يَوْمِيَات وَلَد مَصْري
الأربعاء، يناير 21، 2009
مزيكاتي قديم – الجزء الخامس
في فيلم رصيف نمرة خمسة دخل فريد شوقي القهوة اللي بتقعد عليها العصابة وقعد على إحدى الطرابيزات وكان ساعتها الريس محمد طه بيغني ويقول "يا معلم الكل والكل يقولك يا معلم" وكانت كل حاجة ماشية تمام .. لكن بعد شوية بقى دخل محمود المليجي والشرار بيطق من عنيه وحاطط إيده داخل جيب الصديري المقلم اللي كان لابسه تحت الجلبية البلدي وراح لفريد شوقي وقاله:
"لا مؤاخذة الكرسي ديه بتاعي أني"
عنها وابتدت العركة اللي فيها محمود المليجي أكل علقة تمام ماكلهاش مواطن مصري في مظاهرة واتبهدل آخر بهدلة ووقع على الأرض وبدأت التعليقات تنهال عليه من الناس اللي كانوا قاعدين في القهوة وعمالين يضحكوا ويقولوا:
"حوش اللي وقع منك يا معلم"
"المعلم بيلحس البلاط يا رجاله"
وطبعا زي ما حضراتكم عارفين ان نهاية محمود المليجي كانت بخنجر في ظهره وانتهى الفيلم إن البطل رجع للبطلة واتجوزوا بعض وخلفوا فاروق الفيشاوي اللي عمل الجزء التاني من نفس الفيلم مع بوسي في فيلم خايب مش فاكر اسمه!!
المهم إن المقدمة دي واللي بتحكي جزء من أجمل الأفلام في تاريخ السينما المصرية ليها مغزى وهو إن الحرام عمره ما بيدوم ومن خرج من داره اتقل مقداره وكنتي فين يا "لأ" لما قلت "آه" (ايه نظام الولايا ده .. ما علينا) لأن تحديدا ده اللي حصل مع فرقتنا الموقرة في الفرح اللي هحكي لحضراتكم عليه النهارده بإذن الله.
اللي حصل يا سادة إن الفرقة تم استدعاءها لإحياء أحد أفراح دوري المظاليم (اللي غالبا الزمالك هيلعب فيه الموسم اللي جاي ويمكن المواسم اللي بعد كده كمان) واللي كان بيمثله نادي كهرباء شبرا والحقيقة إن الفرح ده كان بيعتبر نقله حضارية جبارة للفرقة حمدنا ربنا عليها، نظرا لأن الفرح كان أولا في مكان مغلق (محدش عارف يمكن الدنيا تمطر ولا حاجة) وثانيا كان في نادي – حتى وإن كان درجة تالتة (أهي اسمها برضه منطقة ليها سور يعني مش مشاع للي رايح واللي جاي) وده بيعني إن المفروض إننا مش هنتعرض للتحرش البيئي اللي تعرضنا له في الفرح اللي فات واللي كان بيتمثل في العروض الخاصة بشرب البلاء الأزرق اللي اسمه بيرة أو التعامل مع براميل الطرشي اللي بيطلقوا على أنفسهم راقصات.
بدأ الفرح ودخل العريس وفي إيده العروسة وقعدوا داخل الكوشة وتم توزيع الشربات وكل واحد من السادة المعازيم قعد على كرسيه وفرقتنا الموقرة واقفة على الاستيج اللي كان مسرح بجد مش زي الفرح اللي قبله وكل شئ كان على ما يرام.
ابتدينا نلعب الأغاني الشبابية ولأول مرة أشعر إننا بنلعب مزيكا بجد والمغني لعلع والناس بدأت تقوم وصديقات العروسة اجتمعوا حوليها وشدوها علشان تقوم تهز شوية هيه والزبون اللي كان قاعد متنشي جنبيها في الكوشة وكانت الحياة بمبي والدنيا ربيع والجو بديع وقفلي على كل المواضيع علشان نعرف نشتغل .
المهم بعد شوية ابتدينا نغني أغنية لمطرب إسمه إبراهيم عبد القادر كان موجود أيام زمان إسمها القمر قمرنا قمرنا والفرح في دارنا في دارنا والهوى جمعنا جمعنا.. والكل سعيد ومبسوط ولحد دلوقتي مافيش أي مشكلة.
