياض انت وهوه؟ فكرة ايه إن شاء الله؟ إننا نلف في الشوارع ندور على مطرب؟
- يا أخي لأ .. نلف في الشوارع ايه بس
- مش إنت يا سي زفت اللي بتقول إن فكرة الشارع دي فكرة حلوة؟
- أنا قصدي إن فيه واحد ساكن جنبنا بيحب يمشي يغني في الشارع طول اليوم .. هو أينعم صايع وضايع وبلطجي .. بس صوته حلو ..ايه رأيكم نجيبه؟
- يا نهار أسود ومنيل بنيلة سوده مهببه على دماغك إنت وهوه .. بلطجي؟ إنتوا أكيد بتهرجوا؟ أكيد أكيد بتهرجوا؟ ما هو مش ممكن يكون الكلام ده بجد ومش تهريج؟ وتهريج زبالة كمان؟ يعني ايه عايزين تجيبوا واحد يغني معانا كل مؤهلاته إنه بلطجي وبيغني في الشوارع؟ دي إيه المؤهلات العالية دي؟ معلش يا جماعة أنا متهيألي بس إنكم متأثرين شوية بفيلم بداية ونهاية بتاع صلاح أبو سيف لما جابوا فريد شوقي يغني "طب والله زمان زمان والله" .. إنتوا عاوزين المعازيم يحدفونا باللي في رجلهم؟ ولاعاوزنا مانروحش من أم الفرح اللي مش باين من أوله ده؟
- يا جماعة ما هو مافيش حل تاني أنا رأيي نجيبه وخلاص
- طيب ولنفرض إننا رضينا إنه يغني معانا ممكن أعرف بقى هنلاقيه ملقح في أنهي خرابه دلوقتي؟
- بسيطة هوه دايما بيقعد على قهوت كتكوت في روكسي
- يا دي المصيبة .. وكمان قهوة كتكوت؟
- يا سيدي وانت مالك بإسم القهوة بس هو انت هتناسبها؟
- ما هو ده بيدل على المستوى البيئي اللي ما يعلم بيه الا ربنا اللي هنتعامل معاه
- يا سيدي ماتتعاملش معاه انت وسيبنا إحنا نتعامل معاه
- ماشي .. بس برضه قهوة كتكوت دي مش مريحاني؟
- يا عم مش مهم تريحك المهم إننا ننزل الحفلة وخلاص .. دي أول مرة نعمل حاجة زي كده وعايزين نجرب
- وماله خلينا نجرب ماهي شكلها كده هتبقى اول وآخر حفلة ننزلها
- طيب المهم دلوقتي مين هيروح يندهله
- أنا هروح مافيش مشكلة ..
ده تحديدا الحوار اللي دار ما بين أعضاء الفرقة الجديدة اللي اتكونت وبتستعد تنزل أول حفلة ليها في نفس اليوم اللي اتكونت فيه .. عرفته ليه حالة الفن بتسوء في مصر!!
المهم راح صاحبنا قهوة كتكوت ولقى الزبون المطرب اللي المفروض هيغني معانا مآنس على القهوة وهاتك يا شرب شيشة ولعب طاولة ودومينو .. عرض عليه صاحبنا الفكرة وطبعا وافق على الفور .. أكيد لازم يوافق وهوه هيلاقي مكان يتاوى فيه - أقصد يغني فيه - فين أحسن من كده بدل قاعدته على القهوة وغناه في الشوارع .
المهم إنه شده معاه ورجعوا هما الاتنين لمكان تجمع الفرقة .. بس المشكلة بقى إن الكلام الجميل ده كان الساعة كام؟ كان في تمام الساعة 12 ظهرا، والحفلة كانت الساعة كام؟ كانت في تمام الثامنة مساءا!!
يا ترى يا هل ترى ايه اللي حصل لما أعضاء الفرقة اتقابلوا مع بعض لأول مرة؟ وإيه اللي حصل في الحفلة؟ ده اللي هنعرفه في الفصل التالت بإذن الله ..
