يَوْمِيَات وَلَد مَصْري
السبت، فبراير 07، 2009
جعلوني مدونا – الحلقة الأخيرة من البداية
المهم كنا وقفنا المرة اللي فاتت (اللي تعب من الواقفة ممكن يقعد مافيهاش حاجة) إني سبت أول تعليق ليا في عالم التدوين عند دكتورة جنة وكان تحت اسم غير معرف والحقيقة إني لما شفت "غير معرف يقول" .. حسيت بإهانه شديدة، والمشكلة كمان اللي عرفتها بعد كده إن صاحب المدونة بيوصله ميل بيقول "غير معرف ترك رسالة" يعني فضيحة الغير معرف بتكون بجلاجل على كل المستويات.
المهم سبت التعليق ودخلت بعد كده بيومين قلت أشوف إيه اللي حصل وإذا كان فيه رد على التعليق بتاعي وكانت الصدمة إني "تفوجؤت" باللي شفته قدامي لأن اللي شفته "كان شئ لا يصدكه عكل" (على رأي الفنانه شويكار) لقيت يا سادة الدكتورة جنة منزلة التعليق بتاعي كلمة كلمة وحرف حرف في بوست عندها وقالت إن الكلام ده وصلها من شخص غير معروف (الله يسامحك يا دكتورة) ردا على البوست الخاص بالزوجة التانية .. طبعا أنا قعدت فاتح مدونة دكتورة جنة قدامي ولقيت بقدرة قادر ابتسامة بلهاء لزقة في وشي مش عاوزة تفارقه.
بعد كده عَرَضِت عليا دكتورة جنة إني أشترك معها كمدون في مدونتها همسات مصرية وطلبت مني أضرب اسم مستخدم وابعته ليها علشان تضفني عندها في بطاقة التموين أقصد في بطاقة التدوين كلاعب أساسي.
قعدت أفكر كتير في الاسم لأني كنت عاوز اسم يعبر عن حبي لبلدي وفي نفس الوقت يمشي مع اسم المدونة اللي هكون أحد المشاركين فيها واستقريت في النهاية على اسم ولد مصري .. وبعد اختيار الاسم، ظهر موضوع جديد وهو إني أختار صورة للبروفايل ودي بقى كانت أصعب من اختيار الاسم نفسه لأني كنت عاوز صورة أولا تكون ظريفة يعني فيها لمسة كوميدية لأني حسيت إنها ممكن تعبر عن شخصيتي اللذيذة (طول عمري متواضع من يومي) وفي نفس الوقت يكون فيها معاناة ودي بقى اللي بتعبر عن حال المصريين .. وبعد البحث والتنقيب وسهر الليالي لقيت صورة (الولد) الغلبان ده واللي فالق نفسه من العياط ومحدش بيسأل فيه (الشعب المصري) .. ده غير إن الصورة كمان بتعبر عن مدى عدم اهتمام السادة المسئولين عن هذا الولد في تجفيف منابع العبرات المتساقطة من عيونه الحزينه ومسح "التيييييييييت" المتدلية من الأنف وده كمان غير البنية التحتية اللي أكيد محتاجة نظافة وتشطيف واللي طبعا كان صعب جدا إنها تظهر في الصورة ولو إن جميع الأمهات بتتعرف عليها من ريحتها.
