يَوْمِيَات وَلَد مَصْري
السبت، يناير 31، 2009
جعلوني مدونا - البداية
نظرا لأني بعد شهر من الآن سوف أتم سنة تدوينية كاملة بإذن الله فقد قررت أن أكتب عن بداياتي في عالم التدوين حيث أنه جزء لا يتجزأ من حياتي اليومية وأزعم أنها تجربة حياة أرجو أن يستفيد منها كل من يقرأها.
أول مرة أدخل مدونة في حياتي كانت مدونة الحاجة جنة (بمناسبة إنها أدت فريضة الحج السنة دي – ربنا يتقبل) واللي كان اسمها همسات مصرية وللأسف وأنا داخل نسيت أدخل برجلي اليمين وكمان مدخلتش برجلي الشمال وطبعا فيه واحد رزل هيسألني أمال دخلت إزاي هقوله دوست على اللينك بتاع المدونة يا ظريف. المهم إني لما دخلت لقيت مواضيع قيمة جدا كانت دكتورة جنة كتباها وده اللي شدني في موضوع التدوين، ليه بقى .. لأني افتكرت إن كل اللي بيدخلوا علشان يدونوا لازم يكونوا بيعرفوا يقرؤا ويكتبوا (إيه الكلام الغريب ده) لكن للأسف إني اكتشفت بعد كده إن موضوع القراءة والكتابة ده مش شرط أساسي لترشيحك إنك تبقى مدون والغريب في الموضوع إن الواحد كمان ممكن يبقى مدون من غير لا واسطة ولا يحزنون وكل اللي عليه انه يعمله إنه يدخل على المعلم جوجل ويعرف نفسه ويضرب له اسم وكلمة سر وبعدين يدخل على البلوجات عدل وفي تلت خطوات تبقى عملت المدونة بتاعتك وعيش يا ريس واكتب كل اللي نفسك فيه أو شخبط فيها براحتك واطمن خالص لانك هتلاقي فيه ناس جانتيه بيدخلوا عندك ويقولوا لك ياي ايه الإسلوب الرائع في الكتابة ده .. بجد مش ممكن .. إنت فظيع .. إنت بتجيب الكلام السكر ده منين يا مضروب .. وطبعا هتلاقي الباشا من دول انشكح وصدق نفسه وافتكر نفسه الباشا إنه يوسف السباعي بتاع عصره وأوانه وراح فقعنا بوست أنأح من اللي قبله ويحكي فيه بقى إزاي إنه لما صحي من النوم إمبارح اتشطف وغسل وشه بصابونة لوكس وحلق دقنه وعور نفسه وخر دم وطبعا إزاي كمان إنه مانساش يغسل سنانه علشان الحبكة الدرامية للبوست وبعد كده بعد ما لبس هدومة وهو نازل من بيتهم قوم يجيله تليفون مهم، من مين بقى؟ قال يقولك نبقى نكمل بقى في يوم جديد علشان نعرف أم التليفون اللي جاله وهو نازل ده جاله من مين بالظبط!!
طبعا الوصف اللي فوق ده انا بقصد بيه نفسي مش أي حد تاني لكن الحقيقة اللي انا عاوز اوضحها إن فيه ناس كتير للأسف بتعمل زي حالاتي كده غاويين يكتبه أي كلام فارغ وحكايات خايبة لا بتودي ولا بتجيب وقال ايه يحطوا على باب المدونة وانت داخل بالفونت العريض "هذه هي تجربتي مع الحياة" غور ينعن ... وقال إيه أنا بحكي الكلام ده يا جماعة علشان الناس تقدر تستفيد من تجربتي واللي مش هيستفيد منها فكفاية انه ضحك من قلبه علشان الضحك بقى عملة نادرة!!
استغفر الله العظيم يا رب
على العموم إن شاء الله في البوست اللي جاي هبقى أحكي لكم بقى بعد ما دخلت عند دكتورة جنة يا ترى يا هل ترى إيه اللي حصل؟ (علشان تعرفوا بس إني كلامي اللي فوق كان كله صح).
