يَوْمِيَات وَلَد مَصْري
الأحد، أغسطس 31، 2008
وحوي يا وحوي
كل عام وأنتم بخير
يا سلام أخيرا الواحد جاتله الفرصه إنه ياخد أجازة في شهر رمضان
لأ مش من الشغل
ولا من التدوين
لكن أجازة من الذنوب والمعاصي والأخلاق اللي ما يعلم بيها إلا ربنا ، وطبعا من اللسان الزفر واللجافة (محدش يسأل يعني إيه لجافة أنا بسمعهم بيقولوها كده)
مش قادر أصدق نفسي
معقولة 30 يوم مش هعمل فيها ذنوب أو على الأقل هحاول إني معملش ولو عملت هلحق نفسي واستغفر وأتوب!!
ساعات بقعد أفكركده إنه كان ممكن ربنا سبحانه وتعالى يخلقنا زي الملايكة (لأ طبعا مش قصدي بجناحات) قصدي يعني إننا زي الملايكة في طاعة ربنا سبحانه وتعالى وإننا منعملش ذنوب ومانكرهش بعض ويكون مافيش ما بينا غير كل حب وخير مش كانت تبقى الدنيا جميلة خالص ويا سلام بقى لو الناس كمان لبسوا أبيض في أبيض تبقى كملت!
بعدين أرجع أفكر طيب لو إحنا كنا كده ، أسماء ربنا وصفاته والمتعلقة بالمغفرة والرحمة والتوبة كانت هتتحقق إزاي؟
طبعا ربنا قادر إنها يحققها بينا أو من غيرنا بس كنت بقول إن ربنا خلقنا على السحنة اللي إحنا موجودين عليها دلوقتي علشان نعمل ذنوب ونستغفر منها وندعيه إنه يتوب علينا ويرحمنا وكمان لما يعدي علينا شهر زي رمضان نجتهد فيه في العبادة وندعي ربنا بإخلاص إنه يغفر لينا ويرحمنا ويعتقنا من النار.
الخلاصة كل واحد فينا يشمر درعاته (لأ مش علشان هياخد حقنه) يشمر علشان يجتهد في الشهر المبارك ده ويبذل أقصى ما في وسعه للوصول لرضا ربنا سبحانه وتعالى ويكون شعارنا "وَعَجِلْتُ إلَيْكَ رَبِي لِتَرْضَى"
وأخيرا يا ريت نقلل شوية من الكنافة والقطايف والمحاشي اللي جايبانا ورا وأهم حاجة نسيبنا من الفوازير والمسلسلات ووحوي يا وحوي إيوحا اللي طبعا محدش عارف معناها ايه!!
كل سنه وحضراتكم بخير وبصحة وسلامة
التسميات: وجهة نظر
20 Comments:
السلام عليكم
كل سنة وحضرتك طيب ربنا يتقبل منا جميعا ويغفر لنا وييسر لنا الطاعة
وجزاك الله خيرا على النصائح الجميلة
أمل عليكم السلام ورحمة الله وبركاته
جزانا وإياكي وربنا يتقبل منا جميعا
كل سنة وإنتي طيبة ورمضان مبارك
تحياتي
السلام عليكم
كل عام وانت بخير وسعادة وبجد نصائحك رائعة وياريت كلنا نحاول على قدر استطاعتنا نصوم عن المعاصي والذنوب....رمضان كريم
وحوي يا وحوي ؛)
تحياتي
كل عام وانت بالف خير و صحة وسلام
رمضان كريم عليك و علينا
خالص تحياتى
روفي
حمدا لله على السلامة
ربنا يتقبل منا الصيام والقيام وصالح الأعمال
تحياتي
بيربل ويفز
وعليكم السلام ورحمة الله وبركاته
كل سنة وإنتي طيبة ورمضان مبارك
أتمنى فعلا إن ربنا سبحانه وتعالى يعينا على الصيام عن الذنوب والمعاصي ولاسيما إننا مالناش حجة إننا نقول أصل الشيطان شاطر أهو متربط ومتسلسل أما نشوف
