يَوْمِيَات وَلَد مَصْري
الأربعاء، مايو 14، 2008
ساعات بحس
ساعات ألاقي اللي أنا عايزه *** وساعات يضيع مني في ثانية
ساعات بحب وساعات بتحب *** وساعات الدنيا تبقى ليا
وساعات بأكره سيرة الحب *** ودموعي تبقى مليا عينيه
أرجع ندمان على لحظة *** عايشها بين أحضان همسي
أهرب لفرحتي من همي *** ألقيها هيه غروب شمسي
ليـالي تمر وجفـوني *** سهـرانه تشكي هوا نفسي
لا عارف إزاي ولا إمتى *** توهاني بين يومي وأمسي
نفسي أكون ملاك طيب *** أدل الناس على الجـنه
نفسي أحب وأتشعبط *** في مركـب نوح وأتمنى
آخـد بإيدي وإيديهم *** ويبقى لدنيـتي معـنى
علشان أحس إني عايش *** لغيري وغيري يتهـنى
يا سنين العمر لا تروحي *** تشكيني وتشكي أيامي
وتسـيبي الهم لظنوني *** وغروب لشمس أحلامي
أجـري ورا أيام فاتت *** أحلم بحبي وغــرامي
مالاقيش فيه حد يونسني *** والاقي سـرابي قدامي
ساعات بحس إني ناسـي *** معنى وجـودي في الدنـيا
ساعات ألاقي اللي أنا عايزه *** وساعات يضيع مني في ثانية
التسميات: همسات
السبت، مايو 10، 2008
الحرام عمره ما بيدوم
وانا في اعدادي هندسة كان عندنا مادة غبية اسمها الهندسة الوصفية وغباء هذه المادة مش ناتج من صعوبة المادة نفسها، لكن في نوعية الدكاترة اللي كانوا بيدرسوها وده لسبب بسيط جدا لاني أعتقد إنهم هما كمان ماكانوش فاهمين فيها حاجة، وعلى فكرة أنا مابفتريش عليهم لكن انا هثبتلكم بالدليل القاطع وبالبرهان الذي لا شك فيه ولا ريب إن كلامي صحيح وإن الموضوع كله دجل وشعوذة ومحدش فاهم حاجة.
اللي حصل يا سادة ان في امتحانات نصف السنة دخلت امتحن المادة دي وانا لا افقه فيها غير بعض القشور وعلى فكرة ده يعتبر عادي جدا في المادة دي والدليل على كده كم الأصفار المهول اللي بيتسمع وهما بيعلنوا نتيجة الامتحان بتاع نصف السنة في السكشن، المهم لحفظ ماء الوجه وعشان أهرب من موضوع الصفر ده وطبعا لغياب الوازع الديني في الفترة دي قررت للاسف الشديد اني استعين بصديق خلال فترة الساعة ونص بتوع مدة الامتحان وكان انسب شخص بالنسبة لى صديقي العزيز أبو علي اللى كنت اعرفه من ايام ثانوي وكانت بتربطنا ببعض صداقة وطيدة واللي كمان زادت جدا بعد ما دخلنا نفس الكلية وزادت اكتر بعد أن شاء القدر انه يكون معايا في نفس السكشن اللي أنا فيه نظرا لان اسمي انا كمان بيبتدي بحرف العين (اطمنوا ماسميش عب عال ولا عاحمد) والغريب في الموضوع إني تفاجأت كمان بالريس علي لازق في القاعدة اللي جنبي في لجنة الإمتحان والحقيقة ولو إني ماكنتش عامل حسابي إني أغش لكن برضه ده مايمنعش إن وجود علي جنبي كان بيحسسني بالأمان لأن طبعا محدش عارف ظروف الامتحانات هتبقى عاملة إزاي !!
المهم قبل ما يبتدي الامتحان خدت علي على جنب وابتديت ادي له بعض النصائح اللي ممكن تكون عنصر فعال في اجتياز هذه الازمة وخصوصا إن علي كان من نوعية "باين عليك فاهم يا نصه" وده طبعا كان ظاهر جدا من خلال ورقة الامتحان بتاعته اللي كل ما ببص فيها (غصب عني طبعا) ألاقيها مشبرة من أولها لآخرها وطبعا بمقارنة بسيطة بورقتي كنت بحس إني أكيد بامتحن مادة تانية غير اللي أبو علي بيجاوب عليها، المهم ابتدأ الحوار بيني وبين علي بإني قلت له:
انا: ابو علي مش هوصيك
علي: على ايه
انا: نعم احنا هنستهبل من اولها بقولك ايه يا ابو علي اخوك معلوماته في الوصفية زي معلوماته في الصيني يعني لا أفقه فيها شئ .. ميح .. فاهمني
علي: ما انت قلتلي نفس الكلام ده في الميكانيكا
انا: جرى ايه يا سي زفت انت هتسيحلي يعني وفيها ايه لما أنقش منك مسألة ولا اتنين يا أخي الناس لبعضها وبعدين ما انت عارف يا أبو علي الموضوع كله إني مابلقيش وقت أذاكر فيه كويس علشان شغل المزيكا بتاع بالليل الله يحرقه
علي: طيب وإيه المطلوب
انا: ابدا .. بعد ما سعادتك تخلص حل .. عاوزك تباصيلي شوية حركات كده اعملها في كل مسأله .. يعني اهو اقله ما سلمش الورقة وهي فاضية كده
