يَوْمِيَات وَلَد مَصْري
الاثنين، يناير 26، 2009
جعلوني مدونا - تحديث
التدوين عالم بحاله
سمعت عنه وعن جماله
قلت أشوف واخش اجرب
وأنا بس كان مالي وماله
دنيا كبيرة وعالم مابينتهيش
مولد مالهش آخر وبشر عايزة تعيش
تلاقي فيهم سي السيد
وتلاقي بينهم الحرافيش
تلاقي المؤمن وتلاقي الشاذ
تلاقي الطالب والأستاذ
تلاقي الضايع واللي صايع
واللي بيقول اين الملاذ
فيه اللي نايم وفيه اللي قايم
وفيه اللي قاعد سرحان وهايم
فيه المفتح وفيه المتنح
وفيه المسنتح بشنبات قوايم
اللي أصله كحيان ودقة
وعامل فيها ابن الوزير
سمى نفسه البرنس الطاير
وساعات ملك وساعات أمير
الواد الجن والمجنون
والعاقل في زمن الجنون
والسكران والحرامي
والسابح في الظنون
أحوال الهوى والرومنسي
ومحمد غاليه ومدحت ومرسي
أحمد الشاعر وفشكول
واللي مسمي نفسه منسي
الجميلة والأميرة
واللي بتقول شمس الشموس
وهمس الليل وهمس الصبح
وشروق ونهار وشمعة فانوس
اللي بتدور على الخطوبة
واللي عايزة ابن الحلال
واللي شايفة ان الخطوبة
دلوقتي بقت شئ محال
اللي عايزة تطلق واللي عايزة تتجوز
واللي مش عارفة هي عايزة ايه
المفروسة من حماتها
والمتغاظة من جوزها البيه
اللي بتطالب بالحرية
واللي عاملة مواجهات
واللي رافعة مليون قضية
ونازلة شتيمة في الحكومات
المبسوطة فيه تقول هه هه
واللي بتعيط بتقول عاااا
والمكسوفة قال بتكتب
وش مكسوف يا ولداه
واللي داخله بتقول يا لهوي
واللي داخلة بتقول عوووو
دا انا عقلي هيشت مني
ابقوا يا ناس الحقووووا
وشوش غريبة وناس عجيبة
وكل يوم بيكونوا في حال
يا عالم أنا طهقت
من اللي قالوا ومن اللي قال
سمعت عنه وعن جماله
قلت أشوف واخش اجرب
وأنا بس كان مالي وماله
دنيا كبيرة وعالم مابينتهيش
مولد مالهش آخر وبشر عايزة تعيش
تلاقي فيهم سي السيد
وتلاقي بينهم الحرافيش
تلاقي المؤمن وتلاقي الشاذ
تلاقي الطالب والأستاذ
تلاقي الضايع واللي صايع
واللي بيقول اين الملاذ
فيه اللي نايم وفيه اللي قايم
وفيه اللي قاعد سرحان وهايم
فيه المفتح وفيه المتنح
وفيه المسنتح بشنبات قوايم
اللي أصله كحيان ودقة
وعامل فيها ابن الوزير
سمى نفسه البرنس الطاير
وساعات ملك وساعات أمير
الواد الجن والمجنون
والعاقل في زمن الجنون
والسكران والحرامي
والسابح في الظنون
أحوال الهوى والرومنسي
ومحمد غاليه ومدحت ومرسي
أحمد الشاعر وفشكول
واللي مسمي نفسه منسي
الجميلة والأميرة
واللي بتقول شمس الشموس
وهمس الليل وهمس الصبح
وشروق ونهار وشمعة فانوس
اللي بتدور على الخطوبة
واللي عايزة ابن الحلال
واللي شايفة ان الخطوبة
دلوقتي بقت شئ محال
اللي عايزة تطلق واللي عايزة تتجوز
واللي مش عارفة هي عايزة ايه
المفروسة من حماتها
والمتغاظة من جوزها البيه
اللي بتطالب بالحرية
واللي عاملة مواجهات
واللي رافعة مليون قضية
ونازلة شتيمة في الحكومات
المبسوطة فيه تقول هه هه
واللي بتعيط بتقول عاااا
والمكسوفة قال بتكتب
