يَوْمِيَات وَلَد مَصْري
الأحد، مايو 04، 2008
أمري لله
مش عارف ايه شوطة التيجان اللي بتيجي لأهل التدوين مرة واحدة كده, والحقيقة إن اليومين دول الموضوع زايد حبتين، يعني كل ما أدخل مدونة من مدونات الجيران الاقي كل واحد منهم هاتك يا كلام عن نفسه وعن صفاته ونعاته المحمود منها والمذموم والظريف في الموضوع إنك لازم تلاقي كل واحد منهم يحط جملة "أصل صعب جدا إن الواحد يتكلم عن نفسه" وبعدين تلاقيه اتفتح زي اللبلب وهو بيوصف في جمال شخصيته وحلاوة أخلاقه وشياكته وطبعا ما يمنعش إنه يشلفط نفسه بصفتين مش ولابد عشان مايتقلش عليه بيشكر في نفسه أو إنه شايف نفسه حبتين، وكل ده لحد دلوقتي مش مهم لكن المصيبة السوده لما واحد منهم يكون بيعزك شويتين ويروح ملابسك الصلطنيه (أقصد التاج) غصب عنك ويقولك ياللا سمعنا يا ريس حنتيرة وطبعا عشان خاطر أم الأتيكيت والجنتلة اللي مقطعة بعضها وعشان مايتقلش عليك جلنف ولا بني آدم مستجد في موضوع التدوين فلازم سعادتك زي الدغوف تروح لابس التاج .. لأ وإيه تلبسه وانت كمان فاشخ ضبك عشان تبين لهم إنك مبسوط وسعيد ومش بس كده كمان لأ وإيه لازم سعادتك تحط إسم الشخص اللي لبسك العمة وتقوله ميرسي يا روحي .. طول عمرك جانتيه يا مضروب وهكذا من صفات المدح اللي طبعا طالعة من تحت ضرسك وإن جيت للحق طبعا سعادتك مش طايقه وبتلعن اليوم اللي دخلت فيه على مدونته من أساسه.
المقدمة الجميلة دي كان لابد منها علشان أفضي حالة الغيظ والنرفزة اللي أنا فيها قبل ما أجاوب على التاج اللي جاللي من صديقة المدونة الدائمة برنسيس غروب الشمس وكمان نخص بالشكر أبلة داي دريمنج اللي حلفت ميت يمين على كل واحد يعلق عندها أنه لازم يلبس التاج وعشان أنا بحبكم كلكم يا حلوين فطبعا الشرط المجحف ده مش هحطه ليكم واللي عايز يلبس التاج يلبسه براحته خالص وممكن ياخده معاه في مدونته ويقعد عنده في مدونته يومين علشان يقيس التاج براحته ولو حس إنه مش مستريح أو إن التاج ماطلعش مقاسه ممكن يرجعه (لأ مش قصدي إنه يطرشه بلاش قرف وزروطه) ياللا جاهزين نبتدي بسم الله:
أولا احب أقولكم إني مابعرفش أتكلم عن نفسي خالص أبدا بتاتا بس هعمل إيه هحاول .. ولو إن الكلام عن نفسي صعب .. صعب خالص .. أوف يا ساتر إيه ده مش عارف هعمل إيه لكن زي بعضه بقى هحاول وربنا يسهل!!!!
لو أعطيتك ثلاثة وردات من هم الأشخاص اللي هتديهم الورد ده؟
لو الورد ريحته حلوة هحط اتنين منهم على قبر والدتي وواحدة منهم على قبر والدي ولو ريحتهم مش حلوة مش هقدر أديهم لحد وهسيبهم لحد مايعفنوا وأرميهم في الزبالة (ما هما كده ولا كده هيترموا في الزبالة في الآخر ايه لزمته بقى اللف والدوران وبعدين إبقى هات ورد بريحة وماتسترخصش)
معاك 3 سطور إكتب اللي عايزه
روح يا شيخ إلهي .... ولا بلاش لتكون ساعة إستجابة .. يا رب إنت خالقتني وعارف إني مخلوق ضعيف لا حول ليَّ ولا قوة إلا بيك وقفت ببابك لأن ماليش حد غيرك أروح له عارف إني ماستهلش إنك تفتح ليّ بس عارف كمان إنك بتحبني على كل التقصير اللي مني في حقك بس إنت خلقتني وبتحبني فأنا برضه هفضل واقف ببابك لحد ما تفتح ليّ...