التسميات: يوميات
32 Comments:
أوووووووووووول تعليق
هقرا و ارجع تااااااااااااااااانى
بحجز مكان بس ((:
أولا قبل كل شئ
مبروك للزمالك ..لان حسب الدراسات انه خلاص على مشارف
دخول موسوعة جينيس كأول فريق يحطم الرقم القياسى للهزيمه فى المباريات D:
ايوة امال كنت فاكر مبروك على ايه ؟؟
انه كسب مثلا مثلا يعنى ..لالا لازم يكون عندك ثقة فى فريقك اكتر من كده على فكرة P:
^^^^^^^^^^
نيجى بقى للبداية اللى الحمدلله نهايتها دلوقتى
و ياااااااااارب مايطلع لها حاجة تانيه و يبقى فيها يتبببببببببببببببع
امممم .. ياخسارة طلع التعليق نزل فى بوست لوحده
خاب ظنى عااااااااااااااااااااااااااااااااااااااا
عموما بقى منتظرة حكاية البوست الاول
بس يارب مايكونش على حلقات هو كمان )):
زمالك
يوووووه
قصدى ولد مصرى:)))
انا فعلا كانت محيرانى صورة البروفايل بس ايه الاسباب المقنعة دى هههههه
صبرررررررررررررررني يارب
كووووووووووول دي مقدمه
علي راي ضد حبيبتي
الف مبرووووووووووووووووووك للزمالك لدخوله الموسوعه انا فرحانه فرح في الزملاكاويه بابا برده مرارته هتتفقع مني دا انا بفرسه كل فرسه وفرسه
صحيح كل دا في البدايه امال بقي لما تيجي سيرة يوميات ولد مصري هتقعد اد ايه لاااااااااااااااااااا زود الحبر شويه وكبر البوست ايه البخل دا ءاءاءاءء
كنت عايزة اسألك عن سر اختيارك للصورة لانى كنت مفكراها بتعبر عن حاجة تانية خالص غير اللى قلته:)
اية دة نزلت أجزاء كمان؟؟
مبرارتك للصورة واختيارك ليها بجد اختيار موفق
مخمخنى اوى ردك دة....
الله يباركلك لمة تنزل فوازير رمضان او الجزء رقم54548574
اوعى تنسى تقولى!!!
**امشى انا بقى لا متمسكش فيا يدوبك امشى**
عوووووووو
ضد التيار
بتحجزي ايه يعني من كتر الناس اللي واقفه على باب المدونة مستنية نزول البوست الجديد على العموم وماله إحجزي مكان براحتك خالص ولو عايزة تحجزي ليكي ولاصحابك برضه مافيش مشكلة
تحياتي
ضد التيار تاني
يا فتاح يا عليم يا رزاق يا كريم
هو فيه بوستات كده بتبان من اول تعليق
ماله بقى يا ستي الزمالك؟
معلش العيب مش عليكي العيب على الفريق ابن ال"تيييييييت" اللي انا بشجعة مقصر رقبتنا ومش مقصرها بس ده قاصفها خالص ومش مخلي الواحد عارف يتفك في الكلام براحته
يلا الله يرحم العجل اللي دبحتوه على عتبة الجون
هيييييييييه كانت أيام
بالنسبة للبداية ولو اني كنت بفكر أنزلها جزء تاني بس صرفت نظر بناءا على طلب السادة المشاهدين
******************
خاب ظنى عاااااااااا
******************
فعلا ليكي حق تعيطي حاكم خيابة الظن دي صعبة قوي
البوست الأول في الفرن وإن شاء الله أول ما يستوى هتلقيه على السفرة
تحياتي
كبيرة رابطة مشجعي القافلة الحمراء الشهيرة ببرينسيس
"بكرة تندم يا جميل"
بالنسبة لصورة البروفايل لكل مجتهد نصيب أمال سهر الليالي ده كله كان علشان ايه؟ وبعدين الواحد لازم يعمل الحاجة صح من أول مرة :)
تحياتي
كيارا
****************
صبرررررررررررررني يارب
***************
آمييييين
إنتوا ليه يا جماعة محسسني إن وراكم مشوار وأنا معطلكم؟!!