وش مكسوف يا ولداه
واللي داخله بتقول يا لهوي
واللي داخلة بتقول عوووو
دا انا عقلي هيشت مني
ابقوا يا ناس الحقووووا
وشوش غريبة وناس عجيبة
وكل يوم بيكونوا في حال
يا عالم أنا طهقت
من اللي قالوا ومن اللي قال
التسميات: وجهة نظر
38 Comments:
انا اول تعليق بجد ضحكتني موت ههههههههههه مين قالليك جرب هههههههههه
اهو استحمال ههههههههههههه فعلا هي دنيا كبير تلقي في اشياء عجيب
بس يلا ربنا يقدرك تصبور هههههه
ايه ده (وش مندهش جداااا )
هى المدونة قلبت سووووواد ليه كده
عاااااااااااااااااااااااااااااااااااااااااااااااااااا
يعنى انا اغيب عن المدونة تروح تعمل فيها كده ؟؟؟؟
لالالالا ماينفعش كده على فكرة
هقرا و ارجع تانى لانى لسه ماقرتش لانى اتخضيض من المدونة
عاااااااااااااااااااااااااااااااااااااااا
لالالالالالالالالالالالالالالالالالالالا
اعتراااااااااااااااااااض
ده انت شقلبت العالم كله على بعضه على فكرة
انى اعترض اعترض اعترض
و كمان مالها اللى بتقول عاااا ؟؟؟
عالم التدوين هو هو العالم الواقعى بناسه
يعنى واااااااااارد جدااا انك تلاقى كوووووووول دول
و انك تلاقى كل شوية الواحد بحال
و مثلا مثلا تلاقى واحد بعد ماكانت المدونة مفتحة يروح مغمقها
رغم ان هو اللى كان بيطلب تفتيح لون المدونات
تعرفه ؟؟؟
****
لا بجد عجبنى الكلام بس سؤال لولبى
يعنى ايه (المسنتح بشنبات قوايم) ؟
معلش بتعبك معايا
بس براحتى بقى انا واخدة من المدونة تصريح ان اتعب صاحبها D:
وش مذبهل**
وبيقول ههههههههههههوعااااااااااااا
والجديدة بقى كع كع كع كع
**ضحكات متقطعة شريرة**
***********************
رؤية ليك عن التدوين بتنم عن حاجات كتير اوى!!!
واوعى تنسى كمان تقول والى بتقول
عوووووو عشان فرستك تكمل بس**
سلااااااااام
عوووووووووووووو
عاشقة القمر
مبروك اول تعليق
التدوين ده عامل زي فنجان القهوة بتاع الصبح مرة وطعمها وحش بس لازم تتشرب :)
أديني صابر اهه
تحياتي
ضد التيار
معلش أصلي بوفر في الكهربا
وبعدين ازاي يعني ما ينفعش؟ ماهي نفعت اهه وبقى لونها اسود
انزل بقى ارد على تعليقك التاني
تحياتي
كل دة
دة انت دوختنى يا بنى
يعنى ايه
مسنتح
عايزة اعرف و ضرورى و بشده
أعرف يعنى ايه مسنتح
و دمتـــــــــــــــــــــــــم
ضد التيار تاني
حضرتك بتعترضي على ايه بالضبط
فيه كلمة قلتها مش مظبوطة
ولا هو اعتراض والسلام
اللي بتقول "عاااااا" دي زي الفل انا قلت حاجة ياكش بس الموضوع ان انا كنت بقول يعني إن اللي عايز يأوء يبقى يأوء في بيتهم أصلها مش طالبة صداع ودوشة
وبعدين حكاية التفتيح والتغميق دي احسن ما كل شوية أهد مدونة وأبني واحدة تانية وأرجع أهد اللي لسه بانيها وأفتح واحدة تالته ولا إيه يا ست أم حنين :)))