التسميات: يوميات
40 Comments:
بيب بيب بيب اعوعا
اوللللللل تعليق
هقرا واجي
مولان
يعني لما تتخدي مخالفة دلوقتي على استخدامك آلات التنبيه يبقى كويس
على العموم حقك طبعا أول تعليق مين قدك
في انتظار التعليق اللي بجد
تحياتي
ايه ده بقي
مش كملت ليه وقولت عملتوا ايه مع الكائن الغريب يوه اقصد المطرب الغريب
نرجع للبوست من اول
***********
مُدرسة موسيقى رائعة كانت بتعتبر كل أعضاء فريق الموسيقى زي ولادها وكانت بتخدمهم بعنيه
--------
بصراحه موقفها رائع وربنا يكرمها بجد الناس اللي زي دي الواحد بيحس ان في امل وعمر وتوفيق هتسال مين توفيق هقولك ولا اعرف
--------
بحب أقعد على الدرامز
ههههههههههههههههههههههههههههههههههههههه
انا دلوقتي عرفت الدوشه دي جايه منين اءاءاء
------------
هيهات هيهات
ههههههههههههههههههه دي الجلاله اخدتك اووووووووووووووووووي بس استني مش قلت اخدتك فين عشان مش ندور عليك ونقول ولد مصري تايه ياولاد الحلال
--------
بوست لذيذ جدا
وتقريبا فاضل بياض الشقه وهنزل بوست عنه مخصوص وابقي حب محمد براحتيك لن انسي لك هذا الموقف عااااااااااااااا
ههههههههههههههههههه ومش هتاخد مخالفه ده انا في مدونه ولد مصري نياهاهاهاها
ههههههههه اكيد اضربتم جايبين واحد من على كتكوت عايزين ايه يعنى؟:)))
وبعدين طول عمرك بتحب الدوشة درامز حتة واحدة
ده انا اكتر الة بحس ان اى حد ممكن يخبط عليها ههههههه بوم بوم بوم
مالها الكمنجة ما كانت كويسة
وكويس ان الجلالة اخدتك لحد كده ده كان هيقلب مسلسل تاريخى ههههه
ومدرسة الموسيقى دى اكيد انقرضت لان دلوقتنى الناس مش بتساعد بعضها كده
مستنية الباقى يا boss
تحياتى
مولان (كيارا سابقا)
ان شاء في الفصل التالت هتعرفي متستعجليش على رزقك
تصدقي إني بفكر أعملها زي المسلسلات المكسيكي وأوصلها للفصل 344
وجايز كمان أعملها ألف ليلة وليلة ربنا يدينا طولة العمر
بالنسبة للمس بتاعة الموسيقى ففعلا كانت المدرسة كلها بتحبها حتى الطلبة اللي ماكنوش في فريق الموسيقى لأنها كانت ست لارج جدا وبتضحك مع كل الناس وفي نفس الوقت شخصيتها بتفرض على الجميع الإحترام
بالنسبة لموضوع الدوشة الله يسامحك لا تعليق بس لعلمك أني مننساش حجي ابدا :)
حضرتك الجلالة لما بتاخدني بيبقى صعب إن حد يحصلني لأني أنا شخصيا بتوه لأني مابعرفش ناوية تاخدني على فين :)
لسه بياض الشقة؟ أمال العجن اللي كان مخليكي مختفيه ده كان عبارة عن ايه
على العموم ربنا يعينكم
تحياتي
مولان كلاكيت تالت مرة
وجودك في مدونة ولد مصري ده في حد ذاته يستوجب سحب رخص :)
على العموم فيه مثل بيقول أخرة الزمر طيط
طيط
ههههههههههههههههههههههههه
لا ده كان هد للشقه وبنا من اول وجديد وتركيب سيراميك جديد
فاضل البياض ادعيلي انت بس
جميل قوى هواياتك مره تمثيل و مره موسيقى
ماشاء الله ياترى ايه تانى ؟؟؟
انا عاشقه القيثار على فكره و بلعب عليه كمان (:
الآله الوحيده اللى بجد رفضت العب عليها كانت الكمان
مش بحبها مش عارفه ليه ...يلا ماهى راحه برضه نفسيه فى الاول و الاخر
منتظرين الجزء التالت من مزيكاتى قديم
تحياتى
هههههههههههههه
اوكى انا متابعه
والمره الجيه هجيب شاش وميكركروم
والف لاباس عليكم
كل سنه وانت طيب
الموسيقار العظيم ولد مصري، ايه ده كله ، كمنجات ودرامز ناقص تقول انك لعبت على العود كمان ههههههههههه
كتكوت في مطرب يقعد على قهوة اسمها كتكوت، هو مستوى الفن اتدهور من شوية :))))))
انا اللي صعبان عليا في الموضوع ده كله الناس اللي في الفرح ذنبهم ايه بس، ده كل اللي عملوه انهم راحو فرح
عموما في انتظار الجزء التالت وعلى فكرة المسلسلات المكسيكي راحت عليها خليه مسلسل تركي احسن وممكن برده يقعد 150 حلقة مش بطالين يعني :))))
كل سنة وانت طيب وعيد أضحى سعيد
تحياتي
كل سنة وانت طيب
عيد سعيد
لك ولأسرتك
شكرا لسؤالك عنى
تحياتى
السلام عليكم
كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .
اوعي تقول انكم قضيتوا الليلة في التخشيبة... احسن استني الجزء التاني
تحياتى
برينسيس
ربنا ستر وقهوة كتكوت كان ليها عامل كبير إن الليلة تعدي على خير زي ما هنشوف في الجزء التالت
حكاية الدوشة دي مش هقولك غير الله يسامحك
وعلى العموم ده السبب اللي خلاني وانا بلعب على الدرامز أحس إني بلاقي نفسي :)
بوم بوم بوم هوه ده اللي إنتي شايفة إن الدرامر بيعمله؟ لعلمك فيه كمان بوم بوم تك تك بوم بوم تك وفيه بوم تك تك بوم تك تك ده غير طبعا بوم تك بوم تك تك بوم ايه رأيك بقى لسه شايفة إن أي حد ممكن يخبط عليه؟
فعلا هوه مسلسل تاريخي وان شاء ربنا يدينا طولة العمر ونتابعه
حكاية مدرسة الموسيقى اللي انقرضت دي طبعا إنتي شغالة في كار التدريس ده وأعلم مني لكن الأمل فيكي يا برينسيس إنك تحملي الراية :)))
خالص تحياتي
مولان
يبقى حمدلله على سلامة الشقة ومبروك السيراميك
تحياتي
ضد التيار
هوه عامة جميل إن الواحد يبقى له إهتمامات لإنها بتساعده إنه يطلع اللي جواه
على أي حال الاهتمات كمان بتختلف من وقت لآخر
إن شاء الله الجزء التالت بعد أجازة العيد
تحياتي
همس
كل سنه وانتي طيبة
على العموم الشاش والميكروكروم مش هيخصروا وأكيد لو ماستخدمناهمش المرة دي هنستخدمهم في حفلات تانية
تحياتي
كل عام وانتم بالف خير... وكل الاهل والاحباء والاصدقاء بخير...
كل عام وامتنا الاسلاميه بالف الف خير...
كل عام وامتنا الاسلاميه عزيزه... كريمه ومنصوره باذن الله...