ما هو هدفك في الحياة
أبني قصر كبير قوي ...... الحجارة بتاعته تكون من الفضة والذهب والبلاط بتاعه يكون مرمر ونجيل الجنينة بتاعته تكون لون الزعفران ... ويكون في منطقة الجيران اللي فيها يكونوا من صحابة النبي عليه الصلاة والسلام ..
إن شاء الله بكرة أحسن من النهاردة هل تصدق هذه المقولة؟
أكيد لأن النهاردة وحش قوي وماعتقدش إن فيه أوحش من كده
ما هي أجمل مقولة سمعتها؟
قول الله تعالى "إنَّ اللهَ يَغْفِرُ الذُنُوبَ جَمِيعَا"
مين المغني اللي بتحبه؟ وإيه أغنيتك المفضلة؟
كان ممكن أجاوب على السؤال ده أيام زمان بس دلوقتي مابقتش أسمع أغاني والحمد لله
على العموم أنا بسمع الشيخ مشاري راشد ولو إنه مش مغني .. وأغنيتي المفضلة "أشكو إلى الله كما قد شكى .. أولادُ يعقوبَ إلى يوسفِ"
غزة تمثل إيه في حياتك؟
مقياس لوحدة العرب
تعطي كام في المية لإنتمائك للوطن؟
ما لا نهاية %
لو تزوجت وأنجبت قول أسماء الأولاد والبنات اللي تحبهم؟
في الأولاد: عابد وداود
في البنات: شهد وجهاد ودانة
عمرك غشيت وأنت صغير؟
وليه الإحراج ده .. مش هجاوب ولو إني جاوبت خلاص بس الغريب إني كنت كل مرة باتقفش!!
لو اتعرضت عليك رشوة وانت في زنقة هتعمل ايه؟
نفس فكرة إنك تبقى جعان وقدامك أكل فيه سم هاري أكيد مش هتاكل
قول 3 صفات في 3 كلمات توصف بيهم شخصيتك؟
1- منظم بصورة تشل (ماتنفعش تنحط في كلمة واحدة)
2- مرح
3- دماغ كالحجارة أو أشد قسوة
أول مرتب ليك ولو هتجيب هدايا لعائلتك هتجيب ايه لكل فرد؟
أول مرتب شهري لما سافرت أمريكا في أجازة الصيف وأنا طالب في هندسة عين شمس واشتغلت في مطعم وكنت بقبض 4 ونص دولار في الساعة وكنت بعمل في الشهر حوالي 1300 دولار وفي نهاية الصيف وأنا راجع اشتريت هدايا كانت عبارة عن قطع قماش حرير للوالدة والخالة وأخويا اشتريت له لبس كان عبارة عن جاكت وبنطلون وجزمة والدي كان توفاه الله فملحقتش أجيب له حاجة .. الله يرحمه وأموات المسلمين
أهم صفة في شريك حياتك؟
صفة واحدة بس ايه البخل ده .. أهم حاجة الهدووووووووء لأني مابحبش الدوشة
المجال اللي غير دراستك بتحبه حتى لو كنت بترسم على الحيطة؟
بحب المزيكا جدا وكنت بلعب درامز كمان وقعدت عشر سنين درامر في باند كنا ماسكين دار الهيئة الهندسية في مصر الجديدة بس اعتزلت والحمد لله .. ربنا يعفو عنا ويغفر لنا
بتحب السفر؟ طب ايه المكان اللي عاوز تروحه دلوقتي من غير ما تفكر؟
بحب السفر جدا .. أحب أروح أي مكان غير الرياض :) بس لازم يكون فيه بحر
تمرر التاج لمين؟
بصراحة أنا أحب أسيب الموضوع على حسب ظروف كل شخص لكن ده مايمنعش إن الناس الآتي اسماؤهم يا ريت يبقى عندهم وقت ويلبسوا التاج:
Rovy
Samourai 4 Ever
Gannah
همس
monlaiza
tamer nabil
awaadz
المهاجر
التسميات: تيجان لبستها
22 Comments:
كده برضه بقى بعد كل المحاضره ديه عن تلبيس التاج تلبسه لى اول واحده .
