يَوْمِيَات وَلَد مَصْري
الاثنين، فبراير 09، 2009
جعلوني مدونا – إبتدا المشوار وآه يا خوفي
بعد حسن الاختيار .. للاسم المختار .. ورحلة البحث والتنقيب ..عن صورة الولد العجيب .. اللي فالق نفسه من البكاء .. نتيجة للبؤس والشقاء .. حصل التعيين .. في عالم التدوين .. واتنشر أول موضوع .. بدون رقابة أو خضوع .. لأي إنسان .. كائن ما مكان .. واللي هخليكم دلوقتي تشفوه .. وبعنيكم تقرؤوه .. أول بوست ليا .. نزلته بإيديا .. في همسات مصرية .. نشرته بس للأسف عدى وفات .. بدون أي تعليقات .. ولذلك وبدون مجاملات .. أو تزويقات .. عاوز اسمع منكم شهادة .. في الحق يا سادة .. رأيكم بصراحة هتقولوه .. واحنا بكل نزاهه وحيادية هنعلنوه.
البدر لما اشتاق لضياءه الورد والفل والياسمـــين
راحوا اشتكوا لهلاله والدمع أنهارعلى الخــديــن
بكا ونواح عويل وصياح ولوعة وفراق وأنــــيـن
سنين على بدرنا في حزننا يا عم هلال صــابريـن
شايلين جبال المر وتمر علينا الأيام بعدك سـنــيـن
مستنيين القمر يطلع يبتسم ويطل على المساكــيـن
ماسكين في بعض نطعن قلبنا المسكين بسكاكــيـن
مسكين قلب سهران يعشق في الليل بايت حــزيـن
يمسح دمعته يداوي بيها جراحه وبشر الصــابرين
اللي المولى وعدهم ووعده حق إن في يوم الــدين
يلبسهم حلل ويدخلهم جنات ذوات أنهار وبساتـــين
يا رب ارحم ضعفنا واغفر لنا غلابة إحنا مساكـين
من غيرك نضيع نصيع نمشي في الكون هيمانـيـن
يا رب أبدا ما تسيبنا ده احنا بنعبدك وبيك نستعـيـن
اهدنا صراطك اللي أنعمته على عبادك الموحديـن
وابعدنا عن صراط المغضوب عليهم والضـآلـيـن
واجعلنا ننول شفاعة حبيبك النبي سيد المرسلــــين
أبو القاسم المعصوم أحمد رسول رحمة للعالميــن
وصلي اللهم عليه وسلم صلاة مباركة ليوم الديــن
وعلى الصحابة وآل بيته الكرام الطيبين والتابعـين
واحنا معاهم بكرمك وعطفك وجودك يا رب آمين
المرة الجاية بإذن الله هيكون أول بوست نزلته في سلسلة اليوميات واللي بحكي فيه عن واقعة حصلت ليَّ وأنا في أمريكا.
التسميات: يوميات
28 Comments:
شيء حلو اني الحق البوست من أوله
وبالرغم من اني زعلانة ومقهورة وانت مضطهدني الا اني اقول رايي بصراحة
في بداية البوست حسيت اني جوه الف ليله وليله
طريقتك عجبتني جدا
اول بوست نشرته في همسات مصرية
الكلمات جميلة جدا
ومعبره للغاية
بجد وبغض النظر عن اي شيء تسلم ايدك
ايه ده انا كنت اول تعليق
طيب كويس
عشان تعرف بس اني بلحق الطابور من اوله
المقدمه والسجع الخفيف ده جميله جداا بجد
********
والبوست جميل فعلا
اهدنا صراطك اللي أنعمته على عبادك الموحديـن
وابعدنا عن صراط المغضوب عليهم والضـآلـيـن
واجعلنا ننول شفاعة حبيبك النبي سيد المرسلــــين
أحسنت
ايه دا
على راى زهرة المضروبه
ولا الف ليله وليله
لا بجد المقدمة والقصيدة جميله اوى
ومستنينك فى امريكا
وبعدين معظم البوستان الاولنيه بتبقى بدون تعليق اصلك داخل عالم لسه مش معروف فيه وعلى ما تكون اصحاب باه