رمضان مبارك
إيوووحه :)
تحياتي
كل سنه وانت طيب
و ان شاء الله رمضان السنه دى نخرج حاجه تانيه منه
و يارب فعلا نقدر على انفسنا لان فى الشهر دا النفس هى اللى بتسوس مش الشيطان ):
تقبل الله منا ومنك صالح الاعمال ان شاء الله
تحياتى (:
كل سنه و انت طيب يا مصرى و رمضان كريم عليك و علينا
و رنا يتقبل صيامك و صيامنا
و شكرا على ردك عليا فى البوست اللى فات
و دمتـــــــــــــــــــــم
وكل سنه وانت طيب
بس لو ربنا خلقنا ملايكه مكناش هنغلط
ولو مغلطناش مكناش هنستغفر
والاستغفار يولد التوبه
والتوبه تاتى بالعتق
صدقنى احنا احسن من الملايكه لان الملايكه لا تخطئ ولا تستشعر توبه الله
نحن نخطئ وحين نتوب تشملنا رحمه ربنا ومغفرته
تحياتى
كل سنة و انت طيب و يا رب نكون من عتقاء النار جميعا فى هذا الشهر الكريم
و ربنا يعينا عن اننا نصوم عن الذنوب طول السنة مش شهر واحد
و يا سلام لو فعلا بطلنا نكرة و نحقد على بعض و الكل يحب الخير للناس الاى حواليا هتبقا الدنيا ليها شكل تانى
كل سنة وانت طيب
اه اه انا برنسيس صدق ههههههههه
بعد طول الغياب عادت برنسيس
هههههههه
يارب يتغفر لينا كلنا الشهر ده ونعمل خير كتير
وحالو يا حالو:))))
تحياتى
فعلا وجهه نظر ووجهه نظر محترمة كمان
اكيد هانفضل بشر وربنا خلقنا بشر وهو اعلم مننا بالطبيعة البشرية
تدوينة جميلة واحتفال مميز بشهر رمضان وليس على غرار بوست يحتوى على كلمتين هما رمضان كريم او كل عام وانتم بخير
تحياتى
اه نسيت اقولك انك تصميم البلوج هايل جدا
تحياتى كمان مرة
شيماء
كل سنه وإنتي طيبة
وربنا يسمع منك إننا نتغير ونخرج من رمضان حاجة تانية
وحتى لو كانت النفس هيه اللي بتوسوس المفروض إننا في رمضان بنقدر نتحكم فيها طول فترة الصيام يبقى معنى كده إننا ممكن نتحكم فيها بقية اليوم بعد الاستعانة بالله
شكرا على مرورك والتعليق
ساموراي
آميين
ربنا يتقبل منك الدعاء الجميل ده
ولا شكر على واجب
تحياتي
كناري
اتفق معاكي
الانسان لو أطاع الله وامتثل لاوامره اكيد هيكون افضل من الملايكة ولو كابر ومسمعش الكلام هيكون أضل من الحيوانات زي ما قال ربنا سبحانه وتعالى
شكرا على الزيارة والتعليق
تحياتي
نونا
آميين ربنا يتقبل دعائك
فعلا الدنيا هتبقى جميلة قوي لو مافهاش حقد ولا كره وفعلا هتبقى أجمل بكتير
شكرا على زيارتك والتعليق
تحياتي
برينسيس
فينك؟؟؟؟؟
(يا ريت متعمليش زي بعض ناس وتقولي إنك في مصر .. )
على العموم حمدا لله على السلامة وكل سنه وإنتي طيبة
تحياتي
غير معرف
كلامك زي الفل يا ريس اتفق معاك
كل سنه وانت طيب
تحياتي
أبو شاهين باشا
أشكرك على كلامك الجميل الخاص بالبوست والمدونة
واتمنى ان زيارتك متكونش الاخيرة
على فكرة مدونتكم جميلة انا زرتها وسيبتلكم تعليق
اتمنى دوام التواصل
تحياتي
إرسال تعليق
<< Home