علي: حاضر يا سيدي ماشي اتفقنا
وفعلا إبتدى الإمتحان وإبتدى معاه علي في تشبير الورقة بكل أنواع الخطوط اللي ممكن حد إنه يتخيلها يمين وشمال وفوق وتحت وخطوط طالعة وخطوط نازلة واستخدام لجميع أدوات الهندسة زي ما الكتاب بيقول وفضل كده لحد ما بصيت في ورقته لقيت التلات مسائل اللي في ورقة الأسئلة محلولين في ورقته وطبعا كان ممكن تعرف إن الحل خلص لما في النهاية يطلعلك الشكل المطلوب اللي ساعات بيكون مثلت نايم على جنبه أو مربع فارد صدره وكمان ساعات بتكون دايرة بس على حل شعرها .. وطبعا معنى إن ساعدتك يظهرلك الأشكال دي في نهاية الحل بتكون سعادة ما بعدها سعادة لأن الأشكال دي بيبقى صعب جدا إنها تظهرنظرا للكم المهول من الخطوط اللي بترسمه واللي لابد إنك تتلخبط منها، لكن اللي حصل مع أخونا علي إن الأشكال ظهرت والحلوة اتكلمت وطلعت قماش وده اللي خلاني بمنتهى الثقة أفكر علي بالوعد بتاعه وأطالبه بيه بكل سماجة زي ما يكون حق مفروض عليه (مش عارف كنت طايق نفسي ازاي)
فعلا علي "دايما يوفي بوعده" وابتدى معايا بأول مسألة نقطة تقاطع مستقيم مع مستوى على خط تقاطع مستويين وبعدين ندور المستوى الأول وندور المستوى التاني وندور خط التقاطع لأن في الدوران (مش بتاع شبرا) نقدر نعمل بعض العمليات اللي مانقدرش نعملها في المستوى العادي (حد فاهم حاجة) أهو ده هو اللي كنا بناخده في الوصفية، المهم أنا كل ما الاقي المسألة اتشبرت خطوط أقوله كفاية كده خش على اللي بعدها وطبعا علي يحاول معايا جاهدا إني أكمل لكن طبعا أنا كان لي هدف تاني إني فقط ماسلمش الورقة فاضية.
خلص الامتحان وسلمت الورقة وشكرت على جدا على شهامته وجدعنته معايا وانتهت الامتحانات وخدنا أجازة نصف السنه اللي قضيتها في الأقصر وأسوان مع الكلية واللي الحقيقة أعجبت بيها جدا لدرجة إني أصبحت مدمن الأقصر وأسوان وبقيت أسافرها في أجازة كل نصف سنه خلال فترة وجودي في الكلية وإن شاء الله هبقى أحكيلكم على بعض النوادر اللي حصلت فيها في أيام جاية.
المهم بعد الأجازة وتحديدا بعد مرور أسبوعين إبتدوا يوزعوا نمر مادة الوصفية وكانت النمر بتوزع في كل سيكشن عن طريق إنهم ينادوا على إسمك ويقولولك نمرتك عيانا بيانا على رؤس الأشهاد علشان الفضيحة تبقى بجلاجل وكل زمايلك في السيكشن يسمعوا نمرتك العظيمة اللي غالبا كانت بتتراوح ما بين صفر إلى 10 من .. 30 !!
طبعا أنا كنت متوقع نمرة في حدود السبعة من تلاتين على أحسن تقدير وابتديت أسمع النمر على النحو التالي:
المعيد: فلان الفلاني
فلان الفلاني: أيوة
المعيد: 2 من 30
المعيد: علان العيلاني
عيلان: أفندم
المعيد: صفر
المعيد: ترتان الترتاني
ترتان: أفندم
المعيد: صفر
المعيد ينادي على إسمي
أنا: أفندم
المعيد: 16 من تلاتين
أنا: الحمد لله .. أحمدك يا رب .. يا رب هصلليلك طول عمري .. الحمد لله الحمد لله ..
علي: مبروك يا ريس
أنا: الله يبارك فيك يا أبو علي إن شاء الله هتاخد 30 .. الحمد لله .. الحمد لله
المعيد في خلال هذا الوقت يكمل باقي الأسماء وطبعا تسمع زهول من كل الحاضرين وبكاء وعويل من مهندسات المستقبل اللي لم يسعدهن الحظ بتخطي عقبة الصفر المتين
المعيد: علي عبد الحفيظ (صاحبي)
علي (بكل ثقة): أفندم
المعيد: 11 من تلاتين
علي:!!!!
علي: إيه .. إزاي
المعيد: بلاش دوشة
علي: مش ممكن .. مش ممكن .. في حاجة غلط .. أكيد في حاجة غلط
المعيد: أقعد مكانك يا باشمهندس وبلاش دوشة
علي: يا جماعة أكيد دي مش نمرتي
المعيد: يعنى ايه مش نمرتك أنت هتعرف أحسن من الدكتور
علي: بس إزاي
أنا (مرمي على ظهري من الضحك على الدجل والشعوذه اللي بيسموه الوصفية)
وانتهى السيكشن وانتهت الحكاية لكن أحب أطمنكم إن علي في نهاية السنة جاب جيد في مادة الوصفية وأنا .. جبت فيها مقبول بس بعد ما نزلت فيها وعدتها في تاني سنة!!
ونكمل ان شاء الله في يوم تاني...
التسميات: يوميات
الأحد، مايو 04، 2008
أمري لله
التسميات: تيجان لبستها