وربنا يدوم الود يا عم شهريار
اخييييييييييييييييييييييرا
خلصت البدايه و بدأنا ندخل فى المشوار
احمدك يارب
اول مرة اعرف انك بتكتب حلو كده .. اممممم .. هو انا جيت فى البوست الكام فى المدونة دى
لا بس بجد كلمات حلوة .. يلا شويه مدح اهو علشان ماتقولش ضد التيار بخيلة ولا حاجه ((:
يلا بقى منتظرين البوست التانى و ياريت بسرعه و يكون اتنين فى بعض
ايوة ماهو احنا مش هنعمل زى المسلسلات اللى انا مابحبهاش و يبقى 45687941567897674987 حلقة
تحياتى ((:
آآآآه صحيح نسيت
هو انت ماردتش ليه على التعليق بتاع الجلسة النفسية ؟؟؟
ياراجل كده ماينفعش على فكرة لازم ترد على المدونين عندك
مش معاملة دى D:
ياااااربي اخيرااااااااااااااااا
بس بجد رووووووووعه لالالا بجد جامده
ومستنين البوست الجاي
وبحدين انا مش كروت ولا حاجه :)
السلام عليكم ياشهريار الزمان وملقي الأشعار
جميل قوي قوي مجتلكش كومنتس ازاي بقى بالصلى ع النبي
ده انت لو في صحرا لازمن حد يقول ده فله ده جميل خالث خالث
تحياتي ويلا ادينا بوست جديد
زهرة الجنة
وبالرغم من اني زعلانة ومقهورة وانت مضطهدني الا اني اقول رايي بصراحة
********************
حضرتك بتتكلمي عن مين بالظبط؟ مين ده اللي مضطهدك؟ أنا؟ فين وإمتى والساعة كام؟
في بداية البوست حسيت اني جوه الف ليله وليله
طريقتك عجبتني جدا
*******************
يا مسهل عقبال الباقي
اول بوست نشرته في همسات مصرية الكلمات جميلة جدا
ومعبره للغاية
*******************
ربنا يخليكي ويكرمك على كلامك الجميل
بجد وبغض النظر عن اي شيء تسلم ايدك
**********************
أي شئ ده اللي هوه يطلع إيه؟ المحاكم والقواضي اللي بينا يعني ولا إيه :))))
تحياتي
زهرة الجنة - 2
ايه ده انا كنت اول تعليق
طيب كويس
******************
طبعا مش كويس ....
ده هايل:)
تحياتي
زهرة الجنة - الجزء التالت
عشان تعرف بس اني بلحق الطابور من اوله
********************
إيه نظام طابونة العيش ده؟
على العموم الطابور نور
تحياتي
سلوى
المقدمه والسجع الخفيف ده جميله جداا بجد
******************
خلاص اتفقنا على الله ماتندموش بعد كده
والبوست جميل فعلا
*******************
ربنا يكرمك مش للدرجة دي يعني
تحياتي
همس
على راى زهرة المضروبه
*******************
والله ما انا دي هيه
لا بجد المقدمة والقصيدة جميله اوى
********************
ده بس من ذقك ربنا يكرمك
ومستنينك فى امريكا
*******************
ربنا يسهل بس في الحجوزات
وبعدين معظم البوستات الاولنيه بتبقى بدون تعليق اصلك داخل عالم لسه مش معروف فيه وعلى ما تكون اصحاب باه
********************
فعلا محدش مابياكلها بالساهل
وربنا يدوم الود يا عم شهريار
*******************
آميين يا أبلة همس
تحياتي
ضدالتيار
اخييييييييييييييييييييييراخلصت البدايه و بدأنا ندخل فى المشوار
*********************
يا جدعان هو انتوا وراكوا ايه بس؟ حاجة غريبة
اول مرة اعرف انك بتكتب حلو كده ..
