يَوْمِيَات وَلَد مَصْري
السبت، مايو 10، 2008
الحرام عمره ما بيدوم
سنوات الدراسة في الكلية كانت بتعتبر من اجمل سنين عمري، لان الصداقة في الكلية كانت مختلفة والضحك في الكلية كمان كان مختلف وكان اسوا حاجة في الموضوع كله فترة الامتحانات اللي الواحد فيها بينسى اعز اصدقاؤه وبينسى الضحك ومش بعيد كمان ينسى فيها ابوه وامه اللي ربوه ويمكن تكون المشكلة مش في فترة الامتحانات في حد ذاتها لكن المشكلة الأكبر بتكون في النتيجة لما بتطلع بتبقى غالبا ما يعلم بيها الا ربنا !!
وانا في اعدادي هندسة كان عندنا مادة غبية اسمها الهندسة الوصفية وغباء هذه المادة مش ناتج من صعوبة المادة نفسها، لكن في نوعية الدكاترة اللي كانوا بيدرسوها وده لسبب بسيط جدا لاني أعتقد إنهم هما كمان ماكانوش فاهمين فيها حاجة، وعلى فكرة أنا مابفتريش عليهم لكن انا هثبتلكم بالدليل القاطع وبالبرهان الذي لا شك فيه ولا ريب إن كلامي صحيح وإن الموضوع كله دجل وشعوذة ومحدش فاهم حاجة.
اللي حصل يا سادة ان في امتحانات نصف السنة دخلت امتحن المادة دي وانا لا افقه فيها غير بعض القشور وعلى فكرة ده يعتبر عادي جدا في المادة دي والدليل على كده كم الأصفار المهول اللي بيتسمع وهما بيعلنوا نتيجة الامتحان بتاع نصف السنة في السكشن، المهم لحفظ ماء الوجه وعشان أهرب من موضوع الصفر ده وطبعا لغياب الوازع الديني في الفترة دي قررت للاسف الشديد اني استعين بصديق خلال فترة الساعة ونص بتوع مدة الامتحان وكان انسب شخص بالنسبة لى صديقي العزيز أبو علي اللى كنت اعرفه من ايام ثانوي وكانت بتربطنا ببعض صداقة وطيدة واللي كمان زادت جدا بعد ما دخلنا نفس الكلية وزادت اكتر بعد أن شاء القدر انه يكون معايا في نفس السكشن اللي أنا فيه نظرا لان اسمي انا كمان بيبتدي بحرف العين (اطمنوا ماسميش عب عال ولا عاحمد) والغريب في الموضوع إني تفاجأت كمان بالريس علي لازق في القاعدة اللي جنبي في لجنة الإمتحان والحقيقة ولو إني ماكنتش عامل حسابي إني أغش لكن برضه ده مايمنعش إن وجود علي جنبي كان بيحسسني بالأمان لأن طبعا محدش عارف ظروف الامتحانات هتبقى عاملة إزاي !!
المهم قبل ما يبتدي الامتحان خدت علي على جنب وابتديت ادي له بعض النصائح اللي ممكن تكون عنصر فعال في اجتياز هذه الازمة وخصوصا إن علي كان من نوعية "باين عليك فاهم يا نصه" وده طبعا كان ظاهر جدا من خلال ورقة الامتحان بتاعته اللي كل ما ببص فيها (غصب عني طبعا) ألاقيها مشبرة من أولها لآخرها وطبعا بمقارنة بسيطة بورقتي كنت بحس إني أكيد بامتحن مادة تانية غير اللي أبو علي بيجاوب عليها، المهم ابتدأ الحوار بيني وبين علي بإني قلت له:
انا: ابو علي مش هوصيك
علي: على ايه
انا: نعم احنا هنستهبل من اولها بقولك ايه يا ابو علي اخوك معلوماته في الوصفية زي معلوماته في الصيني يعني لا أفقه فيها شئ .. ميح .. فاهمني
علي: ما انت قلتلي نفس الكلام ده في الميكانيكا
انا: جرى ايه يا سي زفت انت هتسيحلي يعني وفيها ايه لما أنقش منك مسألة ولا اتنين يا أخي الناس لبعضها وبعدين ما انت عارف يا أبو علي الموضوع كله إني مابلقيش وقت أذاكر فيه كويس علشان شغل المزيكا بتاع بالليل الله يحرقه
