يَوْمِيَات وَلَد مَصْري
الأربعاء، مايو 14، 2008
ساعات بحس
ساعات بحس إني ناسـي *** معنى وجـودي في الدنـيا
ساعات ألاقي اللي أنا عايزه *** وساعات يضيع مني في ثانية
ساعات بحب وساعات بتحب *** وساعات الدنيا تبقى ليا
وساعات بأكره سيرة الحب *** ودموعي تبقى مليا عينيه
أرجع ندمان على لحظة *** عايشها بين أحضان همسي
أهرب لفرحتي من همي *** ألقيها هيه غروب شمسي
ليـالي تمر وجفـوني *** سهـرانه تشكي هوا نفسي
لا عارف إزاي ولا إمتى *** توهاني بين يومي وأمسي
نفسي أكون ملاك طيب *** أدل الناس على الجـنه
نفسي أحب وأتشعبط *** في مركـب نوح وأتمنى
آخـد بإيدي وإيديهم *** ويبقى لدنيـتي معـنى
علشان أحس إني عايش *** لغيري وغيري يتهـنى
يا سنين العمر لا تروحي *** تشكيني وتشكي أيامي
وتسـيبي الهم لظنوني *** وغروب لشمس أحلامي
أجـري ورا أيام فاتت *** أحلم بحبي وغــرامي
مالاقيش فيه حد يونسني *** والاقي سـرابي قدامي
ساعات بحس إني ناسـي *** معنى وجـودي في الدنـيا
ساعات ألاقي اللي أنا عايزه *** وساعات يضيع مني في ثانية
ساعات ألاقي اللي أنا عايزه *** وساعات يضيع مني في ثانية
ساعات بحب وساعات بتحب *** وساعات الدنيا تبقى ليا
وساعات بأكره سيرة الحب *** ودموعي تبقى مليا عينيه
أرجع ندمان على لحظة *** عايشها بين أحضان همسي
أهرب لفرحتي من همي *** ألقيها هيه غروب شمسي
ليـالي تمر وجفـوني *** سهـرانه تشكي هوا نفسي
لا عارف إزاي ولا إمتى *** توهاني بين يومي وأمسي
نفسي أكون ملاك طيب *** أدل الناس على الجـنه
نفسي أحب وأتشعبط *** في مركـب نوح وأتمنى
آخـد بإيدي وإيديهم *** ويبقى لدنيـتي معـنى
علشان أحس إني عايش *** لغيري وغيري يتهـنى
يا سنين العمر لا تروحي *** تشكيني وتشكي أيامي
وتسـيبي الهم لظنوني *** وغروب لشمس أحلامي
أجـري ورا أيام فاتت *** أحلم بحبي وغــرامي
مالاقيش فيه حد يونسني *** والاقي سـرابي قدامي
ساعات بحس إني ناسـي *** معنى وجـودي في الدنـيا
ساعات ألاقي اللي أنا عايزه *** وساعات يضيع مني في ثانية
ساعات يضيع مني في ثانية
التسميات: همسات
25 Comments:
انا معدية لقيت البوست الجديد
كلماته جميلة قوي ومعبرة
تقبل تحياتي
أمل
شكرا على مرورك وعلى التعليق
طيب ومستعجلة ليه .. على العموم الحمدلله إن البوست عجبك
نورتينا بالزيارة السريعة دي
والله كلامك حلو اوى
اجرى ورا ايام فاتت
أحلم بحبى وغرامى
مالاقيش فيه حد يونسنى
والاقى سرابى قدامى
كلامك ملمس معايا اوى
هيييه...ياللا دنيا
ده كلامك؟؟
لو كلامك يبقى انت حد كويس وحساس
ولو مش كلامك
يبقى؟؟؟؟؟؟
برضة انت حد كويس وحساس
بس ماتعرفش ليه كل الناس عمالة تدور على الحب ومش لاقياه؟
طيب ما احنا ممكن نعمل ماتشينج كده بين الناس دى كلها ويا بخت من مش عارف ايه
:)
أمولة
أيوة يا ستي ده كلامي وبالثلث كمان
وأنا فعلا بحاول أكون إنسان كويس أينعم الشيطان مش سايبني في حالي لكن أديني بحاول