بعد شوية لقينا واحد بيوشوش العريس في ودنه وبعدها طلع العريس يجري خارج القاعة
احنا ملناش دعوة وشغالين زي ما احنا: القمر قمرنا والفرح في دارنا والهوى جمعنا
شوية كمان لقينا العروسة طالعه تجري خارج القاعة
قلت يا واد طنث خالث وفضلنا نغني القمر قمرنا والفرح في دارنا والهوى جمعنا
أبو العريس كمان طلع يجري خارج القاعة
عنينا إبتدت تبص بره على اللي بيحصل خارج القاعة بس في نفس الوقت مازال القمر قمرنا والفرح في دارنا والهوى جمعنا
أخو العروسة هوه كمان طلع يجري خارج القاعة
بدأ الاستغراب ومعاه القلق لكن مازال القمر قمرنا والفرح في دارنا والهوى جمعنا
رجعت العروسة تجري وراحت توشوش مامتها
استر يا رب (ماهي البنت مابتوشوشي مامتها إلا في الكوارث) والقمر قمرنا والفرح في دارنا والهوى جمعنا
ابتدت المعازيم تتلم حوالين العروسة
وماله .. أهم حاجة إن القمر قمرنا والفرح في دارنا والهوى جمعنا
سمعنا صوت زعيق خارج القاعة
وهنا كان فيه سؤال لازم يطرح نفسه على الساحة هل مازال القمر قمرنا والفرح في دارنا والهوى جمعنا؟
خرجت العروسة ومامتها
وبعد شوية سمعنا صوت صويت جاي من خارج القاعة
لاااااا .. دي حاجة مايتسكتش عليها أبدا .. بس للأسف الشديد ماكنش ممكن نعمل أي حاجة غير إننا نغني القمر قمرنا والفرح في دارنا والهوى جمعنا يمكن الأحوال تتصلح
بعد كده لقينا كل اللي كانوا خارج القاعة داخلين القاعة وبيزعقوا بصوت عالي أعلي من صوت المطرب اللي اضطر إنه يعلي صوت الساوند سيستم وزعق بعلو حسه وقال:
القمر قمرنا والفرح في دارنا والهوى جمعنا
ابتدي أخو العروسة يزق العريس
واحنا برضه مصممين إن القمر قمرنا والفرح في دارنا والهوى جمعنا
العريس راح هابد أخو العروسة بالقلم على سحنته
طبعا إحنا بعد ما شفنا المنظر ده مقدرناش نسكت وقاعدنا نغني القمر قمرنا والفرح في دارنا والهوى جمعنا
أصحاب أخو العروسة لما شافوا صاحبهم اترقع بالقلم على قفاه اتلموا حولين العريس علشان يضربوه
يا جماعة استهدوا بالله مايصحش كده .. طب ده حتى القمر قمرنا والفرح في دارنا والهوى جمعنا
قوات الانتشار السريع التابعة للعريس واللي بتشمل أهله وأصدقاؤه تدخلت
و القوات الخاصة التابعة للعروسة ابتدت تشارك وتتعامل مع الموقف بكل حزم
وإحنا برضه شغالين زي ما احنا في القمر قمرنا والفرح في دارنا والهوى جمعنا (فرقة معندهاش دم صحيح)
بعد شوية لقينا كرسي طار ولبس في وش العريس والحمد لله إنه ماجاش في دماغ المغني وعلشان كده كمل كلامه .. القمر قمرنا والفرح في دارنا والهوى جمعنا
لكميات يمين وشمال في الوجه وفي فم المعده تتبادل ما بين أهل العريس وأهل العروسة
وكراسي تتطاير في اتجاه المغني والفرقة اللي برضه لسه مصممين على رأيهم إن القمر قمرنا والفرح في دارنا والهوى جمعنا
أخيرا .. تتدخل إدارة النادي بقطع الكهرباء (واخدين بالكم نادي الكهرباء بيقطع الكهرباء عن الفرح .. ما علينا) ويصبح الظلام الدامس هو سيد الموقف!!
الكوميديا في الموضوع إن أول ما النور اتقطع كان لسه صوت المغني وسط الضلمة بيقول القمر قمرنا والفرح في دارنا والهوى جمعنا وكان معاه صوت الدرامز لأن بقية الآلات بتشتغل بالكهرباء اللي كانت مقطوعة.
يأتي الأمن ويفض الاشتباك ونخرج من النادي بسلام تحت حراسة الأمن دون أي إصابات ونعود إلى قواعدنا سالمين وإحنا فطسانين على روحنا من الضحك وبنغني القمر قمرنا والفرح في دارنا والهوى جمعنا ..
على فكرة دي كانت آخر مرة نغني الأغنية الشؤم دي وبعدها كمان أفتكر إن المطرب إبراهيم عبد القادر قرر اعتزال الغناء!!