علي: طيب وإيه المطلوب
انا: ابدا .. بعد ما سعادتك تخلص حل .. عاوزك تباصيلي شوية حركات كده اعملها في كل مسأله .. يعني اهو اقله ما سلمش الورقة وهي فاضية كده
علي: حاضر يا سيدي ماشي اتفقنا
وفعلا إبتدى الإمتحان وإبتدى معاه علي في تشبير الورقة بكل أنواع الخطوط اللي ممكن حد إنه يتخيلها يمين وشمال وفوق وتحت وخطوط طالعة وخطوط نازلة واستخدام لجميع أدوات الهندسة زي ما الكتاب بيقول وفضل كده لحد ما بصيت في ورقته لقيت التلات مسائل اللي في ورقة الأسئلة محلولين في ورقته وطبعا كان ممكن تعرف إن الحل خلص لما في النهاية يطلعلك الشكل المطلوب اللي ساعات بيكون مثلت نايم على جنبه أو مربع فارد صدره وكمان ساعات بتكون دايرة بس على حل شعرها .. وطبعا معنى إن ساعدتك يظهرلك الأشكال دي في نهاية الحل بتكون سعادة ما بعدها سعادة لأن الأشكال دي بيبقى صعب جدا إنها تظهرنظرا للكم المهول من الخطوط اللي بترسمه واللي لابد إنك تتلخبط منها، لكن اللي حصل مع أخونا علي إن الأشكال ظهرت والحلوة اتكلمت وطلعت قماش وده اللي خلاني بمنتهى الثقة أفكر علي بالوعد بتاعه وأطالبه بيه بكل سماجة زي ما يكون حق مفروض عليه (مش عارف كنت طايق نفسي ازاي)
فعلا علي "دايما يوفي بوعده" وابتدى معايا بأول مسألة نقطة تقاطع مستقيم مع مستوى على خط تقاطع مستويين وبعدين ندور المستوى الأول وندور المستوى التاني وندور خط التقاطع لأن في الدوران (مش بتاع شبرا) نقدر نعمل بعض العمليات اللي مانقدرش نعملها في المستوى العادي (حد فاهم حاجة) أهو ده هو اللي كنا بناخده في الوصفية، المهم أنا كل ما الاقي المسألة اتشبرت خطوط أقوله كفاية كده خش على اللي بعدها وطبعا علي يحاول معايا جاهدا إني أكمل لكن طبعا أنا كان لي هدف تاني إني فقط ماسلمش الورقة فاضية.
خلص الامتحان وسلمت الورقة وشكرت على جدا على شهامته وجدعنته معايا وانتهت الامتحانات وخدنا أجازة نصف السنه اللي قضيتها في الأقصر وأسوان مع الكلية واللي الحقيقة أعجبت بيها جدا لدرجة إني أصبحت مدمن الأقصر وأسوان وبقيت أسافرها في أجازة كل نصف سنه خلال فترة وجودي في الكلية وإن شاء الله هبقى أحكيلكم على بعض النوادر اللي حصلت فيها في أيام جاية.
المهم بعد الأجازة وتحديدا بعد مرور أسبوعين إبتدوا يوزعوا نمر مادة الوصفية وكانت النمر بتوزع في كل سيكشن عن طريق إنهم ينادوا على إسمك ويقولولك نمرتك عيانا بيانا على رؤس الأشهاد علشان الفضيحة تبقى بجلاجل وكل زمايلك في السيكشن يسمعوا نمرتك العظيمة اللي غالبا كانت بتتراوح ما بين صفر إلى 10 من .. 30 !!
طبعا أنا كنت متوقع نمرة في حدود السبعة من تلاتين على أحسن تقدير وابتديت أسمع النمر على النحو التالي:
المعيد: فلان الفلاني
فلان الفلاني: أيوة
المعيد: 2 من 30
المعيد: علان العيلاني
عيلان: أفندم
المعيد: صفر
المعيد: ترتان الترتاني
ترتان: أفندم
المعيد: صفر
المعيد ينادي على إسمي
أنا: أفندم
المعيد: 16 من تلاتين
أنا: الحمد لله .. أحمدك يا رب .. يا رب هصلليلك طول عمري .. الحمد لله الحمد لله ..