أشوفكم المرة الجاية على خير بإذن الله
التسميات: يوميات
18 Comments:
فيك حاله غريبه
تاني بوست داخل فيه اقراء شخص ثاني غير اللي انا متابعه؟؟؟؟
علي الرغم من صدق ما تكتب في حالات مثيرة و لكن هناك من ياخذ الموضوع بجدو يكتب للعامه و هناك حواديت مقصودبيها شلة النادي او الجامعه تخص الخاصه فقط
و كلاهما لا يضر لانك حر تكتب اللي انت عايزة و تقرا اللي انت بتحبه
وعلي الرغم من انك ضربت مثل و نسبته لنفسك و لكني احب اصحح لك معلومه علشان ما تصدقش نفسك
حقيقي علي الرغم من اسلوبك الساخر و حواديتك الممتعه لكنها اعمق مما تبدو فهي تجربة حياه و خبرات سنين
رفقا بنفسك فلعلمك انت سبب دخولي عالم التدوين لانك دليت بوبوس اللي بدوره دخلني المغارة و هو بطل من اول بوست وكأن مهمته انتهت بمجرد انه زقني و خلع
و زي ما انت شايف عمال اكتب و متقمص دور رامي و باحب في ام كلثوم وهي مدياني الطرشه
روق يا استاذي
و قولنا حكاية البلبل ياعم حزومبل
تحياتي
ايه النيلة اللي انت كاتبها ده !!
هااااااااااه
شكلي هعمل هاكر عليك واقفلك المدونه
بص يا عم يوسف يا سباعي
مش هقولك ياااااي كلامك سكر
ويااااي كلامك عسل
كده هنلزق مينفعش
المهم
المهم
المهم
عايزة اقولك ان كلامك فعلا بيفكرني بكلام اخويا نفس الاسلوب اللي يلطش ده قصدي الاسلوب الجميل ده
هههههههههههه
لا بجد نفس الاسلوب مع انه مش مدون
سبحانك يارب :d
كمل بقى القصه بتاعت التدوين يا مدوناتي عشان نكمل وصله الضحك
تحياتي ليك يا مضروب يووووه قصدي
يا باش مهندس يا متغرب ياللي شويتين واقول لبباك تعالا شوف ابنك بيعمل ايه من وراك :d
تحياتي ليك بجد
يلا روح خلاص اوف زهقت
سلام
مش مهم ايه بنكتب المهم نعبر:)))
محدش غصب حد انه يقرا الكلام اللى مكتوب
ولا الخنقة هتكون كمان فى التدوين:))
وانت مش يوسف السباعى صحيح بس
انت ولد مصرى
وده كفاية(كلام جامد اهو)ههههههههه
تحياتى
دكتور أحوال
انت لسه شفت حاجة انا هوريك اللي عمرك ما شفته (حاجة كده زي قناة نتانة)
طبعا معاك حق مش كل الناس كده وفيه ناس كتير محترمة وبتكتب كلام موزون يعدل الدماغ لكن ساعات بحس إن اللي بكتبه مالوش اي فايدة والشيطان كمان بيظبطني بإن كل اللي بيعلقوا عندي بيجوا يقولوا كلمتين بس علشان ماخدهمش غياب :))
يمكن علشان داخل على سنة تدوين وكنت حابب أقيم الفترة اللي فاتت فقلت اوضح الجانب السئ في موضوع التدوين من وجهة نظري المتواضعة
طبعا باشكرك على كلامك الجميل وعلى إطراءك على الاسلوب واتمنى فعلا إنه يكون كذلك
اما انت يا دكتور فطبعا انا مش محتاج اقولك إن كلماتك رائعة بمعنى الكلمة واكيد انك خارج دائرة الشبهات التي اتحدث عنها في هذا البوست
تحياتي
مرمر
وعليكم السلام ورحمة الله وبركاته
طيب وليه بس كده ما الطيب احسن
هاكنج وقفل للمدونة وبلطجة دي ايه الناس اللي داخلة تتخانق دي
وكمان كلام نيلة وكلام يلطش يا سلام آدي التعليقات ولا بلاش فعلا تعليقات كلها موضوعية وبتناقش الموضوع بدون تحيز او اسفاف :))