ونتقابل في ليلة أخرى وفرح آخر بإذن الله
التسميات: يوميات
22 Comments:
يا ابنى مش عارفة اقرا الكلام مش باين الشاشة اكلت نص البوست
اتصرف
القمر قمرنا
اموت و اعرف ايه اللي حصل
العريس خرج ليه؟ و بعدين العروسه و اخوها
يظهر يا قمر ان الجو القديم كان منور بره و علشان كده قامت الخناقه
و غالبا الفرقة كانت لسه مدروخه من الفرح اللي قبله و مغيبه عن الحدث
انت القمر قمرنا
تحياتي
في الاول كدا
الاستايل الاولاني احلي بكتير
نص الكلام رايح
هروح اقرا من الريدر وهرجع
(فرقة معندهاش دم صحيح)
***********
هههههههههههههههههههههههههههههههههه
هههههههههههههههههههههههههههههههه
انا مش قلت حاجه خالث
**************
هههههههههههههههههههه دا ايه الاغنيه الفل دي لالا موش ممكن ابداااااااا
قدرت تخرجني شويه من المود
اولا نص الكلام مش رايح ولا شيء
كل شيء عندي ظاهر
صحيح هو أصلا اتحنقوا ليه
شكلهم عملوها حجة عشان زهقوا من القمر قمرنا هههه
ال القمر قمرنا قال
العيب مش في الأغنية شكل المغني كده مكنش عارف يغني ههههه
(هو مين المغني ههههه)
قال بتقول القمر قمرنا مش عجبك موقف العاشر هههه
لو كنت معانا في الأسماعيلية كنت هتعرف
أوعي تتنرفز خالث (:
القمر قمرنا والفرح في دارناوالهوى جمعنا
الصورة اللي في الخلفية حلوة جداااااااااا
القمر قمرنا والفرح في دارناوالهوى جمعنا
عايزه اعرف ايه اللي حصل بره القاعة، مين السبب في الخناقة
وبعدين شايفين الناس بتتخانق قمر ايه اللي قمركم وفرح مين اللي في داركم هي عافية، لازم يعني الكراسي تيجي في المطرب عشان يفهم إن الفرح مبقاش فرح :))))))))
وبعدين أقل واجب إن نادي الكهربا يقطع الكهربا آمال هيعمل ايه غير كده :)))
بس أهم حاجة في الموضوع إن القمر قمرنا والفرح في دارنا والهوى جمعنا
ايوة كده هو ده الاستايل ايلى يليقك بفنان سابق هههههه
لا بجد كده حلو:)
انما ايه الاصرار على الغناء ده لحد اخر نفس ده انتوا فظاع بتفكرونى بالزمالك لسه مصمم يلعب برده فى الدورى هههههه
تحياتى
مصممين
بتعملوا بلقمتكم بجد
مستمرين فى الغناء مهما اختلفت الاجواء
مشاء الله
لغز الفرح القمرى
ههههههههههههههههههههههههههه
و دمتــــــــــــــــــــــــم
هههههههه
اول مره اسمع الاغنيه دى
وبرضه كنتم مصرين ان القمر قمركم قمر ايه بس ده!!
بس الحمد لله انكم خرجتم تضحكوا و بدون اصابات ..
تحياتى
برينسيس
أي خدمة
تحياتي
دكتور أحوال
الحقيقة الأسباب مجهولة عن الهجرة المفاجئة للعريس والعروسة وأهلهم لخارج القاعة
وبعدين إيه الأفكار الشريرة دي يا دوك بس تصدق ممكن برضه
الفرقة ماصدقت إنها اتلايمت على مكروفونات وهاتك يا غنا وماكنش فيه حاجة ممكن تمنعها أبدا
سعيد بكلامك اللي يفتح النفس يا جميل
تحياتي
كيارا
ان شاء الله يكون الموضوع وضح والماكنة طلعت قماش
تحياتي
كيارا تاني
وكمان بتشتميني في مدونتي
دي حاجة مايتسكتش عليها خالص
على العموم القمر قمرنا والفرح في دارنا
اهم حاجة اوعي تدخلي المود تاني :)
تحياتي
زهرة
واضح جدا إنك داخلة تهدي النفوس :)
بالنسبة للمغني إنتي عارفة لو كان العيب منه ماكنتش رحمته بس بصراحة الكدب خيبة ماكنش له اي دخل في اللي حصل
حكاية موقف العاشر مش هوه المشكلة في حد ذاته انا اللي حرق دمي إنك معتبراه من أجمل سبع أماكن في العالم بتحبي تزوريهم بالله عليكي مش حاجة تحرق الدم :)
بالنسبة للاسماعيلية هقول ايه - ياما انتو متهنين يا ولاد مصر (الجملة دي قالتها نجوى "براهيم" في فيلم الأرض)