بالنسبة بقى لموضوع المسنتح فده أشاسا أشاسا جاي من السنتحة وده إسم مصدر بيعني الولد اللي بيلزق شعره وتلقيه عادة فاشخ ضبه بابتسامة بلهاء بدون عنوان وهذه السنتحة إكتشف علماء الطبيعة أنها بتتواجد بكثرة في مجتمعات الذكور عند بدء ظهور لأي جنس ناعم وينتج عن هذه السنتحة إفرازات في الغدد تؤدي إلى نتح العرق ومن هنا جاءت كلمة سنتحة
يلي انحرمتم من التعليم الفرصة لسه قدامكم
تؤمري
تحياتي
كيكي
طيب الناس لما تدخل عند حد تقول السلام عليكم - بنسوار يا نينة - العواف يا أبلتي أي حاجة من هذا القبيل
مش تدخل تزق وتدي باب المدونة كتف وإشي ضحكات متأطعة وشريرة
على أي حال أنا سعيد جدا بزيارتك ولو اني متابع تعليقاتك من زمان وكنت عاوز أبدء أنا الطلعة الجوية دي بس سبحان الله محصلش نصيب
وطبعا تم إضافة كبليه بمناسبة اللهم احفظنا العوووووو
شكرا على زيارتك واتمنى دوام التواصل
تحياتي
ساموراي
دوختك ليه بس
الشرح التفصيلي لكلمة مسنتح تم كتابته بالتفصيل الممل في الرد على ضد التيار
أرجو الرجوع للرد
ولو فيه أي حاجة مش مفهومة عندي ورق درس هايل في الموضوع ده ولا ناوية تغشي برضه :)
تحياتي
يا اخي خليك في المزيكا
مالك قلبت و صنفت المدونين يعني يشركوا همومهم مع مين
تخيل انا اتواصل مع معظم الرموز اللي انت ذكرتها ولا اعرف منهم احد و لا اظن اني سوف اسعد بمقابلة اي منهم
و لكني وجدت ملاذ غريب افضفض به و القي به حمل السنين و اسمع كلام اللي بمدح و اللي بيحبط و اللي بيقول امين
و سعيد بالجميع
و زي مانت قلت اشكال و رغبات مختلفه من البشر و كل واحد بيدور علي اللي ينقصه
فكرت كتير اقفل المدونه و ارجع للقوقعه مرة اخري و لكني اشتاق لحواديتك الجميله و اشعار عم بيرم المصري و فشكلة عم فشكول و طيبة شمس النهار و صبر واصرار محاسن و براءة نورهاتي و شقاوة كيارا ووووو اسماء و رموز اصبحوا في خاطري
و اسماء كثيره امتلئ بها قائمة الترقب و التتبع اصبحوا من اهلي
خليك مدون بشخصيتك الجميله بها الحكمه و الرجوله و شطحات الشباب
و لا يغلبك الفضول للبحث عن اسباب و غايات التدوين
لك حبي و احترامي
تحياتي
على فكرة بقى انا مش هلحق عقلك و خليه كده بقى هه بس
و كمان ماله اللى بيهد و بيبنى . اهو تغيييييييييييييييييييير
امال افضل فى مكان واحد و يبقى روتين بقى و كده
نووووووو انا مش بحب الروتين
بس اسكت بقى فكرتنى باللى فات و دموعى نزلت
عجبك كده يعنى اهو مش معايا منديل
اعمل ايه دلوقتى انا بقى ؟؟
ليا عودة للرد على تعليقك عليا
بس افوووق من المود اللى انت دخلتنى فيه
دكتور أحوال الهوى
تصحيح بسيط إنت تعرف اتنين من المدونين وقابلتهم العبد لله وأخوه
وبعدين ما البوست ده برضه نوع من انواع الفضفضة وكمان حطه تحت تصنيف وجهة نظر يعني ممكن تبقى صح وممكن تبقى غلط
وبعدين أنا مش متضايق من التدوين بالعكس تماما وزي ما قلت في ردي على عاشقة القمر إنه عامل زي قهوة الصبح بتبقى مرة بس لازم تتشرب
وطبعا انا متفق معاك تماما إن الواحد لازم يكون بشخصيته بس موضوع الفضول ده مش بإيدي وأنا متأكد إن إحساس إني عاوز أعرف الناس اللي بتواصل معاهم وأشوفهم ده مش إحساسي لوحدي وأكيد فيه ناس تانية كتير نفسها في كده برضه