بتقولي أخوكي نفس الاسلوب ونفس الطريقة بس مش مدون طيب ما جايز بيدون من وراكي واطلع انا أخوكي في نهاية الفيلم الهندي ده وانتي بقى تعيطي وتقولي ناهيي ناهيي
وبعدين يا ريت حضرتك مدخليش الوالد في المشاكل التدوينية دي حاكم انا بدون من وراه (بادخل الحمام وأدون)
حضرتك زهقتي من كتابة التعليق بصراحة ليكي حق لأن انا كمان زهقت من الرد :))
(طبعا بهزر)
تحياتي وشكرا على الزيارة
برينسيس
بصراحة بعد الكلمتين الحلوين بتوعك بفكر أقفل التعليقات في المدونة كلها علشان يبقى اخر تعليق شفته في حياتي
(وش بيختشي زي البنت البكر)
محدش عارف المستقبل مخبي ايه للبني آدم :))
بس بصراحة فعلا المهم اننا نعبر واللي مش عاجبه الكلام ممكن يشوف مدونة تانية تتماشى مع افكاره ومستواه الادبي
فعلا مش طالبة خنقة في التدوين كمان:)
خالص تحياتي
ههههههههههههههههههههههههههههههههه
ماشي يا مطوع
:)
باشمهندس
وحشني كتير
بقالك كتير ماجتش تزورني
عاوزين بس نطمن عليك
تحياتي
وبعدين بقى
ماينفعش كده على فكرة
اولا انا مش بحب انا التعليقة دى
البوست الجاى هنعرف و البوست اللى بعده هنعرف
ايه ده هو علشان يعنى انت عامل مدونة تقوم تدوخ الناس اللى بتدخل عندك
*****
التدوين زى ماهو مجتمع للنقاش و تبادل افكار
الا انه بردو فى نفس ذات الوقت المدونة زى بالظبط دفترك الخاص اللى ممكن تدون فيه يومياتك او اى حدث فى حياتك
يعنى مش شرط كله مواضيع هادفه و نقاش و الذى منه
و كمان مين قال ان كل اللى بيعلق بيقول كلام صح و سكر و عسل
ما فى ناس بتدخل تعترض بردو فى البوستات
و كمان على فكرة بقى البوست اللى فات و البوست ده
بيزيد عندى حالة الزهق .. مش علشان البوست ملل لا سمح الله D:
لا بجد لان فعلا حاسه ان التدوين حصل له حاجة غريبة
و لا انت ايه رأيك ؟؟؟
في الاول انا كنت كاتبه تعليق هنا وشكله مش اتضاف
التدوين في البدايه انا بعتبره صالون ادبي
كل واحد بيقول رايه
عارف انت ممكن تلاقي حد كاتب انا مخنوق هو فضفض مع مدونته هو اه مش في حد استفاد بس عارف ممكن يلاقي اللي يقوله قرب من ربنا ويكون بدايه الطريق لانه يكون سعيد وممكن حد تاني يقرا كلمه مخنوق ويقول اهو في حد غيري مخنوق ويقول يارب فرج همي
ممكن تلاقي حد كاتب هزار وضحك زي حلاتي كدا
بس حد يقرا يخرج من المود الحزين اللي كان فيه
هتلاقي تدوينات قيمه فيها داتا كويسه وتدوينات شخصية
المهم اننا بنستفاد من تجارب الاخرين
اقولك مثلا لو بابا بيحكيلي عن موقف حصله وهو صغير انا الموقف دا مش بيقوله لله والوطن بيقوله عشان يوصلي حاجه وبذكائي الخارق المفروض استشفها زي ما نستشف اللحمه اللي مش بحبها كدا
وبعدين بقي هو كل بوست تنزله تعلقنا مزيكاتي بتعلقنا وحتي التدويييييييييييين
طب زحلانه منك هه بس
السلام عليكم ...
الحمدلله أن المدونه مش محتاجه لواسطه...
..
في إنتظار وإبتدا المشوار...
....