علي: مبروك يا ريس
أنا: الله يبارك فيك يا أبو علي إن شاء الله هتاخد 30 .. الحمد لله .. الحمد لله
المعيد في خلال هذا الوقت يكمل باقي الأسماء وطبعا تسمع زهول من كل الحاضرين وبكاء وعويل من مهندسات المستقبل اللي لم يسعدهن الحظ بتخطي عقبة الصفر المتين
المعيد: علي عبد الحفيظ (صاحبي)
علي (بكل ثقة): أفندم
المعيد: 11 من تلاتين
علي:!!!!
علي: إيه .. إزاي
المعيد: بلاش دوشة
علي: مش ممكن .. مش ممكن .. في حاجة غلط .. أكيد في حاجة غلط
المعيد: أقعد مكانك يا باشمهندس وبلاش دوشة
علي: يا جماعة أكيد دي مش نمرتي
المعيد: يعنى ايه مش نمرتك أنت هتعرف أحسن من الدكتور
علي: بس إزاي
أنا (مرمي على ظهري من الضحك على الدجل والشعوذه اللي بيسموه الوصفية)
وانتهى السيكشن وانتهت الحكاية لكن أحب أطمنكم إن علي في نهاية السنة جاب جيد في مادة الوصفية وأنا .. جبت فيها مقبول بس بعد ما نزلت فيها وعدتها في تاني سنة!!
ونكمل ان شاء الله في يوم تاني...
وانا في اعدادي هندسة كان عندنا مادة غبية اسمها الهندسة الوصفية وغباء هذه المادة مش ناتج من صعوبة المادة نفسها، لكن في نوعية الدكاترة اللي كانوا بيدرسوها وده لسبب بسيط جدا لاني أعتقد إنهم هما كمان ماكانوش فاهمين فيها حاجة، وعلى فكرة أنا مابفتريش عليهم لكن انا هثبتلكم بالدليل القاطع وبالبرهان الذي لا شك فيه ولا ريب إن كلامي صحيح وإن الموضوع كله دجل وشعوذة ومحدش فاهم حاجة.
اللي حصل يا سادة ان في امتحانات نصف السنة دخلت امتحن المادة دي وانا لا افقه فيها غير بعض القشور وعلى فكرة ده يعتبر عادي جدا في المادة دي والدليل على كده كم الأصفار المهول اللي بيتسمع وهما بيعلنوا نتيجة الامتحان بتاع نصف السنة في السكشن، المهم لحفظ ماء الوجه وعشان أهرب من موضوع الصفر ده وطبعا لغياب الوازع الديني في الفترة دي قررت للاسف الشديد اني استعين بصديق خلال فترة الساعة ونص بتوع مدة الامتحان وكان انسب شخص بالنسبة لى صديقي العزيز أبو علي اللى كنت اعرفه من ايام ثانوي وكانت بتربطنا ببعض صداقة وطيدة واللي كمان زادت جدا بعد ما دخلنا نفس الكلية وزادت اكتر بعد أن شاء القدر انه يكون معايا في نفس السكشن اللي أنا فيه نظرا لان اسمي انا كمان بيبتدي بحرف العين (اطمنوا ماسميش عب عال ولا عاحمد) والغريب في الموضوع إني تفاجأت كمان بالريس علي لازق في القاعدة اللي جنبي في لجنة الإمتحان والحقيقة ولو إني ماكنتش عامل حسابي إني أغش لكن برضه ده مايمنعش إن وجود علي جنبي كان بيحسسني بالأمان لأن طبعا محدش عارف ظروف الامتحانات هتبقى عاملة إزاي !!