بالنسبة لباباكي طول عمري شايف إنه انسان محترم :))
ربنا على المفتري
تحياتي
كيارا تاني
بخل؟ ..الله يسامحك وكمان بتتهميني بإني بخيل أمال البورتريه 180 في 180 اللي انا حطه ده مش بيكلف حبر وورق
على العموم المرة الجاية ان شاء الله هبقى انزل بوست 150 صفحة بالألوان علشان تعرفوا إني مش بخيل
الله يرحم البويت النص صفحة اللي قلبتي فيه حكايتك مع التدوين :))
تحياتي
موناليزا
اللهم اجعله خير .. انتي كده قلقتيني
لأ انا عاوز أعرف انتي فهمتي ايه ليكون فيه حاجة انا مش واخد بالي منها
عيل بيأواء و"تيييت" نازل من مناخيره يبقى تفتكري كان بيعبر عن ايه؟
في إنتظار الإجابة
تحياتي
كيكي
صباح الفل .. هي الناموسية كانت كحلي ولا إيه
الحمد لله إن إختياري كان في محله وعاجبك
*****************
الله يباركلك لمة تنزل فوازير رمضان او الجزء رقم54548574
******************
متهيألي شامم ريحة تريقة .. آه هي ريحة تريقة
حضرتك بس الجزء رقم 54548574 متعرفيش مفتاح البلد بتاعه إيه؟ متهيألي المنوفيه 066
*****************
**امشى انا بقى لا متمسكش فيا يدوبك امشى**
****************
من غير ما تشربوا حاجة كده .. مايصحش .. طيب أقوم أوصلكم
تحياتي
نيجى لاول تعليق
هو انت كمان زعلان انى بحجز
اييييييييييييييه الناس دى ياربى
يعنى بعملك شغل كده فى التعليقات و كمان ماانت عندك ناس كتير اهم
اقر عليك بقى .اقر
و كمان انا مش محتاجة احجز لاصحابى كمان
لان اصلا المدونة بقت بتاعتى وبراحتى .. بدون حجز هما يدخلوا كده على طوووووول D:
^^^^
التعليق التانى
قصدك ايييييييييه بقى بتبان من اول تعليق دى ؟؟
طبعا ان البوستات و التعليقات عثل عثل عثل ((:
ماله الزمالك ؟؟ اتغلب طبعااااااااااااااااااا
و خلاص قرب يدخل الموسوعة فقولت ابارك ليك انا غلطانة يعنى
خلاص مش مبروك .. ايه الناس دى
هههههههههههههههههههههههههههه ياعينى صعبت عليا
خلاص خلاص هدعيلك تشفى من مرض تشجيع الفريق ده
ايوة ايوة ماهو ده مرض مش اهتمام بالرياضة و الكلام ده ((:
^^^^^
لالالالا على فكرة الدراسات اثبتت ان التفكير مضر جدااا للصحة
بلاش بقى تفكر لو تفكيرك من النوع ده
ال جزء تانى ال
^^^^^^
ايوة شوفت بقى صعبه ازاى
عااااااااااااااااااااااااااااااااااا
عاااااااااااااااااااااااااااااااااا
عااااااااااااااااااااااااااااااااااااااااا
^^^^
يلا بقى كفاية كده و منتظرة البوست (:
اول زيارة بس بالصلى ع النبي موش اخر واحده
اخدت بونطة في المدونة وحفظت عن ظهر قلب اسم المدونة جنة وسبب دخولك التدوين
بس اسمح لي والله دمك خفيف زينا كلنا نحن المصريين المعلم حلاوة العنتبلي
ها احط مدونتك ع البانر عندي لو معندكش ايوها مانع
مشكلة وااااااااااحده انت فعلا فعلا زملكاوي؟
اكتر من كده وربنا يزيح
تحياتي ومتزعلش مني معرفش جبت العشم المفاجيء ده منين
:)
قرأت الجزء اللي فات
والبوست ده
طريقه الكتابه حلوة بجد
ربنا يوفقك
الصورة بس اللي كانت فعلا محتاجه توضيح :)
بس على فكرة رغم المعاناه اللي الطفل فيها
إلا إنه طفل مش مصري ده تايواني تقليد يعني :))
المصري مهما أخد على دماغه وعاش في معاناه
بيكون واقف ألف .. (ولا كلمه.. الله أكبر على رأي سمير غانم) ...