على كل حال على عينى علشان خاطرك ..
بس بعد اذنك اسمح لى بكره اخذه لأنى النهارضه مشغوله جدا ودخلت خطف على النت .
طبعا اجابتك ساحقه ودمك زى العسل
وفقك الله دائما
تحياتى
rovy
انا حاولت اهرب من موضوع التاج ده هربت مرة قبل كده ولكن المرة دى اتقفشت فقلت عليا وعلى اعدائى :))
وبعدين الانسان القوى هو اللى عارف عيوبه ومميزاته
مش عيب ان الواحد يقولهم
بس انا متفقة معاك انا بكره جملة معرفش اتكلم عن نفسى دى اصلها قديمة موووووووووت
وبعدين اكيد شريكة حياتك لازم تبقى هادية كفاية انك علطول عامل دوشة:)
تحياتىىىىىىىىىى
روفي
ربنا يخليكي على ذوقك وكلامك الجميل
حلوة حكاية دخلت النت خطف دي جديدة
على العموم حضرتك تاخدي التاج في الوقت اللي يناسبك وبراحتك خالص ولو عايزانا نوصله لحد عندك كمان مافيش مشكلة إدينا بس عنوان المدونة واحنا نجبهولك فورا
ملحوظة فيه 3 جنيه رسم توصيل
برينسيس
على العموم أنا قلت اللي يرضي ضميري في المقدمة وعلى فكرة أنا نسيت أقول حاجة مهمة جدا تانيه عن نفسي وهي إن قلبي إسود فحمة ومابنساش طاري أبدا ومعلش يا زهر وبكرة تندم يا جميل
تقصدي ايه إن مش عيب إن الواحد يقول عيوبه إتكلمي عن نفسك لو سمحتي قال عيوب قال :)
ايه ده هو فيه version من جملة "معرفش أتكلم عن نفسي" يا دي المصيبة ودي نزلت امتى لازم اعمل update
بقى أنا عامل دوشة على العموم الله يسامحك ليكي مدونة يترد عليكي فيها
شكرا على مرورك
كدا انا لو قلتلك قعدت اد ايه افهم يعنى ايه تاج ولزمته ايه اصلا
هتجى جنبى وتعيط
وانت لما قلتلى فى مدونتى تاج قلت هيكلم عليه مش لاقى دا
اصوت
وكمان جى تدبسنى فيه الله يسامحك
بس هعمل ايه ...؟ امرى لله وحده
بس ادينى فرصه اعمله بعدين على ما اظبط فى المدونة
علشا ن فى حاجات زى التخطيط اتلغت
وما عدت عارفه اظبط والصوراتلغت
هعيط عااااااااااااااا عااااااا
بسب صراحه اجاباتك ما ادتنى مجال افكر فى حاجه اكتبها
اعمل فيك ايه ...اجى اخنقك
واتوب بعدها ....