أما موضوع الحس ده فمتهيألي كل واحد بيكتب فلازم يكون حساس لأنه بيحس باللحظة اللي بيعشها قوي وبعدين يترجمها على ورق سواء كان في صورة قصة أو شعر أو زجل
وعلى العموم يا ستي ده بعض ما عندكم واللي يزور مدونتك هيفهم معنى كلامي ايه
وعلى فكرة أعتقد إن البوست ده هيلمس مع ناس كتير لأن زي ما قلتي إن الناس كلها بتدور على الحب الضائع ومش لاقياه أمال هوه اسمه حب ضائع ليه :)
شكرا على زيارتك وتعليقك الجميل
إنت كل يوم بتبهرني
إيه يا سيدي الكلام الروعة ده
لمس معايا أنا كمان على فكرة
بس المشكلة زي ما إنت قولت
لو ماكانش ضائع ما كانش قى إسمه كدة
بس كلامك أكبر من مجرد حب ضائع
كلامك عن أحلام ضايعة
عن هدف ضايع
عن حاجات كتير جميلة و حيوية للإنسان بس بتضيع في زحمة الحياة
زي ما كل حاجة حلوة بتضيع
مش عارف أنا سرحت في الكلام و مش عارف لو كنت لسه في نفس المدونة ولا خرجت بره خالص
أحييك على الإحساس اللي حطيته في المدونة
صحيح أنا غصبت على نفسي و عصرت عليها نص كيلو لمون و رديت على التاج بتاعك عندي
يالا كله لله
;)
ايه ياعم الكلام الجامد دا
بجد ماشاء الله
بالرغم انه حزين شوية
بس مش مشكله برضو حلو
مش انت لوحدك على فكرة الغالبية العظمى كده
عواد (أي خدمة أهه بس على الله ماتغيروش بعد كده)
هو انت لسه شفت حاجة ابقى زرنا انت بس وانت هتنبسط معانا قوي يا شحاته أفندي
كلامك كله صح يا ريس
الموضوع ان ساعات الواحد بيضيع وسط الزحمة ما بيعرفش هو كان عاوز ايه ولا رايح فين حتى أجمل حاجة في حياته وهي الحب كمان بينساه وبيضيع منه في الزحمة
الحمد لله إن الكلام لمس معاك بس ربنا يستر لحسن لو لمس مع حد تاني هيعمل قافلة والمدونة تبقى ضلمة :)
جايلك يا ريس بإذن الله أشوف الردود
ومعلش تعيش وتلبس
همس
هو فعلا كلام حزين وكئيب كمان زي صاحبه
بس هو دايما كده الواحد لما بيحس إنه هيفقد حاجة عزيزة عليه بيبقى مهموم حبتين
ومعلش بقى تغيير :)
موناليزا
انا سعيد إنك مريتي وطمنتينا إنك بخير لأن البوست الأخير بتاعك كان قلقنا عليكي
أنا عارف إن معظم البشر كده وهو ده اللي مخلي الموضوع يأثر في ناس كتير لأن كل واحد بيتخيل نفسه انه هو اللي بيتكلم
سعدت فعل بمرورك
كلامك جميل واسلوبكك رااائع
ربنا يرجعك بالسلامه لبلدك ومش عارف ليه حسيت انى عاوز نبقى اصحاب او على الاقل اتشرف بمعرفتك
sasatifa باشا
يا ريس أنا أكون سعيد جدا ويشرفني إننا نكون أصدقاء
شد حيللك في الامتحانات وان شاء هيبقى بنا كلام كتييييييييييييييير اول ما تخلص
بالتوفيق وشكرا على زيارتك
ما شاء الله ايه الاحساس العالى ده كله
اهرب لفرحتى من همى القيها هى غروب شمسى . حقيقى تعبير جميل واحساسه صادق وشفاف قوى . الحقيقه انت شخصيه محيره ساعات باحس انك ساخر جدا وساعات باحس انك حساس جدا وساعات ضحوك وساعات رومانسى .. خليط هايل من المشاعر الانسانيه يمكن تبدو شخصيه متعبه ظاهريا لكن الحقيقه انك انسان
انسان جدا .
بوست رائع وحقيقى ابدعت فى وصف المشاعر الانسانيه المتقلبه بصدق واحساس عالى جدا.
وفقك الله ودمت بخير واتمنى ان تشرق شمس احلامك دائما .