ربنا يوفقك في عالم التدوين أخي
ودمت بكل خير
ههههههههههههههههههههه
انت لسه مصمم تحكلنا قصه حياتك
ما تقلنا سموك احمد ولا محمد ولا ولا ولا ليه
اهو ده الناقص
ههههههههههههههههههه
غير معرف هيهيهيهيهيهيهيهيهي
ربنا يهديك يابني
هههههههههههههههههه
ازيك يا غير معروف
هههه
حلو الأسم عليك يلا غيره بقي
علي فكرة اكتشفت ان ضعف نظري مكنش مخليني اشوف الصورة كويس
لكن المرة دي شوفتها كويس جدا
طلعت صورة وحشه ):
حسيت إنها ممكن تعبر عن شخصيتي اللذيذة (طول عمري متواضع من يومي)
وبتقول اني انا بحرق دمك
ال متواضع ال
ههههه
بمناسبة حرق الدم مش انا روحت موقف العاشر انهارده هههههه
علي فكرة كلها أخر الأسبوع وهنزل بوست حارق دمي جداااااا
شوفت بقي عشان محرمش اصدقائي من فرستي
ههههه
ادينا سيبنا تعليق بس ربنا يكرمك شوف منديل للولة الغلبان بتاعك ده احسن نفسنا غمت علينا حراااام
تسلم ايدك
صوره ظريفه؟
ياراجل ظلمت الظرف والظرفاء
دى صوره مقرفه
صوره مقززه
صوره مثيره للاشمئزاز
حال الشعب المصرى مهما كان احسن من الصوره دى
ثم ان اللى هيشوفها مش هيفكر بطريقتك دى ابدا
هيفكر فى الكلام اللى انا قلته فوق ده
وكمان من قوتك وجبروتك منزلها مع البوست
نصيحه لله وفى الله
شيلها
غيرها
ارميها وابعتلك صور اطفال
انضف من كده بكتير
وفيهم معاناه برضه
ضد التيار (التعليق التالت اللي هو قبل تعليق ستيتة وبعد ردي على تعليق كيكي وانت داخل منطقة التعليقات على ايدك اليمين)
هو انت كمان زعلان انى بحجز
*********************
لأ طبعا مش زعلان بالعكس هفرقع من الانبساط من كتر الناس اللي مش لاقيه مكان وواقفة مستنية دورها في التعليقات
و كمان ماانت عندك ناس كتير اهم
*******************
صحيح الكحكة في إيد اليتيم عجبة
لان اصلا المدونة بقت بتاعتى وبراحتى .. ***********************
(وش عاوج بقه وبيمصمص شفايفه) قال على المثل سكتناله دخل بحماره
ماله الزمالك ؟؟ اتغلب طبعااااااااااااااااااا
***********************
نورتي المحكمة وايه الجديد ..
خلاص خلاص هدعيلك تشفى من مرض تشجيع الفريق ده
*******************
يا ريت تبقى الدعوة عامة إني ماتفرجش على كورة من أساسه وأهو كله بثوابه
ايوة ايوة ماهو ده مرض مش اهتمام بالرياضة و الكلام ده ((:
*******************
إنت شايف كده يا دكتووور
لالالالا على فكرة الدراسات اثبتت ان التفكير مضر جدااا للصحة
********************
علشان كده شعوبنا في المنطقة العربية دايما بتحافظ على صحتها
عااااااااااااااااااااااااااااااااااا
عاااااااااااااااااااااااااااااااااا
عااااااااااااااااااااااااااااااااااااااااا
*******************
عااااااااليكم السلام ورحمة الله وبركاته:)))
تحياتي
ستيته حسب الله الحمش (الإسم لوحده يعتبر تعليق في حد ذاته محتاج رد عليه)
اول زيارة بس بالصلى ع النبي موش اخر واحده
********************
أعتبر ده وعد؟؟
اخدت بونطة في المدونة وحفظت عن ظهر قلب اسم المدونة جنة وسبب دخولك التدوين
********************
الحمد لله انا كده ممكن اعتزل التدوين وانا قلبي مستريح .. وعلى العموم اتريقي براحتك ولا بحس
بس اسمح لي والله دمك خفيف زينا كلنا نحن المصريين المعلم حلاوة العنتبلي
*********************
ربنا يخليكي ماهو كل الناس اللي بتفهم ده رأيها برضه (مش بقولكم متواضع)