المهم قبل ما يبتدي الامتحان خدت علي على جنب وابتديت ادي له بعض النصائح اللي ممكن تكون عنصر فعال في اجتياز هذه الازمة وخصوصا إن علي كان من نوعية "باين عليك فاهم يا نصه" وده طبعا كان ظاهر جدا من خلال ورقة الامتحان بتاعته اللي كل ما ببص فيها (غصب عني طبعا) ألاقيها مشبرة من أولها لآخرها وطبعا بمقارنة بسيطة بورقتي كنت بحس إني أكيد بامتحن مادة تانية غير اللي أبو علي بيجاوب عليها، المهم ابتدأ الحوار بيني وبين علي بإني قلت له:
انا: ابو علي مش هوصيك
علي: على ايه
انا: نعم احنا هنستهبل من اولها بقولك ايه يا ابو علي اخوك معلوماته في الوصفية زي معلوماته في الصيني يعني لا أفقه فيها شئ .. ميح .. فاهمني
علي: ما انت قلتلي نفس الكلام ده في الميكانيكا
انا: جرى ايه يا سي زفت انت هتسيحلي يعني وفيها ايه لما أنقش منك مسألة ولا اتنين يا أخي الناس لبعضها وبعدين ما انت عارف يا أبو علي الموضوع كله إني مابلقيش وقت أذاكر فيه كويس علشان شغل المزيكا بتاع بالليل الله يحرقه
علي: طيب وإيه المطلوب
انا: ابدا .. بعد ما سعادتك تخلص حل .. عاوزك تباصيلي شوية حركات كده اعملها في كل مسأله .. يعني اهو اقله ما سلمش الورقة وهي فاضية كده
علي: حاضر يا سيدي ماشي اتفقنا
وفعلا إبتدى الإمتحان وإبتدى معاه علي في تشبير الورقة بكل أنواع الخطوط اللي ممكن حد إنه يتخيلها يمين وشمال وفوق وتحت وخطوط طالعة وخطوط نازلة واستخدام لجميع أدوات الهندسة زي ما الكتاب بيقول وفضل كده لحد ما بصيت في ورقته لقيت التلات مسائل اللي في ورقة الأسئلة محلولين في ورقته وطبعا كان ممكن تعرف إن الحل خلص لما في النهاية يطلعلك الشكل المطلوب اللي ساعات بيكون مثلت نايم على جنبه أو مربع فارد صدره وكمان ساعات بتكون دايرة بس على حل شعرها .. وطبعا معنى إن ساعدتك يظهرلك الأشكال دي في نهاية الحل بتكون سعادة ما بعدها سعادة لأن الأشكال دي بيبقى صعب جدا إنها تظهرنظرا للكم المهول من الخطوط اللي بترسمه واللي لابد إنك تتلخبط منها، لكن اللي حصل مع أخونا علي إن الأشكال ظهرت والحلوة اتكلمت وطلعت قماش وده اللي خلاني بمنتهى الثقة أفكر علي بالوعد بتاعه وأطالبه بيه بكل سماجة زي ما يكون حق مفروض عليه (مش عارف كنت طايق نفسي ازاي)
فعلا علي "دايما يوفي بوعده" وابتدى معايا بأول مسألة نقطة تقاطع مستقيم مع مستوى على خط تقاطع مستويين وبعدين ندور المستوى الأول وندور المستوى التاني وندور خط التقاطع لأن في الدوران (مش بتاع شبرا) نقدر نعمل بعض العمليات اللي مانقدرش نعملها في المستوى العادي (حد فاهم حاجة) أهو ده هو اللي كنا بناخده في الوصفية، المهم أنا كل ما الاقي المسألة اتشبرت خطوط أقوله كفاية كده خش على اللي بعدها وطبعا علي يحاول معايا جاهدا إني أكمل لكن طبعا أنا كان لي هدف تاني إني فقط ماسلمش الورقة فاضية.
خلص الامتحان وسلمت الورقة وشكرت على جدا على شهامته وجدعنته معايا وانتهت الامتحانات وخدنا أجازة نصف السنه اللي قضيتها في الأقصر وأسوان مع الكلية واللي الحقيقة أعجبت بيها جدا لدرجة إني أصبحت مدمن الأقصر وأسوان وبقيت أسافرها في أجازة كل نصف سنه خلال فترة وجودي في الكلية وإن شاء الله هبقى أحكيلكم على بعض النوادر اللي حصلت فيها في أيام جاية.
المهم بعد الأجازة وتحديدا بعد مرور أسبوعين إبتدوا يوزعوا نمر مادة الوصفية وكانت النمر بتوزع في كل سيكشن عن طريق إنهم ينادوا على إسمك ويقولولك نمرتك عيانا بيانا على رؤس الأشهاد علشان الفضيحة تبقى بجلاجل وكل زمايلك في السيكشن يسمعوا نمرتك العظيمة اللي غالبا كانت بتتراوح ما بين صفر إلى 10 من .. 30 !!