على العموم شكرا للنصيحة وإن شاء الله هعمل بيها
تحياتي
ضدالتيار
موضوع الهد والبناء ده ردي على كلامك الخاص بتفتيح وتغميق المدونات ماهو كمان اللي مدونته من إزاز مايرميش المدونات التانية بالطوب :)
بالنسبة للدموع وتوابعها اللي بتنزل من الأنف (يع) ممكن تستخدمي كم "الزكته" ومحدش شايف :))))
في انتظار تعليقك
تحياتي
ايه ده؟؟
استنى
ايه ده بجد؟؟ههههههه
مش عارفة اقول ايه
ايه ده؟؟؟؟
مين بيحرق دم مين دلوقتي
يعني ايه مسنتح بشنبات قوايم؟؟
الغاز دي يابني
كل ده علي المدونين ..هيعلنوا الحرب عليك ههههه
بس انت نسيت تكتب عن واحد بيدخل مدونتي بيتحرق دمه علي طول وعلي فكره مين غير اسباب
بس بجد وبدون مجاملات ضحكتني لا جميلة بجد
******
قولي بجد ليه بقي دمك بتحرق دايما (:
ههههههههههههههه
ايه يا عم الفضايح دى
دى كانت أول مادة اومال لما احكى على الباقى حتعمل ايه
حتنزلها فى الجرايد
اعتقد كلمه مسنتح دى وجدت فى مصطلح ولد مصرى فقط
و دمتــــــــــــــــــــــــــم
انا جييييييييييييييييت
نورت نورت عارفة D:
بلاش تكسفنى بقى (وش بيغيظ)
انا بقول ماينفعش كده ان انت صاحب فكرة تفتيح المدونات و انت اللى غمقت المدونة بتاعتك
نيجى بقى فى التعليق تانى
ايوة بقى هو اعتراض و السلام مش انا ضد التيار و لا ايه
يعنى اساسى عندى الاعتراض و بس
ماينفعش ادخل فى مكان الا لما اعترض
لازم كده اعمل دوشه فى التعليقات امال يبقى الدنيا هدوووء كده
لالالا ماينفعش ابدا خالص
اوباااااااااااااااا
و كمان
اوبااااااااااااااااااااا
قصدك ايه بقى مش ناقصه صداع هه ؟؟؟
طيب
عااااااااااااااااااااااااااااااااااااااااااا
عاااااااااااااااااااااااااااااااااااااااااااااا
عاااااااااااااااااااااااااااااااااااااااااااااااا
انا بقى هصدعك و هغرق المدونة كمان بس هه
ماشى انت قولت معنى مستنح
لكن ماقولتش معنى (بشنبات قوايم)
يعنى ايه دى ماهى دى اساسا اللى انا مافهمتهاش
نيجى بقى للتعليق التالت
لالالالالا معلش فى فرق بين الهد و بين التغميق
و خصوصا انك كنت بتنادى بالتفتيح هه
واخد بالك انت .. بلاش تاخده على فكرة علشان غلط على الصحة نياهاهاهاهاها
ايييييييييييييييييييييييه اللى انت بتقوله ده انا بقول دموعى نزلت دموووووووعى فقط (ايع)
طيب و اللى مش عنده زكته يعمل ايه بقى ؟ هه؟
يلا بقى عرف الكلمة اللى قولت عليها بسرعه
ماشى بسرعه
و ادى قاعدة فى المدونة الغامقة دى لحد ماتعرفه
بما إني عندي قضايا وضرايب فألحق اعلق بقى قبل ما يحكموا عليا ويحبسوني في المدونة المقفولة :))))))))))
بالنسبة للتأخير في التعليقات معاك حق، مش هعرف أرد (وش محرج)
مش عارفه ليه متفقة معاك في كل الكلام اللي قلته، بس يعني هي جت على التدوين، وبعدين التدوين صورة مصغرة للعالم الحقيقي، يعني من كلامك يتضح لينا (حلوة يتضح دي) إن التدوين يساوي الدنيا اللي احنا عايشين فيها لكن هي دنيا بمصطلحات مختلفة خاصة بيه