ها احط مدونتك ع البانر عندي لو معندكش ايوها مانع
**********************
يا فندم ولو عايزة تلزقي صورة صاحب المدونة كمان عندك على البانر برضه ماعنديش مانع
مشكلة وااااااااااحده انت فعلا فعلا زملكاوي؟
*********************
جوي جوي يا بوي
اكتر من كده وربنا يزيح
*******************
ونعم بالله
تحياتي ومتزعلش مني معرفش جبت العشم المفاجيء ده منين
******************
أكيد جبتيه من سوق الحمام!! وعلى أي حال أنا سعيد جدا بوجود العشم ده وإن شاء الله تكون معرفة خير
خالص تحياتي
سلوى
قرأت الجزء اللي فات
والبوست ده
*****************
ايه نظام اتنين في واحد ده من أول زيارة كده:)
طريقه الكتابه حلوة بجد
ربنا يوفقك
*******************
ربنا يخليكي وشكرا على ذوقك
الصورة بس اللي كانت فعلا محتاجه توضيح :)
********************
تصدقي إن الصورة دي محدش خد باله منها أساسا إلا لما أنا جبت سيرتها .. وعلشان أكون صادق هما اتنين بس علقوا عليها في خلال السنة التدوينية اللي فاتت
بس على فكرة رغم المعاناه اللي الطفل فيها
إلا إنه طفل مش مصري ده تايواني تقليد يعني :))
********************
أعوذ بالله الغش دلوقتي بقى في كل حاجة حتى العيال المصرية بقوا يضربوها .. رحمتك بنا يا رب
المصري مهما أخد على دماغه وعاش في معاناه بيكون واقف ألف .. (ولا كلمه.. الله أكبر على رأي سمير غانم) ...
*******************
هخخخخخخخخخخ ربنا يخليلنا الفول والطعمية (الإشارة حمرا يا والدي .. حمنه حمنه مين)
ربنا يوفقك في عالم التدوين أخي
ودمت بكل خير
*******************
ربنا يكرمك واتمنى غن الزيارة متكونش الأخيرة
تحياتي
مرمر
انت لسه مصمم تحكلنا قصه حياتك
*******************
يعني المدونة اسمها يوميات ولد مصري وانا اسمي ولد مصري يبقى متوقعة هكتب عن إيه؟ قصة حياة أبو تريكة!!!!
ما تقلنا سموك احمد ولا محمد ولا ولا ولا ليه
********************
عين عب عال يبقى أكيد عحمد:)
غير معرف هيهيهيهيهيهيهيهيهي
*******************
على العموم الشتيمة بتلف تلف وبعدين ترجع لصاحبها
ربنا يهديك يابني
******************
آميين
خالص تحياتي
زهرة الجنة
ازيك يا غير معروف
هههه
******************
الحمد لله يا ست زهرة (وش متغاظ زي بتاع كل مرة اللي هوه العادي ده النورمال مش الإكس لارج)
حلو الأسم عليك يلا غيره بقي
********************
حاضر هسميه "ولد مصري غير معروف"
علي فكرة اكتشفت ان ضعف نظري مكنش مخليني اشوف الصورة كويس
********************
ربنا يشفي
(قصدي على النظر يعني مش حاجة تانية)
لكن المرة دي شوفتها كويس جدا
طلعت صورة وحشه ):
*********************
علشان تعرفي بس إن ضعف النظر نعمةتحمدي ربنا عليها
حسيت إنها ممكن تعبر عن شخصيتي اللذيذة (طول عمري متواضع من يومي)وبتقول اني انا بحرق دمك
ال متواضع ال
*******************
ماهو حرق الدم ده انواع وأشكال ودرجات مالهاش آخر لكن موضوع إن موقف العاشر من أجمل سبع أماكن في العالم أكيد هو البريمو في حرقة الدم
بمناسبة حرق الدم مش انا روحت موقف العاشر انهارده هههههه
******************
ويا ترى كان فيه سياح كتير زي حالاتك كده جايين من كل بقاع العالم علشان يزوروه؟
علي فكرة كلها أخر الأسبوع وهنزل بوست حارق دمي جداااااا
شوفت بقي عشان محرمش اصدقائي من فرستي