طبعا أنا كنت متوقع نمرة في حدود السبعة من تلاتين على أحسن تقدير وابتديت أسمع النمر على النحو التالي:
المعيد: فلان الفلاني
فلان الفلاني: أيوة
المعيد: 2 من 30
المعيد: علان العيلاني
عيلان: أفندم
المعيد: صفر
المعيد: ترتان الترتاني
ترتان: أفندم
المعيد: صفر
المعيد ينادي على إسمي
أنا: أفندم
المعيد: 16 من تلاتين
أنا: الحمد لله .. أحمدك يا رب .. يا رب هصلليلك طول عمري .. الحمد لله الحمد لله ..
علي: مبروك يا ريس
أنا: الله يبارك فيك يا أبو علي إن شاء الله هتاخد 30 .. الحمد لله .. الحمد لله
المعيد في خلال هذا الوقت يكمل باقي الأسماء وطبعا تسمع زهول من كل الحاضرين وبكاء وعويل من مهندسات المستقبل اللي لم يسعدهن الحظ بتخطي عقبة الصفر المتين
المعيد: علي عبد الحفيظ (صاحبي)
علي (بكل ثقة): أفندم
المعيد: 11 من تلاتين
علي:!!!!
علي: إيه .. إزاي
المعيد: بلاش دوشة
علي: مش ممكن .. مش ممكن .. في حاجة غلط .. أكيد في حاجة غلط
المعيد: أقعد مكانك يا باشمهندس وبلاش دوشة
علي: يا جماعة أكيد دي مش نمرتي
المعيد: يعنى ايه مش نمرتك أنت هتعرف أحسن من الدكتور
علي: بس إزاي
أنا (مرمي على ظهري من الضحك على الدجل والشعوذه اللي بيسموه الوصفية)
وانتهى السيكشن وانتهت الحكاية لكن أحب أطمنكم إن علي في نهاية السنة جاب جيد في مادة الوصفية وأنا .. جبت فيها مقبول بس بعد ما نزلت فيها وعدتها في تاني سنة!!
ونكمل ان شاء الله في يوم تاني...
التسميات: يوميات
26 Comments:
الغش ده مشكلة طلبة مصر كلها
الناس بتستسهل
عموما حكاية ان الدكتور مش بيفهم ده الطبيعى
تلاقيه لما عمل الورق عصافير الجنة فى البيت ولرقتك جت على الترابيزة وورقة صاحبك جت على الارض
عموما ربنا ادالو حقه فى الاخر
وانت .... ولا بلاش هههههههه
احلى حاجة النهاية
الحق رجع لصحابه فى الاخر
بس هى كانت عندكوا التيرمين؟ونجحت فيها ازاى من غير على؟
لو اسئلتى محرجة ممكن جدا ماتجاوبش انا ديمقراطية
والله فكرتني بالذكريات الحلوة...
طبعا حلوة لانها عدت وانتهت
انا كمان كنت جايبه في الوصفيه مقبول
رغم اني كنت بحبها قوي
بس على رأيك مكنلهاش امان
تقبل تحياتي
ايه الهندسه دى كلها ....
تعر ف وانت بتحكى على غباء الماده دى فكرتنى بماده كنت باخدها فى الدبلوم التروبى وكانت فلسفيه
وفيها روسمات عباره عن حلزونات
والدكتور اصلا ما كان فاهم منها حاجه
وبالرغم من ان الامتحان مشترك فى ماده تانيه الله اعلم كنت نجحت ولا لاء
بس كويس انك عرفت تسلك نفسك
انماانا كان كل محاولاتى فشلت فى الغش
وهبقى احكى بعدكدا عنها
بتفكرنى بايام حلوه
تسلم يا باشا
انا وقعت فى مادة فى النص الاولانى
و الدكتور بيدينا الامتحان قبل ما ندخل الامتحان
يعنى بيقولنا الامتحان بيجى فى كذا و كذا بس
هما سؤالين
و بذاكرهم و بدخل الاقى السؤالين اللىى انا حفظاهم صم
و معنى انى اقول صم
اللى هو 48 ساعه بحفظ فى السوالين
و بدخل احلهم
و اكيد صح
و بردوه وقعت فى المادة
عادى عادى
و انا مش لاقيه سبب
عادى يا بابا
بلدك
و دمتــــــــــــــــــــــم
برينسيس
واضح إن تعليقاتك إختلفت لما تميتي 22 سنة كبرتي وعقلتي :)
الموضوع مش استسهال.. هو زي ما تقولي كده قلة فضا الواحد ماكنش بيلاقي وقت يذاكر
حلوة حكاية ورق الامتحانات يبقى عصافير الجنة دي بس يظهر العصفورة بتاعتي كانت بتستنصح زي صاحبها واتشعبطت في الطرابيزة على آخر لحظة