بخ
جيت اقول كل سنه اونت طيب
وركنت عربيتي برا عشان المخالفات
في واحد هنا مابيصدق يدي مخالفات
كل سنه و انت طيب ):
ايوة هو الوش دا صح
كل سنه و انت طيب ):
السلام عليكم ورحمة الله
كده يا بشمهندس تقطع الحكاية عند أهم نقطة ههههه ده لزوم التشويق والا ايه حضرتك طلعت متعدد المواهب ممثل ومزيكاتي ههههههه ولعيب كورة كمان يعني احنا لينا الشرف اننا بنقرالك
كل سنة وانت بألف خير ويارب عيد سعيد عليكي وعلى أسرتك
و لا إنه تعليق متأخر
بس كويس إنه جه
حلوة حكاياتك
انت تطلع من حكايات الجيش
لحكايات المدرسه
و ماله
بس جميله
بس بطل تشوقنا كدة
كل سنه و انت طيب يا باشا
و دمتــــــــــــــــــم
كل عام وحضرتك بخير
احمد الشاعر
كل عام وانتم بخير :)
بيربل ويفز
موسيقار عظيم مرة واحدة مش للدرجة دي
فعلا قهوة كتكوت عليها عامل كبير لدهورة الفن
الناس اللي حضروا الفرح دول يستاهلوا كل اللي يجرالهم وهو فيه حد برضه يتفق مع فرقة مزيكا في نفس يوم الفرح؟ علشان يحرموا
فكرة المسلسلات التركي دي مش وحشة على العموم الموضوع سهل وبسيط خالص نخلي البطل يسافر من المكسيك الى تركيا ونحوله لمسلسل تركي :)
ولو ان 150 حلقة دول يخلصوا يا دوب في المقدمة
كل سنه وانتي بخير وسعادة
تحياتي
جنة
كل سنه وانتي طيبة وبخير وسعادة
أهم حاجة إننا نطمن عليكي ونعرف إنك بخير حتى وان كان بكلمات بسيطة بنسيبها لبعض
تحياتي
أحوال الهوى
وعليكم السلام ورحمة الله وبركاته
كل عام وانتم والأسرة بخير
بالنسبة للتخشيبة الحمد لله كانت بتعدي كل مرة على خير
تحياتي
أكون أو لا أكون
كل سنه وانتي والأمة الاسلامية بخير وتقبل الله دعائك
تحياتي
مولان
وليه بس الخضة دي الواحد جتته مش خالصه
كل سنه وانتي طيبة
مخالفات ايه كفى الله الشر
حضرتك تنوري في أي وقت واحنا نركن لك العربية ونغسلها كمان
تحياتي
ضد التيار
كل سنه وانتي طيبة
ممكن أفهم لزمة الوش الجميل ده ايه ولا مش لازم
تحياتي
أمل
وعليكم السلام ورحمة الله وبركاته
معلش ماهو لازم شوية تشويق
يا فندم ده أنا اللي ليا الشرف إن حضراتكم بتدخلوا عندي وبتشاركوني الكلام اللي باكتبه
كل سنة وانتي طيبة وشكرا على كلامك الجميل
تحياتي
ساموراي
اخبارك ايه واخبار الكلية
احنا عاذرينك على التأخير ربنا معاكي ويعينك
بس اهم حاجة طمنينا عليكي
كويسس إن حكاية المزيكا عجبتك زي اللي قبليها
شكرا على زيارتك والتعليق
تحياتي
الشاعر أحمد
كل سنه وانت بألف خير
افتقدناك يا ريس
تحياتي
أقصوصة
كل سنه وانتي بخير وسعادة وعيد سعيد
تحياتي
هو وش الزعلان ..وش حلو !!!!!!!!
تيب
هو وش زعلان عادى عادى مش تاخد فى بالك
المهم انك بخير
ضد التيار
يعني ايه مخدش في بالي
هو انتوا تبعتوا وشوش كده والسلام وبعدين تقولي ماتخدش في بالك
ممكن افهم بس ايه اللي بيحصل لحسن الدنيا ملخبطة على الآخر ومش قادر أفهم حاجة وخايف اكون السبب في اي مشكلة وانا مش واخد بالي
تحياتي
مافيش مشكله ولا حاجه
هو الوش دا عشان التغير اللى عندك اللى مش عارفة سببه
و انت كالعاده مش بتقول
و المفروض اننا اخوات و بنقلق على بعض و حضرتك لا حياه لمن تنادى
بس
مش اكتر
طيب ياعم المزيكاتي مستنين
الفرح إلي شكله إتقلب وبقى ترح..
........
بجد ماشاء الله عليك ..
أسلوبك سلس بالكتابه..
....
دمت بخير..
ضد التيار
الحمد لله إن مافيش مشاكل ربنا ما يجيبها ويبعدنا عن الجميع
انا شاكر جدا على سؤالك وعلى كلامك الرقيق
خالص تحيات أخوكي الكبير مصري :)
M.K
واضح ان الثقة منعدمة خالص
على العموم في الجزء التالت كل شئ هينكشفن ويبان :)
وشاكر جدا على كلامك الجميل عن الاسلوب ولو انه مايرتقيش للكلام الجميل ده
تحياتي
إرسال تعليق
<< Home