تحياتي
بيربل ويفز
قبل اي تعليق او كلام ممكن اعرف سعادتك جبتي ضرف المدونة ليه؟
بقى انا اعمل بأصلي (مش دايما بعمل كده على فكرة) وأجي علشان أزورك وأسأل عليكي ألاقي رسالة سافلة طلعالي بتقولي ماكنش ينعز المدونة بقت للاعضاء فقط تقولش داخل نادي الصيد ياخي
محتاج توضيح فورا باللي بيحصل وإعتذار رسمي في جريدة حكومية على اللي حصل
أولا بالنسبة للصورة الحمد لله إنها عجبتك بس عندي احساس إني هدخل في يوم ألاقيها مقطوعة (ابقى قولي ما شاءالله)
********************
عايزه اعرف ايه اللي حصل بره القاعة، مين السبب في الخناقة
******************
والله ما انا أنا ماعملتش حاجة دول هما
تصدقي فاكرتيني بأمي الله يرحمها
أيون لازم الكرسي يتهبد في دماغ المغني علشان نفهم إن الفرح خلص ده سلو بلدنا كده :)
الحمد لله إن الفرح ماكنش في نادي المياة كانوا زمانهم بيرشوا المعازيم بالمية :)
تحياتي
برينسيس كمان مرة (ماهي التعليقات ببلاش أصلها)
طبعا انتي بتقولي الكلام ده علشان تحرجيني بعد تعليقي عليكي في البوست اللي فات بخصوص الترابزين والكوشة
على العموم رسالتك وصلت يا هانم
تشبيهك للعلاقة بين إصرار الفرقة على الغنا ولعب الزمالك في الدوري تشبيه ملعوب أحيكي عليه ماهو برضه الواحد لازم يشجع اللعبة الحلوة
أخ يا ناري
تحياتي
ساموراي
أولا حمدا لله على السلامة مرة تانية
كويس انك بتيجي تطمنينا عليكي
حلوة حكاية بنعمل بلقمتنا دي بس بصراحة عندك حق
فرقة وماصدقت
تحياتي
روفي
دي اول وآخر مرة هتسمعي الأغنية دي
غالبا ده اللي بيسموه قمر بالستر :)
الحمد لله فعلا إن الموضوع عدى على خير
تحياتي
السلام عليكم..
أهم شيئ إن القمر قمرنا لازالت مستمره..
يابني مش خايف إن الأغنيه دي تنحسلك المدونه....
.....
جميل إصراركم على الأغنيه..
وعدم فلسعتكم ههههههه
..
في إنتظار أفراح جديده...
من غير قمر..
.......
دمت بخير
كل ده عشان رحت المدونة لقيتها مقفولة، ده على أساس ان المشوار كلفك مواصلات وكده، وبعدين اعتذار رسمي في جريدة حكومية، هو لسه في حد بيقرا الجرايد الحكومية :)))))
بالنسبة لباب المدونة والله هنحاول نفتحه تاني ونشيل الشمع الأحمر :)
أما بقى بالنسبة للصورة اللي انت خايف عليها ممكن تعلق خرزة زرقا أو خمسة وخميسة ، محدش ضامن ايه ممكن يحصل
تحياتي
نهار
وعليكم السلام ورحمة الله وبركاته
تصدقي ما فكرتش في موضوع النحس ده
وبعدين نفلسع ونروح فين دا احنا ماصدقنا ان جالنا شغل انتي بتهزري :)
تحياتي
بيربل ويفز
ايوة بقى كل ده علشان رحت المدونة ولقيتها مقفولة ايه رأيك بقى؟
تبقى غلطانة والغلط راكبك من ساسك لراسك (متسألنيش يعني ايه ساسك) وكمان جاية تتخنقي
حضرتك بقالك قد ايه مازورتينيش هه؟ سكتي ليه؟
طبعا مش عارفة تردي
وبعدين مالها الجرايد الحكومية؟ قولي بقى انها مش عجباكي يا بتاعة جرايد المعارضة
ايه موضوع هتحاولي تفتحي المدونة وتشيلي الشمع الأحمر ده هيه المدونة عليها قواضي ماتحكمش فيها ولا ايه؟ ولا يمكن مادفعتيش الضرايب اللي على التعليقات اللي عندك.على العموم انا اعرف محامي تعويضات شاطر ممكن يخدمك في الموضوع ده ولا اقولك خلي عوضك على الله بلا وجع قلب
خرزة زرقا وخمسة وخميسة!! ايه الطرق البلدي دي .. وبعدين الكلام ده حرام .. استغفر الله العظيم.. سامحها يا رب
اوعي تكوني من اياهم وبتزعلي انا طبعا بهزر
تحياتي
إرسال تعليق
<< Home