الحمدلله إنك ماكملتيش كلام لحسن شكلك كده كنتي ناويه تعكي وعلى أي حال لو ليكي نفس تعكي خدي راحتك على الآخر أنا ديمقراطي بمعني إن مافيش حاجة بتحوأ فيا
منورة
موناليزا
من ناحية أسئلتك محرجة فهي محرجة بس مافيش مشكلة هجاوب عليها علشان خاطرك وعشان اثبتلك إني أنا كمان ديمقراطي
تاني سنة بقى الطبيعي ان كل اللي بيعيدوا المادة دي بيجيبوا فيها 30 من 30 والغريب إني حليت في نص السنه كويس جدا وطلعت الأشكال اللي عايزنها لكن في النهاية جبت 10 من 30 شفتي تهريج أكتر من كده
وفي آخر السنه قفلت الامتحان وجبت مقبول
إزيك بـجااااااا
أمل
أنا برضه من ساعة ما دخلت مدونتك وقلت الكلام المكتوب ده مايطلعش غير من شخص دماغة متركبة أيزومتريك
بما إنك كنتي جايبة مقبول - ربنا يجعلنا جميعا من المقبولين ان شاء الله ممكن اعرف نمرة نص السنة؟ لأن دي بالذات ليها طعم تاني
همس
فلسفة وحلزونات في التربية ؟؟!!!
وديه تتكتب دي ولا تترسم يا سي حنفي!!
على العموم مبروك عليكي دبلووون التربية والحمد لله إنك حصلتي عليه بدون غش لأن الحرام عمره ما بيدوم
بقالك يومين ماكتبتيش حاجة ابتديت أقلق مش بعادة
ساموراي
والله مش عارف أقولك ايه بس واضح إن فيه حاجات عجيبة بتحصل في التصحيح لأن الكلام اللي بتقوليه بيتكرر كتير
على العموم شدي حيلك في آخر السنة وإهم حاجة إدعي ربنا إنه يسهل مش الامتحان بس لأ والتصحيح كمان
السلام عليكم
انا بس بأحجز مكان فى التعليق لحسن شكلى بقه وحش من اول اليوم كل ما ابدأ فى قرأة البوست يحصل حاجه تقومنى
ودلوقت جالى ضيوف ..
بس انا حلفت اكتب التعليق الاول قبل ما اقوم .
اول ما اقدر حأقرأه وأكتب التعليق
معلش غصب عنى .. تحياتى
rovy
انا حنفى
يالهوتى هو انا ناقصه وقف حاااااااال
كدا ماااااااااااااشى
و سلمتك من القلق ابدا
كنت بزور اصحابى الفلسطنين
وما كان ينفع اقعد عندهم على النت
وانا الحمد لله بخير
وشكرا ليك
يعنى يا جماعة لازم تضغطوا عليا علشان اعلق
ارجوكم ليه بتفكرونى باللى عايزه انساه...التصحيح و سنينه اقولكم بقه بما انى بدرس فى الجامعة فى مصر احكيلكم على اللى بيحصل فى المطبخ..قصدى فى الكنترول
شوفوا طبعا سياسة التعليم عندنا بتخلى عدد الطلبة حاجة كده فى اللمون و المطلوب انك تصحح كومة اوراق بالمئات فى ظروف منيلة بنيلة كنترول فى عز الحر بمروحة تعبانة تخلى دماغك تلف و تقعد وسط 4-5 من زمايلك و ما فيش مانع من الحكايات وسط التصحيح فى السياسة و الدين و الفن و التعليم البايظ وكل اللى تتمناه ولو ستات بقى ما فيش مانع من الطبيخ و خلافه
المهم فى يوم دخلت الكنترول اصحح قول قدامى 50 ورقة مثلا احاول اخلصهم فى 4 ساعات لو كنت بقرا بسرعة اما بقى لو قابلتنى ورقة من الخطوط الهيروغليفى اللى بتميز الجيل الجديد واللى مش عارفة ازاى دول اخدوا 100% فى الثانوية العامة و دخلوا طب فلوحدها ممكن اخد فيها اكثر من نص ساعة علشان بس اقدر افك الرموز و اعرف h من f و كده و لو فكيت الشفرة بيكون باقى التصحيح سهل
المهم كان فى زميل قاعد فى الكنترول من قسم التشريح و قدامه كومة اوراق عايزالها يومين و كل شوية يبصلى مستغرب و انا كمان ابصله مستغربة
اصل الكومة اللى عنده بتتحرك بسرعة الصاروخ و انا ورقى ماشى زى سلحفة مريضة فى الاخر ماطاقش نفسه وبصلى و قالى
ايه اللى بتعمليه ده يا دكتورة؟
قلتله باصحح
هو انتى بتقرى كلمة كلمة
ايوة
دا انتى كده عايزالك اسبوع علشان تخلصى!