تحياتى
rovy
روفي
مش عايز أقولك إن وشي إحمر زي البنت البكر وأنا بقرأ كلامك
على العموم كويس ان الموديل بتاعي عجب حضرتك ولو اني أعتقد أن كل المواصفات اللي قلتي عليها بتجي استاندرد في كل البني أدميين
بس ايه حكاية ان انا متعب دي جبتيها منين؟
على أي حال سعيد جدا بزيارتك اللي دايما تيجي متأخرة لكن بصراحة بترفع من المعنويات
ايه الكلام الجميل ده
حلو اوى بجد
مكنتش اعرف انك شاعر
100 100
دمت متألقاً
كلام رقيق الحس:)))
لا بجد معاك حق الدنيا عمالة تلعب ملاكمة معانا لحد ما الواحد خلاص من كتر ما بيقع
وبعدين زحمة اوى اليوم فيها دقيقة وساعات اليوم سنة واهى كلها ايام
تحياتى
ساسو
ربنا يخليكي وشكرا على المجاملة دي
وشكرا كمان على زيارتك وتعليقك وانتي وسط الامتحانات
تحياتي
برينسيس
فعلا التخبيط جاي من كل حته وعشان كده الواحد محتاج حد يقف جنبه علشان يعينه على الدنيا واللي بتعمله
أسعدتني زيارتك ومتتأخريش علينا
تحياتي
السلام عليكم اخى الكريم
لم اقصد انك شخصيه متعبه بالمعنى الذى فهمته ولا تقلق فلم يفتن عليك لى احدا .
لا حقيقى انا قصدت ان الشخصيه اللى بتجمع كل الحالات الانسانيه دى ممكن تكون متعبه لان الواحد بيتقلب مع مودها . لكن ده ما يمنعش انها شخصيه
محبوبه و اجتماعيه ومثقفه و جاده وساخره ورومانسيه . ايه رأيك متعبه بس للى ما يفهمهاش .
دمت بخير
خالص تقديرى وتحياتى
rovy
روفي
ايه كل ده.. براحة شوية لحسن أصدق
على العموم شكرا على كلماتك اللي دايما بتكون رقيقة
وتقبلي خالص تحياتي
مش عايزة اقولك انا دخلت كام مرة اقرى الكلام و احاول اكتب التعليق.. كتير
زمان وانا صغيرة لما كنت بسمع ماجدة الرومى بتقول
ساعات اقوم الصبح قلبى حزين
ابص م الشباك ياخدنى الحنين
اللى اشتريته باع واللى لاقيته ضاع
راح اللى راح معدش فاضل كتير
كنت بحس بالحزن ومكنتش عارفة ليه لان مكنش عندى اسباب تخلينى احزن
البوست بتاعك ادانى نفس الاحساس بالاغنية احساس بالحزن بس المرة دى لان الواحد بقى زى كل الناس عنده احلام متحققتش وامال ضاعت بقى فيه سبب وجيه للحزن
كلامك اثر فينا لانك قلت اللى احنا مش عارفين نقوله وعبرت عن الافكار اللى مش عارفين نعبر عنها
بس الحمد لله فيه جزء ادانى احساس بالامل وبخيربة البشر اللى هتفضل موجودة فيهم
نفسي أكون ملاك طيب *أدل الناس على الجـنه
نفسي أحب وأتشعبط * في مركـب نوح وأتمنى
آخـد بإيدي وإيديهم * ويبقى لدنيـتي معـنى
علشان أحس إني عايش * لغيري وغيري يتهـنى
كتبته علشان اقراه قبل ما اخرج من المدونة فيفضل عندى الاحساس بالخير والامل
معذرة لو كان التعليق كئيب وطويل
تحياتى
ساعات بحب وساعات بتحب *** وساعات الدنيا تبقى ليا
وساعات بأكره سيرة الحب *** ودموعي تبقى مليا عينيه
الالم موجود دوماً فى حياتنا لا نستطيع ان ننكره
كلماتك فى منتهى الصدق الجميل النابع من الاحساس
سلمت يداك
هانى يس
جنة
هو ممكن يكون التعليق طويل لكن كئيب .. مستحيل
كلامك الحقيقة خلاني اندم اني كتبت حاجة تزعلكم وتخليكم تحزنوا بس والله مش قصدي لان المدونة دي كنت عاوز اخليها تبسط كل واحد يعدي عليها بس معلش هبقى اخلي بالي المرة اللي جاية
خلاص بقى كفاية عياط :)
هاني يس
شكرا يا ريس على زيارتك وكلامك الجميل
انا زرتك قبل ما أرد والحقيقة ان جملة بعض ما عندكم مش هتوفيك حقك لكن على اي حال بشكرك بشدة وان شاء الله نشوفك دايما معانا
تحياتي
ايه الحكايه مفيش جديد وكمان بقالك كثير مزرتنيش .. ياريت تطمنا عليك
تحياتى
rovy
إرسال تعليق
<< Home