دمت بخير
السلام عليكم
اولا بأعتذر لتأخيرى لأنى كنت فى شبه اجازه و رجعت لقيتك نازل ضرب فى المدونين .. و مشلفط التدوين و الحقيقه انا مش فاهمه سر الاكتئاب و حالة الزهق التدوينى المنتشره و المعديه جدا اليومين دول .. ربنا يستر لحسن بجد كده حنقفل كلنا و نسيب الناس اللى انت وصفتهم فى البوست بتوع صحيت الصبح و غسلت وشى و جانى تليفون و الكلام ده و لو انى شايفه انه ممكن يكون كلامهم بالنسبه لنا تافهه لكن بالنسبه لهم حاجه مهمه جدا و وسيله يعبروا بها عن نفسهم بحريه حتى لو كانت بتفاهه ممكن تكون نوع من العلاج لوحدتهم مثلا وطبعا ده مش معناه ان كل المدونات بالمستوى ده و لا ايه ؟
فى انتظار حكايتك مع التدوين
تحياتى
ضد التيار (كل مرة بكتب اسمك بتلفت حوليا - اسم يودي في داهية)
هوه ايه اللي ماينفعش - طب ماهو نفع اهه
حضرتك مادام قررتي انك تدخلي عندي بمحض إرادتك وبدون أي ضغط أو زق يبقى تستحملي بقى :)
أيوة مدونتي وانا حر فيها أفردها وأتنيها - أكرمشها وأكويها - أقطعها وأرفيها واللي مش عاوز يلعب معايا يتفضل ياخد صندله ويروح
*****
"المدونة زي يومياتك الخاصة" كلام جميل بس ذنبهم ايه بقى الغلابة اللي ياعيني بيبقى نفسهم يقرؤا حاجة مفيدة ويدخلوا يتكعبلوا في الكلام العجيب المكتوب
بالنسبة للتعليق فمعظم الناس بيقولوا ايه الحلاوة دي .. يخرب عقلك يا مجرم .. كلامك رائع .. إسلوبك مالوش حل .. وهاتك يا جمايل الواحد مش قدها (على فكرة جمايل مش جمع جمل وهذا للعلم)
التدوين ماحصلش فيه حاجة غريبة ولا حاجة كل حاجة زي الفل بس المشكلة في المدونين بقوا من عينة "أنا كنت بحب المانجة ودلوقتي بحب المشمش"
تحياتي
كيارا
قصدك ايه بإنك كنتي كاتبة تعليق وبعدين مش اضاف إن التعليقات بتتألب من عندي من المدونة؟ ولاد الحرام ماسبوش لولاد الحلال تعليق
التعليق صالون أدبي - حلوة الجملة دي بس يا ترى ستيل ولا مودرن
كلامك جميل وفعلا الواحد لما بيفضفض بيلاقي اللي يقف جنبه واكيد ساعات الواحد بيحب إنه يقرأ كلام ظريف علشان يخرجه من المود اللي هو فيه
بالنسبة للباباكي طيب ماقلكيش حاجة على موضوع تلميه الأكر ولا قال وانتي عملتي نفسك مش فاهمة :))
بالنسبة لكتابة المواضيع فزي ما تقولي كده كل ما بفتكر حاجة باكتبها ومش شرط البوستات يكونوا ورا بعض ان شاء الله هكمل موضوع المزيكا بس بعد ما احتفل بعيد ميلاد المدونة الأول اللي بيجي مع عيد الأم علشان محدش ينسى
كل سنه وهي طيبة
تحياتي
نهار
وعليكم السلام ورحمة الله وبركاته
فعلا الحمد لله ان التدوين مش بالوسايط كنت هتلاقي كل المدونين من الحزب الوطني
ربنا يسهل والمشوا يبتدي
تحياتي
روفي
وعليكم السلام ورحمة الله وبركاته
حمدا لله على السلامة
أصلي واخد حباية شجاعة على غيار الريق
الحمد لله ماعنديش اكتئاب بالعكس بس ضربت في نفوخي اكتب عن التدوين من وجهة نظر مختلفة
أكيد متفق معاكي غن كل واحد بيبقى شايف انه بيكتب حاجة ظريفة واكيد مش قاصده انه يكتب حاجة هايفه
وانا والله مش قصدي انتقد حد لكن ساعات بحس إن ده اللي انا بعمله :)
تحياتي
بالنسبة للباباكي طيب ماقلكيش حاجة على موضوع تلميه الأكر ولا قال وانتي عملتي نفسك مش فاهمة :))
********
تقصد ايه ؟؟؟
كيارا
أقصد موضوع تلميع الأوكر
أخباره إيه:))
تحياتي
إرسال تعليق
<< Home