طول عمر الشعب المصري شعب عاطفي، وعشان كده بياخد على دماغه من كل الخلق سواء كان حاكم أو حكومة وده بسبب واحد مافيش غيره إنه عاطفي ومابيحبش يزعل حد .. ومش بس كده لأ ده حتى في أحرج اللحظات أول ما حد بيجرجره في موضوع المشاعر ده تلاقيه اتدلق على طول ونسي كل اللي اتعمل فيه وعشان كده المشهد الآتي شفناه في يجي خمسميت فيلم عربي قبل كده من أول ما قالوا يا أبيض وأسود لحد الأفلام التكنو كولور:
تعود ليلي إلى المنزل في وسط النهار على غير العادة .. تفتح باب الشقة .. فتسمع صوت حركة مريبة في غرفة النوم
تذهب ليلى إلى غرفة النوم لتجد زوجها عادل في أحضان الخطيئة اللي هيه غالبا بتكون أعز صديقاتها
بعد ذهول وبكاء ونويح وعويل والذي منه تذهب ليلي إلى بيت والدها ويتبعها عادل ليقف أمامها مدلدل رقبته على صدره ويقول:
عادل: سامحيني يا ليلي .. أرجوكي تسامحيني
ليلي وهيه بتعيط: أنا مش قادرة أصدق اللي أنا شفته
عادل: أنا آسف .. أنا فعلا آسف
ليلي: طيب ليه .. ليه
عادل: لأني إنسان حقير خسيس حيوان
ليلي: إنت جرحتني يا عادل
عادل: مغفل حمار سافل
ليلي: أنا مش ممكن هقدر أسامحك
عادل: أرجوكي تسامحيني .. أحلفلك بأعز ما أملك وهو حبي ليكي (طبعا ده حلف بغير الله لا يجوز وبعدين كان فين الحب ده يا روح خالتك وانت بتخونها)
ليلي: صحيح يا عادل إنت ندمان (ليلي بتجيب مارشدير)
عادل: صدقيني يا ليلي (حسين رياض كان بيقولها صضئيني)
ليلي: احضني يا عادل .. ضمني ليك .. ضمني لصدرك .. ضمني قوي (ما خلاص يا أبلة ليلى إنتي ما صدقتي)
وبكده عادل يعود إلى ليلاه .. وطبعا نظرا لأن ديل الكلب عمره ما يتعدل فيقوم عادل بخيانة ليلى كمان مرة ويحصل نفس الحوار مع زيادة جملة "إنت قولتيلي إنك مش هتعمل كده المرة اللي فاتت" وعادل يزود جملة "طور جاموسة خنزير" وهو بيشتم نفسه .. ومع ذلك برضه بتسامحه وكل ده ليه؟ لأننا شعب عاطفي بنحب من قلبنا وبننسى كل اللي بيتعمل فينا.
المقدمة دي كلها علشان من الآخر أقولكم إني مسافر لمدة إسبوعين وعايزكم تسامحوني أنا كمان (إشمعنى عادل) وللأسف الشديد إني مش هقدر أفتح المدونة ولا أطمن عليكم خلال الفترة اللي جاية وعشان كده عايزكم تسامحوني كلكم عن أي طولة لسان أو دفاشة أو لجافة (محدش يحاول يفهم معنى الكلام ده ايه) قمت بيها بس أكيد إنتم فهمتوني وعرفتوا إنهالا يمكن تكون كانت مقصودة.
هتوحشوني كلكم
(إمسحي دموعك يا آمال)
ملحوظة لو فيه حد ناوي على حدف قلل يستنى بعد الساعة الثانية صباحا لأن ده موعد إقلاع الطائرة
التسميات: يوميات
23 Comments:
السلام عليكم
ألف مبرووووووووووك - مش برضه مسافر مصر والا أنا فهمت غلط - التمثيلية دي ظريفة قوي قعدت اضحك عليها من قلبي بس مين آمال اللي في الآخر هيه مش كانت ليلى والا ايه .. الظاهر ان عادل مفيش فايده فيه لسه معتذر لها وبرضه غلط في اسمها ههههههه .. ربنا ييسر لك السفر ويكرمك وان شاء الله اجازة سعيدة .. تحياتي ودمت بخير ان شاء الله
ولـــــــــــــــــــــــد مصرى
اسبوعين ماشى :) عارف لو اسبوعين ويوم مكنش ينفع هههههه
ترجع بالسلامة ان شاء الله
انا عايزة sweets من المكان اللى انت ريحو:) ده قصاد ان مفيش قلة
باى باى
ترجع لنا بالسلامه ..
حقيقى حتوحشنا ..
وحيوحشنا الولد المصرى العنيد اللى دمه خفيف ..
بس انت ما قلتش رايح فين علشان نقولك تجيب لنا ايه معاك .. ليه البخل ده !!