*********************
قصدك إيه هه؟ إن خطي كان وحش الاول ودلوقتي بقى رقعة
اممممم .. هو انا جيت فى البوست الكام فى المدونة دى
**********************
الحقيقة ماكنتش بعد بس ان شاء الله هبقى اعمل شيت اكسل وأسجل فيه بعد كده كل واحد بيدخل عندي دخل إمتى والساعة كام وفي أنهي بوست وكان فرحان ولا متضايق وكان متغدي ايه وهو داخل محدش عارف يمكن أتسأل الأسئلة دي مرة تانية أبقى جاهز للرد
لا بس بجد كلمات حلوة .. يلا شويه مدح اهو علشان ماتقولش ضد التيار بخيلة ولا حاجه ((:
*******************
لأ العفو أنا برضه أقول حاجة زي كده قال بخيلة قال
يلا بقى منتظرين البوست التانى و ياريت بسرعه و يكون اتنين فى بعض
**********************
حضرتك ولو فيه كمان شرابات عايزة تتغسل أو مكوى أنا تحت أمرك
ايوة ماهو احنا مش هنعمل زى المسلسلات اللى انا مابحبهاش و يبقى 45687941567897674987 حلقة
**********************
لأ اطمني خالص هيكونوا
45687941567897674986 بس
تحياتي
ضد التيار مكرر
آآآآه صحيح نسيت
******************
استر يا رب
هو انت ماردتش ليه على التعليق بتاع الجلسة النفسية ؟؟؟
********************
والله رديت والله رديت حتى انزلي شوفي بنفسك .. انا معملتش حاجة
ياراجل كده ماينفعش على فكرة لازم ترد على المدونين عندك
*******************
طلعت أوت المرة دي
تحياتي
كيارا
ياااااربي اخيرااااااااااااااااا
******************
تقولش كانت مستنية مترو الأنفاق والكهربا قاطعة
بس بجد رووووووووعه لالالا بجد جامده
********************
مش للدرجة دي يعني وعلى العموم ربنا يخليكي وشكرا على كلامك الجميل
وبحدين انا مش كروت ولا حاجه :)
********************
أي تعليق أقل من 350 كلمة يعتبر كروته ويحتاج إعادة
تحياتي
ستيتة حسب الله الحمش
السلام عليكم ياشهريار الزمان وملقي الأشعار
*******************
وعليكم السلام ورحمة الله وبركاته
جميل قوي قوي مجتلكش كومنتس ازاي بقى بالصلى ع النبي
********************
عليه الصلاة والسلام .. وانا هخبي ليه يا دكتورة لو كان جالي كنت قلت على طول
ده انت لو في صحرا لازمن حد يقول ده فله ده جميل خالث خالث
********************
انا فعلا في مدينة ملهاش لازمة في وسط الصحرا بس للاسف ملقتش حد يقول الكلمتين الحلوين دول
تحياتي
يعنى ينفع كده ؟؟
ايه المدونات اللى الخدمة فيها مش حلوة دى
ازاى يعنى مش عارف انا جيت امتى
اتفضل بقى حسن الخدمة اللى فى المدونة دى .. يعنى الواحد يجى هنا و يتعب كده
و كمان انا قولت مافيش تعليق هناك خالص مالص
يعنى مافيش تعليق هناك خالص مالص
مش كل شويه مشوار رايح جاى علشان اتأكد من التعليقات
مين هيدفع حق المواصلات دى هه
و كمان المفروض تعمل فى المدونة باص علشان ينقل المدونين
ايه المدونة اللى خالية من الخدمات دى بس ياربى
مدام فات اكتر من 12 ساعه على التعليق يبقى الحكم صدر غيابى
بفتح خط مباشر مابين مدونة ولد مصرى و ضد التيار
واصبحوا ملك لضد التيار
و ولد مصرى اصبح زائر و يلا نخليه كمان يكتب فيها بوستات
عد الجمايل بقى . ماشى ؟
((:
على فكره قصدك ايه يعني بالشتيمه تلف وترجع لصاحبها !!
مش ذنبي انك فهمت غلط هزاري
لو عايز تفهم غلط وتفهم على مزاجك الكلام مش هعلق تاني
اجتنابا لاي زعل واي غلط
سلام
ياريت بلاش حساسيه يا ابن بلدي ده احنا ولاد بلد واحده
تحياتي
اللهم صلي وسلم على نبيك محمد....
........
جميل ما بدأت به إبحارك في عالم التدوين...
.......
في إنتظار أمريكا وحكياتها..
...
دمت بخير..
اولا باعتذر عن التأخير
ثانياالبوست حلو بس هو ليه ملاقاش تعليقات عليه يعنى؟
وانت بقى هتعيد كل الموضوعات بتاعتك من الاول تانى ولا ايه؟
هو الكلام خلص وهتقعد تعيد من الاول زى اغانى الست او كلثوم ولا ايه؟
معلش يعنى هو استفسار
علشان انا ممكن اوفر عليك الكتابه واقرا المدونه من اولها وخلاص
(عايزه اريحك يعنى)
وعموما دى مدونتك خد راحتك على الاخر
هههههههههه
امرنا لله
ضد التيار
يعنى ينفع كده ؟؟
*******************
اللهم اجعله خير
ايه المدونات اللى الخدمة فيها مش حلوة دى
*********************
معلش الغالي تمنه فيه وانتي بتسترخصي
ازاى يعنى مش عارف انا جيت امتى
*********************
معلش يا هانم كنت بمسح العمارة وماكنتش قاعد على البوابة بتاعتها فمشفتكيش وانتي داخلة
و كمان انا قولت مافيش تعليق هناك خالص مالص
يعنى مافيش تعليق هناك خالص مالص مش كل شويه مشوار رايح جاى علشان اتأكد من التعليقات
*********************
طب يمين على يمينك أنا سايب تعليق هناك
مين هيدفع حق المواصلات دى هه
*********************
اشحال ماكنتي جاية راكبة توكتوك امال لو راكبة تاكس كنتي عملتي فينا ايه
كمان المفروض تعمل فى المدونة باص علشان ينقل المدونين
*******************
لما ابيع المدونة لطلعت مصطفى هبقى اقول له
مدام فات اكتر من 12 ساعه على التعليق يبقى الحكم صدر غيابى
********************
لو اكتر من 24 فيها اعدام مش كده
بفتح خط مباشر مابين مدونة ولد مصرى و ضد التيار
واصبحوا ملك لضد التيار
*********************
ابقى قولي الكلام ده في القسم قدام حضرة الظابط جوجل
عد الجمايل بقى . ماشى ؟
**********************
الجمايل جمع جمل مش كده :))
تحياتي
مرمر الغضبان (ملهاش علاقة برواية الأرنب الغضبان)
على فكره قصدك ايه يعني بالشتيمه تلف وترجع لصاحبها !!