صحيح عايزه عنوان المحامي :))
تحياتي
برينسيس
"ولما انت مش عارف تقول ايه امال جاي ليه" دي برضه كلمة تقوليهالي وبعدين سبحان الله ربنا سبحانه وتعالى يخليكي تقولي نفس الكلام اللي انا قلته ورديتي عليا الرد الجامد ده "أنا مش عارفة أقول ايه"
أنا عايزك تبقى فاهمة حاجة مهمة يا برينسيس إني كان ممكن أرد عليكي نفس الرد القاسي ده لكن يا هانم مش أنا اللي أعمل حاجة زي دي .. أيوة مش أنا .. لكن أنا هدوس على كرامتي وكبريائي ومش هقولك غير كلمة واحدة بس أرد بيها على كل اللي عملتيه فيا:
روحي يا برينسيس
الله يسامحك
ايه رأيك في الفيلم العربي :))))
طبعا ضميرك نأح عليكي في الأول وافتكرتي إني إتأمصت
لكن مين ده انا قلت لك قبل كده صعب اني اقدر ازعل من اختي الصغيرة
خالص تحياتي
زهرة الجنة
صحيح والله اتحرق دمك
يلا اهي حاجة بسيطة نرد بيها على جمايلك :)
بالنسبة لموضوع مستنتح بشنبات قوايم فقد تم وضع تعريف مفصل عن كلمة المسنتح في ردي على التعليق التاني لضد التيار أما عن الشنبات القوايم فحضرتك طبعا لا يخفى عليكي أيام زمان كان فيه السراير بتاعة دوار العمدة اللي بتكون نحاس وليها أربع عواميد واحد في كل زاوية من زوايا السرير علشان يعلقوا عليها النموسية دي بقى كانوا بيسموها القوايم بتاعة السرير أعتقد كده وضحت يعني ايه شنبات قوايم
أي خدمة
يعني انتي شايفة ان مافيش سبب لحرقة الدم يعني بالله عليكي اسم مدونتك أساسا واحدة متغاظة طيب عايزاني ازاي ابقى كوووول وانا داخل عندك وبعدين فيه احتمال تاني ان يكون الموديل بتاعي أصلا كده حرقة الدم دي استاندرد فيه :)) بمناسبة يعني انك عاوزة تشتري عربية
تحياتي
ساموراي
فضايح ليه بس ربنا ما يجيب فضايح
وبعدين مش انتي اساسا اللي بتحكي يعني انتي مصدر المعلومة أما البلاغ فده بقى سيبيه عليا
ربنا يخليلنا الانترنت
تحياتي
ضد التيار
يا نهار ازرق كل ده تعليق
تصدقي اني ندمت إني قلتلك بقالك فترة مازورتينيش (اوعلى تزعلي أنا بهزر)
أكيد طبعا نورتي يا فندم انتي ملاحظتيش إن المدونة كانت مضلمة ولا ايه
التغميق ده لزوم الشياكة وبعدين ده بعض ما عندكم ما انتي كمان المدونة عندك كحل والحمد لله
اعترضي براحتك ما هو لسه الاعتراض ببلاش ومحطوش عليه ضرايب بكره مش هيعتقوه
بالنسبة للصداع ماقصديش ولا حاجة بس أصلي مابحبش الزززززززززززززززززن
شنبات قوايم تم شرحها باستفاضه في ردي على تعليق زهرة الجنة
حلوة حكاية بنادي بالتفتيح دي وانا من منبري هذا بأنادي كمان ليس فقط بتفتيح المدونات ولكن أيضا بتحريرها من براثن الظلام لأني من أنصار التنوير والحداثة في ظل العولمة الجديدة بدون المضمون الانبهاري الرامي إلى العودة للوراء
اللي مش عنده "زكته" اكيد عنده "بروفل" ممكن يستخدمة برضه