انا متهيألى لو عندى بنات هاسمى الكبيرة جهاد و الصغيرة شهد مش العكس ولا يمكن انت كاتبهم مش بالترتيب :)
انا اعتذر عن قبول التاج لانى فعلا مبعرفش اتكلم عن نفسى و كده كمان لازم اعتذر لبرنسيس و ساساتيفا مع انى وعدته بس فعلا مش هاعرف
تحياتى
همس
واضح فعلا إن النيو لوك بتاع المدونة واكل دماغك معلش إن شاء الله مافيش مشكلة كل حاجة وليها حل
بالنسبة لموضوع التاج أنا كمان أول مرة سمعت عليه مافهمتش حاجة بس بعد شوية وبعد اللف على المدونات بتاعة الجيران فهمت متقلقيش كلنا بنتعلم
يا ساتر يا رب إعدام مرة واحدة علشان خاطر تاج دا أنا لو كنت سارقة مش هيعمله فيا كده
جنة
أنا مش عاوز أزن عشان تاخدي التاج لأني عارف إن الموضوع مش سهل
ِعلى أي حال أهم حاجة إننا نطمن عليكي
بتاج أو بدون
والله معاك حق
أنا شخصيا باتحرج دايما من موضوع التاج ودايما باعتذر عنه
اسماء ولادك أن شاء الله جميلة جدا وعابد وداوود بالذات دول آخر شقاوة ربنا يبارك لك فيهم ويخليلك مامتهم
:)
يا سيدى لو ع البحر اتفضل عندنا بس ما انصحكش تيجى فى الصيف علشان اسكندرية مش بتكون موجودة فى الصيف
وكمان كنت موسيقار زمان...أنا كمان كنت بيانيست-مع نفسى مش فى فرقة حسب الله- بس الحمد لله ربنا تاب عليا من الهلس ده كله من زمان ويمكن دى من الحاجات اللى باتمنى لما أن شاء الله أدخل الجنة أبقى أرجع أعملها تانى أنى اعزف بيانو..ده لو ينفع يعنى
بس برضة ازاى تسافر وتسيب مصر ولا زال السؤال يتردد..يعنى ايه التعيين حسب الاحوال؟؟
:)
عجبنى ردودك جدا وبالذات المقدمة
تعرف انى عذراك جدا فى انك مش عايز تقعد فى الرياض انا كنت فيها فترة والحمد لله رجعت مصر
اعذرنى فى قبول التاج لانى اتدبست فى واحد ولسه مش عارفة اجاوب عليه
بالتوفيق دائما
ammola
القاهرة كانت منورة
شكرا على الدعاء وعلى دعوتك بزيارة الاسكندرية بس فعلا في الصيف بتبقى صعب جدا انا الحقيقة طول عمري بحب جدا أروحها في الشتاء وخصوصا بعد النوات بتبقى مالهاش حل
بقى حضرتك كنتي زميلة في الكار اللي ما يعلم بيه الا ربنا ده طب الحمد لله على السلامة مرة تانية وبصراحة أنا كمان نفسي جدا ألعب درامز في الجنة وأعمل دوشة يا رب (أدخل الجنة مش إني أعمل دوشة)
بالنسبة للسفر فمشيناها خطا كتبت علينا ومن كتبت عليه خطا مشاها
بالنسبة لموضوع التعيين حسب الأحوال الشباب كلهم باعوا القضية وكل اللي واعدنا إنه هيجيبلنا الخبر اليقين معطلكش
شكرا على الزيارة والتعليق
موناليزا
أكيد المونة الجميلة بتاعتك عملتيها بعد ما رجعتي من الرياض علشان عرفتي إن الله حق :)
ولا يهمك بالنسبة لوموضوع التاج وبنا يعينك على التاج اللي عندك
تحياتي
انا جيتلك اهو
بس على فكرة انا عزومتك جت متأخرة انا فعلا كنت دخلت مدونتك بس وقريت كام موضوع وعجبونى مووووت
وعجبنى اوى المقدمة اللذيذة للتاج دى
بس مكنتش لحقت اسيبلك كومنت
على فكرة انا مش هجيبلك ليموناضة تانى من عند خميس
اكتشفت انه بيغش فى السكر بيقول قال ايه ان السكر ب 4 جنيه فبيغشه وبيحط عليه ملح
عرفت كان مر ليه
بس لما ابقى راضية عنك هبقى اعزمك عندى وامرى لله
الا قولى يا خويا هو انا لو خلصت متقدرش تسفرنى وتشغلنى فى مطعم واخد ال300 دولار يعنى انا متنازلة عن الألف اللى جمبها؟
رضا والله