ايوه يا دوب ما انا عاملة حسابى على كدة؟
وحطيت وشى فى الورق و قلت اسكت احسن و فضل كل شوية يبصلى و يهز دماغة عايز يقول ايه الهبلة دى
الموضوع و ما فيه ان التصحيح زى اصدار الاحكام فيه قاضى بيدقق و عارف ان ربنا شايفه وان نصف الدرجة ممكن تفرق مع الطالب وواحد تانى بيقيسها بالشبر و ياخدها بالشبه و يقولك هاوجع دماغى ليه على قد فلوسهم
ادى اخرة الكلام عن الامتحانات فكرتونى بالايام السودة اللى عايزه انساها و كراسات الاجابة اللى من ايام العصر الحجرى و طرق الاسئلة اللى بتختبر قدرة الطالب على انه يبقى مسجل مش دماغ بتفكر
الله يسامحكم و يارب تنجحوا كلكم
مصرى يا ريت تنقل ع الجيش تانى و بلاش تفكرنى باللى عايزة انساه
تحياتى
الرقباوي ؟؟؟
إنت نسخة مني على فكرةبس بإختلاف إني حبيت الوصفية و جبت فيها إمتياز من أول مرة
و سقطت في باقي المواد :)
بس ده بيعلمنا حااااااااجة مهمة
إن "غش تنجح ذاكر تجيب مجموع"
الحمد لله إنه تاب علينا و عليك من الغش
تحياتي
السلام عليكم ورحمة الله وبركاته
شفت ما اتأخرتش كثير
المهم الموضوع اللى سيادتك بتكلم فيه بقى مرض مزمن مالوش دواء فى مصر والمصيبه ان عك التصحيح بيحصل فى الثانويه العامه ويضيع مستقبل ناس ويتغير حسب الحظ ولما تتكلم يقولولك حظهم وحش يعنى الحكايه بقت حظ ..
المهم الحمد لله ان حظك كان كويس رغم الغش .. وسبحان الله .
ربنا يوفقك و يكرمك بمجهودك
ودمت بخير
تحياتى
rovy
روفي - المشهدالأول (قبل ما تقوم علشان الضيوف)
نقطتين ملهمش تالت
أولا حلوة حكاية بحجز تعليق دي والحمد لله إن مش كل الجيران اللي بيدخلوا يعلقوا بيعملوا زيك كده كان زماني قفلت المدونة بالضبة والمفتاح
ثانيا حكاية كل ما تقرأي البوست حاجة تحصل رأيي إنك تسألي فيها واحد شيخ يكون من اللي بيطلعوا الجن بالقرآن يمكن يعرف يدلك :)
وعلى العموم انا زي ما قلتلك قبل كده انا عارف انك مشغولة وأهم حاجة إننا بنطمن عليكي لما بنشوف اسمك في التعليقات
همس
لأ حنفي ده واحد صاحبي إنتي ماتعرفهوش
الحمد لله انك بخير وتنورينا دايما
شكرا على الزيارة
دكتورة جنة
يا سلام أهو انا دلوقتي بس ارتحت ..