طيب وهتفضلوا قاعدين على الباب ماتتفضلوا في الصالون
تحياتي
طب تصدق باايه ؟؟
قول لا اله الا الله
انى ماخدتش بالى ان التعليق طويل الا لما قولت يانهار ازرق
عارف انك لو كنت قولت يانهار ابيض كنت هاخد بالى بردو
لالالا انت مش بتهزر و اقر و اعترف بذلك
عااااااااااااااااااااااااااااااااااااااااااااااااااااااااااااا
يعنى انت مش عايزنى هنا تانى
عااااااااااااااااااااااااااااااااااااااااااااااااا
بس على فكرة هو الموضوع اصلا مش فى ايديك
علشان انا صديقة المدونة و هى اللى قالت اعمل اللى انا عايزاه
و اجى براحتى و اعلق براحتى و اخلص كمان حبر الكيبورد بتاعى عاااااادى جدا
ايوة طبعا كانت مضلمة و الدليل السووووووواد اللى حل عليها ده
على فكرة المدونة عندى اسود مش كحل .. نيهاهاهاهاهاهاهاها
يادى الضرايب اللى انت هتفرضها على كل حاجة دى
شويه شويه هتقول على الهوا كمان .. مش معاملة دى على فكرة
الزن شئ و العياط شئ تانى خاااااااااااااااااالص على فكرة
بلاش تدخل الامور فى بعضها .. ماشى ؟؟؟
اشكرك على التعريف
تنوير و حداثة و عولمة جديدة و مضمون الانبهارى !!!!! ايه الكلام الكبير ده
لالالالالا هو انا اغيب شويه يحصل كل ده
لالالالا ارجع تانى ياعواد و سيبك من محو الامية دى
غلط على الصحة صدقنى
طيب و اللى مش عنده بروفل يعمل اييييييييييييييييييييييييييه
على فكرة انت مصمم تتعب نفساويتى بالحاجات الغريبه اللى انت بتقولها
زكتة و بروفل ... الحاجات دى لسه ماوصلتش عندنا
لالالا الباب طراوة و فيه هوا مابحبش انا الاماكن المغلقة بتجبلى ضيق تنفس
طبعا التعليق ده اكيد هيكون اطول من التانى
علشان تبقى تقول تانى يانهار ازرق
بس
هه
.
بيربل ويفز
بخصوص القواضي انا من ناحيتي جبت كراتين الحلاوة بس للأسف معرفتش اجيب عيش
ايه غريبة انك متفقة معايا في الكلام اللي قلته قال مش عارفة ليه متفقة معاك .. صعبان عليكي قوي انك اتفقتي معايا على حاجة يا ساتر ليه بس يا بنتي كده بتحسسيني زي ما اكون جوز مامتك يعني :))
على العموم كلامك صح عن التدوين وده احساسي انا كمان
بخصوص المحامي اتقبض عليه في قضية رشوة :)))
تحياتي
يعني مش كفاية جبت حلاوة ومجبتش عيش، كمان كنت عايز تجيبلي محامي مرتشي لااااااااااا وانا كنت هخليه يخرجني من القضايا وافتح المدونة شكلها كده هتفضل مقفولة وهنحط عليها شمع ابيض مش أحمر :))))
تحياتي
هههههههههههههههه حلوة على فكره بس ماله بقى التدوين اهو عل اقل بتفضفض في الي جواك وبتلاقي اراء ومقترحات ونصايح وصحاب واخوات وناس بتحبك وتتحب تكره وتتكره يعني هو عالم واسع اوي وكبير زي عالم الانترنت كده لو استخدمناه صح هتبقى حياتنا صح
ولو استخدمنا التدوين صح هنعرف معنى جديد للحياه عن طريقه
تحياتي
ايه دا
دى لفه جامده اوى
دا كلو شوفتو
دا انت نفسك طويل اوى
يلا تعيش وتشوف
طبعا الخير ديما
تقدر تقول انه يجمع فئات المجتمع بس على صغير
السلام عليكم