ممكن اقبضهم فى مصر بس بالجنيه فى يوم ما بعد عملى بعشرتاشر سنة كدة ولا حاجة ده لو اشتغلت اصلا
ده مش حقد طبقى على فكرة
ده نق بس
ههههههه
ربنا يزيدك ويكرمك ويثبتك ويغفر ذنبك ويهدينى
متقطعش الجوابات
السلام عليكم
اول زيارة بس اكيد ان شاء الله مش اخر زيارة
انا برضه مش بحب التاجات بس انت كاتبه بطريقه جميله ومرحة قوي
تقبل تحياتي
Saso
سعيد جدا إن دي مش أول مرة تأنسينا هنا وإن المواضيع عجبتك
بقى الواد خميس بيغش السكر .. شوفي إزاي .. لا ملوش حق .. بكره يغلوله الملح ومايلقيش حاجة يغش بيها
وعلى العموم بالنسبة للعزومة صفري إنتي بس وهتلاقينا عندك مباشرطن (حلوة طن دي)
بالنسبة للشغل فيه وظيفة معروضه لشغالة أندونيسية إيه رأيك؟؟
سعيد بمرورك وان شاء الله نشوفك دايما معانا
أمل
الحقيقة أنا رحت عندك ولقيت كلام جميل قوي حسيت إن اللي بكتبه ما ينفعش غير في حاجة واحدة إنه يتعمل بيه قراطيس لب
على العموم المهم إنه عاجبك ونتمنى نشوفك معانا دايما
أول حاجة رحمة الله على الوالد و الوالدة و أسكنهما الله فسيح جنانه و غفر لهما و تجاوز عن سيئاتهما
ثانيا :
ويحك
أدخل أمسي ألاقي نفسي لبست ؟
إنت بتحبني أوي كدة ؟
هاحاول أهرب بس ربنا يستر
أما بالنسبة للمقدمة الطويلللللللللة
فبصراحة أنا وقعت من الضحك
خدت الكلام بالحرف من على لساني
و طبعا طبعا ماعرفتش تتكلم عن نفسك خااااااااالص
بس إجاباتك عسل
لكن ليا رجاء صغير
دعاءك حلو بس شيل كلمة جنابك لأنها لا تليق برب العالمين
أنا عارف إنك قصدك تبين حبك لله
بس دي طلعت أوت
و تسلم على الموضوع العسل
عواض باشا
جزاك الله كل خير على الدعاء ولا أصابك الله مكروه فيمن تحب
يا ريس انا قلت لك قبل كده إني ارتحت لك وانا لما بقول حاجة ببقى فعلا بعنيها مش مجاملة
تهرب ده ايه يا ريس انت فاكر نفسك هتقدر تضحك على زكي بشكها
لبست التاج لبسته هأنتظر ردك عليه في مدونتك قال يهرب قال
مادام المقدمة عجبتك يبقى واضح إنك زي حالاتي بتتخنق بسرعة مش بقولك ارتحتلك
جزاك الله كل خير على موضوع جناب الله بس انت متاكد ان الكلمة فيها مشكلة على العموم ان شاء الله انا برضه هسأل فيها وانا شلتها من البوست احتياطا
وعلى فكرة يا ريت كل ما تلقيني هيست في كلمة كده ولا كده يا ريت تبقى تنصحني حاكم الواحد ساعات الجلالة بتاخدة ومابيدراش هو بيكتب ايه
متتأخرش علينا يا ريس تاني
عواض تاني ؟؟؟
:(
طيب مافيش أمل ؟؟؟
يعني ممكن أروح كولالمبور أجيب كيلو ملوخية للحاجة و أعزمك و الموضوع يخلص على كدة ؟
طيب شوف يرضيك كام و أنا أخلص..
طييب نتفاهم طيب ؟
ليه العنف ده ؟
أنا راجل مسالم و مش بتاع كدة :)
عيني يا باشا هاتلاقي الرد في أقرب وقت إن شاء الله
بالنسبة للكلمة فجزاك الله كل خير ولا مانع نتأكد منها سوا لكن القصد إنك بتخاطب رب العالمين و لا يجوز إستعمال صيغ تبجيل البني آدمين لأن الله تعالى أعلى و أجل
ده كل قصدي يا باشا و ربنا يكرمك و يباركلك
عواد خلاص يا سيدي عواد
ما هو أنا معذور ما هو برضه إسم صعب
وعلى العموم ماتزعلش وآدي راسك أهه
هستنى ردك على التاج
يالهوووووووووووووووووووي
كل ده كلام عشان اخدت تاج
بس بجد اجابات جميله
تحياتي
كناري
اديكي عرفتي اهوه علشان تفكري الف مرة قبل ما تهيديلي تاج
ممكن آخد حقي ناشف
وربنا يخليكي على كلامك الجميل
تحياتي
إرسال تعليق
<< Home