معلش تروح وترجع بالسلاااااامه
تحياتى
rovy
تسافر وترجع بالسلامة إن شاء الله بس إسبوعين بس، مش مشكلة تبقى تعوضها في سفرية تانية
تحياتي
طب مش تقولنا انت مسافر فين
و بعدين ايه المقدمه الطويله دى
ههههههههههههههههههه
على العموم تروح و ترجعلنا بالسلامه يا اخ مصرى
و عندى احساس انك حتوحشنا معرفش ليه
مع حذف اللجافه و ما قبله
ترجع بالسلامه ان شاء الله
و دمتـــــــــــــــــــــــــم
طيب مش تقول مطار ايه وفين علشان نبعت القلة؟
وبعدين لامؤاخذة
مش حسين رياض اللى كان بيقول صضئينى
زكى رستم
بس...هه
هههههههههههه
ظير بقي مش قله علي راي
عم حسين رياض
تروح وتيجي بالسلامه ان شاء الله
بس اوعي تعملها تاني :D
تصدق
فعلا هاتوحشني يا أخي
بجد حقيقي
صضئني هاتوحشني جدا جدا جدا
خصوصا إنك ما دفعتش اللي عليك
;)
تروح و ترجع بالسلامة إن شاء الله و فعلا إنت واحشني جدا بس معلش الظروف مكعبلة اليومين دول
و ماتنساش برطمان المش اللي وصيتك عليه و تدفع فاتورة التليفون و إنت جاي و تعدي على عم حسن المكوجي تجيب من عنده الهدوم قبل ما يأجرها زي عوايده
باشمهندس
تروح وتيجى بالسلامة
بس انت برضه مصر على موضوع القلل ده...ميصحش ...خليها حاجة شيك كده فازة كريستال ملاينه ورد مش أحسن برضه:)
فى انتظارك
تحياتى
نسيت اقولك انا عملت الواجب كل يوم بطل ع المدونة واى مسح كنس احنا فى الخدمة
تحياتى
بس انت ماقلتش رايح فينااوعى تقول انك سافرت مصر من غير ماتقول
لا بجد كده ممكن ازعل
سلام عليكم مدونتك جميل جدا وانت مش قالت مسافر فيان وتروح وترجع بسلام ترجع سالم وغانم هههه
باشمهندسة أمل
عليكم السلام ورحمة الله وبركاته
الله يبارك فيكي عقبالك
لأ طلعت اوت (معلش متأثر بماتش الأهلي والزمالك الأخير) ماكنتش في مصر كنت في كولومبو
آمال ولا ليلى دي كلها مصطلحات تدل على الانكسار (غير اللي بيحصل في شعاع الضوء لما ينزل على مخروط زجاجي)
على العموم شكرا على زيارتك وعلى الدعوات الحلوة دي
تحياتي
برينسيس
الحقيقة هما كانوا 19 يوم بالضبط شاملين الطيران وفترة الترانزيت عشان متقوليش إني خبيت عليكي حاجة
وبالنسبة للسويتس مش تعرفي الأول أنا كنت فين يمكن السويتس بتاعتهم متعجبكيش
ولاسيما إنهم بيحطوا شطة وملح على الأناناس !!
شرفتيني بالزيارة
روفي
ربنا يخليكي على كلامك الجميل ده
معلش نسيت أقول أنا رايح فين على العموم كانت سفرية عمل الى كولومبو عاصمة سيريلانكا
الموضوع والله مافيهوش بخل ولا حاجة بس كنت مركز هقول ايه علشان تسمحوني
شكرا على الزيارة والتعليق
بيربل ويفز
شكرا على الزيارة وبعدين ماهما اسبوعين شغل ودلوقتي والحمد لله أجازة لمدة ثلاثة أسابيع
تحياتي
ساموراي
معلش موضوع كتابة المقدمة نساني أقول انا رايح فين وعلى العموم كنت في سيريلانكا
طمنيني يا ترى إحساسك كان في محله ولا طلع فشنك؟
على اي حال شكرا على كلامك الجميل
تحياتي
أمولة
ماتتعبيش نفسك كفاية شعورك النبيل ده إنك عاوزة تبعتي القلة لحد عندي هوه ده العشم برضه :)
حضرتك كل الممثلين في الفترة دي كانوا بيتكلموا بنفس الطريقة مش كده ولا ايه يا هانم؟
تحياتي
مايوية
اول زيارة ليكي واتمنى ماتكونش الأخيرة انا دخلت في المدونتين بتوعك وتصفحتهم على عجالة بس لقيت كلام كبير ماينفعش مايتقريش برواقة علشان كده ان شاء الله هيكون في زيارات تانية بإذن الله هو أينعم النور كان قاطع عندك في المدونات بتاعتك واضح إنك مسددتيش فواتير الكهرباء لكن برضه كانوا حلوين :)
شكرا على زيارتك والتعليق
عواد باشا
ايه يا ريس الطلبات دي كلها ماهو مافيش غيري في البيت ولا إيه
والله انت كمان هتوحشني وان شاء الله هيكون ما بينا اتصال لما انزل مصر
تحياتي
جنة
يعني اعمل ايه في ذوقك ده فازة كريستال مرة واحدة انا ماستهلش الكلام ده بس لو مصممة يبقى ياريت بقى تجبيها بوهيمي اصلي وخلي الورد عليا
بصراحة المدونة لقيتها بتبرق من كتر النظافة ربنا يخليكي وهو ده العشم برضه
تحياتي
موناليزا
عيب انا برضه اعمل العملة دي قال اسافر مصر من غير ما قول قال
على فكرة انا في مصر بقالي يومين :)
تحياتي
عاشقة القمر
أهلا بيكي وبأهل السودان كلهم
ربنا يخليكي على ذوقك وكلامك الجميل عن المدونة وشكرا على الدعاء الجميل اللي فكرني بدعاء والدتي :)
على العموم كنت خاطف رجلي لسيريلانكا في شغل والحمد لله رجعت سالم غانم :)
اتمنى ان الزيارة دي ماتكونش الأخيرة وان يدوم التواصل
تحياتي
إرسال تعليق
<< Home