ههههه
*******************
اشجيني اشجيني هو انا هبطل تدوين من شوية
روحي يا شيخة..ولا بلاش لتكون ساعة إستجابة
تحياتي
فكرة من الزمن ده
ادينا سيبنا تعليق
*******************
وليه المصاريف دي:)
بس ربنا يكرمك شوف منديل للولة الغلبان بتاعك ده
********************
ولا أعرفه
احسن نفسنا غمت علينا
********************
ألف مبروك يا مدام
تسلم ايدك
********************
ربنا يكرمك وإن شاء الله الزيارة ماتكنش الأخيرة
تحياتي
عاشقة الرومانسية
صوره ظريفه؟
ياراجل ظلمت الظرف والظرفاءدى صوره مقرفه
صوره مقززه صوره مثيره للاشمئزاز
******************
يا نهار اثود .. يا نهار اثود .. كل ده .. تصدقي كرهتيني في أم الصورة وخلتيني أحس كل ما أبص فيها إني عاوز أرجع
بس معلش هعمل ايه الضنا غالي
حال الشعب المصرى مهما كان احسن من الصوره دى
********************
حضرتك أكيد بتتكلمي عن حال الشعب المصري إبان حكم رمسيس التاني لما كان هامان هو رئيس الوزراء
ثم ان اللى هيشوفها مش هيفكر بطريقتك دى ابدا
هيفكر فى الكلام اللى انا قلته فوق ده
********************
أشاسا أشاسا محدش خد باله من الصورة دي غير حضرتك والصديقة أكون أو لا أكون وأكون كان رأيها إن الولد صعبان عليها وقالت باللفظ حرام شكله كده
وكمان من قوتك وجبروتك منزلها مع البوست
******************
يا ستي هو الولد ده كان من بقية أهلك ولا اشتكالك :)))
صورتي يا عالم وانا حر فيها أنزلها في بوست أعمل بيها قراطيس ومراكب كل واحد حر في صورته
نصيحه لله وفى الله
شيلها
غيرها
ارميها
*******************
طيب ممكن حذف إجابتين
وابعتلك صور اطفال
انضف من كده بكتير
*******************
الفقر عمره ما كان عيب يا هانم :))
تحياتي
يخرب عقلك على ردودك
ده كل رد بوست لوحده
ههههههههههه
بجد انا ضحكت على الرد فى وقت انا فعلا محتاجه اضحك فيه
تحياتى يالمض
عاشقة الرومانسية
يخرب عقلك على ردودك
ده كل رد بوست لوحده
ههههههههههه
********************
مش للدرجة دي يعني وبعدين بلاش حكاية يخرب عقلك دي لحسن هو مش ناقص
بجد انا ضحكت على الرد فى وقت انا فعلا محتاجه اضحك فيه
******************
أي خدمة
تحياتى يالمض
*****************
وانتي من أهله
(من أهل اللماضه يعني)
تحياتي
بما انك عايز تعرف هقول بس افتكر انك انت اللى طلبت يعنى من غير زعل
اتفقنا؟؟
اوكى متفقين
اولا الصورة صغيرة فماكانش باين انه بيعيط ولا الحاجة التانية دى
المهم يعنى كنت مفكراها صورتك وانت صغير
ولما شوفتها مكبرة اتصدمت اكتر من الاول
ولما قلت السبب اتصدمت اكتر لان محدش هييجى فى باله ابدا السبب ده
بس
موناليزا
اولا الصورة صغيرة فماكانش باين انه بيعيط ولا الحاجة التانية دى
********************
طيب الحمد لله إن الصورة صغيرة
المهم يعنى كنت مفكراها صورتك وانت صغير
*********************
ومين قال إنها مش صورتي وأنا صغير؟؟؟
ولما شوفتها مكبرة اتصدمت اكتر من الاول
**********************
مادام اتصدمتي تبقى مش صورتي وانا صغير
ولما قلت السبب اتصدمت اكتر لان محدش هييجى فى باله ابدا السبب ده
*********************
ده انتي مصممة تتصدمي بقى :))
على العموم أنا بعتذر عن الصدمات دي كلها ومستعد لدفع أي تعويضات (أصلي عندي تأمين ضد الغير)
تحياتي
إرسال تعليق
<< Home