*********************
دعابة ... على أساس إنك بتقوليلي يا غير معروف فقلت على سبيل المزاح الشتيمة بتلف وترجع لصاحبها لكن طبعا انا مش قصدي بيها أي إساءة
مش ذنبي انك فهمت غلط هزاري
********************
ومين قال اني فهمت غلط انا فهمت صح وكملت على هزارك ده بدعابة
لو عايز تفهم غلط وتفهم على مزاجك الكلام مش هعلق تاني اجتنابا لاي زعل واي غلط
**********************
يا عالم يا هووو مين قال اني فهمت غلط .. أنا فهمت صح وفهمت إنك بتهزري ورديت على هذا الأساس وكان ردي برضه هزار
على العموم ماتزعليش الموضوع بسيط خالص وتأكدي اني مش ممكن هزعل من أختي الصغيرة
تحياتي
مرمر
ياريت بلاش حساسيه يا ابن بلدي ده احنا ولاد بلد واحده
********************
ولو اني مش فاهم إيه لزمة الكلام ده كله لكن حاضر وعايز أقولك كمان إن حتى لو ماكناش ولاد بلد واحدة وحتى لو اختلفنا في الدين واللون والنوع فده كلة مش هيفرق وبرضه مش هيكون فيه اي حساسية
الموضوع بسيط ومايستهلش أي خلاف أو زعل
تحياتي
نهار
اللهم صلي وسلم على نبيك محمد....
*******************
عليه الصلاة والسلام
جميل ما بدأت به إبحارك في عالم التدوين...
*******************
ربنا يكرمك وشكرا على الإطراء
في إنتظار أمريكا وحكياتها..
********************
قولي يا رب
تحياتي
عاشقة الرومانسية
اولا باعتذر عن التأخير
*********************
ولا يهمك المهم إنك وصلتي بالسلامة
ثانياالبوست حلو بس هو ليه ملاقاش تعليقات عليه يعنى؟
*********************
كانت لسه المدونة جديدة ومحدش كان يعرفها
وانت بقى هتعيد كل الموضوعات بتاعتك من الاول تانى ولا ايه؟
هو الكلام خلص وهتقعد تعيد من الاول زى اغانى الست ام كلثوم ولا ايه؟
********************
ما انتي كنتي ماشية كويس في التعليق قلبتي ليه؟ :))
معلش يعنى هو استفسار
علشان انا ممكن اوفر عليك الكتابه واقرا المدونه من اولها وخلاص
*********************
ماهو انتو مش هترتاحوا إلا لما أعمل ماتش اعتزال
يا ستي وفرضا إني بعيد الكلام تاني هو حد دافع حاجة من جيبه
وتصدقي فكرة بدل ما اكتب بوست أحط لينك على البوست القديم وخلاص وبلا وجع قلب
بس لعلمك بقى البوستات دي مالهاش اي أثر في المدونة لأن سعادتك لو بتركزي معانا شوية كنتي عرفتي إن البوستات دي كانت موجودة في مدونة همسات مصرية الله يرحمهما ويبشبش البوستات بتاعتها ومش موجوده في يوميات ولد مصري طويل العمر يطول عمره ويزهزه عصره وينصره على مين يعاديه هاي هيه
امرنا لله
******************
تصدقي فكرتيني بجمهور الزمالك اللي عمره ماشاف فريقه بيكسب!!
بقى كل ده علشان بتدخلوا عندي .. أعوذ بالله ايه الناس دي:))
تحياتي
إرسال تعليق
<< Home