الحمد لله إن جه الوقت اللي استطعت فيه إني أعرف ان السنين اللي قضيتها في السجن .. أقصد في كلية الهندسة دي مش بسبب غبائي لكن القدر كان أقوى مني (حته من سيناريو فيلم أنا ابن ناس بتاع ولد مصري)
على العموم متهيألي هيكون مناسب جدا إنك تعرضي الموضوع ده في بوست لحاله وخصوصا في الفترة اللي احنا فيها دي بتاعة الامتحانات علشان بس الطلبة الغلابة يعرفوا إن مافيش فايدة وإنهم مالهمش غير الدعاء الشديد وقيام الليل علشان ينجحوا
شكرا على التوضيح الرائع ويا ريت فعلا تفكري في موضوع البوست ده
عواض باشا
يا ابني انا قلت من الاول اني انا مرتحلك دلوقتي بس عرفت السبب مادام جبت سيرة الرقباوي
علشان بس أصحابنا يبقوا متابعين معانا الرقباوي ده يا جماعة زي عشماوي بتاع الاعدام بس الفرق الوحيد ان الرقباوي بيعدم طلبة اعدادي في هندسة عين شمس
طبعا انا مش هستغرب انك جبت امتياز في الوصفية اذا كنت انا جبت فيها 16 في نص السنة والغلبان صاحبي علي الدحاح جاب 11
بالمناسبة الباشا كان في أنهي عنبر (القسم يعني) وخت إفراج امتى (دفعة كام)؟
روفي - المشهد التاني (بعد ما "قلبت" الضيوف عشان التدوين وسنينه)
حضرتك موضوع الغش ده مش مرتبط بالطلبة ولا بالتصحيح بس، ده بقى موجود في كل حياتنا، كل حاجة حوالينا بقت مغشوشة وأكيد اللي بيغشوها دول مابتداش معاهم الموضوع دلوقتي بس لكن كان بادي معاهم من زمان وهما صغيرين
الحمد لله إن ربنا سبحانه وتعالى خلانا نتوب ونكفر عن ذنوبنا الفظيعة المرتبطة بالغش بس للأسف إن فيه ناس تانية لسه ما تابوش ولسه بيتاجروا في أرواح الشعب وده اللي مرجعنا ورا
ما علينا قادر سبحانه وتعالى إنه يهدي الناس أجمعين!!
يافندم والله عوااااااااااااد
بالداااااال مش بالضاد
عموما أنا زي ما قلتلك أنا نجحت في الوصفية و كمان مادتين بإمتياز و سقطت في الباقي
تاني سنة نجحت في كمان مادتين و سيبت الكلية
لاقسّمت و لا عنبرت
إدوني حسن سير و سلوك بدري بدري
و بالمناسبة المواد اللي جبت فيها إمتياز كانت الوصفية و رياضة 1 و رياضة 2
تحياتي يا باشا
عواد باشا
بقى أدوك حسن سير وسلوك بدري
يا إبن الإيه يا محظوظ
على العموم كفارة وسعدت بمرورك
لية كدة فكرتنى بالذى مضى
دة الواحد سايب المذاكرة بقالة كتير قوى اد 8 سنين تقريبا
بس بجد موت على نفسى من الضحك
طب زميلك على جاب 11 غيرة باة شال المادة 3 مرات و فى الاخير صعبت على الدكتور و نجحنى حسن سيرة و سلوك تقريبا ههههههههههههه
بس بجد و اللهى المادة الاى كنت بذاكرة الكبير بتاعها مقبول و الاى افقد فيها الامل انى افهم حاجة اجيب فية جيد و ما تسالش ازاى
و طبعا كلكم عارفين الاعنجليزى كنت بجيب فية جيد جدا مع انى معرفتى بية زاى معرفتك بالصينى ههههههههههههه
نونا
معلش الموضوع فكرك بذكريات أليمة بس عندي سؤال صغنن هي المادة اللي شلتيها 3 مرات نفس المادة ولا أخرى؟
معلش حاكم انا فهمي تقيل حبتين
وبعدين معنى إن حضرتك تجيبي جيد جدا في الانجليزي يبقى أكيد شعرك أصفر وعنيكي خضر
آي هاف تو آيز اند آي كان سي
ويلكم
تحياتي
يالهوووووي هتقولي علي الدكاترهه دول شلوني وركبولي العصبي
بتفكرني بماده النقد
يلا الحمد لله انك خلصت علي خير
كيارا
الدكاتره دول "تريد مارك" في كل الكليات
المهم طمنينا على موضوع الشلل والعصبي دول مش الحمد لله فيه تحسن ولا لسه الحالة زي ما هيه :))
تحياتي
إرسال تعليق
<< Home