يَوْمِيَات وَلَد مَصْري

الجمعة، يوليو 24، 2009

عودة للتدوين


بعد اهلا وسهلا وسلامات وطيبون والعواف ونهاركم سعيد وبون وي وبون جور وجودن مورجن وجودن ناخت .. ببعت أحلى سلام وأحلى تحية .. تحية كبيرة قوي وتحية عظيمة وتحية كاريوكا لكل نفر سأل علينا في غيبتنا وكل نفر ساب تعليق في مدونتنا وبنقول للجميع ألف ألف شكر وربنا يديم المعروف .. مع تحيات فراشة ولد مصري.
بادئ ذي بدء (الكلمتين دول دايما بيجوا في امتحان الإملاء للصف السادس الإبتدائي علشان فيهم همزات كتير والعيال الغلابة طبعا مابيعرفوش يكتبوهم وبيسقطوا .. وهي العيال دلوقتي فاضية للهمزة اللي على النبرة والهمزة اللي على السطر، دول يا دوب بيعرفوا يشتهجوا اسمهم بالعافية) .. المهم وأنا قاعد كده في قاعدة صفا (أو إنتباه مش فاكر بالظبط) قلت في عقل بالي (ايه عقل بالي دي .. مش مهم) انت يا واد يا مصري نقصك حاجة مهمة جدا .. حاسس كده ان فيه حاجة نقصاني .. قلت يمكن جعان .. فتحت التلاجة وتنحت قدامها يجي خمس دقايق وبعدين قلت "لع" ديه مش جوع يا واد يا مصري .. قلت يمكن "عشطان" ونفسي في "كان ببث" وبرضه قلت لأ مش هوه ده .. قلت جايز الشعور الغريب ده اللي أنا أول مرة أحس بيه سببه إن ربنا مد في عمري وعشت لما شفت الأهلي بقى يتغلب .. وبعدين قلت برضه لأ ... فيه حاجة تانية .. أيوة أيوة .. ابتديت أعرف انا عاوز ايه بالظبط .. انا عاوز الحاجة اللي قعدت سنه كاملة من حياتي بعملها وبعدين بطلتها في ظروف غامضه (غير اني كنت بلعب في مناخيري وأنا صغير) الحاجة دي هي التدوين .. حاسس إن نفسي غمه عليا وعاوز أطرش كلمتين أنزلهم في بوست جديد .. ياااااااااااه من زمان قوي ماكتبتش .. ده أنا حتى مش عارف هكتب أقول إيه .. ولا هبتدي إزاي .. بس مش مهم .. أنا عارف إن المدونين دول ناس طيبين وبيستحملوا أي حد وأي كلام بيتكتب لأنهم عارفين إن أي حد بيدون فهو بيدون لنفسه وبيفضفض معاهم والغريب كمان إنهم بيشجعوه إنه يكتب ويفضفض كمان وكمان.
دخلت على الورد (طبعا قصدي مايكرو سوفت وورد مش الورد اللي بنشمه .. بلاش نصاحة .. ايه فاكرني بكتب على ورق باردي) وابتديت أكتب .. كتبت كل اللي انا بعمله وكل اللي أنا حاسس بيه من غير رتوش أو أدوات تجميل .. محاولتش أحط النقط فوق الحروف .. محاولتش أزين الكلام .. كنت بكتب لنفسي .. زي ما كنت متعود قبل كده .. وفعلا حسيت بسعادة وحسيت براحة .. لأني رجعت تاني لبيتي القديم.
البوست ده ممكن تعتبروه بوست تسخين أو احماء وان شاء الله البقية تأتي بس قبل ما أنهي البوست الغريب ده .. وبمناسبة إنتهاء الدراسة ، افتكرت في أيام المدرسة وأنا في إعدادي كنت في مدرسة طبري روكسي وكان فيه شعار للمدرسة لازم كنا نقوله كل يوم الصبح في طابور الصباح ، الشعار ده كان بيقول ايه:
بم شيكا بم .. بم شيكا بم
هفسا هفسا هيه
ط ب ب ر ي – ط ب ب ر ي
احنا الطبري بمب حديد بمب حديد يا هيه

الحمد لله الذي عافانا مما ابتلى به كثيرا من الناس وفضلنا على كثيرا ممن خلق تفضيلا
أشوفكم في بوست جديد بإذن الله
posted by ولد مصري at 00:29 29 comments