أنا اتلخبطت اول لما دخلت
لقيت شكل جديد
مبروووووك
اهم حاجة متكنش بتدعى على اللى كان السبب انك تدخل عالم التدوين..كانت نيته كويسة
كل الناس الحلوين لسه هنا
سامو
وبرنسيس
وهمس
اول اصحابى فى التدوين
لعلك والأسرة بخير
تحياتى
ههههههههههه
تصور قريت البوست وماخدتش بالى من العنوان
لا هما معملوش حاجة
انت عندك قابلية للمرض..سورى للتدوين
ربنا يشفينا جميعا
الخوف انه يبقى وراثة
تحياتى
بيربل ويفز
ماهو انا لو اعرف بس تهمتك ايه اللي بسببها اتقفلت المدونة كنت اعرف اساعدك يعني مثلا لو كنتي مخبية فيها مخدرات هتختلف عن التهرب من الضرايب اعترفي انتي بس علشان اقدر اساعدك
وبالنسبة للشمع انا رأيي نحط عليها شمع أبيض بخطين حمر في النص (علشان نكيد الأعادي - طبعا مفهوم هما مين:))))
تحياتي
ضد التيار (مش فاكر المرة الكام)
بالنسبة للتعليق هو اللون بيفرق مع الطول ولا ايه؟
وبعدين حضرتك تنوري في اي وقت واعملي اللي انتي عاوزاه مافيش مشكلة
معلومة ان الزن شئ والعياط شئ تاني خالص دي معلومة جديدة ولو انا شايف انهم وجهين لعملة واحدة
وبعدين لا زكته ولا بروفل ولا كرينك كده يبقى الموضوع صعب خالص
وبعدين يمين على يمينك لتتفضلوا في الصالون ماهو كمان مش "مونكن" تفضلوا كده على الباب "لا يونكن" ابدا لازم تتفضلوا جوه تشربوا حاجة
تحياتي
مارمر
هو حد جاب سيرة التدوين ولا قال عليه حاجة
"اراء ومقترحات ونصايح وصحاب واخوات" أحمدك يا رب
ايه كل ده طب ده معنى كلامك كده إن الواحد يفضل ملجأن في المدونات ما يخرجش منها الا وهما شايلينه علشان يصلوا عليه صلاة الجنازة :)))
واضح جدا إنك مغرمة بموضوع التدوين على العموم هو كمان بيعزك قوي ربنا يوفقكم :))
على اي حال انا سعيد بزيارتك الأولى واتمنى ماتكنش الأخيرة وان شاء الله أرد الزيارة حالا
تحياتي
همس
دي البداية بس
لسه البقية تأتي بإذن الله
على رأي المثل اللي يعيش ياما يشوف واللي يدون يشوف أكتر :)
تحياتي
موناليزا
فعلا هو بيجمع كل فئات المجتمع عمال وفلاحين :)))
تحياتي
دكتورة جنة
وعليكم السلام ورحمة الله وبركاته
انتي بس نسيتي العنوان علشان بقالك كتير ماجتيش تزوريني :)
مع ان العنوان مايتوهش
بالنسبة للشكل الجديد الله يبارك فيكي
اكيد مش هدعي على اللي كان السبب بالعكس لانه عرفني على ناس محترمة فعلا انا سعيد اني بتعامل معاها
فعلا الناس الحلوين اللي ذكرتيهم دول كانوا البداية بس الغريبة انهم محرموش ولسه بيدخلوا عندي تصدقي؟ حاجة غريبة فعلا تفتكري بيعملوا كده علشان ياخدوا ثواب زي عيادة المريض كده :)
شكرا على زيارتك وعلى السؤال
تحياتي
دكتورة جنة تاني مرة
طيب الحمد لله انك قريتي البوست انا كنت فاكر انك داخلة تتفرجي على الصور بس :))))
اكيد مرض التدوين ده مش وراثة يا دكتورة لان تاريخ العيلة بيقول إن مافيش فيها حد بيدون تاني
تفتكري نوعية الأكل ليها دور :)
تحياتي
إرسال تعليق
<< Home